Taa, on wara takî tî xakn̂e Xonatas ero yimaw, Sau yakro Tapi mtapotarî ka n̂encekn̂e. Ero yimaw takî tî yiixe xa takî tî n̂ehtîkekn̂e. Tupun xe rma xakn̂e ero wa xa marha tî noro xe xakn̂e hara. Ero wa takî tî xakn̂e Xonatas Tapi poko.

2 Ero yimaw rma tî Tapi nahsîyakn̂e Sau tantonî ro me. En̂epera takî tî xakn̂e yîîm yaka hara.

3-4 Ero yimaw tî Xonatas nîmtapowakn̂e Tapi yakro cetakronomacho komo poko. Ero wa tî nîmtapowakn̂e Xonatas Tapi xe xa cexiri ke. Tupun xe rma xakn̂e ero wa xa marha tî yiixe xakn̂e. Tpononthîrî rma tî mohkekn̂e kawno Tapi ya tîmtome. Tawrutathîrî marha tî nîmyakn̂e yîwya kuripara. Tîkaciparanthîrî, tîkrapanthîrî, taan̂apotunthîrî, ero warai komo tî nîmyakn̂e Xonatas Tapi ya.

5 Taa, mîn hak poko takî tî Tapi nantomekn̂e Sau. Ahce na poko antomache takîhso makî tî n̂iir̂akn̂e. Ero ke sowtatu yantoman̂e me takî tî Tapi n̂iir̂akn̂e Sau, mer̂pono pîn yantoman̂e me tak ha. Tawake tî xatken̂e Ixaw Yana komo sowtatu yantoman̂e me cirirî ke. Sau maywen komo marha tî xatken̂e tawake. Ero wa tî xatken̂e Tapi poko.

6-7 On wara takî tî xatken̂e wooxam kom hara Ixaw Yana kom ha. Ero yimaw tî sowtatu n̂etîrametken̂e Piristew waihkache Tapi ya. Etîrametaw so wooxam komo takî tî n̂epataketken̂e ahnoro Ixaw Yana komo yewton poi. Sau yakro esepotpona tî cetken̂e. Waano tî naar̂atken̂e. Maraka tî nîyorketken̂e. Raatî marha tî nîyorketken̂e. Manatken̂e marha. Manataw so on wara tî ketken̂e waano me, Emapona roro 1.000 komo waihkai okre Sau. Emapona roro marha 10.000 komo waihkai okre Tapi, kacho tî naar̂atken̂e. Ero wa kacho tî naar̂atken̂e waano wooxam komo.

8-9 Ero wa kacho yentache nîrwonakn̂e xa takî tî Sau. Cewresawra ro makî tî wooxam komo wanorî n̂encekn̂e. On wara tî kekn̂e, 10.000 komo waihkai Tapi emapona roro, kexe wooxam komo. 1.000 komo waihkai Sau emapona roro, kexe mak kica opoko hara. Noro xawyakan me mak oyetacaxe kica. Kayaritomo yopono me katî wa ciri xe natu Tapi? kekn̂e tî. Ero yinhîrî cewresawno mera takî tî Tapi n̂een̂akn̂e kica miya roro. Ero wa tî xakn̂e Sau kica.

10-11 Enmapuche hara kicicitho takî tî mokyakn̂e xa hara ekatî Sau ropotaka, Kaan n̂en̂epetho rma ha. Ero yimaw Kaanî mtapotarî yekatîmn̂e wara rma tî re nîmtapowakn̂e Sau tîmîn yaw rma. Ero yimaw marha tî tîratîn nîyorkekn̂e Tapi, nîyorkekn̂e roro, cehtopo ro yaw roro rma. Iyorketaw Sau tî xakn̂e rah ke cemyarke. Ero yimaw takî tî Tapi wece nar̂mekn̂e raapu oko. On wara tî kekn̂e tîropotaw, Tapi wîtwesî mîîmo wacan pona twoso ro mak on ke rah ke, kekn̂e tî oko. N̂emahciyakn̂e tko tî Tapi asakî ro.

12 Ero yimaw takî tî n̂eraswakn̂e takî tî Sau Tapi pona. Kporin komo tî n̂een̂akn̂e Tapi yakronoman̂e me xa. Sau pen yakronoman̂e me exihra ro mak takî reha tî xakn̂e. Ero ke tî n̂eraswakn̂e Tapi pona.

13 Ero ke tîhyai tî Tapi n̂en̂epekn̂e hara. Sowtatu komo yantoman̂e me tî n̂iir̂akn̂e 1.000 komo yantoman̂e me. Noro yipu komo takî tî naar̂akn̂e Tapi, n̂ekyakn̂e hara. Ixaw Yana komo wero ro rma ero poko xakn̂e.

14 Ahce na poko exitaw Tapi takîhso xa tî n̂iir̂akn̂e. Ero wa tî xakn̂e Tapi Kporin komo ya takronomarî ke.

15 Takîhso xa Tapi yehtopo tî n̂een̂akn̂e Sau. Ero ke n̂eraswakn̂e xa takî tî noro pona.

16 Ero warahra tko tî xatken̂e Ixaw Yana komo, Xuta yepamtho komo marha. Tapi xe tî xatken̂e n̂examro reha taan̂e komo me exirî ke sowtatu me tîcetaw so.

17 Ero yinhîrî on wara takî tî kekn̂e Sau Tapi ya, Moso oyemsîrî Merabe ha. Takno yopono moso ewrutoponhîrî. Apici me wîmyasî moso. On wara makî tko wîîkes awya, Erasîn me ro mak etoko roro sowtatu me. Kporin komo xatî pîn komo waparî me etok ha, kekn̂e tî. On wara tko tî kekn̂e Sau tîropotaw, Tapi waihkara was ow. Piristew komo xa waihkacowpe n̂examro waparî me toche, kekn̂e tî kica.

18 On wara tko tî Tapi n̂eyukyakn̂e, Noro pîntho mak ow. Noro pîntho marha apapa yanan komo. Amna ponarora ro mak naxe Ixaw Yana komo. Ero ke ahce kacho kayaritomo woxin me wai hara? kekn̂e tî. Ero wa makî tî kekn̂e Tapi Sau yemsîrî poko.

19 Ero yinhîrî Sau yemsîrî Merabe tîmtopo me exitaw tak Tapi ya anarî ya xa matko tî nîmyakn̂e yîîm okwe. Atîriew ya tî nîmyakn̂e okwe yipici me Meora pono ya.

20 Taa, anarî tî xakn̂e hara Sau yemsîrî Mikaw tî osotî. Tapi xe tî xakn̂e noro. Tapi xe ehtopo tî n̂ekatîmyatken̂e Sau ya noro maywen komo. Saw yewresaw tî ero wa xakn̂e.

21 On wara tî kekn̂e tîhnaw, Tapi pici me wîmyasî noro oyemsîrî. Noro pînînke tak Piristew komo yarmaxi nîîce, noro penî kra tak n̂examro waihketu, kekn̂e tî. Ero ke on wara takî tî kekn̂e Tapi ya yipihtotopo poko xa hara, Nasî rma tko anarî oyemsîrî, ponan xa hara. Ero ke owoxin me rma mas oroto, kekn̂e tî yîwya.

22 Ero yinhîrî on wara takî tî kekn̂e Sau tmaywen komo ya, Ai, on wara men kacoko Tapi ya ahto so na awexitaw so noro yakro, Ai oyakno, aaxe tî nai Sau. Noro maywen komo marha tî natu aaxe. Ero ke noro woxin me tak esko, kacoko yîwya, kekn̂e tî.

23 Ero ke ero wara rma tî ketken̂e Tapi ya. On wara tko tî Tapi n̂eyukyakn̂e, Ahce wa thakwa re kayaritomo woxin me wai okwe? Yupurantamnî thakwa ow okwe. Esekaiporen marha ow, kekn̂e tî.

24-25 Ero ke Tapi mtapotarî tî n̂ekatîmyatken̂e Sau ya hara noro maywen komo. Ero yentache on wara tî kekn̂e Sau yîwya so, On wara kacoko Tapi ya, Puranta xera tî nai kayaritomo cemsîrî yepetho me. 100 Piristew komo makî tî mîwaike. Anpichothîrî komo tî mekya yîhyaka enpotome yîwya. Ero xe makî tî nai cemsîrî yepetho me tîîxatî pîn komo waihkacho ha, kacoko yîwya, kekn̂e Sau. On wara tko tî kekn̂e Sau tîhnaw, Tapi penî kr̂a tak waiketu Piristew komo, kekn̂e tî kica.

26 Ero ke Sau mtapotarî takî tî n̂ekatîmyatken̂e hara noro maywen komo Tapi ya. Ero yentache kayaritomo woxin me cexi xe rma takî tî xakn̂e Tapi. Enatîra rma tî ka xakn̂e enmarî, Ero wicakî mak n̂enmape Piristew pen komo yanpichotho komo yehtome Tapi ya, kachonho Sau ya.

27 Ero ke yohno rma tî cekn̂e Tapi tmaywen komo yakro Piristew pen komo waparî me. N̂examro pen waihketken̂e 200. Anpichothîrî tî n̂ekyakn̂e Tapi Sau yaka yunkuknomathîrî yopono. Yîwya tî nîmyakn̂e kayaritomo woxin me tak cehtome. Ero ke cemsîrî takî tî nîmyakn̂e Sau yîwya, Mikaw, yipici me.

28-29 Ero yimaw tak Kporin komo nakronomarî me xa takî tî Tapi n̂een̂akn̂e Sau. Tapi xatî me marha tî cemsîrî n̂een̂akn̂e. Ero ke n̂erahtîmtîkekn̂e takî tî Sau Tapi pona. Yiixatî pîn me roro takî tî n̂ehtîkekn̂e okwe.

30 Ero yimaw waapa me rma tî mokyatken̂e roro Piristew komo Ixaw Yana komo waparî me. Mokuche roro tko takîhso tî xakn̂e Tapi n̂examro pen yakro cetar̂macho poko. Anarî komo yopo tî xakn̂e Tapi takîhso, Sau maywen komo yopo. Ero ke Tapi yosotî takî tî n̂ekaiwakn̂e xa tak, takîhsom me xa tak. Ero wa tî xakn̂e Tapi.