Taa, ero yinhîrî Piristew komo takî tî mokyatken̂e xa hara waapa me kopi. Soko pona tî ka n̂esenmekyatken̂e Xuta yepamtho yewton pona. Epese Tamin pona xa tî cetarî komo n̂iir̂atken̂e. Mehxa xakn̂e Soko, xehxa xakn̂e Aseka hara.

2 Ero ke n̂examro yakro etar̂maxi takî tî cetken̂e Sau Ixaw Yana komo yakro. Era woskaran pona tî n̂iir̂atken̂e cetarî komo. En̂exa takî tî cetken̂e îh pona epanatoso Piristew komo yeepatai.

3 Mehxan po tî xatken̂e Piristew kom hara îh po. Xehxan po tî xatken̂e Ixaw Yana komo îh po. Iyotaw so tî xakn̂e tuuna yaporî.

4 Ero yimaw takî tî sowtatu imo mokyakn̂e Piristew komo yetarî yai, Korias tî mîk xakn̂e noro yosotî. Kace pono tî mîk xakn̂e. Kawno xa tî mîk xakn̂e, 3 metru tî xakn̂e kopi.

5 Yîxapikan tî xakn̂e bronse ciixapu. Ponon marha tî xakn̂e bronse. Tawsîn̂em xa tî mîn xakn̂e ponon, 57 kiru wicakî tî xakn̂e awsîn okyo.

6 Tîhrewomke marha tî xakn̂e bronse ke. Iyahtari tî xakn̂e raapu, ecepu kawno pîn, tawyockem.

7 Raapu marha tî naar̂akn̂e porin xa. Kwahsî mayo wicakno tî mîn xakn̂e ero yecepu okyo. Kuripara tî xakn̂e ero poturu tawsîn̂em xa marha. 7 kiru wicakî tî xakn̂e poturu yawsîn. Noro yecen̂an yaan̂e tî cekn̂e poturme.

8 Taa, on wara tî xakn̂e noro, Korias ha, Ixaw Yana komo yeepatai tî n̂ecececekn̂e mooxe n̂he ha re. Yîwya so tko tî kekn̂e kar̂pe, Ai, Ixaw Yana komo, ahce kacho mîmohce oona? Ahce kacho mepanatacow amna waparî wara? Piristew pîn me katî ow meen̂at ha? Sau maywen pîn katî amyamro? On wara wîîkes awya so apoyino komo men̂ekacoko cewn̂e. Noro tak en̂epecoko oyakro etar̂maxi.

9 Oyopo na nai noro, owaike ha na. Ero wa exitaw awanton komo me tak amna nasî. Noro yopono me tko na wai ow hara, noro pen na waihke ow. Ero wa oyexitaw amna yanton me tak maxe amyamro hara, kekn̂e tî. Kar̂pe tî kekn̂e yîwya so.

10 On wara marha tî kekn̂e, Kar̂pentho me mak keen̂axe so Ixaw Yana komo. Oyakro cetar̂maxmu ka en̂epecoko xiya, kekn̂e tî. Ero wa tî kekn̂e Korias, Piristew ha.

11 Yîmtapotarî yentache tak nahwoketken̂e ro makî tî Sau komo, Ixaw Yana komo. N̂eraswatken̂e xa takî tî kopi. Ero wa tî xatken̂e.

12 Taa, on wara tî xakn̂e Tapi ero yimaw, Eprata pono mumuru tî mîk xakn̂e, Xese mumuru ha. Beren tî xakn̂e n̂examro yewton, Xuta yepamtho yewton ha. 8 tî xatken̂e Xese mumuru komo. Kayaritomo me exitaw Sau poritomo me takî tî xakn̂e yîîm komo.

13 Xese mumuru komo takî tî cetken̂e Sau wenari Piristew komo yakro etar̂maxi, 3 makî tî cetken̂e. Eriabe tî xakn̂e potuthîrî yosot ha. Ponan yosotî xakn̂e, Abinatabe. Ponan yosot hara xakn̂e Sama.

14 Mahtîkîthîrî tî mîk xakn̂e Tapi. Poritomo komo reha tî cetken̂e Sau wenari osorwaw mak.

15 Sau yawnonho rma tî cekn̂e Tapi amn̂e xa so mak. Beren pona roro tî cekn̂e tîîm yoku yenso, oper̂a yenso. Ero wa tî xakn̂e Tapi.

16 Taa, pahkî tî mokyakn̂e Piristew Ixaw Yana komo ya esenposo, 40 kaamo. Enmar̂atîxera tî mokyakn̂e, kokmamr̂atîxera marha. Îh po tî n̂ecececekn̂e. Ero wara roro tî xakn̂e okwe.

17 Ero yimaw on wara tî kekn̂e Xese tumumuru ya, Tapi ya, Okopuci, on arko puruma yupuxapu awakno komo yaka, sowtatu komo yakro naxe, iina arko yîhyaka so. Kumixi yaka enkakî. On marha arko cuure 10 ha. Yohno arko.

18 On marha arko keixu awakno komo yantoman̂e yaka, mil komo yantoman̂e yaka ha. 10 arko ha. Awakno komo yehtopo enko, kir̂wan̂he na natu kachome. Amokyataw hara ahce na eeko yînmîthîrî komo ciki, Kir̂wan̂he nat ham, kachome owya.

19 Era woskaran po tî natu. Iito tî natu Sau komo, Ixaw Yana komo ahnoro. Piristew komo yakro tî n̂etar̂metu iito, kekn̂e tî. Ero wa tî kekn̂e yîîm Tapi ya en̂epetaw.

20-21 Ero ke enmarî yakro ro takî tî pakekn̂e Tapi. Anarî tî nantomekn̂e oper̂a yenîrî poko. Buhu mkahsî tî nakriyakn̂e tînarîrî. Ero yinhîrî takî tî cekn̂e tîîmî mtapotarî yaw roro rma. Sowtatu yetarî yaka takî tî n̂epatakekn̂e sowtatu komo cetaw rma Piristew komo yeepataka. Yuu yuu, ketken̂e tî tîcetaw so. Esepataka ro makî tko tî n̂ecececetken̂e. Mehxa tî xatken̂e Piristew komo, xehxa tî xatken̂e Ixaw Yana kom hara.

22 Iina cepatakache tak tîn̂ekîthîrî tî nîmyakn̂e Tapi sowtatu yemyawno yenîn̂e ya. Ero yinhîrî yohno tî cekn̂e sowtatu komo cheka. Iito rma takî tî takno komo nîmtapotarekn̂e.

23 N̂examro yakro yîmtapowataw Korias takî tî mokyakn̂e xa hara sowtatu imo. Piristew tî mîk xakn̂e, Kace pono. Piristew sowtatun komo yai takî tî mokyakn̂e. Ececetoso tî mokyakn̂e Ixaw Yana komo yeepataka. Cececetotopo ro na tî mokyakn̂e. Ixaw Yana komo tî nîwîrîyakekn̂e xa hara kica. Yîmtapotarî takî tî n̂encekn̂e Tapi.

24 Korias yenîche Ixaw Yana komo takî tî n̂emahciyatken̂e yîhyai. N̂eraswatken̂e xa tî noro pona.

25 On wara tî ketken̂e Ixaw Yana komo, Noro xa hara kopi, enko xe. Ixaw Yana komo yîwîrîyakaxi mokyasî roro kica. Noro waihkacho ponaro xa tî nai kayaritomo. Puranta pen tî nîmya noro waihkan̂enho ya. Cemsîrî marha tî nîmya yipici me. Kayaritomo purantan tîmcoko, kahra marha takî tî nai yîîm ya, iyanan komo ya ahnoro. Ero wa tî noro pen waihkan̂enho n̂epeme kayaritomo, ketken̂e tî.

26 On wara tî kekn̂e Tapi iito ececetoxapu komo ya, Ai, ahce warai ke kepeme kayaritomo moso Piristew waihkache kîwya? Twaihkapore men nai ha Ixaw Yana komo yîwîrîyakara tak ehtome. Piristew mak mexe mîkro, etanpikantho ha. Ahce kacho noro yipu Kaan sowtatun komo n̂îwîrîyake kica? kekn̂e tî.

27 Ero ke takî tî kayaritomo mtapotarî n̂ekatîmyatkekn̂e Tapi ya. Ero wa xa tî noro waihkan̂enho n̂epeme kayaritomo, ketken̂e tî yîwya.

28 Yîmtapotarî tko tî n̂encekn̂e Tapi yakno, Eriabe ha, potuthîrî kom ha. Iitono komo yakro esentacho komo tî n̂encekn̂e. Ero ke takî tî nîrwonakn̂e Tapi poko. On wara tî kekn̂e yîwya, Ahce kacho oona mîmoko? Onoke xa nai oper̂a yenîn̂e me awemtaka hara asak makno yenîn̂e me, pohnîntawno yenîn̂e me ha? Anarî komo yopono me cesehtînosom mak amoro ham kica, kicicme ro mak nai aropotarî ham kica, Amna yetar̂marî yenso mak wa mîmoko oona, kekn̂e tî.

29 On wara tko tî n̂eyukyakn̂e Tapi yîmtaka, Ahce wa ma wex hara awya? Tohnaw ma re wa kmoko awya? kekn̂e tî.

30 Ero yinhîrî anarî komo ya takî tî kekn̂e xa hara Tapi. Ai, ahce ke tî n̂epeme kayaritomo noro waihkan̂enho ha? kekn̂e tî. Yîhcirî me kan̂enhîrî komo wara xa marha tî kekn̂e hara.

31 Ero wa tî nîmtapowakn̂e Tapi sowtatu komo yakro. Yîmtapotachonhîrî tko tî n̂ekatîmyatken̂e Sau ya hara. Ero ke Tapi takî tî nan̂ikpekn̂e Sau.

32 On wara tî kekn̂e Tapi Sau ya, Ai apa, ahwokara ro mak cexpore nasî noro yanme, Piristew yanme. Awanton ow ha. Ow xa kîwcesî etar̂maxi noro yakro, kekn̂e tî.

33 On wara tko tî Sau n̂eyukyakn̂e, Mîîce ha ma re awya noro yakro etar̂maxi? Kar̂pamxan me xa thakwa mas okwe. Noro reha nasî waapa me mehxa ro, kar̂pamxan me cehtoponhîrî n̂ixa ro rma kopi, kekn̂e.

34-35 Kekn̂e rma tko tî Tapi Sau ya, On warai ow awanton ha, apapa yoku yenîn̂e ow oper̂a yenîn̂e. Pahxa reaw mokyakn̂e oper̂a yeskaxi, uhsu marha mokyakn̂e anarimaw hara oper̂a yeskaxi. Noro yipu yetapaxi tak kîwcekn̂e. Oper̂a wowyakn̂e hara yîmtawnonhîrî rma. Oyeska xe re xakn̂e. Yîhpoci poko tko wahsîyakn̂e, wetapekn̂e tak twaihso ro.

36 Reaw waihkan̂enho ow, uhsu waihkan̂enho marha. N̂examro pen wara rma tak nas amn̂e noro hara Piristew ha. Kaan sowtatun komo nîwîrîyakesî kica waipînî ro sowtatun kom ha. Ero ke ero wa wiirasî noro pen hara.

37 Okurunpekn̂e Kporin komo oyahsîra ehtome reaw, oyahsîra ehtome uhsu hara. Ero ke oparaxka xe exitaw noro, Piristew ha, okurunpesî rma hara, kekn̂e tî. Ero wa tî kekn̂e Tapi Sau ya. Taa, kekn̂e takî tî Sau, etoko rma. Awakronoma xe wasî Kporin komo ya, kekn̂e makî tî yîwya.

38 Ero ke tpononî rma takî tî Sau namrupekn̂e Tapi ya, kuripara. Tawrutarî tî namrupekn̂e yîywa kuripara. Tîxapikan marha namrupekn̂e yîwya bronse hara.

39 Ero yinhîrî Sau kaciparan takî tî n̂imiyakn̂e Tapi tponon poko rma, kuripara poko ha. Ero ke takî tî ero yipu yaw tîtotopo nukukmekn̂e Tapi. Pîra ro mak was okwe, kekn̂e takî tî. On yaw tohra ro mak was okwe on yipu yaw tohnînhîrî kaxi thakwa, kekn̂e tî. Ero ke tî Sau ponontho mohkekn̂e hara Tapi.

40 Ero yinhîrî cekn̂e takî tî Tapi tamoyin ke cemyarke mak tak. Aporî wacetaw toopuci tî men̂ekekn̂e tmemehsem kom ha, 5 mak. Ero takî tî n̂enkayakn̂e tukumixin yaka. Tamorî yaw reha tî naar̂akn̂e toopuci yar̂macho, tawyockem ha. Ero wa tî cekn̂e Piristew wece.

41 Ero yimaw noro marha tî mokyakn̂e Tapi wece hara. Noro yecen̂an yaan̂e tî mokyakn̂e poturme.

42 Ero yimaw takî tî Tapi wece tî n̂een̂akn̂e Korias. Kar̂pamxan me exirî tî n̂een̂akn̂e. Tupunpore exirî marha tî n̂een̂akn̂e cewcure exirî ha. Kar̂pentho me ro makî tî n̂een̂akn̂e.

43 On wara tî kekn̂e Tapi ya, Ahce wa ow meen̂a hara kopi? Xaparitho mak katî ow awya? Ero wa oyenîrî ke na amoyi ke cemyarke mak mîmokya owece ha? kekn̂e tî. Ero yinhîrî takî tî ponaro cehtopo komo ya Tapi pen n̂eremkapekn̂e.

44 Amoko xiya ha, kekn̂e tî Tapi ya. Kwacinama yotî me kr̂a war̂mesî apunthîrî, kamara yotî me marha, kekn̂e tî yîwya.

45 On wara tko tî Tapi n̂eyukyakn̂e, Owece mîmokyasî akaciparan ke cemyarke mak, raapu ke marha kawno ke, kawno pîn ke marha. Ero yipu mak mekyasî owece. Owî reha kmokyasî awece Kporin komo yosotî ponaro, kantoman̂e ro yosotî ponaro ha. Kaan xa Mîk ha, Ixaw Yana komo sowtatun yaan̂e ha. Noro yipu mîwîrîyakesî kica. Noro yosotî ponaro mak awece kmokyasî owî reha.

46 Oroto rma awar̂mapesî Kporin komo owya. Ketapesî kr̂a tak, kîpîmkocesî marha. Piristew sowtatun komo puntho marha wîmyasî kwacinama komo yot me, kamara komo yot me ha . Ero wa awar̂mapexe so Kporin komo owya, Kaan xa nai ham Ixaw Yana komo chew, kachome tak roowo poko hakno komo ya. Ero wa kexe amn̂e.

47 On wara marha tak kexe moxam oona esenmexapu komo ahnoro, Yukurunpeno riin̂e xa Mîk ham Kporin komo kacipara ken̂ehra mak, raapu ken̂ehra marha, kexe. Ero ke Noro yanme xa amna n̂etar̂mesî awakro so. Noro xa tak awar̂mapexe so amna ya, kekn̂e tî. Ero wa tî kekn̂e Tapi Piristew ya.

48 Ero yimaw tak meyehra n̂he takî tî mokyakn̂e Piristew Tapi paraxkachome. Ero ke karpe xa marha Tapi cekn̂e sowtatu komo wece hara, Piristew wece xa.

49 On wara takî tî xakn̂e Tapi, tukumixin yawno takî tî mohkekn̂e toopuci. Ero takî tî nar̂mai ar̂macho ke ciki. Piristew pen takî tî n̂etapekn̂e perî poko oko. Yîhtîpîrî tawkaxi ro tî n̂ewomyakn̂e toopuci oko. Ero yanme takî tî n̂epîrkekn̂e Korias pen cewnapo.

50 Ero yipu ke tî Piristew nar̂mekn̂e Tapi, toopu yar̂macho ke cik mak, toopuci ke marha. Ero yipu ke makî tî waihkekn̂e. Kacipara imo exihra ro makî tî xakn̂e Tapi yaw.

51 Ero yinhîrî takî tî Tapi n̂emahciyakn̂e Piristew yaka. Epona tî n̂ecececekn̂e. Noro pen kaciparantho rma tî mohkekn̂e. Ero ke rma tî nîmpîmkocekn̂e waihkachome xa tak. Piristew komo tî n̂een̂atken̂e noro pen waihkacho, pona tîwya so entoponhîrî komo pen waihkacho ha. Ero ke takî tî n̂emahciyatken̂e ro mak.

52 Ero ke Ixaw Yana komo takî tî cetken̂e Piristew komo waihkaxi. Xuta yepamtho komo yakro rma tî weken̂emekyatken̂e. Yahya ketken̂e tî weken̂emekrî komo me. Miya rma tî weken̂emekyatken̂e Kace potaka rma, Ekron potaka marha. Piristew pen yokoputho komo takî tî xatken̂e Saarain yesamarî porero, paraxkaxapu komo yokoputho ha. Miya roro tî xakn̂e okoputhîrî komo mer̂pora, Kace pona roro, Ekron pona roro marha.

53 Ero yinhîrî takî tî Piristew komo weken̂emekn̂enho komo mokyatken̂e hara n̂examro pen yetatho yaka. Emyawnonhîrî komo takî tî nahsîtîketken̂e.

54 Taa, on wara takî tî xakn̂e Tapi, Korias pen pîtho tî naar̂akn̂e Xerusaren pona. Noro pen ponontho reha tî nakriyakn̂e tîmîn yaka, kuripara ciixapu ha.

55 Taa, on wara tî xakn̂e Sau Tapi yeen̂ataw, Piristew wece torî yeen̂ataw, on wara tî kekn̂e Abine ya, tîsowtatun komo yantoman̂e ya, Ai Abine, onok mumuru mîk kar̂pamxan ha? kekn̂e tî. On wara tî Abine n̂eyuyakn̂e, Apo ha na. Onok mumuru na mîkro? Camkî mak was apa. Yaaro tan wîîkes awya, kekn̂e tî.

56 On wara tî kekn̂e kayaritomo, Entata ika noro yîîm yosotî, kekn̂e tî yîwya.

57 Ero yinhîrî takî tî Tapi n̂etîramekn̂e hara Piristew waihkan̂enho. Ero yimaw takî tî noro naar̂akn̂e Abine Sau yaka. Piristew pîtho ke cemyarke rma tî cekn̂e Tapi yîhyaka.

58 On wara tî Sau kekn̂e yîwya. Okopuci, onok mumuru amoro? kekn̂e tî yîwya. On wara tî Tapi n̂eyukyakn̂e, Awanton mumuru ow ha Xese mumuru, Beren pono mumuru ha, kekn̂e tî. Ero wa tî kekn̂e Tapi.