Ero ke mokyatken̂e takî tî Kiriace Xearin pono komo Kporin komo yamatan ka. Cewton komo pona tî naar̂atken̂e. Abinatabe mîn yaka tî naar̂atken̂e, îh pono yaka. Noro mumuru tî n̂iir̂atken̂e Kporin komo yamatan yenîn̂e ro me, Ereasa ha.

2 Pahkî tî xakn̂e Kporin komo yamatan iito Kiriace Xearin po, 20 cimn̂ipu tî. Ero yimaw tî nîwracetken̂e Ixaw Yana komo Kporin komo pînîn yaw okwe.

3 Ero ke on wara takî tî kekn̂e Samuew Ixaw Yana komo ya, miyan komo ya rma, Kporin komo pokono me mak tak awexi xe awexitaw so, yaaro xa tak yiixe awexitaw so ponaro anarî yana komo yehtopo ar̂macoko kr̂a. Astaroce komo marha ar̂macoko. Kporin komo ya xa tak etîmcoko. Noro mak ewetîcoko. Ero wa awexitaw so tak Piristew komo mamakan mera tak awir̂axe so, kekn̂e tî yîwya so.

4 Ero ke tîhyawnonhîrî komo takî tî nar̂metken̂e Ixaw Yana komo. Baaw komo, Astaroce komo, ero warai komo tî nar̂metken̂e kr̂a. Kporin komo poko mak takî tî xatken̂e okre.

5 Ero yinhîrî on wara takî tî kekn̂e Samuew yîwya so, Ahnoro Ixaw Yana komo anîhcoko Mispa pona. Iito tak kîmtapowasî Kporin komo yakro apoko so, kekn̂e tî.

6 Ero ke takî tî an̂ihxapu komo mokyatken̂e Mispa pona. Ero yimaw takî tî tuuna nanîmyakn̂e Samuew. Ero takî tî nukmamyakn̂e Kporin komo yeepatai. Ero kaamo po marha tî eseresmara mak xatken̂e. Kicicme cehtoponhîrî komo marha tî n̂ekatîmyatken̂e. Kicicme amna xakn̂e kica, aponarora kica, ketken̂e tî Kporin komo ya. Ero yinhîrî takî tî Ixaw Yana komo panatanmekyakn̂e Samuew, Mispa pona mohxapu kom ha.

7 Ero yimaw on wara kacho takî tî n̂encetken̂e Piristew komo, Ixaw Yana komo tak n̂esenmekyatken̂e Mispa pona, kacho tî n̂encetken̂e. Ero ke Ixaw Yana komo waparî me takî tî mokyatken̂e Piristew kayaritomon komo. Mohtopo komo tî n̂encetken̂e Ixaw Yana komo, Piristew komo tî mokyatu kwaparî komo me, kacho tî n̂encetken̂e. Ero ke n̂eraswatken̂e takî tî Piristew komo pona.

8 Ero ke on wara tî ketken̂e Samuew ya, Amtapotakî men Kporin komo yakro amna poko. Ero wicakî mak, kacho mera ro mak amtapotakî. On wara kasko yîwya, Piristew komo ya cma re amna armapora mas Apa, amna yemetanmekn̂enho komo ya ha, kasko yîwya, ketken̂e tî yîwya.

9 Ero yinhîrî oper̂a xîkrî takî tî waihkekn̂e Samuew tîson mownu yeen̂e rma. Taknitîkaxmu me tî nîmyakn̂e Kporin komo ya. Yupunthîrî takî tî nakn̂iyakn̂e. Kporin komo yakro marha tî nîmtapowakn̂e cerewre Ixaw Yana komo yakronomacho poko. Ero ke tî noro mtapotarî n̂eyukyakn̂e.

10 Taa, Kporin komo ya tîmsom yakn̂iyataw rma mokyatken̂e takî tî Piristew komo Ixaw Yana komo waparî me. Ero kaamo po rma tko knerere knerere kamexpekn̂e Kporin komo. Car̂ar̂a kekn̂e marha tî oko Piristew komo cheka. Ero ke n̂esekatketken̂e takî tî. Kar̂pera takî tî xatken̂e. Iyopono me takî tî xatken̂e Ixaw Yana kom hara okre.

11 Mispa poi takî tî cetken̂e Ixaw Yana komo kîrkomo. Piristew komo wece tî cetken̂e kar̂pe. Esama yaw rma tî waihkano n̂iir̂atken̂e emahciyataw so. Bece Kaa pona roro tî ero wa n̂iir̂atken̂e. Ero wa tî xatken̂e Ixaw Yana komo.

12 Ero yinhîrî takî tî toopu n̂ekpekn̂e Samuew. Ewto yotaka tak n̂irpekn̂e. Mehxa xakn̂e Mispa, xehxa xakn̂e Sen ewto. Ebenese me tî toopu nosohcekn̂e. Kakronomacow so ha ka Kporin komo, kekn̂e tî Samuew.

13 Ero yinhîrî twerî takî tî xatken̂e Piristew komo. Ixaw Yana komo waparî me takî tî mokuhra xatken̂e. Waipîra rma ka exitaw Samuew Piristew komo yemetanmekn̂e me roro tî xakn̂e Kporin komo.

14 Yaake tî xakn̂e Ixaw Yana komo yewtontho Piristew komo nowtho. Ekron mkai xakn̂e ewto mko Kace pona rorono mko, ero mko takî tî nahsîyatken̂e hara Ixaw Yana komo. Iitono roowo ahnoro nahsîyatken̂e Piristew komo nowtho. Ero wa xatken̂e Ixaw Yana komo, Piristew komo yopono me tî xatken̂e. Amohew komo marha tî xatken̂e tawake Ixaw Yana komo poko.

15 Ixaw Yana komo panatanmekn̂e me tî xakn̂e Samuew pahkî, twaihtopo pona roro.

16 Yicimn̂ipuntaxera tî cekn̂e Samuew Mispa pona, Betew pona, Xiwkaw pona. Ero wara roro tî n̂etapomrikyakn̂e. Iina so tî cekn̂e roro Ixaw Yana komo panatanmeso.

17 Ero wa cetapomrikîche n̂etîramekn̂e roro Hama pona hara. Iito tî xakn̂e noro yekenî ro. Iito marha Ixaw Yana komo yenîn̂e me tî xakn̂e. Iito marha tî Kporin komo ya tîmsom yakn̂itopo nakîhcekn̂e. Ero wa tî xakn̂e Samuew.