Taa, ero yinhîrî on wara takî tî xakn̂e Samuew, katî nahsîyakn̂e een yawno. Iike takî tî Sau nîhkapekn̂e. N̂ewcohkekn̂e marha. On wara kekn̂e yîwya, Kporin komo xa awirî ham tîyanan komo yantoman̂e ro me.

2 On wara tak masî ohyai awtoche oroto, kîrkomo tak meen̂asî Hakew pen yahrutoponho mîtwo. Sewsa po xa meen̂asî, Benxamin yepamtho komo rowon po rma. On wara kexe n̂examro awya, Ai Sau, amna rma n̂een̂e buhu, eposo mîîcekn̂e noro. Noro ponarora takî tî nai aamo, aponaro xa takî tî nai. Ahto nai omumuru okwe? kee ha tî apoko, kexe awya.

3 Taa, en̂exa tak etok hara karpar̂u yepu yaka, Tabo pono yaka. Iito tak meen̂asî kîrkom hara osorwaw, Betew pona tîtosom ha, Kaan yaka tîtosom. Anarî naar̂asî 3 kabritu. Anarî cuure naar̂asî osorwaw. Anarî wooku naar̂asî een yaw.

4 N̂examro tak amtapotarexe. Awru marha nîmyaxe asakî. Ero ahsîko yînmîthîrî komo.

5 Ero yinhîrî tak Kaan yîpîn pona etoko, Piristew sowtatun komo naxe iina etok ha. Ewto pahnoke awexitaw Kaanî mtapotarî yekatîmn̂e komo tak meen̂as hara. Tîmsom yakn̂itopo poi nîhcexe. Raatî ke cemyarke so meen̂asî. Tîyorkaxmu, maraka, cecesom, ahpa, ero warai ke cemyarke so meen̂asî. Kaanî mtapotarî marha n̂ekatîmyaxe tmokyataw so rma.

6 Ero yimaw tak Kporin komo Yekatî mokyasî aropotaka. Noro yanme tak mekatîmyasî Kaanî mtapotarî amoro hara. Anarmen me xa tak awir̂asî.

7 Noro yipu komo yeen̂ataw awya ahce na poko esko awesehtînotopo yaw roro rma. Kaanî rma nas awakro.

8 Ero yinhîrî oyesamaka etoko Xiwkaw pona. Iina men kmokyas amn̂e takn̂itîkaxmu yakn̂iso, Aaxe xa wasî, kacho yakn̂iso marha. 7 kaamo men ow momohko. Ero yimaw tak kmokyasî poko awehtopo yekatîmso awya, kekn̂e. Ero wa kekn̂e Samuew Sau ya.

9 Ero yinhîrî tak n̂esewkor̂mekn̂e Sau. Samuew yai tak cekn̂e. Torî me rma tak anarme takî tî Sau ropotarî n̂iir̂akn̂e Kaan. Samuew n̂ekatîmtho yaw roro rma takî tî xakn̂e watohnî me ro mak.

10 Îîpî pona tîtoche n̂esepor̂akn̂e Sau weronomano rin̂e komo yakro. N̂examro yenîche Kaan Yekatî takî tî mokyakn̂e Sau ropotaka. Ero ke noro marha takî tî Kaanî mtapotarî n̂ekatîmyakn̂e n̂examro yakro rma.

11 Iito rma tko tî xatken̂e pahxa Sau yenîn̂enho komo. Weronomano rin̂e komo yakro ekatîmrî tî n̂encetken̂e. Ero ke takî tî n̂eserepoketken̂e n̂examro noro poko. On wara tî ketken̂e, Ahce wa nai hara Sau kopi, anarme ro mak nasî Kis mumuru. Noro ma nai ke weronomano rin̂e me hara, ketken̂e tî.

12 Anarî marha tî xakn̂e iito ero ewto pono rma. On wara tî noro kekn̂e, Onoke xa mîk n̂examro yîîm ha? kekn̂e tî. Ero ke on wara tak kexe miyan komo rma ceserepoketaw so tpoyino komo yehtopo poko. Sau ma nai ke weronomano rin̂e me ha?, kexe.

13 Taa, Kaanî mtapotarî yekatîmrî yîtîhkache tak Sau takî tî cekn̂e îh pona, tîmsom yakn̂itopo yaka. Ero wa tî cekn̂e.

14 Ero yinhîrî on wara tî kekn̂e Sau yîîm yakno yîwya, Ai okopuci, ahna mîîtoi? kekn̂e tî. Apapa yoku yeposo ha re amna toi, buhu komo yeposo. Enîhra rma tko amna xakn̂e okwe. Ero ke amna cekn̂e Samuew yaka, kekn̂e tî Sau yîwya.

15 Ai ha, kekn̂e tî Sau yîîm yakno. Ahce wa kekn̂e Samuew awya? kekn̂e tî.

16 Nnn, aamo yoku n̂ence buhu kom ha, kekn̂e owya, kekn̂e tî Sau. Kayaritomo me tak mas amn̂e, nîîkai Samuew owya, kacho yekatîmra ro mak xakn̂e yîwya. Ero wa makî tî kekn̂e Sau tîîm yakno ya.

17 Taa, ero yinhîrî Ixaw Yana komo takî tî nan̂ikyakn̂e Samuew Mispa pona. Kporin komo ponarono me xa amohcoko, cesenmecerî iina, kekn̂e yîwya so. Ero ke tak mokyatken̂e.

18 On wara tî kekn̂e Samuew yîwya so, On wara tî nîîke Kporin komo awya so, ponaro Ixaw Yana komo yehtopo ha, Ixaw Yana komo amyamro. Pahxa kekyatken̂e so Exitu poi. Exipsiu komo yai kowyatken̂e so. Anarî kayaritomo komo yai marha kowyatken̂e so awemetanmekn̂enhîrî komo yai ha.

19 Oroto tak ponaro awehtopo komo yanwekn̂e me tak maxe hara okwe, awemetanmekn̂enhîrî komo yai awown̂enhîrî komo yanwekn̂e me ha. On wara mîîketken̂e owya, On wara roro cexi xera ro mak nas amna. Amna kayaritomonî ro xa matko cirko, mîîketken̂e. Ero ke on wara wîîkesî oroto awya so, meyehra tak amohcoko Aporin komo yeepatakan me xa. Ahnoro tribu komo amohcoko, nîîke awya so, kekn̂e yîwya so Samuew.

20 Ero ke Ixaw Yana komo tak mokyatken̂e. Noro re yepamtho komo nan̂ikyatken̂e Samuew ceyaro so men̂ekachome. Ero ke Benxamin yepamtho komo xa tî n̂emen̂eketken̂e.

21 Ero yinhîrî Benxamin yepamtho komo re takî tî n̂emen̂ekapetken̂e Samuew ya. N̂examro poritomon komo nan̂ikyakn̂e cewn̂e so. Iyanan komo yakro rma tî nan̂ikyakn̂e. Ero wa mokuche so Matîri yanan komo kuknon me takî tî n̂epîrkekn̂e men̂ekacho. Ero ke noro yanan komo tak nan̂ikyakn̂e hara cewn̂e so. Ero ke men̂ekacho yar̂metaw Sau xa takî tî n̂emen̂ekekn̂e. Ero ke noro takî tî n̂epor̂atken̂e. Enîhra rma tko tî xatken̂e okwe.

22 Ero ke Kporin komo yakro tî nîmtapowatken̂e. Apa kah yaw, ahto nai Sau? Mokuhra katî n̂ehxe? ketken̂e. On wara Kporin komo n̂eyukyakn̂e, Mînto nai awemyawno komo chew ceseyamso, kekn̂e yîwya so.

23 Ero ke iina tî cetken̂e kar̂pe eposo. Enîche n̂ekyatken̂e tak Ixaw Yana komo n̂enîrî me. Kawno xa tî mîk xakn̂e. Noro motarî xakn̂e anarî komo tîpîrî yopo.

24 Ero yimaw on wara kekn̂e Samuew Ixaw Yana komo ya, Moso ham Kporin komo nîhtînoputho akayaritomon komo me. Anarî exihra ro mak nasî moso warai ha, kekn̂e. Ero ke, Eei, ketken̂e tak Ixaw Yana komo. Pahkî moso n̂expe kîkayaritomon komo me ha, ketken̂e. Kar̂pe ketken̂e.

25 Ero yinhîrî Samuew panatanmekno n̂iir̂akn̂e kayaritomo maywen me ehtopo komo poko. On wara xa n̂expe akayaritomon komo. On wara marha ehcoko amyamro hara noro maywen me awexirî ke so ha, kekn̂e yîwya so. Ero wa kacho mewrekn̂e karita yaka. Ero mewreche Kporin komo mîn yaka tî n̂iir̂akn̂e. Ero yinhîrî tak en̂epeno n̂iir̂akn̂e hara Samuew. Ero ke cetken̂e hara Ixaw Yana komo tîmîn komo yaka hara.

26 Sau marha tî cekn̂e tîmîn yaka Xibea pono yaka. Akro tî cetken̂e kîrkomo yaake. Karitî komo mîkyam cetken̂e. Kaanî rma tî n̂iir̂akn̂e n̂examro ropotarî Sau yewetîn̂e me. Ero ke tî cetken̂e Sau yakro.

27 Iito tko tî xatken̂e anarî komo, kicicitho kom hara. On wara tî ketken̂e n̂examro hara, Ahce wa thakwa re moso kowyatu so kîîxatî pîn komo yai ha? ketken̂e tî. Ero wa tî Sau nîwîrîyaketken̂e kica. Noro ya tîmsom tî ekîhra ro mak xatken̂e n̂examro. Nîtîtmamyakn̂e makî tko tî Sau. Ero wa tî xakn̂e Sau.