Taa, iito rma exitaw so Xiwkaw po rma on wara takî tî kekn̂e Samuew Ixaw Yana komo ya, Oyakno komo, on wara wîîkes awya so, amtapotachonhîrî komo wewehce. Tkayaritomoi tak kiice so.

2 Ero ke akayaritomon komo tak nasî awan̂e komo me. Owî reha poritomotho me tak wasî. Tumutwe tak nasî ohpoci. Tanî rma naxe omumuru komo awakro so. Pahkî wîxakn̂e tan awero ro so rma. Mehxa ro ero wa wîxakn̂e omrenai ro rma.

3 Ero ke tan wasî oroto. Kicicme oyehtoponho yeen̂ataw awya so oroto ekatîmcoko owya. Kporin komo n̂entarî me rma ekatîmcoko, yînîhkapethîrî n̂entarî me marha. Onok yokutho wowye paaka? Buhu anarimaw? Onoke xa wepethîkai awya so? Onoke xa wemetanmekye awya so? Onok purantantho xa wahsîye ewuhnî wara oritopo, kicicitho yen̂ekara oyehtome? Ero wa oyehtoponho yîhtînoyataw awya so ekatîmcoko owya oroto. On̂emetanmekîtho exitaw noro wepemesî oroto rma, kekn̂e tî yîwya so.

4 Pîra apa, ketken̂e tî Ixaw Yana komo Samuew ya. Amna yepethîkara ro mak mîxakn̂e, amna yemetanmekîra marha mîxakn̂e. Amna yemyawnonho towîhra ro mak mîxakn̂e, ketken̂e tî yîwya.

5 Taa, kekn̂e takî tî Samuew yîwya so, Kporin komo n̂entarî me rma mîîkacow oroto, yînîhkapethîrî n̂entarî me marha. Kicicme awehtoponhîrî yîhtînopîra ro mak nas amna, mîîkacow owya, kekn̂e tî. Nhnk, Kporin komo n̂entarî me rma wa ero wa amna nîîka, ketken̂e tî yîwya.

6 Ero yinhîrî takî on wara kekn̂e Samuew yîwya so, Kporin komo xa Moises pen n̂iir̂akn̂e awan̂e komo me, Araw pen marha n̂iir̂akn̂e ero warai me. Noro rma aporin pen komo n̂ekyakn̂e Exitu poi, Kporin komo rma.

7 Ero ke iito rma ka ececetocoko. Kir̂wan̂he ro mak xakn̂e Kporin komo apoko so, aporin pen komo poko marha. Ero ke kir̂wan̂he awitoponhîrî komo tak wekatîmyas awya so.

8 Pahxa kporin pen tî cekn̂e Exitu pona, Xako pen ha. Iito rma cexitaw so noro yepamtho, Kporin komo yakro tî nîmtapowatken̂e towtopo komo poko. Cerewre tî kekn̂e yîwya. Ero ke takî tî Moises nantomekn̂e Noro Araw yakro. N̂examro tak aporin pen komo n̂ekyatken̂e Exitu poi. Oona tak n̂examro pen n̂ekenmetken̂e.

9 Tporin komo tko tî nîhcamnoyatken̂e kica, ponaro cehtoponhîrî komo rma. Ero ke tî n̂examro pen n̂iir̂atken̂e Sisera mamakan me, Aso pono komo mamakan me, sowtatu yantoman̂e mamakan me. Piristew komo mamakan me marha tî n̂iir̂akn̂e, Moabita komo kayaritomon mamakan me marha tî. N̂examro tî n̂etar̂metken̂e kporin pen komo yakro.

10 Ero ke Kporin komo yakro takî tî nîmtapowatken̂e kporin pen komo cerewre xa. On wara tî ketken̂e yîwya, Apa, kicicme nas amna kica. Awahsîpînkekn̂e ro mak amna kica, Tporinî rma Amoro awahsîpînkekn̂e. Baaw komo poko mak tak amna xakn̂e kica, Astaroce komo poko marha kica. Wara rma amna cma re mukurunpesî amna xatî pîn komo yopono me tak amna yehtome. Amna ya n̂examro ar̂mapetaw awya apokono me mak tak nas amna, ketken̂e tî. Ero wa tî ketken̂e Kporin komo ya.

11 Ero ke Xerubaaw tak tî nantomekn̂e Kporin komo, Barake marha nantomekn̂e, Xehte marha, ow tak Samuew ha. Amna tak awakronometken̂e so aaxatî pîn komo yar̂macho poko. Mehxarpan komo yar̂macho poko amna awakronometken̂e so mamawno mera tak awehtome so. Ero ke waapa pona erasîra ro mak tak menmayatken̂e okre.

12 Kokon̂oro tak Naas tîsowtatun komo n̂ekyakn̂e awaparî komo me. Amonita yepamtho mîk Naas. Ero ke on wara mîîkace owya, On wara mak cexi xera ro mak tak nas amna. Tkayaritomon xe mak tak nas amna, mîîketken̂e owya. Ero wa mîîketken̂e Kporin komo Kaan exitaw rma akayaritomon komo me.

13 Ero ke moso tak ha kayaritomo me anîhtînoputhîrî kom ha, Tkayaritomon xe tak nas amna, kachonho awya so. Enko xe, akayaritomon komo rma tak n̂iir̂akn̂e Kporin komo.

14 Ero ke Kporin komo ponaro xa men ehcoko. Noro poko mak ehcoko, yîmtapotarî ewetîcoko. On wara ehcoko, ketaw awya so ahce na poko anwekîra men ehcoko. Ero wa xa marha n̂expe akayaritomon kom hara. Ero wara awexitaw roro so kir̂wan̂he maxe, Aporin komo Kaan yehtopo yaw roro rma maxe.

15 Kporin komo tko na manwekyatu anarimaw. Ahce na poko apanatanmetopo komo na manwekyatu. Ero wa awexitaw so awemetanmekyatu so men Noro hara. Aporin pen komo n̂emetanmekyakn̂e ero wa xa marha awemetanmekyatu so hara okwe.

16-17 Ero ke iito rma ka ececetocoko. Kar̂pe xa cehtopo takî tî n̂enpe Kporin komo awero ro so rma. Puruma yeperîrî yenmetopo me nasî oroto. Wara rma Kporin komo yakro kîmtapowasî tuuna mohtopo poko, knererere kacho poko marha. Ero poko kîmtapowasî, Kicicme ro mak keen̂atu so ham okwe Kporin komo, kachome tak awya so. Amna kayaritomon cirko, kachonho kicicme xa tî xakn̂e yîwya, kekn̂e. Ero wa kekn̂e Samuew Ixaw Yana komo ya.

18 Ero yinhîrî tak Kporin komo yakro nîmtapowakn̂e Samuew. Ero ke tuuna tak mokyakn̂e Kporin komo yanme, tarai marha n̂esencekn̂e. Ero ke Kporin komo poko twerî xa tak xatken̂e Ixaw Yana komo, Samuew ponaro xa marha xatken̂e.

19 Ero yinhîrî on wara tak ketken̂e Samuew ya, Ai apa, amna poko cma re mîmtapowasî Kporin komo yakro, ponaro awehtopo yakro ha. Awanton mak amna. Ero ke amna poko amtapotakî waipîra amna yehtopo poko. Kicicme rma re ka amna xakn̂e. Oroto kicicme amna yehtoponho amna nîhrema hara tkayaritomon yapontopo ke hara kica, ketken̂e.

20 On wara tko tî n̂eyukyakn̂e Samuew, Erasira rma ehcoko. Kicicme rma re mîxatken̂e. Wara rma oroto tak Kporin komo poko xa ehcoko etowra ro mak tak. Noro yewetîn̂e me xa matko ehcoko. Yiixe xa awexirî ke so etowra ro mak ehcoko.

21 Ero wa ehcoko, etowra ro mak ehcoko. Awetowyataw so noro pîntho poko mak tak mehtîkexe hara kica. Awakrera so wa nasî enporixapu komo, akurunpera so marha nasî noro pîntho me cexirî ke thakwa.

22 Pahxa rma tîyanan me awahsîtopo komo tî nîhtînoyakn̂e Kporin komo. Tawake tî xakn̂e apoko so. Ero ke awahsîpînkara so nasî tîyanan me awexirî ke so. Cesekaiporesom me xa ehtome tosotî awahsîpînkara so rma nasî.

23 Apoko so rma tko kîmtapowasî Kporin komo yakro. Yîtîtmamra wasî ero poko. Kicicme men oyeen̂a Kporin komo otîtmamyataw, apoko yîmtapotara oyexitaw. Ero ke yîtîtmamra ro mak wasî. Kpanatanmekyaxe so rma kir̂wan̂he awehtopo komo poko, takîhso awehtopo komo poko ha.

24 On wara mak wîîkes awya so, Kporin komo poko twerî men ehcoko. Noro poko mak ehcoko yaaro xa. Yiixe xa awexirî ke so Noro ewetîcoko. Miya xe xa awakronomachonhîrî komo poko eserepokacoko.

25 Kicicme rma tko na matu anarimaw so. Ero wa awexitaw so mehcamnoyaxe tak okwe akayaritomon pen komo yakro ro rma. Ero wa maxe okwe, kekn̂e tî. Ero wa tî kekn̂e Samuew Ixaw Yana komo ya.