Ero yinhîrî takî tî, anarî kaamo po tak on wara tî kekn̂e Xonatas, Sau mumuru, kar̂pamxan ya tî kekn̂e tukurun yaan̂e ya, Amok ha Piristew komo yaka sowtatu komo yaka. Mînto naxe aporî yeco po, kekn̂e tî. Tîîm ya tko tî esekatîmra xakn̂e Xonatas tîcetaw.

2 Xibea potaw tî xakn̂e Sau ero yimaw. Iito nai homeira yepu Mikron po, ero yapomyaw tî xakn̂e. Sowtatu komo rma tî re xatken̂e noro yakro 600 mak okwe.

3 Noro yakro marha tî xakn̂e Aias. Eepoci yaw tî xakn̂e. Ikaboce yakno mumuru tî mîk xakn̂e, Aitube mumuru. Pin̂eias mumuru tî mîk xakn̂e Aitube. Eri pen mumutho tî mîk xakn̂e Pin̂eias. Kporin komo yaka cewomsom pen mîk xakn̂e Eri pen. Siro pononho mîk xakn̂e. Noro pen yepamtho tî mîk xakn̂e Aias. On wara tko tî xatken̂e Sau sowtatun komo, Xonatas totopo yîhtînopîra ro makî tî xatken̂e.

4-5 Taa, tarenakem yari tîto xe tî xakn̂e Xonatas. Ero yeco po tî xakn̂e toopu tpotkem, Boses tî osotî. Xehxan po marha tî xakn̂e anarî hara toopu, tpotkem xa marha, Sene tî mîn, ero yosot hara. Xehxa tî xakn̂e anarî nohce n̂ixa Xibea n̂ixa, mehxa tî xakn̂e anarî hara suu n̂ixa Mikmas n̂ixa ha. Ero wa tî xakn̂e toopu imo iitono.

6 Ero ke on wara tî kekn̂e Xonatas kar̂pamxan ya, tukurun yaan̂e ya, Amok ha Piristew komo yaka etanpikantho komo yaka. Mînto naxe yaake toopu imo meretwo. Kporin komo tko na kakronome. Ehn̂ara ro mak nasî Kporin komo kukurunpetopo poko asak mak kexitaw, mer̂pora kexitaw so marha, kekn̂e tî Xonatas.

7 Awanme ro mak esko, kekn̂e makî tî yukurun yaan̂e. Etoko rma awto xe awexitaw. Kmokyasî rma awenari, kekn̂e tî.

8 On wara marha tî kekn̂e Xonatas yîwya, Taa, amok ha. Aporî tîtwatorî n̂examro wece. Iito tak cesenporî yîwya so.

9 Kenîche on wara na ketu kîwya, Iito ka ehcoko. Ahyaka so amna mokyasî, ketu na. Ero wa ketaw iito rma cexirî awnukura yîhyaka so.

10 Anarimaw on wara na ketu kîwya, Xiya awnucoko amna yaka, ketu na. Ero wa ketaw tawnukrî tak yîhyaka so. Ero wa ketaw kîwya on wara tîtkesî, Taa, n̂examro pen nar̂mape ham Kporin komo kîwya, tîtkesî, kekn̂e tî. Ero wa tî kekn̂e Xonatas karpamxan ya, tukurun yaan̂e ya.

11 Ero ke Xonatas takî tî n̂esenpekn̂e Piristew sowtatun komo ya, kar̂pamxan yakro tî n̂esenpetken̂e. N̂examro yeen̂ataw on wara tî ketken̂e Piristew komo, Enko xe, Ebrew komo tak n̂epataketu ewtarî yaw eseyamxapunhîrî komo, ketken̂e tî.

12 Ero yinhîrî takî tî Xonatas ya ketken̂e hara Piristew komo, yukurun yaan̂e ya marha tî ketken̂e. Xiya amohcoko amna yaka. Ahcamhokexe so tak amna ha, ketken̂e tî yîwya so. Kar̂pe tî ketken̂e. Ero ke on wara tî kekn̂e Xonatas tukurun yaan̂e ya, Amok ha. Owenari awnuko. Ixaw Yana komo nar̂marî me n̂examro pen n̂irî ham Kporin komo, kekn̂e tî.

13 Ero ke îîpî nawnukyakn̂e Xonatas tamorî po, tosokmuru po marha. Wenari rma tî nawnukyakn̂e yukurun yaan̂e. Capahno pona cepatakache so tak Piristew komo takî tî waihkekn̂e Xonatas. Noro wenari mokyakn̂e yukurun yaan̂e waihkano rirî poko xa marha.

14 Ero wa tî waihkano rirî n̂ihciyakn̂e Xonatas tukurun yaan̂e yakro. 20 tî waihketken̂e Piristew pen komo. Ewto roron po rma tî waihkano n̂iir̂atken̂e.

15 Ero yimaw takî tî n̂esekatketken̂e iitono komo, Piristew sowtatun komo ahnoro. Tatanatken̂e makî tî kopi. Meyeno komo marha tî n̂esekatketken̂e woskara pono komo rma, Ixaw Yana komo yemetanmeso toxapunhîrî komo marha, mîn hak po ehxapu komo marha. Ero wa tî xatken̂e Piristew komo kopi. Roowo meero tî n̂esewsîyakn̂e. Kaanî rma tî ero wa n̂iir̂akn̂e.

16 Mooxe n̂he tî xakn̂e Sau Xibea po Benxamin komo rowon po. Mîîmo kanahtaw so rma tî xakn̂e waapa yekaiporen̂e komo, Sau maywen kom ha. Piristew komo yemahcirî takî tî n̂een̂atken̂e n̂examro. Ero ke tî n̂ekatîmyatken̂e Sau ya.

17 Ero ke on wara tî kekn̂e Sau takrono komo ya, Epanatocoko tak ahnoro tantono komo. Ero wa ehcoko kîhyai so toxapu yîhtînotome tak kîwya so, kekn̂e tî. Ero ke n̂epanacetken̂e ahnoro Sau maywen komo. Epanatoche so nîhtînoyatken̂e takî tî. Xonatas xa exihra nasî, yukurun yaan̂e exihra marha nasî, kekn̂e tî.

18 Ero yinhîrî on wara tî kekn̂e Sau Aias ya, Kaan yamatan ek ha xiya, kekn̂e tî. Ixaw Yana komo yaw takî tî xakn̂e Kaan yamatan ero yimaw.

19 Taa, nîmtapowakn̂e ka Sau Kaan yaka cewomsom yakro. Ero wa yîmtapowataw rma kar̂pe xa takî tî n̂esencetîkekn̂e wara hakî kacho komo Piristew komo ya. Ero ke on wara takî tî kekn̂e Sau, Pîra rma, Kaan yamatan arko hara, kekn̂e tî.

20 Ero yimaw takî tî n̂esenmekyatken̂e xa hara tî Sau sowtatun komo. Piristew komo waparî me takî tî cetken̂e. Anarme ro makî tî n̂examro n̂een̂atken̂e kopi. Kacipara imo ke n̂etar̂metken̂e Piristew komo re rma kopi. Camkî ro makî tî n̂een̂atken̂e takrono komo rma kopi.

21 Ebrew komo marha mokyatken̂e Ixaw Yana komo yakronomaxi Piristew komo yaka etowxapunhîrî komo rma. Pahxa rma tî n̂etowyatken̂e tpoyino komo yai Piristew komo yaka. N̂examro yetarî komo yaw tî ka n̂enmayatken̂e. Ero yimaw tko Piristew komo yai n̂etowyatken̂e hara. Ixaw Yana komo tak tî nakronmetken̂e hara Sau sowtatun komo, Xonatas sowtatun komo marha.

22 Ero yimaw marha tî Piristew komo yemahcitopo takî tî n̂encetken̂e anarî kom hara Ixaw Yana komo. Îîpî cheka eseyamxapu komo tî mîkyam n̂encetken̂e. Ero ke n̂examro marha tî cetken̂e kar̂pe Piristew komo waihkaxi.

23 Ero wa tî Ixaw Yana komo nukurunpekn̂e Kporin komo ero kaamo po. Miya ro makî tî cetken̂e Ixaw Yana komo Piristew komo waihkan̂e komo, Bece Apen mehxa tî cetken̂e. Ero wa tî cetken̂e.

24 Taa, on wara tko tî xatken̂e Ixaw Yana sowtatun komo ero kaamo po, nahwoketken̂e okwe Sau mtapotacho yanme. On wara tî kekn̂e Sau, Eseresmara ro mak ehcoko kokmamra ka exitaw. Kaan nîwîrîmarî me tak n̂expe on po ceseresmaxmu. Ero wa wîîkesî ooxatî pîn pen komo yar̂matîkachome tak owya. Yaaro tan wîîkesî, oroto ceseresmaxmu waihkapesî Kaan ya, kekn̂e tî kopi. Ero ke erewsî pokohra ro makî tî xatken̂e Ixaw Yana sowtatun komo.

25 Ero yinhîrî comota pona takî tî cetken̂e Ixaw Yana sowtatun komo Piristew komo wece. Iito tî xakn̂e weenu roowo pore rma.

26 Ero pore tîcetaw so weenu tî n̂een̂atken̂e. Cipi cipi kekn̂e tî. Tamorî komo tko tî cirihra ro makî tî xatken̂e tîmtaka so. N̂eraswatken̂e tî Sau mtapotacho pona.

27 Tîîmî mtapotacho tko tî entara xakn̂e Xonatas, Kaan nîwîrîmarî me xa n̂expe ceresmaxmu komo, kacho tî entara. Ero ke tî tamoyin poturu nukpekn̂e weenu kwaka. Ero takî tî n̂iir̂akn̂e tîmtaka tamorî ke. Ero yemerî ke takî tî kar̂pe n̂he xakn̂e.

28 Ero ke on wara takî tî kekn̂e anarî hara sowtatu Xonatas ya, Ai, on wara nîîka aamo, Kaan nîwîrîmarî me xa tak n̂expe on kaamo po ceseresmaxmu, nîîka, kekn̂e tî sowtatu. Cekar̂kaxi thakwa tî xatken̂e Ixaw Yana sowtatun komo.

29 Ai ha okwe, kekn̂e tî Xonatas. Kpoyino komo mak n̂emetanmek ham okwe apapa. Enko xe, wara n̂he oyewru yexirî weenu yemerî ke cik owya.

30 Wara n̂he xa n̂ehcerî ha re sowtatu komo oroto tîîxatî pînînhîrî pen komo naputho yahyataw ketaw ha re. Mer̂pora n̂he tak Piristew pen komo tîtwaikacerî ha re, kekn̂e tî. Ero wa tî kekn̂e Xonatas.

31 Taa, ero kaamo po n̂ekar̂ketîketken̂e takî tî Ixaw Yana komo. Piristew komo waihkarî poko tî cetken̂e Mikmas poi Aixaron pona. Ero ke n̂ekar̂ketken̂e.

32 Ero ke Piristew pen komo yokutho yahsîso takî tî cetken̂e Ixaw Yana sowtatun komo kar̂pe ro mak okyo. Kahn̂eru komo, paaka komo, paaka xîkrî kom, noro yipu komo tî nahsîyatken̂e. Roowo po rma tî nakpocatken̂e. Yupunthîrî tî non̂etken̂e kamxukre rma kica.

33 Ero ke on wara tî ketken̂e iitono komo Sau ya, Apa, enko xe, Kporin komo nanwekyaxe okwe sowtatu komo. Kamxukremu rma non̂exe okwe, kekn̂e tî. Ahce okwe, kekn̂e tî Sau. Kicicme ro mak mehcow ham okwe. On wara xa ehcoko ha ke toopu yîhmamacoko oona ohyaka, porin xa, kekn̂e tî.

34 On wara marha tî kekn̂e Sau, Etocoko sowtatu komo yan̂ihso. On wara kacoko yîwya so, Anahsîthîrî komo aacoko Sau yaka paaka, kahn̂eru komo. Iina mak waihkacoko. Iito marha tonocoko yupunthîrî. Kporin komo mtapotachonho yanwekîra tak ehcoko, Kamxukrem tonohra ehcoko, kachonho ha, katatko yîwya so, kekn̂e tî Sau yîwya so. Ero ke paaka takî tî n̂ekyatken̂e ahnoro Ixaw Yana komo iina toopu mîtkoso. Ero po takî tî waihketken̂e tootî me so.

35 Ero yinhîrî takî tî Kporin komo ya tîmsom yakn̂itopo nakîhcekn̂e Sau. Ero yimaw makî tî n̂ihciyakn̂e Kaan ya tîmsom yakn̂itopo yakîhtotopo yîwya.

36 Ero yinhîrî on wara takî tî kekn̂e Sau, Kaikatko xa hara kosope rma Piristew komo waparî me. Tîtwaikacerî cenmakaxi ro. Cewn̂e mak yîmtora ro mak cehcerî waipîn, kekn̂e tî. Amoro ha tko, ketken̂e sowtatu komo yîwya. On wara tko tî kekn̂e Kporin komo yaka cewomsom, Kaanî mtapotarî ka centacerî tanî rma ka, kekn̂e tî.

37 Ero ke on wara tî kekn̂e Sau Kaan ya, Apa, Piristew komo waparî me kîwce xa hara? Amna ya mar̂mape, Ixaw Yana komo ya? kekn̂e tî. Eikura tko tî ka xakn̂e Kaan ero kaamo po.

38 Ero ke on wara takî tî kekn̂e Sau, Oona amohcoko amyamro sowtatu yantoman̂e komo. Kicicme cehsom ka tîhtînocerî.

39 Yaaro tan wîikesî. Kporin komo nasî waipîn me yaaro, Ixaw Yana komo kurunpen̂e ha, kacho wara rma nasî omtapotarî yaaro xa marha. Omumuru meero kicicme exitaw Xonatas ha noro rma waihyas ha, kekn̂e tî. Eikura ro makî tko tî xatken̂e sowtatu komo.

40 Ero yinhîrî on wara tî kekn̂e Sau Ixaw Yana komo ya, Iito ehcoko amyamro mehxa n̂he. Xehxa was ow omumuru yakro, Xonatas yakro ha. Amoro ha tko, ketken̂e makî tî Ixaw Yana komo.

41 Ero yinhîrî Kporin komo yakro tî nîmtapowakn̂e Sau, ponaro Ixaw Yana komo yehtopo yakro. Apa kah yawno, kicicme ehxapu cma re menpes owya yaaro ha, kekn̂e tî. Ero yinhirî tak men̂ekacho nar̂mekn̂e. Sau komo ponan me tî n̂epîrkekn̂e Xonatas komo ponan me. Sowtatu komo ponan me epîrkara ro makî tî xakn̂e.

42 Ero ke on wara tî kekn̂e Sau, men̂ekacho ar̂macoko xa hara amna yîhtînotome tak, kekn̂e tî. Ar̂metaw tak Xonatas ponan me takî tî n̂epîrkekn̂e okwe.

43 Ero ke Xonatasî ya takî tî kekn̂e Sawru, Ai, okopuci, owya ekatîmko kicicme awehtoponhîrî, kekn̂e tî. On wara tî kekn̂e Xonatas, Weenu wemeu wahra mak oyamoyin poturu pokono mak. Ero poyero kwaihya ham, kekn̂e tî.

44 On wara takî tî kekn̂e Sau, Kaan xa owaikape waipîra awexitaw Xonatas, ero yopo ro mak owîrîmape. Mîwaiyasî men okopuci, kekn̂e tî.

45 On wara tko tî ketken̂e sowtatu komo reha, Xonatas ma re waihya Ixaw Yana komo yukurunpen̂enho, kyopono ro komo yai kukurunpen̂enho ha? Pîra ro mak. Yaaro xa nasî Kporin komo waipîn me, ero wa xa marha yaaro kes amna. Cewn̂e cik noro poci epîrkara nasî roowo pona. Kaan xa noro nakronoma oroto kukurunperî komo poko okre, ketken̂e tî. Ero wa tî Xonatasî n̂ewyometken̂e waipîra ehtome.

46 Ero yinhîrî Piristew komo yar̂maxi xa hara tî tohra xakn̂e Sau. Ero ke cetken̂e takî tî Piristew komo cekenî ro komo pona so hara.

47 Taa, on wara xakn̂e Sau, Ixaw Yana komo kayaritomon me xa tak n̂ehtîkekn̂e. Yiixatî pîn komo yakro tî n̂etar̂mekn̂e roro mehxarpan komo yakro. Moabita komo yakro n̂etar̂mekn̂e, Amonita komo yakro, Eton pono komo yakro, Soba pono komo kayaritomon yakro, Piristew komo yakro, noro yipu komo yakro tî n̂etar̂mekn̂e roro. Ahna na tîcetaw Ixaw Yana komo xatî pîn komo yopo xakn̂e.

48 Anarimaw sowtatu komo nan̂ikyakn̂e. N̂examro yakro takî tî n̂etar̂metken̂e Amarekita komo yakro. Ixaw Yana komo nukurunpekn̂e roro emetanmekn̂enhîrî komo mokuhra tak ehtome. Ero wa tî xakn̂e Sau.

49 Taa, on wara xakn̂e Sau mumuru komo yosotî, Xonatas, Ispi, Mawkisua. On wara tî xakn̂e emsîrî komo yosot hara, Merabe, potuthîrî, Mikaw tak, ponan hara. Ero wa tî xakn̂e Sau xîkrî komo yosotî.

50 Ainowan xakn̂e Sau pici yosotî. Aimas yemsîrî tî mîk xakn̂e. Abin̂e tî xakn̂e Sau sowtatun komo yantoman̂e me. N̂ee mumuru tî mîk xakn̂e Abine. Sau yîîm yakno tî mîk xakn̂e Nee.

51 On wara tî xakn̂e Kisi, Sau yîîm, Nee komo, Abine yîîm ha. Abiew mumuru komo tî mîkyam xatken̂e. Ero wa tî xatken̂e.

52 On wara tî xatken̂e Ixaw Yana komo, kayaritomo me Sau yehtopo yecenarî, Piristew komo yakro tî n̂etar̂metken̂e kar̂pe ro mak. Ero ke on wara tî xakn̂e Sau, kîîrî yeen̂ataw karitî, erasîn, noro yipu nahsîyakn̂e tîsowtatun me. Ero wa tî xakn̂e Sau.