Taa, ero yinhîrî takî tî on wara kekn̂e Kporin komo Samuew ya, Atî wicakî pahkî mîwrace Sau pînîn yaw. Ixaw Yana komo kayaritomon mera tak noro wîhtînoyasî. On wara tak wîîkes awya, paaka meretîtho arîhtoko katî ke. Ero yinhîrî esama yaw etoko Beren pona Xese yaka. Yaake nasî noro mumuru komo. Anarî tak men̂ekai Ow kayaritomo me hara, kekn̂e tî yîwya.

2 On wara tko tî Samuew n̂eyukyakn̂e, Ahce wa thakwa re kîwce? Owtotopo men n̂encesî Sau. Entache owaike okwe, kekn̂e tî. On wara tî Kporin komo n̂eyukyakn̂e, Paaka arko awcetaw woosî. Iina awepatakache on wara kasko iitono komo ya, Kporin komo ya tîmsom yakn̂iso kmoko oona, kasko mak.

3 Taa, Xese tak an̂ihko owya tîmsom yakn̂itopo yaka. Ero yimaw poko awehtopo wekatîmyas awya. On̂etacirî tak mîhkapesî kayaritomo me hara, kekn̂e tî.

4 Ero ke Kporin komo mtapotarî yaw roro rma tak cekn̂e Samuew. Beren pona epatakache poritomo komo n̂eraswatken̂e noro pona iitono komo. On wara ketken̂e yîwya, Tawake mîmoko ha? ketken̂e.

5 Nhnk, tawake kmoko, kekn̂e Samuew. Kporin komo ya tîmsom yakn̂iso tan kmoko. Ero ke Kporin komo ponaro xa tak ehcoko amyamro. Ero yinhîrî tak amohcoko oyakro tîmsom yakn̂itopo yenso, kekn̂e tî. Ero yinhîrî Xese tak n̂iir̂akn̂e Kaan ponaro, yumumuru komo marha. N̂examro marha nan̂ikyakn̂e tîmsom yakn̂itopo yenîn̂e me.

6 Mokuche so tak Eriabe takî tî n̂een̂akn̂e Samuew. Tan nai ham Kporin komo yeepatai Noro nîhkaperî, kekn̂e tî.

7 On wara tko tî kekn̂e Kporin komo Samuew ya, Tupunpore ehtopo ponarora ro mak esko, kaw ehtopo ponarora marha esko. Kayaritomo mera moso wîhtînoi. Tooto warahra enîno wiir̂as Ow, Aporin komo. Tupunpore tpoyino komo yehtopo ponaro mak naxe tooto. Yîropotarî ponaro xa matko was Owî reha Aporin kom ha, kekn̂e tî Kaan.

8 Ero yinhîrî Abinatabe takî tî nan̂ikyakn̂e hara Xese. Noro n̂en̂epekn̂e Samuew n̂enîrî me hara. On wara tko tî kekn̂e Samuew, Kporin komo nîhtînoputho pîn moso hara, kekn̂e tî.

9 Ero yinhîrî Sama takî tî n̂en̂epekn̂e Xese Samuew n̂enîrî me hara. Pîra, Kporin komo nîhtînoputho pîn marha moso hara, kekn̂e Samuew.

10 7 tî n̂en̂epekn̂e Xese tumumuru komo Samuew n̂enîrî me. Pîra, Kporin komo nîhtînoputho pîn moxam ahnoro, kekn̂e.

11 Ero yinhîrî on wara kekn̂e Samuew Xese ya, On wicakî mak nai amumuru kom ha? kekn̂e. Nai rma ha re mahtîkîthîrî xa, kekn̂e tî Xese. Meye nai okwe oper̂a yenîrî poko, kekn̂e. Ai ha, kekn̂e Samuew, taa, anîkpoko. Noro mokuche mak tak ceseresmexe, kekn̂e tî.

12 Ero ke noro takî tî nan̂ikpekn̂e Xese. Mîîmo yaka tî mokyakn̂e. Kir̂wan mîk xakn̂e okre, cenporem xa okre. Cewcure xakn̂e, cepatapore ro mak. Ero yimaw on wara tak kekn̂e Kporin komo, Awomko tak. Noro tak yîhkapeko. Noro xa onîhtînoputho ha, kekn̂e tî Kaan.

13 Ero ke paaka meretîtho takî tî nahsîyakn̂e Samuew, katî yen. Noro tak nîhkapekn̂e akno komo wero ro rma. Ero yimaw rma tak Kporin komo Yekatî mokyakn̂e Tapi ropotaka. Yîropotaw tak xakn̂e miya roro. Ero yinhîrî tak Hama pona cekn̂e hara Samuew.

14 Taa, ero yimaw on wara tî xakn̂e Sau, Kporin komo Yekatî tî cekn̂e noro ropotai hara okwe. Ekenhîrî yaka takî tî mokyakn̂e anarî hara ekatî, kicicitho tak. Kporin komo n̂en̂epetho rma tî mîk xakn̂e. Noro takî tî Sau n̂erepokekn̂e okwe.

15 Ero ke on wara takî tî ketken̂e Sau maywen komo yîwya, Apa, on wara awen̂as amna, kicicitho tak awerepoke ekat ham kica. Kaan n̂en̂epetho rma mîk awerepoke. Ero wa awen̂as amna.

16 Ero ke amaywen komo cma re men̂epesî raatî yorkan̂e yepon̂e komo. Yaana yenîche noro tak raatî nîyorkesî an̂entarî me kicicitho mokyataw aropotaka, ekat ha, Kaan n̂en̂epetho mokyataw ha. Iyorketaw tak wara n̂he tak na mai, ketken̂e yîwya.

17 Ero ke on wara takî tî kekn̂e Sau tmaywen komo ya, Taa, raatî yorkan̂e epocoko yaana me iyorkan̂e. Enîche awya so ohyaka ehcoko, kekn̂e tî.

18 Ero yimaw on wara tî kekn̂e anarî yîwya noro maywen ha, Xese mumuru ween̂e Beren pono mumuru. Raatî yorkan̂e mîkî. Erasînî ro mak mîk, sowtatu me cehsom. Takîhso tîmtapotaxmu marha mîk, kîîrî yenpotho marha okre. Kporin komo marha nasî noro yakronoman̂e me.

19 Ero ke an̂ikn̂e komo takî tî n̂en̂epekn̂e Sau Xese yaka. On wara tî ketken̂e yîwya, On wara tî nîîke Sau awya, Amumuru en̂epeko ohyaka Tapi, oper̂a yenîn̂enho ha, nîîke, ketken̂e tî yîwya.

20 Ero ke tooku mkahsî takî tî Xese nakriyakn̂e cuure buhu mkahsî. Wooku marha tî nakriyakn̂e uupa yukun, een yawno, kabritu marha tî. Sau ya tîmsom tî mîn narpekn̂e tumumru ya, Tapi ya.

21 Ero ke Sau yaka takî tî cekn̂e Tapi. Noro maywen me tak xakn̂e. Tapi xe xa tî xakn̂e Sau. Ero ke tukurun yaan̂e me takî tî n̂iir̂akn̂e noro.

22 Ero yinhîrî on wara takî tî kekn̂e Sau Xese ya, Tawake wasî amumuru Tapi poko. Ero ke eroromero ahsî xe wasî omaywen me, kekn̂e tî.

23 Ero ke emapona roro tî raatî nîyorkekn̂e Tapi kicicitho mokyataw Sau ropotaka, Kaan n̂en̂epetho mokyataw, ekat ha. Iyorketaw wara n̂he takî tî xakn̂e Sau, cerepore tî xakn̂e hara. Kicicitho tî cekn̂e yîropotai. Ero wa tî cekn̂e kicicitho ekat ha.