Ero yinhîrî takî tî Kporin komo yakro nîmtapowakn̂e xa hara Ana. On wara tî kekn̂e yîwya, Kahwowasî ro mak Kporin komo poko. Anarî komo yopono me n̂he tak oriye Noro. Ooxatî pîn komo yopo tak kîmtapowasî. Tawake ro mak wasî oyakronomarî ke awya.

2 Anarî exihra ro mak nasî kir̂wanî ro, Kporin komo warai. Anarî exihra ro mak nasî awarai. Toopu warai mak Mîk Kaan. Anarî exihra ro mak nasî toopu warai, ponaro kehtopo komo warai.

3 Ai, cehcoyoponkaxmu me yîmtapotara tak esko. Anarî komo yopono me awehtopo poko yîmtapotara ro mak tak esko. Kaan xa nasî kehtopo komo yenîn̂e me, Kporin kom ha. Kehtopo yukuknoman̂e ro Mîk ha.

4 Sowtatu komo krapan tak nasî cetaxikwoso. Ehrokaxapunhîrî komo reha tak naxe kar̂pe xa tak ha.

5 Maxmitaxapunhîrî komo tak n̂etapickexe tînahrî komo yepetho me tak. Rooma pokononho komo reha tak naxe yîromamra okre. Yîmxîtanînhîrî tak nasî tîmxîkye xa tak. 7 tak nasî yîmxîkrî komo. Yaakeno ke tîmxîkyemînhîrî reha tak nasî kar̂pera hara.

6 Kwaihkan̂e Mîk Kporin komo, kenpakan̂e marha Mîk ha. Roowo yatumnaka en̂epeno rin̂e marha Mîk ha. Iito ehxapunhîrî komo reha tak nanîmyas hara.

7 Yupurantankano rîn̂e marha Mîk Kporin komo, yupurantanmano rin̂e marha. Anarî komo xawyakan me ciino rin̂e marha Mîk ha, anarî komo yopono me ciino rin̂e marha.

8 Yupurantamnî komo yanîmn̂e marha Mîk ha roowo pupun chewnonhîrî. Emyawnomnî yanîmn̂e marha Mîk wemronho yar̂macho po ehxapunhîrî. Noro yipu komo n̂eremanmekyasî antomano rin̂e komo yakro. Kayaritomo yapon pona xa n̂eremanmekyasî. Roowo yecetî ciin̂e marha Mîk Kporin komo. Ero mko pona tî roowo nakîhcekn̂e.

9 Tînakir̂wamathîrî komo tarî n̂ecehcesî Noro epîrkara ehtome so. Kicicitho komo takî reha n̂iir̂asî yîmtapotan me, awarpanawno me mak okwe. Kar̂pe kehtopo yanme mak iyoponkano cirihra ro mak wa tasî.

10 Tîîxatî pîn komo nakuhr̂apesî ro makî Kporin Komo. Tarai wara ro mak nîmtapowasî Noro kah yaw, n̂examro yar̂macho poko nîmtapowasi. Miyan komo rma n̂en̂ekesî roowo mapitawno komo meero marha. Kayaritomo me tîn̂irithîrî reha karihcesî. Kayaritomo me tînîhkapethîrî n̂iir̂asî anarî komo yopono me, kekn̂e tî. Ero wa tî kekn̂e Ana Kporin komo ya.

11 Ero yinhîrî takî tî n̂etîramekn̂e hara Ewkana Hama pona, tîmîn yaka hara. Siro po rma takî tî xakn̂e rikomo, Eri yaw tak xakn̂e, Kporin komo yaka cewomsom yaw. Kporin komo yanton me tî xakn̂e iito.

12 Taa, on wara tî xatken̂e Eri mumuru komo ero yimaw, kicicitho me ro makî tî xatken̂e kica. Kporin komo ponarora ro makî tî xatken̂e okwe.

13 On wara tî xatken̂e tîmsom pokono komo ero yimaw, Kaan mîn yaka mokyatken̂e Ixaw Yana komo tooku komo tîmso Kaan ya. Siro pona mokyatken̂e. Tookuthîrî pun tî nîyetken̂e. Tîyetaw rma mokyakn̂e Kporin komo mîn yenîn̂e yanton. Parata warai ke cemyarke tî mokyakn̂e.

14 Ero yipu ke takî tî wooto paraxkekn̂e tahrem yawno rma, ahce na warai yawno. Parata warai poko etahsîxapu tî nanîmyakn̂e. Ero wicakî tî naar̂akn̂e Kporin komo mîn yenîn̂e yotî. Ero wa tî xatken̂e n̂examro Ixaw Yana komo nîmrî poko, Siro pona mohxapu komo nîmrî poko.

15 On wara marha tî xatken̂e n̂examro kica, tîmsom pokono yanton cekn̂e tooku tîmn̂e yaka yînmîrî katîtho yakn̂ipîra rma ka exitaw. On wara tî kekn̂e tookuthîrî tîmn̂e ya, tîmsom pokono yotî ka tîmko yunpururu. Tîyoxapu yahsîra ro mak nasî, tîyohnî xe makî tî nai, ketken̂e tî, tîmsom pokono komo yanme rma kica.

16 On wara tko tî ketken̂e tîmn̂e komo tîmsom pokono yanton ya, Katîthîrî ka takn̂ipore nasî. Ero yinhîr̂î tak mahsîyasî awotî komo awanme ro, ketken̂e tî. Ero wa ketaw on wara tî n̂eyukyakn̂e tîmsom pokono yanton, Pîra, oroto rma tîmko iyotî. Tîmîhra awexitaw oroto rma kemyarkesî kr̂a ha men, ketken̂e tî kica.

17 Kicicme ro makî tî xakn̂e Kporin komo ya ero wa n̂examro yehtopo, Eri mumuru komo yehtopo. Kporin komo ya tîmsom yîwîrîyakan̂e me mak takî tî xatken̂e okwe poyino komo. Ero wa tî xatken̂e okwe.

18 Ero yimaw iito rma tî xakn̂e Samuew ciki. Kporin komo mîn yaw. Ero yenîn̂e komo yanton me tî xakn̂e. Eepoci yaw ciki tî xakn̂e poono yaw.

19 On wara tî xakn̂e yîson, tîmrerî ponon ciki tî natpekn̂e ahnorono. Ero takî tî naar̂akn̂e roro tîmrerî yaka. Yicimn̂ipuntaxera tîmsom yakn̂iposo tî cekn̂e roro iin̂o Kaan mîn yaka. Ero ke ciin̂o yakro tî cekn̂e roro yîson tîmrerî ponon yaaso.

20 Kporin komo mîn yaw exitaw so tak Ewkana yakronomacho poko tî nîmtapowakn̂e Eri, yipici yakronomacho poko marha. On wara tî kekn̂e, Ai oyakno, amxîkrî komo xa hara tîmn̂e me exi xe wasî Kporin komo, moso xîkrî xa hara, apici xîkrî ha. Yîmrerî cik nîmye Noro ya. Ero ke yîmrerî komo ke awakre xe xa hara wasî, kekn̂e tî. Ero wa kacho yentache roro cetken̂e hara tî Ewkana komo tîmîn komo yaka.

21 Ero yinhîrî tak Ana wakrekn̂e xa hara Kporin komo. N̂etahsîyakn̂e xa hara tî, n̂ewruyakn̂e marha yaake ro. 3 ro tî n̂ewruyakn̂e yîmrerî komo ciki. Asakî ro tî n̂ewruyakn̂e emsîrî komo cik hara. Iito rma tî xakn̂e Samuew Kporin komo mîn yaw. Iito por̂mamyakn̂e. Ero wa tî xakn̂e.

22 Taa, poritomotho me takî tî xakn̂e Eri. Ero yimaw tumumuru komo yehtopo takî tî n̂encekn̂e. Kporin komo ya takn̂isom tîmtopo tî poxunkapetken̂e kica Ixaw Yana komo ya. Wooxam komo poko marha tî xatken̂e kica. Kporin komo mîn potaka tî mokyatken̂e wooxam komo tîmsom pokono komo yanton kom ha, noro yipu komo yenaka tî cetken̂e kica. Ero wa ehtopo komo tî n̂encekn̂e yîîm kom okwe.

23 Ero ke tî on wara kekn̂e yîwya so, Ai okopuci komo, kicicme awehtopo komo wencesî kica. Miyan komo rma n̂ekatîmyaxe owya. Ahce kacho ero wa matu kica? kekn̂e tî yîwya so.

24 Kir̂wan̂he exihra tî matu okwe okopuci komo. Kir̂wan̂he awehtopo komo pînî ro mak mîn wences okwe. Kporin komo yanan komo tî natu kicicme awanme so rma okwe.

25 Anarimaw kicicme kexitaw kpoyino poko Kaanî rma nasî kn̂emetanmekîthîrî yîrwoxinkan̂e me. Kporin komo wece xa kicicme kexitaw onoke thakwa re nai Noro yîrwoxinkan̂e me hara okwe? kekn̂e tî yîwya so. Ero wa tî kekn̂e yîîm yîwya so. Tîîmî mtapotachonho ponarora rma tko tî xatken̂e yumumuru komo, tîtwermacho komo ponarora. Ero wa tî xatken̂e Kporin komo yanme rma. N̂examro penî tî waihka xe so tî xakn̂e. Ero ke ero wa tî xatken̂e.

26 Taa, iito rma tî xakn̂e Samuew mren, por̂mamyakn̂e rma. Kîr̂wan̂he ti xakn̂e Kporin komo ya, kir̂wan̂he marha tî n̂ehtîkekn̂e tooto komo ya marha. Ero wa tî xakn̂e noro.

27 Ero yimaw tak Kaan yakrono ro tî mokyakn̂e Eri yaka. On wara tî kekn̂e yîwya, Ai apa, on wara tî nîîke Kporin komo awya, Pahxa aporin pen komo xatken̂e Exitu po Paraw yaw thakwa okwe. Ero yimaw kir̂wantawno wara kesenpekn̂e yîwya so.

28 Aporin pen men̂ekekn̂e Ow ohyaka cewomsom me. Anarî komo Ixaw Yana komo men̂ekara wîxakn̂e tribu komo poyino. Owya tîmsom yakn̂itopo pokono me marha noro pen men̂ekekn̂e, Ixaw Yana komo n̂ekîtho yakn̂in̂e me ha. Kotoporem yakn̂in̂e me marha noro wîîr̂akn̂e, eepoci yawno me marha. Ero pokono me noro pen wîîr̂akn̂e. Aporin pen yanan komo ya marha wîmyakn̂e Ixaw Yana komo yokutho pun iyotî komo me, Ixaw Yana komo nakn̂irî raconho ha. Ero wa owya men̂ekachonho rma wa mencesî.

29 Ero ke ahce kacho owya tîmsom mîwîrîyaket hara, omtapotachonho yanme rma tîmsom ha, Omîn potaw tîmcoko, kachonho ha? Metpurukrexe mak kica. Tpoxwem xa mahsîyaxe Ixaw Yana komo nîmrî raconho awotî komo me kica. Ero wa masî amumuru komo ponarono me xa awexirî ke. Oponarono pîn wara n̂he mak mas okwe.

30 Ero ke on wara takî tî nîîke awya Kporin komo, ponaro Ixaw Yana komo yehtopo, Pahxa on wara cma re wîîkekn̂e apoko, ayanan komo poko marha, aporin pen komo poko marha, N̂examro naxe omîn yenîn̂e me eroromero, wîîkekn̂e. On wara tko wîîkes oroto, Pîra ro mak tak. Oponaro cehsom komo ponaro xa matko wasî. Owîrîyakan̂e komo ponarora reha wasî.

31 On wara tak wasî amn̂e apoko, akar̂kan̂e me tak wasî, aporin pen komo yanan kar̂kan̂e me marha. Ero yimaw tak poritomo exihra ro mak tak nasî ayanan komo chew.

32 Ixaw Yana komo wakronomesî rma re amn̂e. Wara rma aaxatî pîn komo tak meen̂as amn̂e omîn yaw okwe. Ayanan komo marha poritomontara ro mak tak naxe, pîra ro mak okwe.

33 Anarî pen komo waihkesî ayananînhîrî pen komo. Anarînhîrî komo reha waihkara wasî, owya tîmsom pokono me matu. Waipîn komo tko naxe aspen̂e me mak okwe. Mesewkesî ro mak wa ha okwe awratarî ke n̂examro yanme. Aropotarî n̂erepexe ro mak okwe. Poritomo me exihra ro mak naxe awepamthîrî komo amn̂e, miya roro exihra ro mak naxe okwe.

34 On wara men naxe amumuru komo amn̂e, Ohn̂i, Pin̂eias komo, asakno roro rma waihyaxe ero re kaamo po rma. Ero wa waihtopo komo tak mîhtînoyasî omtapotarî kuknon me. Kaanî mtapotarî xa mîn wentai ham, mîîkesî ero wa waihîrî ke so amn̂e.

35 Ero yinhîrî tak anarî wiirasî ohyaka cewomsom me, yiixe oyehtopo yaw rorono tak ha, oyesehtînotopo yaw roro ciin̂e ro ha. Noro tak wiir̂asî ohyaka cewomsom me towîhnî me ro. Kayaritomo me onîhkapotho yakronoman̂e me roro tak nasî miya roro.

36 Ero yimaw on wara tak naxe awepamthîrî komo yakwenho, ohyaka cemwomsom me ciixapu yaka mokyaxe tupurantan komo yaponso ciki, tuuru yaponso cik marha. Noro mamaka tak nutupenwaxe. On wara kexe yîwya, Owî cma re mîîr̂asî tîmsom pokono komo yanton me ciki. Ero poko oyexi xe thakwa wasî oyuru yahsîtome, kexe yîwya. Ero wa kexe amn̂e, kesî Kporin komo awya, kekn̂e tî. Ero wa tî kekn̂e Kaan yakrono ro Eri ya.