Ero yinhîrî Ixaw Yana komo takî tî cetken̂e Piristew komo yakro etar̂maxi. Ebenese pona tî cetarî komo n̂iir̂atken̂e Ixaw Yana komo. Apeke pona tî cetarî komo n̂iir̂atken̂e Piristew kom hara.

2 Ero yinhîrî takî tî yuu yuu ketken̂e Piristew komo. Ixaw Yana komo waparî me mokyatken̂e. Iyopono me tko tî xatken̂e karpe xa. 4.000 tî waihketken̂e okwe Ixaw Yana pen komo.

3 Cetarî komo yaka tmokuche so hara Ixaw Yana sowtatun komo on wara takî tî ketken̂e poritomo komo, Okwe, ahce wa kexirî komo poyero Piristew komo ya kar̂mapocow so Kporin komo okwe? Kporin komo yamatan xa tko cehcerî oona, Noro mtapotachonho yen. Siro poi cehcerî oona kakro so aatome tak ketar̂metaw pahxaxa. Ero tak na kiir̂atu so kîîxatî pîn komo yopono me, ketken̂e tî.

4 Ero ke kîrkomo n̂en̂epetken̂e Siro pona. N̂examro takî tî n̂ekyatken̂e Kporin komo yamatan, Kantoman̂e ro yamatan. Kerubin komo yotaw cekenke nasî, Noro yamatan n̂ekyatken̂e, yîmtapotachonhîrî yen ha. Eri mumuru komo marha tî mokyatken̂e Kaan yamatan yakro. Ohn̂i, Pen̂eias kom ha.

5 Taa, cetarî komo yaka n̂ekyatken̂e Kporin komo yamatan, yîmtapotachonhîrî yen ha. Ero yenîche takî tî n̂emtaraketken̂e Ixaw Yana sowtatun komo. Kar̂pe ro makî tî ketken̂e. Roowo pen tî nîrîrînakn̂e cemtarakarî komo ke.

6 Emtarakarî komo tko tî n̂encetken̂e Piristew komo. Ero ke on wara tî ketken̂e, Ahce kacho n̂emtaraketu kopi Ixaw Yana komo? ketken̂e tî. Kporin komo yamatan tî n̂ehcow cetarî komo yaka, kacho takî tî n̂encetken̂e.

7 Ero ke n̂eraswatken̂e takî tî Piristew komo. Kaan tak moko n̂examro yetarî yaka ham kopi. Okwe ro mak okwe. Kaan ke tîchewnoyem komo yakro etar̂mara ro makî ka tîxatken̂e kopi.

8 Ahce wa tak tatu kopi? Onoke thakwa re kiir̂atu so ponaro n̂examro yehtopo komo yopono me? Karitî xa Mîkyam kopi ponaro ehtopo ro komo. Exipsiu pen komo wîrîhman̂enho Mîkyam ha. N̂examro pen tî waihketken̂e mîn hakî ke axawa imo po exitaw so.

9 Kar̂pe tko cehcerî kîwyam Piristew kom ha. Kîrkomo me xa tak cehtîkacerî etîtîkaxapu me. Kar̂pera kexitaw so Ebrew komo yanton me tak men taxe kica, kanton me so ka naxe n̂examro ero wara tak men taxe amn̂e kîwyam hara n̂examro yanton me hara kica. Ero ke etîtîkaxapu me xa tak cehcerî, cetar̂macerî xa tak ha, ketken̂e tî. Ero wa tî ketken̂e Piristew komo.

10 Ero ke takî tî Ixaw Yana komo waparî me mokyatken̂e xa hara. Iyopono me xa hara ti xatken̂e okwe. Ixaw Yana pen komo tî n̂emahciyatken̂e tîmîn komo yaka. Mer̂pono pîn tî waihyatken̂e Ixaw Yana sowtatun pen komo 30.000 tî okwe.

11 Kaan yamatan marha tî nahsîyatken̂e Piristew komo. Eri mumutho pen komo marha tî waihketken̂e Ohn̂i pen, Peneias pen komo. Ero wa tî xatken̂e okwe.

12 Ero po rma takî tî anarî cekn̂e sowtatu me etar̂maxapunhîrî Siro pona. Benxamîn yepamtho tî mîk cekn̂e. Cetahyaxkaxi tî xakn̂e noro ponon. Roowo ken̂e marha tî xakn̂e yîhpoci.

13 Siro pona epataketaw tak Eri tî xakn̂e esama yakumyaw. Aapo po tî xakn̂e ceremaxi. Esama wece cewru tî xakn̂e. N̂eraswakn̂e tî Kaan yamatan yetwîrîmarî pona. Ewto pona cepatakache sowtatu Ixaw Yana pen komo waihkachonho takî tî n̂ekatîmyakn̂e iitono komo ya. Tpoyino pen komo yehtoponho yentache tak nîwracetken̂e ewto pono komo ahnoro. Kar̂pe tî nîwracetken̂e.

14 Yîwratarî komo takî tî n̂encekn̂e Eri. Ero ke on wara tî kekn̂e, Ahce kacho nîwracet hara kopi? kekn̂e tî. Ero ke yîhyaka takî tî cekn̂e sowtatu, mohxapu ha.

15 Poritomotho me xa tî xakn̂e Eri ero yimaw. 98 cimn̂ipu tî xakn̂e ewrutoponhîrî. Ewuhra tî xakn̂e okwe. Enîhra ro makî tî xakn̂e okwe.

16 On wara tî kekn̂e sowtatu yîwya, Oroto xa kmoko etar̂maxpunhîrî. Kemahciw ro mak en̂exa, kekn̂e tî. Ai ha okopuci. Ahce wa mehcow amyamro cetar̂maxmu komo? kekn̂e tî Eri yîwya.

17 On wara tî kekn̂e ekatîmn̂e, Piristew komo yai n̂emahcicow okwe Ixaw Yana pen komo. Mer̂pono pîn waihkacow okwe Ixaw Yana pen komo. Amumuthîrî komo marha waihcow okwe, Ohn̂i pen, Pen̂eias pen komo. Kaan yamatan marha nahsîcow okwe Piristew komo, kekn̂e tî. Ero wa tî kekn̂e sowtatu Eri ya.

18 Taa, Kaan yamatan yahsîtoponho yentarî ke takî tî n̂epîrkekn̂e Eri pen okwe. Tîmkai tî n̂epîrkekn̂e tapon poi, ewto wacan metatan mîtwono poi. N̂epîmîxwekn̂e xa tak okwe. Ero ke waihyakn̂e thakwa okwe. Ero wa tî waihyakn̂e poritomo me xa cexirî ke, tawsîn̂e cexirî ke marha. 40 cimn̂ipu tî xakn̂e noro pen Ixaw Yana komo panatanmekn̂e me. Ero wa tî xakn̂e noro pen okwe.

19 Ero yimaw rma Eri mumutho cinho tî xakn̂e tarke, Pen̂eias pen cinho ha. Ewrutopo pahnoke tî xakn̂e. Etar̂macho komo takî tî n̂encekn̂e noro. Kaan yamatan yahsîtopo, twoxin pen waihtopo, ciin̂o pen waihtopo, ero wa tî n̂encekn̂e. Ero ke katuhwakn̂e, n̂erewakn̂e xa takî tî cewrutome. Tîyopo xa tî n̂erewakn̂e oko.

20 Ero yimaw takî tî waihyakn̂e wooxam okwe ewruche rma. On wara tî ketken̂e yîwya wooxam komo, ewrunokan̂e komo, Ahwokara esko. N̂ewru rma amrerî ciki. Eikura ro makî tî xakn̂e yîson, yîmtapotarî komo ponarora tî xakn̂e.

21 On wara tko tî xakn̂e yîson waipîra ka cexitaw, Ikaboci me tî tîmrerî nosohcekn̂e. On wara tî kekn̂e, Kaan weyuru tak tom ham okwe Ixaw Yana komo yenporitoponho, kekn̂e tî. Ero wa tî kekn̂e Kaan yamatan yahsîrî ke, twoxin pen waihîrî ke marha, ciin̂onhîrî pen waihîrî ke marha.

22 Kporin komo weyuru tak tom okwe Ixaw Yana komo yenporitoponho okwe. Enko xe, Kaan yamatan nahsîcow okwe, kekn̂e tî. Ero wa tî kekn̂e Pen̂eias pen cinho twaihyataw rma. Ero wa tî kekn̂e.