Taa, ero yimaw tî iito xakn̂e Benxamin yepamtho. Kis tî xakn̂e noro yosotî. Abiew pen mumutho tî mîk xakn̂e. Seroro pen mumutho ti mîk xakn̂e Abiew. Bekorace pen mumutho tî mîk xakn̂e Seroro. Apia pen mumutho tî mîk xakn̂e Bekorace. Benxamin yepamtho tî mîk xakn̂e Kis, cemyawnoyem xa.

2 Noro mumuru tî xakn̂e Sau. Kîîrî yenpotho mîk xakn̂e okre Sau. Xatken̂e rma re kir̂wan komo kar̂pamxan komo, Ixaw Yana kom ha. Sau tko tî xakn̂e kir̂wan̂he xa tak. Kawno tî mîk xakn̂e. Noro motarî tî xakn̂e anarî komo tîpîrî yopo.

3 Taa, ero yimaw tî n̂ehcamnoyakn̂e Sau yîîm yokutho okwe, Kis yokutho, buhu pen. Yaake tî n̂ehcamnoyakn̂e okwe. Ero ke on wara tî kekn̂e Kis tumumuru ya, Ai okopuci, mîîcesî cma re oyokutho yeposo buhu pen. Omaywen arko awakro, kekn̂e tî yîwya.

4 Ero ke cekn̂e takî tî Sau buhu yeposo. Eprain yepamtho rowon pore tî cetken̂e tmaywen yakro. Îîpî chere tî cetken̂e iitono chere. Buhu pen yenîhra rma tko tî xatken̂e okwe. Ero yinhîrî takî tî Sarisa rowon pore tî cetken̂e hara. Iito marha tî enîhra xatken̂e okwe. Ero yinhîrî Benxamin yepamtho rowon pore tî n̂etîrametken̂e hara. Buhu yenîhra rma tî xatken̂e okwe.

5 Ero yinhîrî Supe rowon pona takî tî cetken̂e hara. Iito exitaw so on wara takî tî kekn̂e Sau tmaywen ya, Kaika hara. Pahkî kehtîketaw, Okwe okwe, kahra tak nai apapa buhu pen pînîn yaw. Kîpînîn yaw xa tak okwe, Okwe, kee hara, kekn̂e tî.

6 On wara tko tî kekn̂e maywen Sau ya hara, Ai ha. Taa, on wara wîîkes awya, Tanî tî nai Kaan yakrono ro. Takîhsom mîk okre. Ahce na poko yîmtapowataw yîmtapotachonhîrî yaw roro rma tak nai amn̂e yaaro ha. Ero ke yîhyaka cma re tîhcesî. Noro tko na kîwtotopo n̂ekatîmya kîwya, kekn̂e tî.

7 On wara tko tî kekn̂e Sau, Okwe, yîhyaka kîwcetaw ahce ha re tîmya yîwya. Kuruthîrî n̂enat okwe. Kaan yakrono ro ya tîmsom exihra ro mak nasî kîhyaw. Ahce katî nai kîhyaw yîwya tîmsom? kekn̂e tî.

8 On wara tî maywen n̂eyukyakn̂e, On exepeyu ohyawno. Prata on 1 kwahta sikru wicakno ha. Ero wîmyasî Kaan yakrono ro ya kîwtotopo yekatîmtopo yepetho, kekn̂e tî.

9 On wara ketken̂e Ixaw Yana komo pahxa Kaanî mtapotarî yentaxi tîcetaw so, Kaika Kaan n̂enporî yenîn̂e ro yaka, ketken̂e tî. Ero wa tî Kweronoman̂e n̂etahcatken̂e pahxa, Kaan n̂enporî yenîn̂e ro, ketken̂e tî. Ero wa tî n̂etahcatken̂e.

10 Ero yinhîrî on wara tî kekn̂e Sau tmaywen ya, Taa, ero wa ham. Kaika yîhyaka, kekn̂e tî. Ero ke ewto pona takî tî cetken̂e, Kaan yakrono yenso.

11 Îîpî tî nawnukyatken̂e ewto pona. Ero wa tîcetaw so emasî komo yakro tî n̂esepor̂atken̂e tuuna wece tmohsom komo yakro. On wara tî kekn̂e Sau yîwya so, Ai okopuci komo, tan nai Kaan n̂enporî yenîn̂e ro? kekn̂e tî yîwya so.

12 On wara tî n̂eyukyatken̂e emasî komo, Nhnk, mînto nai meyehra awesamarî yaw rma. Yohno etocoko enso. Oroto noro moko oona amna yewton pona. Kaan ya tîmsom tî nakn̂iyatu tantono komo oroto îh meretwo. Ero yenso tî moko.

13 Ewto pona awepataketaw so rma noro meen̂axe îh pona tohra ka exitaw rma. Îh pona tî cee eseresmaxi. Eseresmara nai tantono komo Kaan yakrono ro mokuhra ka exitaw. Kaan yakro tî ka noro nîmtapowasî erewsî yepona. Ero yinhîrî tak n̂eseresmexe an̂ihxapu komo. Ero ke etocoko rma ewto pona. Oroto rma wa meen̂axe, ketken̂e tî yîwya. Ero wa tî ketken̂e emasî komo Sau ya.

14 Ero ke ewto pona tî cetken̂e. Ewto pona cepataketaw so rma tî Samuew n̂een̂atken̂e. Yîhyaka so tî mokyakn̂e esama yaw, tîmsom yakn̂itopo yesamarî yaw.

15-16 On wara tko tî kekn̂e Kaan Samuew ya pahxa n̂he rma ero kaamo ponan po, Pahxaxa on wara rma exitaw kaamo kîîrî wen̂epesî ahyaka Benxamin rowon pono. Noro tak yîhkapeko oyanan komo yantoman̂e ro me, Ixaw Yana komo yantoman̂e ro me ha. Noro tak nowyas oyanan komo Piristew komo mamakan mera tak ehtome so. Oyanan komo tak ween̂asî, yîpînîn yaw so was okwe. Yîwratarî komo marha wencesî. Ero ke noro wirpes awya n̂examro yantoman̂e me, kekn̂e tî Kaan yîwya.

17 Ero ke Sau yenîche Samuew ya on wara tak kekn̂e Kaan yîwya, Noro ha, kokon̂oro wîîkai awya oyanan komo yantoman̂e ro poko noro tak ha. Noro nas amn̂e oyanan komo kayaritomon me, kekn̂e yîwya.

18 Ero yinhîrî takî tî Samuew yaka cekn̂e Sau ewto potaw rma exitaw. On wara kekn̂e Sau yîwya, Ai apa, Kaan n̂enporî yenîn̂e ro mîn cma re menpes owya, kekn̂e tî.

19 On wara Samuew n̂eyukyakn̂e, Kaan n̂enporî yenîn̂e ro ow ha. Îh pona kaika Kaan ya tîmsom yakn̂itopo yaka. Oyakro meseresmesî oroto. Pahxaxa ken̂epes hara. Enta xe awehtopo wekatîmtîkes awya ero yimaw.

20 Pahxa n̂he awoh komo n̂ehcamnoi buhu mîk ha mehxan kaamo po, noro ponarora tak esko. N̂examro rma tî n̂een̂atken̂e anarî komo. Onoke ponaro tko natu Ixaw Yana komo ahnoro? Aponaro tko naxe, aamo yanan komo ponaro marha naxe etpoyino pîn komo ponaro, kekn̂e tî.

21 On wara kekn̂e Sau yîwya, Okyo, Benxamin yepamtho mak ow. Asak makno mak amna, Benxamin yepamtho, Ixaw Yana tribun xawyakan xa. Apapa yanan komo marha naxe asak makî anarî komo xawyaka, Benxamin komo xawyaka. Ero ke ahce kacho ero wa mîîke owya? kekn̂e Sau.

22 Ero yinhîrî tak Sau naar̂akn̂e Samuew, noro yanton marha. Mîîmo yaka naar̂akn̂e. Iina tak n̂examro n̂eremanmekyakn̂e enîno rin̂e yapon pona, an̂ihxapu komo poturu wara. Yaake xatken̂e an̂ihxapu komo 30 ha re.

23 Ero yinhîrî on wara kekn̂e Samuew erewsî yetakan̂e ya, Awya wîîka, On wooto men cirko cewyaro, wîîka awya ero tak eeko xiya, kekn̂e.

24 Ero ke petîthîrî yupuxapu tak n̂ekyakn̂e erewsî yetakan̂e, ehyatîthîrî kotonho meero. Sau yeepataka n̂iir̂akn̂e. On wara kekn̂e Samuew Sau ya, On ha awotî, tonoko tak. Pahxa yîmtoxapu on awotî me an̂ikno cirihra rma ka oyexitaw ero yimaw yîmtoxapunhîrî rma on, kekn̂e. Ero ke n̂eseresmekn̂e tak Sau Samuew yakro.

25 Ero yinhîrî tak îh poi mokyatken̂e hara eseresmaxapunhîrî komo ewto pona. Iito takî tî Sau yakro nîmtapowakn̂e Samuew mîîmo meretwo rma.

26 Pahxaxaro rma paketken̂e Samuew komo enmayataw rma. On wara kekn̂e Samuew Sau ya mîîmo meretwo exitaw rma, Ai okopuci, ahtocoko tak. Ken̂epexe so tak oroto esama yaw awtotome so, kekn̂e. Ero ke kuywa poi takî tî nîhcekn̂e Sau. Samuew yakro tak cekn̂e esama yaw.

27 Ewto panaka cetken̂e. Iito exitaw so on wara kekn̂e Samuew Sau ya, Taa, amaywen en̂epeko kîywapu mooxe n̂he, kekn̂e tî. Ero ke cekn̂e tak Sau maywen mooxe n̂he. On wara kekn̂e Samuew Sau ya, Amoro ka tan esko. Kaanî mtapotarî ka wekatîmyas awya, kekn̂e. Ero wa kekn̂e Samuew Sau ya.