Taa, iito rma tî xakn̂e Samuew mren. Kporin komo yanme tî n̂etapickekn̂e ciki. Eri yanton me tî xakn̂e. Ero yimaw on wara tî xatken̂e Ixaw Yana komo, Kporin komo mtapotarî tî entara xatken̂e okwe. Amn̂e xa so makî tî n̂encetken̂e anarî komo mak asak mak okwe.

2 Taa, on wara takî tî xakn̂e Eri, tîwîntopo ro yaw takî tî n̂etîrapekn̂e tîwîntome. Ewuhra tî n̂ehtîkekn̂e noro ero yimaw. Ahce na yenîhra ro makî tî xakn̂e okwe.

3 Ero yimaw eseikara rma tî ka xakn̂e weeyu Kporin komo mîn yawno, Kaan yamatan mîtwono tî mîn eseikara xakn̂e. Samuew tî iito xakn̂e cetîraposo.

4 Ero wa exitaw Samuew yakro takî tî nîmtapowakn̂e Kporin komo. Ai Samuew, kekn̂e tî. Ahce, tan was apa, kekn̂e tî Samuew.

5 Ero ke Eri yaka takî tî cekn̂e kar̂pe. Ai, tan was apa. Ow man̂ikî, kekn̂e tî. Pîra, awan̂ikîra weexi. Etakrita hara, kekn̂e tî Eri yîwya. Ero ke cekn̂e hara tî Samuew etakriso xa hara.

6 Ero yinhîrî tî kekn̂e xa hara Kporin komo yîwya. Ai Samuew, kekn̂e tî. Ero ke nîhcekn̂e xa hara tî noro ciki Eri yaka tîtotome xa hara. Ai, ahce, tan was Apa. Ow man̂ikî, kekn̂e tî yîwya. Pîra okopuci, awan̂ikîra weexi, kekn̂e tî yîwya. Etakrita xa hara, kekn̂e tî.

7 Kporin komo tî ka yîhtînopîra xakn̂e Samuew mren. Yîmtapotarî tî ka entara xakn̂e ero yimaw.

8 Ero yinhîrî tî kekn̂e xa hara Kporin komo yîwya 3-înhîrî me takî. Ai Samuew, kekn̂e tî. Ero ke nîhcekn̂e xa hara tî Samuew Eri yaka tîtotome xa hara. Ai, ahce apa, Ow man̂ikî xa, kekn̂e tî Eri ya. Ero yimaw takî tî on wara kekn̂e Eri. Kporin komo xa Mîk tîmtapota xe nai ham moso yakro ciki, kekn̂e tî.

9 Ero ke on wara takî tî kekn̂e Eri yîwya, Etoko xa hara okopuci etakariso. Amtapotaretaw xa hara on wara tak kasko yîwya, Ahce apa? kasko rma owya, amtapotarî wencesî, awanton ow ha, kasko yîwya, kekn̂e. Ero ke cekn̂e xa hara Samuew etakriso tîwîntopo ro yaka.

10 Ero yinhîrî mokyakn̂e xa hara tî Kporin komo. Samuew mîtkoso n̂ecececekn̂e. Yihcirî me kekn̂e ero wa xa marha tî kekn̂e xa hara. Ai Samuew, Samuew, kekn̂e tî. On wara takî tî n̂eyukyakn̂e Samuew, Ahce Apa, kasko rma owya, amtapotarî wences ow awanton ha, kekn̂e tî.

11 On wara tî kekn̂e Kporin komo Samuew ya, On wara wîîkes awya okopuci, Ixaw Yana komo wemetanmekyasî ro mak amn̂e okwe. Amn̂e emetanmetopo komo yentan̂e panarî nîyorwasî ececoka rma. Cerewre ro mak exirî ke emetanmetopo komo nîyorwasî.

12 Ero yimaw Eri pen wemetanmekyasî. Ayanan komo wemetanmekyasî xa amn̂e, wîîkekn̂e yîwya ero wa kachonho yaw roro tak noro pen wiitîkesî watohnî me ro mak.

13 On wara wîîkekn̂e yîwya, Awepamthîrî yemetanmekn̂e me was amn̂e miya roro yîtîhkan me ro mak, wîîkekn̂e. Kicicme ro mak n̂ecir̂atken̂e yumumuru komo. Kicicme ehtopo komo n̂entaye rma re yîîm. Panarera rma tko nas okwe.

14 Ero ke on wara wîîkekn̂e Eri ya epamthîrî komo poko, Tookuthîrî komo yakn̂iyataw amn̂e awepamthîrî komo ya kicicme cehtoponhîrî komo yeyamtopo me, etîrwoxinkara rma wasî n̂examro poko. Ahce na komo tîmyataw etîrwoxinkara ro mak wasî n̂examro poko, wîîkekn̂e yîwya, kekn̂e tî. Ero wa tî kekn̂e Kporin komo Samuew mren ya.

15 Ero yinhîrî takî tî n̂etakriyakn̂e xa hara Samuew. Iito rma tî xakn̂e cenmakaxi ro. Enmapuche takî tî Kporin komo mîn metatan nahrunkekn̂e. N̂eraswakn̂e takî tî, Eri ya tî ekatîm xera xakn̂e Kaanî mtapotarî.

16 Samuew tko tî nan̂ikyakn̂e Eri. On wara tî kekn̂e yîwya, Ai okopuci Samuew, kekn̂e tî. Ahce apa, ahce xe mai? kekn̂e tî.

17 On wara tî kekn̂e Eri yîwya, Ahce wa nîîka Kporin komo awya. Owya men ekatîmtîkakî. Ahce wa tî amna pen n̂iir̂a? Ekatîmtîkara awexitaw, tîmtapotachonho yaw roro rma awiri xe men wasî yîwya amoro pen hara, miya xe xa n̂he ha tko, kekn̂e tî.

18 Ero ke Kporin komo mtapotarî takî tî n̂ekatîmtîkekn̂e Samuew yîwya watohn̂î me ro mak. Ero ke on wara tî kekn̂e Eri, Ai ha. Taa, Kporin komo xa Mîk nîmtapota ham awakro. Tanme ro mak nîhtînope Noro oyanan komo ciitopo, kekn̂e tî. Ero wa tî kekn̂e Eri Samuew ya.

19 Ero yinhîrî por̂mamyakn̂e takî tî Samuew. Kporin komo tî xakn̂e akronoman̂e me okre. Yîmtapowataw yîmtapotarî ponaro xa tî xatken̂e entan̂e komo. Ero wa tî xatken̂e Kporin komo yanme rma.

20 Samuew ponaro tî xatken̂e Ixaw Yana komo ahnoro Taan pona rorono komo, Behseba pona rorono komo marha. Kweronoman̂e komo me ciixapu mîk ham, ketken̂e tî noro poko.

21 N̂esenpekn̂e roro tî Kporin komo Samuew ya Siro po. Tîmtapotarî ke tî n̂esehtînomexpekn̂e yîwya. Noro yakro tî nîmtapowakn̂e roro. Samuew mtapotarî tî n̂encetken̂e miyan komo rma Ixaw Yana komo. Ero wa tî n̂encetken̂e.