1-2 Taa, ero yinhîrî poritomotho me takî tî n̂ehtîkekn̂e Samuew. Ero yimaw tak tumumuru komo n̂iir̂akn̂e Ixaw Yana komo yenîn̂e me hara. Xoew tî xakn̂e potuthîrî yosotî. Abia tî xakn̂e mahtîkîthîrî yosot hara. Behseba pono mîkyam xatken̂e. Iito tî xatken̂e Ixaw yana komo yenîn̂e me.

3 Anarme tko tî xatken̂e yumumuru komo tîîm warahra. Puranta ponaro makî tî xatken̂e kica. Anarimaw so tî puranta nahsîyatken̂e kicicitho yen̂ekara cehtamci kica. Kir̂wan komo marha n̂emetanmekyatken̂e hara okwe.

4-5 Ero ke Hama pona takî tî cetken̂e Ixaw Yana poritomon komo. Samuew yaka tî cetken̂e. On wara ketken̂e yîwya, Ai apa, on wara kes amna awya, poritomo me tak mehtîkes okwe. Anarme tko naxe okwe amumuru komo awarara kica. Ero ke amna kayaritomonî cma re miirasî amna panatanmekn̂e me. Ero warai ciriche anarî rowon pono komo wara xa marha tak amna nasî, ketken̂e tî yîwya.

6 Poxumra tko tî yîmtapotarî n̂encekn̂e Samuew, Amna kayaritomonî cma re miir̂asî amna yenîn̂e me ehtome, kacho. Ero ke Kporin komo yakro takî tî nîmtapowakn̂e.

7 On wara tî kekn̂e Kporin komo yîwya, Yîmtapotarî komo ewetko rma. Aaxera nas amna tîkayaritomon me, kacho pînî rma mîn yîmtapotarî komo. Kporin komo xera nas amna tîkayaritomon me, kacho xa mîn yîmtapotarî komo kica.

8 Pahxa Ixaw Yana komo wekyakn̂e Exitu poi ero yinhîrî rma ero wara naxe okwe. Oyahsîpînkan̂e me roro xatken̂e ponaro anarî yana komo yehtopo poko cehtome so. Ero wara rma naxe oroto apoko hara, awanwekn̂e me okwe.

9 Ero ke yîmtapotarî komo rma ewetko. Weronomano tko cirko. On wara men awir̂axe so akayaritomon komo amn̂e, awemetanmekyaxe so men okwe, kasko yîwya so, kekn̂e. Ero wa kekn̂e Kporin komo Samuew ya.

10-11 Ero ke on wara takî tî kekn̂e Samuew Ixaw Yana komo ya, Amna kayaritomon tak cirko, kan̂e komo ya, On wara men awir̂axe so amn̂e akayaritomon komo, amumuru komo nahsîyasî tanton me. Tîtararan yaan̂e me n̂iir̂asî, tok yenîn̂e me marha n̂iir̂asî kawaru yenîn̂e me ha. Otararan poturme etocoko amyamro kar̂pe, kesî marha yîwya so.

12 Anarî komo n̂iir̂asî tmaywen komo yantoman̂e me. 1.000 komo yantoman̂e me n̂iir̂as anarî komo. 50 komo yantoman̂e me n̂iir̂asî anarî kom hara. Omararîn pomon̂e me ehcoko amyamro, kesî anarî komo ya. Onatîrî yeperîrî yenmekn̂e me ehcoko amyamro, kesi anarî komo ya hara. Amyamro xa akîhtocoko kacipara imo mer̂pora waapa me kîwtotome so, kesi anarî komo ya hara. Amyamro xa otararan pokono akîhtocoko mer̂pora, kesî anarî komo ya hara.

13 Awemsîrî komo marha nahsîyasî tanton me so. Amyamro reha ciicoko kotoporem, kesî anarî komo ya. Amyamro reha ehcoko onahrî ciin̂e me, owokru ciin̂e me marha, kesî anarî komo ya hara. Amyamro reha ehcoko oyuru yain̂e me, kesî anarî komo ya hara.

14 Amararînthîrî komo men nahsîyasî, anatîthîrî komo marha uupa yatî, oripa yepu marha. Ero komo nahsîyasî tanton komo yînahmachome. Kir̂wan mîn nahsîyasî amararînthîrî komo, ewtî mexan xa.

15 Anatîrî yeperîrî nîraconkesî tînahrî me cisimu wicak ha. Ero wa xa marha nîraconkesî awokru kom hara cisimu wicakî xa marha. Ero wicakî nahsîyasî anatîthîrî komo yeperîtho tmaywen komo nahrî me, wokru komo me marha.

16 Awantonînhîrî komo nahsîyasi tanton me so, kîrkomo, wooxam komo marha. Awokuthîrî komo marha nahsîyasî buhu pen okwe.

17 Awokuthîrî komo marha nahsîyasî oper̂a pen hara. Cisimu wicakî xa marha nahsîyasî. Tanton me men awir̂axe so okwe.

18 Taa, akayaritomon exitaw tak mîmtapowaxe Kporin komo yakro awemetanmekn̂e komo me exirî ke anîhtînoputhîrî komo rma. Aweikura so tko nasî Noro ero yimaw, kekn̂e tî. Ero wa tî kekn̂e Samuew Ixaw Yana poritomon komo ya.

19 Samuew mtapotarî yewetîra rma tko tî xatken̂e kica. Pîra, tîkayaritomon xe rma nas amna, ketken̂e rma tî yîwya.

20 On wara marha tî ketken̂e yîwya, Ero yimaw anarî rowon pono komo wara rma tak nas amna. Amna yenîn̂e me roro marha tak nasî kayaritomo. Waapa me amna cetaw amna kayaritomon tak ces amna poturme. Amna naar̂asî ar̂mano ritohme okre, ketken̂e tî. Ero wa tî ketken̂e Ixaw Yana komo Samuew ya.

21 Taa, Ixaw Yana komo mtapotarî tî n̂encekn̂e Samuew. Ero ke tak yîmtapotachonhîrî komo n̂ekatîmyakn̂e Kporin komo ya. Ero wa kacow okwe, Apa, kekn̂e Samuew.

22 On wara tî Kporin komo n̂eyukyakn̂e, Taa, yîmtapotarî komo rma entakî okopuci. Kayaritomon komo rma cirko, kekn̂e tî yîwya. Ero ke on wara takî tî kekn̂e Samuew Ixaw Yana poritomon komo ya, Etocoko hara ka awewton komo pona, kekn̂e tî. Ero wa tî kekn̂e Samuew.