Ero yinhîrî takî tî ewto potaka cekn̂e Boas. Iina tî n̂eremekn̂e. Iito exitaw tî waixapu pen yananînho mokyakn̂e, Boas n̂ekatîmyakn̂e Huce ya, noro rma. Noro yeen̂ataw nan̂ikyakn̂e takî tî Boas. Ai, oyakno, oona cma re mîmokyasî eremaxi kapu, kekn̂e tî Boas yîwya. Ero ke takî tî yîhyaka cekn̂e eremaxi.

2 Ero yinhîrî takî tî ewto pono komo marha nan̂ikyakn̂e Boas, antomano rin̂e komo, 10. Oona cma re ka meremexe, kekn̂e tî yîwya so. Ero ke iina marha takî tî n̂examro n̂eremetken̂e.

3 On wara takî tî kekn̂e Boas waixapu pen yananînho ya, On wara wîîkes awya, kokon̂oro tak mokyakn̂e hara Noemi Moabe rowon poi. Kaknonhîrî pen mararîntho tî nîmya noro epethîrî pona, Erimereke pen mararîntho ha.

4 Ero yekatîm xe weexi awya tantono komo n̂entarî me, tan naxe ceremaxi n̂examro n̂entarî me ha. Antomano rin̂e komo n̂entarî me rma ekatîm xe weexi awya. Ero ke noro pen mararîntho yahsî xe awexitaw ahsîko rma epethîrî pona. Ahsî xera awexitaw ekatîmko owya ponaro tak oyehtome ow hara. Amoro xa masî ahsîn̂e me. Ahsîra awexitaw ow xa wahsîyasî awemtaka, kekn̂e tî Boas. Ai ha, taa, ow rma wahsîya ham, kekn̂e takî tî waixa pen yantonînho.

5 Nîmtapowakn̂e xa hara tko Boas. On wara kekn̂e hara, On wara marha wîîkes awya, noro pen mararîntho mahsîya ham Noemi nîmrî. Ero yahsîyataw ero kaamo po rma Huce meero mahsîyasî apici me, Moabita wosîn ha. Ero wa tahsîpore nasî waixapu pen cinho noro pen yepamnotome tak awya. Ero yinhîrî on wara kexe amn̂e kpoyino komo, Mîkro waixapu pen yepamtho. Mînto marha nai waixapu pen mararîntho, kexe amn̂e noro pen yehtoponho ponaro rma ehtome so, kekn̂e tî Boas.

6 On wara tko tî n̂eyukyakn̂e waixapu pen yananînho, Apohana. Ahsîra thakwa wasî. Yîrowonthîrî yahsîyataw owya camkî tak na nat amn̂e okwe omxîkîtho komo owaipuche. Onoke xa nahsîya apapa pen mararîntho ha, kexe thakwa okwe. Ero ke amoro rma ahsîko oyakno. Ahsîra thakwa was owî reha, kekn̂e tî. Ero wa tî kekn̂e waixapu pen yepamnon̂e Boas ya.

7 Taa, on wara tî xatken̂e Ixaw Yana komo pahxa, takîhso mak waihxapu pen rowontho yahsî xe xatken̂e, takîhso marha warawanta xe xatken̂e ahce na poko. Ero ke ahce na tîmyataw n̂ehtakekn̂e takî tî tîmn̂e. Tîhtathîrî nîmyakn̂e ahsîn̂e ya cewn̂e mak. Yaaro xa tak yîhtînoko, awyanî ro me tak men wîîm ha, kacho mîn nîmyakn̂e ha. Ero wa tî xatken̂e.

8 Ero ke ero wara xa marha xatken̂e. Amoro rma yîrowonthîrî ahsîko, kekn̂e tî waihxapu pen yananînho Boas ya. Ero wa ketaw tîhtathîrî takî tî mohkekn̂e, Boas ya tî nîmyakn̂e.

9 Ero yinhîrî takî tî on wara kekn̂e Boas antomano rin̂e komo ya, iitono komo ya ahnoro, Oroto tak amna mtapotarî mentacow. Erimereke pen, Maron pen, Kir̂on pen, n̂examro pen rowontho tak wahsîyasî Noemi nîmrî ha.

10 Huce marha wahsîyasî, Maron pen cinho, Moabita wosîn ha. Noro wahsîyasî opici me. Waixapu pen yosotî yehcamnopu xera taxe tîyananînhîrî pen komo yetahcataw poyino komo ya. Ero ke yihcinhîrî wahsîyasî yîrowonthîrî yakro rma. Ero wa kacho yentan̂e me maxe oroto, kekn̂e tî.

11 Nhnk, ketken̂e takî tî antomano rin̂e komo, ahnoro iina eremaxapu komo marha tî ero wa ketken̂e. Amna n̂ence ham. Wooxamu rma maar̂a ham ahyaka apici me. Noro tak wakrepe Kporin komo yîmxîkrî komo ke. Hakew pen, Ria pen, n̂examro pen xatken̂e Ixaw pen yepamnon̂e me n̂examro pen wara rma Kporin komo n̂irpe noro hara, oroto mahsîyasî noro. Ahwokan me xa awexi xe nas amna Eprata pono komo wero ro. Cekaiporesom me marha awexi xe nasî amna Beren pono komo n̂entarî me.

12 Kir̂wan̂he marha exi xe nasî amna amxîkrî komo amn̂e Kporin komo nîmrî awya. Emasî me rma ka nasî noro apici. Ero ke tîmxîtaxmu me exi xe nas amna Kporin kom yanme. Pahxa tî Tama pen n̂ewruyakn̂e Xuta pen mumuru me ciki, Peres tî osotî. Noro yepamtho xatken̂e cekaiporesom me ero wa xa marha exi xe so nas amna awepamthîrî kom hara amn̂e, ketken̂e tî iitono komo.

13 Ero ke Huce takî tî nahsîyakn̂e Boas cipici me. Noro yenaka tî n̂etakriyakn̂e. Ero yinhîrî takî tî cetahsîsom me noro n̂iir̂akn̂e Kporin komo. N̂ewruyakn̂e takî tî kîîrî ciki.

14 Ero ke on wara tî ketken̂e iitono komo wooxam komo Noemi ya, Kir̂wan̂he Kaan nai ham okre. Waixapu pen yananînho n̂enpoi rma ham Kporin komo awya. Cekaiporesom me xa n̂expe aparî, Ixaw Yana komo ya cekaiporesom me ha.

15 Noro rma nai amn̂e awahworen̂e me. Yiixe awehtopo tîmn̂e me marha nai amn̂e nocwakomo me awexitaw tak. Ero wa nai awoxinî mrerî kaxi. Awakronoman̂e ro xa mîk awoxin. 7 amrerî komo exitaw ketaw ha re awakronomara rma n̂ehcerî ha re moso wara. Noro xîkrî me exirî ke ciki awakronomesî xa tak Kaan, ketken̂e tî.

16 Ero yinhîrî tparî yenîn̂e me takî tî xakn̂e Noemi. Cenaka tî nahsîyakn̂e, enîn̂e me roro tî xakn̂e.

17 On wara tî ketken̂e iitono komo wooxam kom ha, Tîmrekem wara rma nai ham Noemi, ketken̂e tî. Ero yimaw rikomo takî tî nosohcetken̂e Obece me. Ero yinhîrî takî tî noro mumuru xakn̂e hara Xese, Tapi yîîm ha. Noro yipu mîk xakn̂e Obece ciki.

18 Taa, on wara xatken̂e pahxa Perese pen yepamtho komo, noro mumuru tî xakn̂e Esîron,

19-22 Esîron mumuru xa hara tî xakn̂e Haw, Haw mumuru xa hara tî xakn̂e Aminatabe, Aminatabe mumuru xa hara tî xakn̂e Nahson, Nahson mumuru xa hara tî xakn̂e Sawmon, Sawmon mumuru xa hara tî xakn̂e Boas, Boas mumuru xa hara tî xakn̂e Obece, Obece mumuru xa hara tî xakn̂e Xese. Xese mumuru xa hara tî xakn̂e Tapi. Ero wa tî xatken̂e Perese pen yepamtho kom ha.