Ero yinhîrî takî tî on wara kekn̂e Samuew Sau ya, Ai Sau, on wara wîîkes awya, Pahxa Kporin komo oyantomekn̂e ahkapetopo poko, tîyanan komo kayaritomon me awitopo poko ha. Ero ke Kporin komo mtapotarî ka entakî xa hara.

2 On wara nîîke Kporin komo awya, Kantoman̂e ro Mîk nîîke, Ixaw Yana komo yepanpu xe tak wasî. Amareke komo n̂etarmetken̂e n̂examro yakro Exitu poi mokyataw so. Ero ke Ixaw Yana komo yepanpu xe tak wasî.

3 Ero ke etoko amoro Amareke komo yar̂maxi. Emyawnonhîrî komo akn̂iko ahnoro. Yîmtora ro mak men esko. Tooto pen marha yîmtora esko. Ahnoro mak waihkatîkakî, kîîrî pen komo, wooxam pen komo, rikomo pen komo, enawnonhîrî pen meero ciki, iyokuthîrî pen komo marha paaka pen, oper̂a pen, kameru pen, buhu pen, noro yipu pen komo waihkakî ahnoro, nîîke awya Kporin komo, kekn̂e tî Samuew.

4 Ero ke takî tî kîrkomo nan̂ikpekn̂e Sau. Ero ke mokyatken̂e Terain pona. Iina mohxapu komo tî nukuknometken̂e. 200.000 tî xatken̂e tîhtarî po tîtosom kom ha. 10.000 marha tî xatken̂e Xuta yepamtho kom hara. Ero wicakî tî mokyatken̂e sowtatu me cehsom komo.

5 Ero ke takî tî Amareke komo yewton mîtkoso takî tî cekn̂e Sau. Iito cexitaw sowtatu komo tî ka n̂en̂epekn̂e anarî komo mak. Tuuna yarinho yaka eseyamtome tî n̂en̂epekn̂e.

6 Ero yinhîrî takî tî on wara kekn̂e Sau Kenew komo ya, Etocoko men amyamro Amarekita komo chei. Iito rma awexitaw so rma kwaihkexe so men okwe n̂examro pen yakro rma. Ixaw Yana komo mîwakretken̂e okre Exitu poi mokyataw so. Ero ke awaika xera so wasî, kekn̂e tî yîwya so. Ero ke cetken̂e takî tî Kenew komo Amarekita komo chei. Ero wa tî cetken̂e.

7 Ero yinhîrî takî tî Amarekita komo takî tî nar̂mekn̂e Sau. Apira pono komo tî nar̂mekn̂e. Miya rorono komo rma tî nar̂mekn̂e, Suru pona rorono kom ha. Exitu mîtwo nai Suru, resce n̂ixa.

8 Akake tî nahsîyakn̂e waihkara rma. Amareke komo kayaritomon mîk xakn̂e Akake. Noro maywenînho pen komo reha tî waihkekn̂e ahnoro kacipara imo ke.

9 Akake reha tî nîmcetken̂e Sau komo, sowtatu komo yakro rma. Amareke komo yokutho marha tî nîmcetken̂e kir̂wan komo makî tî. Oper̂a tî nîmcetken̂e, paaka komo, yupurukrexapu komo, oper̂a xîkrî marha. Ahnoro tî nîmcetken̂e iyokuthîrî komo kir̂wan kom ha. Noro yipu komo pînîn yaw tî xatken̂e waihka xera okwe. Noro pîntho komo reha tî waihketîketken̂e, kar̂pen komo marha.

10-11 Ero yinhîrî tak Kporin komo nîmtapowakn̂e xa hara Samuew yakro. On wara kekn̂e yîwya, Ai Samuew, ahwora wasî Sau cirirî ke owya kayaritomo me. Oyahsîpînkai tak okwe. Omtapotarî yewetîra n̂ehxe okwe, kekn̂e. Ero ke ahwora takî tî xakn̂e Samuew. Kporin komo yakro tî nîmtapowakn̂e cenmakaxi ro. Cerewre ro makî tî nîmtapowakn̂e.

12 Enmarî yakro ro tak Samuew nawomyakn̂e. Sau yenso tî cekn̂e. On wara tko tî ketken̂e iitono komo, Exihra nasî tan Sau. Kahmeru pona toye. Iito tî toopu n̂enpor̂pekn̂e porin, kayaritomo me xa cehtopo yenpotopo me. Ero ciriche Xiwkaw pona takî tî cekn̂e hara, ketken̂e tî.

13 Ero ke Xiwkaw pona tî cekn̂e hara Samuew. Sau yeen̂ataw on wara tî kekn̂e Sau yîwya, Ai apa, mîmoko. Kporin komo nakronomarî me awexi xe wasî. Kporin komo mtapotachonho yaw roro rma ciino wiire, kekn̂e tî.

14 On wara tko tî n̂eyukyakn̂e Samuew, Beee, kacho tko wencesî kahn̂eru mtapotarî hara. Mooo kacho marha wencesî paaka mtapotarî hara. Ahn̂i xanî mtapotarî mîn wence? kekn̂e tî yîwya.

15 On wara tî Sau n̂eyukyakn̂e, Amarekita pen komo yokutho n̂ehce ha re sowtatu komo. Kir̂wan komo mak nîmcetken̂e oper̂a, paaka komo Kporin komo ya tîmsom me ha tî, ponaro awehtopo ya tîmsom me tî. Anarî komo reha amna waihkatîkai, kekn̂e tî.

16 Atîtmamko ka, omtapotarî ka entakî, kekn̂e takî tî Samuew Sau mtaka. Kosope oyakro nîmtapota Kporin komo oyakro. Ero wekatîmyas awya oroto, kekn̂e tî. Taa, ekatîmko ka, kekn̂e tî Sau.

17 On wara tî kekn̂e Samuew yîwya, Pahxa on wara mîxakn̂e, anarî komo xawyakan me mak mesehtînoyakn̂e. Ero wa awexitaw tko Ixaw Yana tribun komo kayaritomon me tak mîxakn̂e. Kporin komo rma ahkapekn̂e Ixaw Yana komo kayaritomon me.

18 Kokon̂oro tak waapa me awen̂epekn̂e. On wara kekn̂e awya, Kicicitho komo mîkyam Amarekita komo. Ero ke waihkaxi etoko. Waihkatîkakî exihra cehso ro, kekn̂e awya.

19 Ahce kacho Kporin komo yewetîra mîxakn̂e okwe. Ahce kacho anar̂mathîrî komo yemyawnonho mahsîyakn̂e yohno ro mak ha? Kicicme mehxe Kporin komo wero ro, kekn̂e tî Samuew.

20 On wara tko tî Sau n̂eyukyakn̂e, Kporin komo rma tko wewehcakn̂e. Noro yanme rma kîwcekn̂e ar̂mano riso. Amareke komo waihkatîkai. Akake mak wekyakn̂e xiya kayaritomonhîrî komo.

21 Sowtatu komo reha nahsîyatken̂e, iyokuthîrî komo, oper̂a komo, paaka komo. Ero mko akn̂itîkacoko kr̂a, kachonho rma re nahsîyatken̂e kir̂wan komo mak. Xiya n̂ekyatken̂e Kporin komo ya tîmsom me, ponaro awehtopo ya tîmsom me ha. Xiwkaw po tî tîmî xe natu yîwya, kekn̂e tî Sau.

22 On wara tko tî Samuew n̂eyukyakn̂e, Ahce wa kexitaw so tawake nai Kporin komo kpoko so awya? Kookuthîrî tîmyataw katî kîwya so takn̂isom me, ahce na tîmyataw marha, ero yipu tîmyataw katî tawake nai kpoko so awya? Tîmtapotarî yewehcataw xa katî kîwya tawake nai kpoko so awya? On wara xa nasî Kporin kom ha, Ahce na tîmtopo poko tawake rma re nasî Noro. Tîmtapotacho yewetîtopo poko xa tawake xa nasî. Tawake rma re nasî oper̂a katîtho tîmtopo poko hara. Cewetîtopo poko xa yo nasî tawake xa takî.

23 Kicicme ro mak nasî Noro yanwetopo, yaskomo me kehtopo wara rma nasî kica. Oyanme ro mak wehsî, kacho nasî ciixaputho poko kehtopo wara rma kica. Kporin komo mtapotarî manwekye ham okwe. Ero poyero tak awanwekyas tak noro hara okwe. Kayaritomo mera tak awîrasî. Ero wa kesî Kporin komo apoko, kekn̂e tî Sau ya.

24 Ero yinhîrî tî on wara kekn̂e Sau Samuew ya, Kicicme wehxe kica. Kporin komo mtapotarî wanwekye ham kica. Amtapotarî marha wanwekye. Omaywen komo pona keraswakn̂e kica. Ero ke n̂examro wewehcakn̂e.

25 On wara tko wîîkes awya, kicicme oyehtoponho cma re mîhcamnoyasî. Oyakro cma re mîmokyasî Kporin komo poko oyahwotachome, kekn̂e.

26 Pîra, awakro mokuhra wasî, kekn̂e Samuew. Kporin komo mtapotachonho manwekye kica. Ero ke Noro marha tak nasî awanwekn̂e me hara. Kayaritomo mera tak awir̂asî, kekn̂e yîwya.

27 Ero wa kache n̂etaknamekn̂e takî tî Samuew tîtotome. Noro pononî tko tî nahsîyakn̂e Sau. Xahrarara kekn̂e tî, n̂etahyaxkekn̂e takî tî Samuew ponontho.

28 Ero yinhîrî on wara kekn̂e Samuew yîwya, Ixaw Yana komo kayaritomon me awehtopo yahyaxkan̂e wara tak nasî Kporin komo. Ahyai tak n̂examro nowyasî, kayaritomon komo mera tak awehtome. Anarî tak n̂iire kayaritomo me amîtwono rma. Noro xa tko nasî kir̂wan̂he ayopo.

29 Kar̂pe Ixaw Yana komo yehtopo xa Mîk Kporin komo. Cemarontanî ro mak Mîk, tîmtapotachonhîrî town̂e pîn marha Mîk tooto pîn kaxi, kekn̂e tî.

30 On wara tko tî kekn̂e xa hara Sau, Kicicme wehxe kica. Wara rma cewetîsom me rma cma re ow menpesî poritomo komo wero ro, oyanan komo wero ro, Ixaw Yana komo wero ro. Ero yinhîrî tak oyakro amoko Kporin komo poko oyahwotachome, ponaro awehtopo poko ha, kekn̂e tî yîwya.

31 Ero ke Sau yakro takî tî cekn̂e Samuew. Ero yimaw tak, Oporin xa Amoro, kekn̂e Sau Kporin komo ya.

32 Ero yinhîrî on wara takî tî kekn̂e Samuew, Akake eeko ohyaka, Amarekita kayaritomonînho, kekn̂e tî. Ero ke noro n̂ekyatken̂e yîhyaka. Tahwore tî mokyakn̂e Akake Samuew yaka. On wara tî kekn̂e, Cerewrem xa mîn kwaihtopo oko. Kwaihyasî men okwe, wîîka cma re, pîra rma ham okre, kekn̂e tî.

33 On wara tko tî kekn̂e Samuew yîwya, Wooxam komo yîmxîkîtho waihkan̂enho amoro okwe akaciparan ke. Ero ke ero wa xa marha tak nasî anocwanînhîrî pen hara. Yîmxîkînî ro mîkro, kacho me tak nasî noro hara wooxam komo ya, kekn̂e tî. Ero wa kache Akake pen takî tî waihkekn̂e Samuew, nakpocakn̂e makî tî. Ero wa tî n̂iir̂akn̂e Xiwkaw po Kporin komo mîtwo rma.

34 Ero yinhîrî Xiwkaw poi takî tî cekn̂e Samuew. Hama pona tî cekn̂e hara. Sau reha tî cekn̂e Xibea pona hara.

35 Ero yinhîrî Sau yenso tohra takî tî xakn̂e Samuew. Twaihtopo pona roro tohra ro makî tî xakn̂e enso. Okwe, okwe, ken̂e ro makî tko tî Sau pînîn yaw. Ahwora tî xakn̂e Kporin komo Ixaw Yana komo kayaritomon me Sau cirirî ke tîwya. Ero wa tî xakn̂e.