Taa, on wara tî xatken̂e Piristew komo Kaan yamatan takî tî naar̂atken̂e cewton komo pona, Astoce pona. Iina tî naar̂atken̂e Ebenese poi.

2 Takon mîn yaka tî naar̂atken̂e kica. Takon mîtkoso rma tî n̂iir̂atken̂e.

3 Ero yinhîrî enmarî yakro ro takî tî Astoce pono komo paketken̂e hara. Ero yimaw takî tî Takon pen n̂een̂atken̂e. Cemokotoso takî tî xakn̂e cewnapo, Kporin komo yamatan mîtwo rma. Ero ke Takon pen nanîmyatken̂e hara. Tîhkaw tî n̂iir̂atken̂e hara eken pona hara.

4 Enmayataw xa hara paketkene hara. Ero wa xa marha tî n̂een̂atken̂e Takon pen. Cemokotoso xa hara tî xakn̂e, cewnapo xa hara Kporin komo yamatan mîtwo rma. Cepîmkotoso takî tî xakn̂e, tamohkotoso marha ececoka rma. Mîîmo potaw tî xakn̂e ehkotoxapu komo mooxe yupun yai. Puktow wa makî tî xakn̂e. Takon puntho makî tî xakn̂e Kaan yamatan mîtwo.

5 Ero wa exirî yanme on wara takî tî natu Takon yaka cewomsom komo, ahnoro mak iina cewomsom komo, noro mîn yaka cewomyataw so mîîmo potarî tî apikîra natu. Ero wara roro tî natu oroto rma.

6 Ero yimaw marha on wara tî xatken̂e Astoce pono pen komo, yîmîtwono pen komo marha, waihyatken̂e okwe Kporin komo yanme rma. Mer̂pono pîn komo tî namotoyatken̂e tuturui so takî tî xakn̂e yupun komo.

7 Okoh me cehtopo komo yeen̂ataw tak Astoce pono komo ya on wara tî ketken̂e, Kîhyaw so exihra ro mak tak cexpore nasî ponaro Ixaw Yana komo yehtopo yamatan. Kemetanmekn̂e komo me nas okwe, Takon pen marha n̂emetanmekyasî, ponaro kehtopo komo pen.

8 Ero ke Piristew kayaritomon komo takî tî nan̂ikyatken̂e. On wara tî ketken̂e yîwya so, Ahce wa cicir̂a ponaro Ixaw Yana komo yehtopo yamatan awya so? Amna yai tarpore nasî Kace pona hara, ketken̂e tî kayaritomo komo ya.

9 Ero ke iina takî tî naar̂atken̂e. Iina arîche tko iitono komo marha tî waihyatken̂e hara Kporin komo yanme. Mer̂pora ro makî tî waihyatken̂e okwe. Ero ke takî tî n̂eraswatken̂e. Nuturunwatken̂e xa marha tî iitono kom hara mer̂pono pîn komo. Poritomo pen komo tî nuturunwatken̂e, rikomo pen komo marha.

10 Ero ke Ekron pona tî narpetken̂e hara. Ekron pona epataketaw ero yaan̂e komo, Okwe, okwe, ketken̂e tî iitono komo. Ponaro Ixaw Yana komo yehtopo yamatan tak oona n̂ehcow hara kwaihkachome so kîwyam pen hara okwe, ketken̂e tî.

11 Ero ke Piristew kayaritomon komo tî nan̂ikyatken̂e n̂examro hara, On wara tî ketken̂e Ekron pono komo yîwya so, Ponaro Ixaw Yana komo yehtopo yamatan arpocoko hara ekenî ro pona. Tan exitaw kwaihkexe so mak okwe, kyanan komo marha waihkesî, ketken̂e. Mer̂pono pîn tî waihyatken̂e iitono pen komo okwe. Ero ke n̂eraswatken̂e ro makî tî. Kporin komo rma tî n̂examro pen waihkekn̂e mer̂pono pîn komo.

12 Waipîra rma tî xatken̂e anarî komo. Tuturui so rma tko tî xakn̂e yupun komo oko. Ero ke iitono komo tî nîwracetken̂e kar̂pe xa. Yîwratarî komo tî n̂esencekn̂e mooxe kah yaka roro. Ero wa tî nîwracetken̂e okwe.