Taa, ero yinhîrî on wara takî tî xakn̂e Naas, Amonita komo kayaritomon, tmaywen komo tî naar̂akn̂e sowtatu komo. Xabes Xireace pona tî cetken̂e iitono komo waparî me. Ero mîtkoso tak cetarî komo n̂iir̂atken̂e ewto pono komo waparî me. N̂examro yenîche ewto pono komo ya Naas yakro takî tî n̂esencetken̂e. On wara tî ketken̂e yîwya, Ai apa, cesencexe cma re etpoko tawake kehtopo komo poko. Ero yipu poko amtapowataw amna yakro amna tak nasî awewetîn̂e me, ketken̂e tî yîwya.

2 On wara tko tî kekn̂e Naas, Amonita komo kayaritomon, On wara awiriche so mak tawake kehtopo komo poko kîmtapowasî awakro so, kewkexe so ahnoro, eeco me so mak, kaarî n̂ixan mak. Ero wa kewkexe so tîwîrîyakaxmu me kra tak ehtome so Ixaw Yana komo. Ero wa awiriche so mak tawake kehtopo poko kîmtapowasî awakro so, kekn̂e tî kica.

3 On wara tko tî n̂eyukyatken̂e Xabes pono komo, poritomo kom ha, Iito cma re ka maxe 7 kaamo mak. Amna yukurunpetamcoko, kacho ka amna n̂ekatîmyasî Ixaw Yana komo ya miyan komo ya rma. Amna kurunpen̂e komo mokuhra exitaw so 7 enmapuche. Ero yimaw tak amna n̂epatakesî ahyaka so, ketken̂e tî yîwya.

4 Ero yinhîrî tak Xabes pono yekatîmn̂e komo takî tî cetken̂e Xibea pona Sau yewton pona. Iitono komo n̂entarî me tî n̂ekatîmyatken̂e. Ero yentache nîwracetken̂e takî tî kar̂pe.

5 Ero yimaw rma tî Sau mokyakn̂e mararî poko ehxapunhîrî. Tooku n̂ekyakn̂e paaka. On wara tî kekn̂e iitono komo ya, Ahce wa n̂ehcow hara kenmayipu komo okwe? Ahce poyero nîwracet ha? kekn̂e tî yîwya so. Ero ke Xabes pono komo mtapotachonho tî n̂ekatîmyatken̂e yîwya hara.

6 Yîmtapotachonhîrî komo yentache Kaan Yekatî takî tî mokyakn̂e Sau ropotaka. Ero ke nîrwonakn̂e xa takî tî noro.

7 Ero ke tookuthîrî takî tî nahsîyakn̂e paaka asakî. Nakpocakn̂e asakno roro rma. Ero yinhîrî on wara tî kekn̂e tmaywen komo ya, an̂ikno citatko amyamro, kekn̂e tî. N̂examro ya takî tî nîmyakn̂e akpotuxapu. Ero ke tî Ixaw Yana komo yan̂ihso tî cetken̂e miyan komo yan̂ihso rma. On wara tî kekn̂e Sau an̂ikno rin̂e komo ya, On wara kacoko Ixaw Yana komo ya, Amohcoko ahnoro sowtatu me kîwtotome so. Mokuhra awexitaw so Sau wenari, Samuew wenari marha, on wara tak men nas amn̂e awokuthîrî pen, amna nakpocas okwe, kacoko, kekn̂e tî yîwya so. Ero ke ero wa tî ketken̂e Ixaw Yana komo ya. Ero ke Sau pona takî tî n̂eraswatken̂e Ixaw Yana komo Kporin komo yanme rma. Ero ke mokyatken̂e ahnoro.

8 Beseke pona tî mokyatken̂e sowtatu komo Sau yaka. Iito takî tî mohxapu komo nukuknomekn̂e Sau. Ixaw Yana komo tî xatken̂e 300.000. Xuta yepamtho komo reha tî xatken̂e 30.000. Ero wicakî tî xatken̂e sowtatu me tîtosom komo.

9 Ero yimaw tak on wara takî tî ketken̂e Ixaw Yana komo ekatîmn̂e me mohxapu komo ya, Taa, etocoko hara. On wara kacoko Xabes Xireace pono komo ya, Pahxaxa kaamo yawomuche n̂he amna tak mokyasî akurunpeso so, kacoko, ketken̂e tî yîwya so. Ero ke ero wa kaxi takî tî cetken̂e ekatîmn̂e komo. Ero wa entache tawake takî tî xatken̂e Xabes pono komo.

10 Ero ke on wara tî ketken̂e n̂examro Amonita komo ya, Pahxaxa tak amna mokyas ahyaka so. Ero yimaw awanme ro so mak amna miir̂asî, ketken̂e tî yîwya so.

11 On wara tî xakn̂e Sau, enmaporo tak sowtatu komo tî nakpayakn̂e osorwaw yatî. Ero yinhîrî takî tî cetken̂e Amonita komo waparî me kapikara kokwataw rma, Yuu yuu yuu, ketken̂e takî tî n̂examro wece. N̂examro yetarî pona tî cetken̂e. Amonita pen komo takî tî waihketken̂e pahkî kaamo tawomtîkaxi ro. Waipîn komo tî n̂etakpayatken̂e miya so ro mak. 2 so mak iito re exihra takî tî xatken̂e Amonita pen kom okwe. Ero wa tî n̂examro pen nar̂metken̂e Ixaw Yana komo.

12 Ero yinhîrî on wara tî ketken̂e anarî komo Samuew ya, Ahto nat hara Sau poko tîmtapotaxmu komo? Ahce wa thakwa re kîkayaritomon me nai Sautho ha? kan̂e komo ahto nat ha? Ero wa kan̂e komo ekmexpoko xiya waihkachome kr̂a amna ya, ketken̂e tî yîwya.

13 On wara tko tî n̂eyukyakn̂e Sau rma, Pîra, waihkano cirihra wa taxe oroto. Kukurunpecow so okre Kporin komo, Ixaw Yana komo nukurunpew. Ero ke waihkano cirihra ro mak wa taxe oroto, kekn̂e tî yîwya so.

14 Ero yinhîrî on wara takî tî kekn̂e Samuew Ixaw Yana komo ya, Xiwkaw pona tak kaikatko Sau ciiso xa hara kayaritomo me, kekn̂e.

15 Ero ke cetken̂e takî tî ahnoro Ixaw Yana komo Xiwkaw pona. Iito tak Sau n̂iir̂atken̂e xa hara tîkayaritomon komo me. Kporin komo yeepatai rma tî ero wa n̂iir̂atken̂e. Iito marha tî tookuthîrî pun nakn̂iyatken̂e Kporin komo ya tîmsom me, Aaxe xa wasî, kacho ha. Ero yimaw nahwowakn̂e Sau, Ixaw Yana komo yakro. Tahwore xa xatken̂e okre.