1-2 Taa, cewn̂e cimn̂ipu tî ka xakn̂e Sau Ixaw Yana komo kayaritomon me. Ero yinhîrî tak anarî cimn̂ipu yenatîche hara on wara tî xakn̂e noro, Ixaw Yana komo men̂ekekn̂e sowtatu me cehsom komo. 3.000 men̂ekekn̂e. 2.000 tî xatken̂e Sau yakro rma Mikmas po. Betew mîtwo marha tî xatken̂e îîpî chew. 1.000 tî xatken̂e Xonatas yakro hara Xibea po, Benxamin yepamtho rowon po. Anarî komo reha tî Sau n̂en̂epekn̂e hara yîmîn komo yaka hara.

3-4 Ero yimaw Piristew komo tî xatken̂e Xibea po sowtatu kom ha. N̂examro yakro takî tî n̂etar̂metken̂e Xonatas komo. N̂examro pen yar̂machonhîrî takî tî n̂encetken̂e Piristew komo. Ero yinhîrî takî tî tuu kan̂e komo n̂en̂epekn̂e Sau Ixaw Yana komo chere ro. On wara tî ketken̂e tuu kan̂e komo, Ebrew komo ahnoro entacoko ha ka. Piristew sowtatun pen komo nar̂mai Sau. Ero ke Ixaw Yana komo xera ro mak tak naxe Piristew komo, ketken̂e tî. Ero ke ero wa kacho tî n̂encetken̂e Ixaw Yana komo ahnoro. Ero ke an̂ikno tî n̂iir̂akn̂e Sau. Ohyaka amohcoko Xiwkaw pona, kekn̂e tî. Ero ke iina tî mokyatken̂e kîrkomo.

5 Piristew komo marha tî mokyatken̂e Ixaw Yana komo waparî me kopi. 30.000 tî n̂ekyatken̂e tarara kopi. 6.000 tî mokyatken̂e kawaru mkaw so hara. Mer̂pora ro mak takî tî xatken̂e tîhtarî po so tmohsom kom hara. Axawa nasî tuuna imo yecihtaw merpora ro mak, ero wara ro mak tî xatken̂e kopi. N̂examro takî tî n̂iir̂atken̂e cetarî komo Mikmas pona. Bece Apen mehxa tî n̂iir̂atken̂e resce n̂ixa.

6 Piristew komo yeen̂ataw n̂eraswatken̂e takî tî Ixaw Yana sowtatun komo. Nahwoketken̂e ro makî tî n̂examro. Ero ke takî tî n̂eseyamyatken̂e okwe ewtarî yaka îîpî yexenawno yaka, pen cheka, toopu cheka, ewtarî yaka, ahtoxapu yaka. Iina so tî n̂eseyamyatken̂e okwe.

7 Anarî komo reha tî n̂emahciyatkekn̂e Xotaw yeco pona Kace yepamtho komo cheka, Xireace pona marha. Ero wa so tî n̂emahciyatken̂e okwe. Iito rma tî xakn̂e Sau Xiwkaw po. Anarî komo rma tî xatken̂e noro yakro sowtatu kom ha. N̂eraswatken̂e tko tî tatanîmso ro.

8 Iito tî xakn̂e Sau 7 kaamo. Samuew mtapotachonho yaw roro rma tî noro momokyakn̂e iito. Mokuhra tko tî xakn̂e Samuew Xiwkaw pona. N̂etakpayatken̂e tak tî okwe Sau yakrononho komo sowtatu kom ha.

9 Ero ke on wara takî tî kekn̂e Sau, Kporin komo ya tîmsom ehcoko ohyaka takn̂itîkaxmu, Aaxe xa wasî, kacho marha, kekn̂e tî. Ero ke n̂ekyatken̂e yîhyaka. Ero yinhîrî takî tî Kporin komo ya tîmsom nakn̂iyakn̂e Sau rma kopi.

10 Akn̂ipuche rma takî tî mokyakn̂e Samuew. Yîhyaka tî cekn̂e Sau yîmtapotareso.

11 Ahce kacho makn̂ipu ke? kekn̂e takî tî Samuew yîwya. On wara tî Sau n̂eyukyakn̂e, Osowtatun komo yetakparî wenwo okwe. Amtapotachonhîrî yaw roro mokuhra awexirî marha wenwo. Piristew komo marha wenwo esenmekrî komo Mikmas pona.

12 Ero ke on wara tak wîîka oropotaw, Oroto tko na mokyatu Piristew komo Xiwkaw pona owaparî me. Okurunpen̂e me cma re masî, kahra ka weexi Kporin komo ya kopi, wîîka. Ero ke Noro ya tîmsom thakwa wa wakn̂ipu owî rma, kekn̂e tî.

13 Ai ha, kekn̂e tî Samuew. Akpîra mex ham ke okwe. Kporin komo Kaan ya awantomacho yewetîra mex ham ke. Ero yewehcataw ketaw ha re awya eroromero awirirî ha re Ixaw Yana komo kayaritomon me.

14 Wara rma miya roro kayaritomo me awirira tak nasî tanwekrî yanme awya. Anarî tak n̂epore Kporin komo twara xa marha cesehtînosom ha. Noro tak nantomai tîyanan komo yantoman̂e me. Amoro reha awowyasî tîmtapotachonhîrî yewetîra awexirî ke, kekn̂e tî. Ero wa tî kekn̂e Samuew Sau ya.

15 Ero yinhîrî tak Xiwkaw poi cekn̂e Samuew Xibea pona Benxamin yepamtho yewton pona. Noro toche Sau takî tî nukuknomekn̂e takrono komo rma. 600 makî tî xatken̂e okwe. Ero wicakî mak xatken̂e okwe.

16 Ero yinhîrî takî tî Sau n̂enmayakn̂e Xibea po, Benxamin yepamtho yewton po. Iito marha tî xakn̂e yumumuru Xonatas. N̂examro maywen komo marha tî xatken̂e iito. Piristew komo tî xatken̂e Mikmas po.

17 En̂exa takî tî cetken̂e Piristew komo Ixaw Yana komo waparî me okwe. Takpaso tî cetken̂e 3 yatî esama yaw so. Anarî komo tî cetken̂e Ohra yesamarî yaw. Suaw pono komo waparî me tî cetken̂e.

18 Anarî komo tî cetken̂e Bece Oron wece. Anarî komo tî cetken̂e iitono komo rowon wokpan wecan yaw esama yaw. Seboin woskaran nasî axawa imo yemyatwo iina tî cetken̂e. Ero wa so tî cetken̂e Piristew komo Ixaw Yana komo waparî me okwe.

19 Taa, on wara tî xatken̂e Ixaw Yana komo ero yimaw, kuripara ciin̂e komo exihra ro makî tî xatken̂e yîchew so okwe. Piristew komo yanme exihra tî xatken̂e. On wara tî ketken̂e Piristew komo, Kuripara ciin̂e komo kr̂a cen̂epepore nasî Ixaw Yana komo chei. Iito exitaw so Ixaw Yana komo kurun men nakîhcetu kacipara imo, raapu kom ha, ketken̂e tî. Ero ke kr̂a tî n̂en̂epetken̂e.

20 Ero ke Ixaw Yana komo thakwa tî cetken̂e Piristew komo yaka roowo pomotopo iyohtoposo. Pururi komo, yawaka komo, maria komo, ero yipu komo iyohtoposo tî cetken̂e Piristew komo yaka.

21 Epethîrî pona makî tko tî nîyohcetken̂e Piristew komo. 2 tehsa sikru wicakî tî ketken̂e roowo pomotopo iyohtotopo yepetho, pururi iyohtotopo. Parata komo, yawaka komo, paaka yuwun̂kacho komo, ero yipu komo yohtotopo yepetho tî xakn̂e 1 tehsa sikru wicak ha.

22 Ero ke etar̂ma xe cexitaw so emyarîra ro makî tî xatken̂e Sau maywen komo okwe, Xonatas maywen komo marha. Kacipara imo exihra ro makî tî xakn̂e emyaw so, raapu marha exihra tî xakn̂e okwe. Sau yemyaw makî tî xakn̂e kacipara imo, Xonatasî yemyaw marha. Anarî komo yemyaw exihra ro makî tî xakn̂e okwe. Ero wa tî xatken̂e okwe Ixaw Yana komo.

23 Ero yimaw takî tî cetken̂e Piristew sowtatun komo esama yaw, îîpî yeporino yaw. Mikmas pona tî cetken̂e. Iito takî tî xatken̂e.