Taa, pahkî tî xakn̂e Kporin komo yamatan Piristew komo chew, 7 nuun̂i ha.

2 Ero yinhîrî tîmsom pokono cewomsom komo takî tî nan̂ikyatken̂e, yaskomo komo marha tî. On wara tî ketken̂e yîwya so, Ahce wa amna n̂iir̂a Xeopa yamatan? Ekatîmcoko ka amna ya, ahce wa amna narpe ekenî ro pona hara? ketken̂e yîwya so.

3 On wara tî n̂eyukyatken̂e, Ponaro Ixaw Yana yehtopo yamatan yarpetaw ekenî ro pona hara epethîrî ken̂ehra arpora ro mak men ehcoko. Noro yanwekn̂e me awehtoponhîrî komo yepetho men arpocoko akro rma, ponaro n̂examro yehtopo ya tîmsom ha. Ero yimaw kar̂pe tak maxe hara okohme ehxapunhîrî komo. Ero yimaw, marha tak mîhtînoyaxe ahce yanme pahkî Noro nai awaikan̂e komo me, ketken̂e tî.

4 Taa, ketken̂e takî tî Piristew komo. Ahce xa amna narpe yîhyaka anwekn̂e me amna yehtopo yepetho ha? ketken̂e tî. On wara tî n̂eyukyatken̂e, Apun komo turun warai ciicoko 5 mak ooru ha. Cawa warai marha ciicoko ooru rma, 5 xa marha. 5 naxe Piristew kayaritomon komo. Ero re yaw mîxatken̂e eper̂a yaw, akayaritomon komo yakro rma.

5 Ero ke apun komo turun warai me ciicoko ooru. Cawa warai marha ciicoko apoyino komo waihkan̂enho warai ha. Ero wa awexitaw so, Karitî xa Mîk ham ponaro Ixaw Yana komo yehtopo, kan̂e me mesenpexe. Ero ke tak na apokora so nai ha, ponaro awehtopo komo pokohra marha, arowon komo yîwîrîmara marha. Ero wa tak na nai ha.

6 Ahce kacho ceipuru wara mîîr̂atu aropotarî komo Exipsiu pen komo wara, Paraw pen wara ha? N̂examro pen yemetanmekrî poko tî n̂ekaricekn̂e ro mak. Ero ke Ixaw Yana komo takî tî nahsîpînketken̂e totohme so.

7 Ero ke tarara akîhtocoko yaxan. Paaka marha ahsîcoko asakî. Woosî re ahsîcoko tîmxîkyem re, tarara xikn̂enho pîn me cehsom mak, noro yipu ahsîcoko. Yimicoko tak tarara potkoso. Yîmxîkrî tko aacoko miya waaca yaka. Iito mak n̂expe yîmxîkrî asakno roro rma.

8 Kporin komo yamatan tak enkacoko tarara yaka. Anarî marha iina enkacoko yamata hara Noro yamatan yawxaka. Ero yaka enkacoko ooru an̂irithîrî komo, Noro yanwekn̂e me awehtoponhîrî komo yepetho ha. Ero yinhîrî tak tanme ro mak tompe paaka.

9 Torî rma tko encoko. Kaan yamatan yekenî ro pona cetaw Bece Semes yesamarî yaw ero yimaw, Noro n̂emetanmekîtho rma kîwyam, tîtkexe tak. Iina tohra exitaw reha ero warahra tîhtînoyaxe. Noro pîn kwaihketken̂e so ham. Noro yanmera mak kahsîce so ham eper̂a, kahsîyatken̂e kyam mak ham, tîtkexe mak tak. Ero wa xa tîtkexe, ketken̂e. Ero wa tî ketken̂e Piristew yaskomon komo, tîmsom pokono komo marha.

10 Ero ke ero wara rma takî tî narpetken̂e Piristew komo. Paaka n̂ekyatken̂e woosî re, tîmxîkyem re. Tarara potkoso tî n̂imiyatken̂e. Yîmxîkrî tko tî nahruyatken̂e waaca yaka.

11 Kporin komo yamatan tî n̂enkayatken̂e tarara yaka. Ero yawxaka tî n̂iir̂atken̂e anarî yamata hara. Cawa warai tî xakn̂e ero yaw ooru ciixapu ha. Yuturun komo warai marha xakn̂e ero yaw ooru ciixapu xa marha.

12 Ero yinhîrî tak paaka cekn̂e Bece Semes yesamarî yaw. Esama yaw makî tî cekn̂e etowîn me ro mak. Poowa me etowra tî xakn̂e, kar̂me marha tî etowra. Moo, moo, kekn̂e mak tîcetaw. Tarara wenari tî mokyatken̂e Piristew kayaritomon komo Bece Semes rowon wokpan yaka roro. Ero wa tî mokyatken̂e.

13 Taa, ero yimaw Bece Semes pono komo tî xatken̂e tînatîrî yeperîrî yenmekrî poko, puruma yenmekrî poko. Kporin komo yamatan takî tî n̂een̂atken̂e twece so mokrî. Tawake xa takî tî xatken̂e enîrî ke.

14 Mararî pona takî tî mokyakn̂e paaka, tarara yaan̂e, Xoswe mararîn pona ha. Bece Semes pono tî mîk xakn̂e Xoswe. Mararî pona takî tî nîtîtmamyakn̂e paaka toopu panaka porin panaka. Ero yinhîrî takî tî tarara pen nîraketken̂e wehto me. Paaka marha tî waihketkekn̂e takn̂itîkaxmu me, Kporin komo ya tîmsom me ha.

15 Iito marha tî xatken̂e Repita komo. Kporin komo yamatan tî n̂enîhcetken̂e n̂examro, ooru ciixapu yen marha. Toopu pona tî n̂ir̂mikyatken̂e. Ero kaamo po tak iitono komo tî nakn̂iyatken̂e tookuthîrî komo yaake takn̂itikaxmu me, Kporin komo ya tîmsom me ha. Anarmerpan komo marha tî nîmyatken̂e yîwya. Ero wa tî xatken̂e Bece Semes pono komo.

16 Taa, iito tî ka xatken̂e Piristew kayaritomon komo. Kporin komo ya tîmsom yakn̂irî tî n̂een̂atken̂e. Ero yenîche tak yîwya so n̂etîrametken̂e takî tî Ekron pona hara ero kaamo po rma.

17 On wicakî tî n̂ekpetken̂e Piristew komo ooru ciixapu Kporin komo ya tîmsom me, Kicicme amna n̂ehxe ham kacho. Yuturun warai tî n̂ekpetken̂e. Cewn̂e so tî yuturun warai n̂ekpetken̂e cewton komo poko hak so. Astoce, Kasa, Askaron, Kace, Ekron, ero wa tî xakn̂e n̂examro yewton komo yosotî. Ero ke ero wicakî tî n̂ekpetken̂e yuturun warai ooru ciixapu.

18 5 xa marha cawa warai n̂ekpetken̂e ooru ciixapu xa marha. Cewton komo yecenarî xa marha tî n̂ekpetken̂e. Ero wicakî tî xatken̂e kayaritomo yewton komo twacayem. Tpanawnoi so marha tî xakn̂e ewtoci ke so. Cewton komo yecenarî tî n̂ekpetken̂e cawa warai ooru ciixapu. Taa, iito rma nasî porin toopu, pona n̂ir̂mikyatken̂e Kaan yamatan ero ha. Xoswe pen mararîntho po nasî Bece Semes pono mararîn po ha. Ero wa nasî toopu.

19 On wara tko tî Bece Semes pono pen komo n̂iir̂akn̂e Kporin komo, Kaan yamatan yawno tî n̂een̂atken̂e, ero ke waihkano tî n̂iir̂akn̂e. 50.070 tî waihkekn̂e kîrkomo pen okwe. Ero ke nîwracetken̂e takî tî iitono pen komo Kporin komo ya tpoyino komo waihkarî ke so. Okwe, okwe, ketken̂e tî.

20 On wara tî ketken̂e iitono komo, Bece Semes pono komo, Onoke ma re n̂ececece Kporin komo mîtwo? Kir̂wanî ro xa Mîk ha. Onok yaka ha re tarpet hara Noro yamatan kîhyai so, ketken̂e tî.

21 Ero yinhîrî kîrkomo tî n̂en̂epetken̂e Kiriace Xearin pona. On wara tî ketken̂e iitono komo ya, Kporin komo yamatan tak nîramanîyatken̂e hara Piristew komo. Amohcoko aaso ahyaka so, ketken̂e tî yîwya so. Ero wa tî ketken̂e yîwya so.