Ero yinhîrî on wara takî tî kekn̂e Sau tumumuru ya Xonatas ya, Tapi kra waihkakî, kekn̂e tî. Ero wa xa marha tî kekn̂e tmaywen komo ya hara. Tapi xe rma tko tî xakn̂e Xonatas. Yiixe ro makî tî xakn̂e.

2 Ero ke tî Tapi weronomekn̂e. On wara tî kekn̂e yîwya, Ai, apapa tî nai awaika xe okwe. Ero ke pahxaxa men eseyamko. Iito men ka esko epatakara.

3 Apapa yakro kmokyasî mararî pona iipo masî ceseyamso ero pona. Noro yakro kîmtapowasî apoko. Yîmtapotarî yentache tak wekatîmyasî awya amn̂e, kekn̂e tî.

4 Ero ke enmapuche takî tî tîîm yakro nîmtapowakn̂e Xonatas yîrwoxinkachome Tapi poko. On wara tî kekn̂e, Apa, kicicme exihra ro makî cma re masî Tapi poko. Awanton mîkî. Kicicme exihra xakn̂e apoko. Awakronoman̂e me xa matko nasî miya xe xa okre.

5 Piristew pen waihkaxi noro cekn̂e twaihîrî yaro rma okwe. Ero ke Piristew komo yopono me takî tî xatken̂e Ixaw Yana kom okre. Ero wa tî xatken̂e Kporin komo yanme rma. Iyopono me exirî komo rma meen̂akn̂e. Tawake mîxakn̂e okre. Ero ke ahce kacho kicicme awexi xe tak mai? Ahce kacho Tapi waihka xe tak mai kicicme exihnî ro mak okwe? kekn̂e tî.

6 Xonatasî mtapotari tî n̂encekn̂e Sau. Ero ke on wara tî kekn̂e yîwya, Yaaro xa tan wîîkes awya, Tapi waihkara wasî. Yaaro, Kporin komo nasî waipînî ro me, ero wa xa marha yaaro wîîkesî cemaro pîn me ro mak. Waipîra nasî Tapi, wîîkesî, kekn̂e tî.

7 Ero ke Tapi tî nan̂ikyakn̂e Xonatas. Sau mtapotachonho takî tî n̂ekatîmtîkekn̂e yîwya. Sau yaka marha tî naar̂akn̂e. Ero yinhîrî takî tî Sau yaw xa hara xakn̂e Tapi pahxa xakn̂e ero wara rma.

8 Ero yinhîrî takî tî Piristew komo mokyatken̂e xa hara Ixaw Yana komo waparî me. Ero ke akro so tî etar̂maxi cekn̂e xa hara Tapi. Kar̂pe tî n̂etar̂mekn̂e akro so. Ero ke takî tî n̂emahciyatken̂e. Ero wa tî Piristew komo nar̂mekn̂e Tapi.

9 Ero yinhîrî kicicitho takî tî mokyakn̂e xa hara ekatî Sau ropotaka. Kporin komo n̂en̂epetho rma tî mîk xakn̂e. Tîmîn yaw tî xakn̂e Sau ceremaxi. Ero yimaw tîhrahnu nahsîyakn̂e ratî yorketaw Tapi ya.

10 Ero yinhîrî tak Tapi pen paraxka xe xa hara tî xakn̂e okwe. Two xe tî xakn̂e rah ke rma mîîmo wacan poko. N̂emahciyakn̂e xa hara tko tî Tapi. Mîîmo wacan makî tî Sau wekn̂e tîrahnu ke, pom knoi. Ero ke takî tî n̂emahciyakn̂e Tapi ero po rma kosope.

11 Ero po marha tî sowtatu komo n̂en̂epekn̂e Sau Tapi mîn wamton̂e komo. Enmapuche men Tapi waihkacoko, kekn̂e tî yîwya so. Mikaw tko tî n̂encekn̂e, yipici. Ero ke tî ciin̂o weronomekn̂e. Oroto kosope emahcira awexitaw pahxaxa men tî awaiketu okwe, kekn̂e tî yîwya.

12 Ero ke mîîmo yewkanapan yaro tî Tapi n̂enîhcekn̂e Mikaw. N̂emahciyakn̂e takî tî Tapi Sau maywen komo n̂enîhtorî me rma. Ero wa tî n̂emahciyakn̂e Tapi.

13 Ero yinhîrî tooto warai me ciixapu takî tî nîrapekn̂e Mikaw cetîrapotopo komo pona. Kabra pocitho kahxapu tî n̂iir̂akn̂e yîhtîpîrî warai me. Ero takî tî n̂eewopon̂akn̂e. Ero wa tî n̂iir̂akn̂e Mikaw.

14 Ero yinhîrî sowtatu komo takî tî n̂en̂epekn̂e Sau Tapi yahsîso. On wara tko tî kekn̂e Mikaw yîwya so. Namotoyas okwe Tapi, kekn̂e tî yîwya so.

15 Sowtatu komo tko tî n̂en̂epekn̂e xa hara Sau Tapi yahsîso. On wara tî kekn̂e yîwya so, Etîrapotopo po rma ehcoko ohyaka waihkachome kr̂a owya, kekn̂e tî yîwya so.

16 Tapi mîn yaka cewomuche so tooto warai me ciixaputho makî tî n̂een̂atken̂e etîrapotopo po. Kabra pocitho tî xakn̂e yîhtîpîrî warai.

17 Ero yinhîrî on wara tî kekn̂e Sau Mikaw ya, Ahce kacho ero wa ow memîknopu kica. Yiixera oyehtopo men̂epew. N̂emahciw tak ham okwe, kekn̂e tî. On wara tko tî Mikaw n̂eyukyakn̂e, On wara nîîkai kopi owya, Ow men en̂epeko. Ahce kacho kwaihke okwe, kai owya. Ero ke thakwa wen̂epew, kekn̂e tî.

18 Taa, ero wara n̂emahciyakn̂e Tapi. Ero yimaw takî tî Samuew yaka tî cekn̂e hara Hama pona. Iito cexitaw takî tî twaika xe Sau yehtoponho n̂ekatîmtîkekn̂e yîwya. Ero yinhîrî takî tî Samuew cekn̂e Naioce pona. Tapi tî naar̂akn̂e iina. Iito tî n̂enmayatken̂e.

19 Tapi totopo tko tî n̂encekn̂e Sau. Meye nai Tapi Naioce po, Hama pono po, kacho tî n̂encekn̂e.

20 Ero ke Tapi yahsîn̂e komo tî n̂en̂epekn̂e Sau iina. N̂examro toche ewto pona weronomano rin̂e komo tî n̂een̂atken̂e iito re. Kaanî mtapotarî tî n̂ekatîmyatken̂e ero yimaw. Samuew tî xakn̂e panatanmekn̂e me. N̂examro yenîche rma takî tî Kaan Yekatî mokyakn̂e yîropotaka so, Sau maywen komo ropotaka rma. Noro yanme tak n̂examro meero tî n̂ekatîmyatken̂e Kaanî mtapotarî kopi.

21 Ero yinhîrî yîn̂en̂epethîrî komo yehtopo tî n̂encekn̂e Sau. Ero ke anarî komo xa hara tî n̂en̂epekn̂e Tapi yahsîn̂e komo. N̂examro marha tî n̂ekatîmyatken̂e Kaanî mtapotarî. Ero yinhîrî tak anarî komo xa hara tî n̂en̂epekn̂e Sau Tapi yahsîn̂e komo. 3 ro takî tî xakn̂e yîwya en̂epetoponhîrî. N̂examro meero tî n̂ekatîmyatken̂e Kaanî mtapotarî.

22 Ero ke Sau rma takî tî cekn̂e Hama yesamarî yaw. Seku pona tî ka cekn̂e tuuna ahtoxapu yaka, porin yaka. Ahto natu Samuew komo, Tapi komo? kekn̂e tî iitono komo ya. Naioce po tî natu Hama pono po ha, ketken̂e tî yîwya.

23 Ero ke Naioce pona tî cekn̂e Sau, Hama pono yaka. Noro pona xa marha tko tî mokyakn̂e Kaan Yekatî. Ero ke n̂examro wa xa marha tî n̂ekatîmyakn̂e Kaanî mtapotarî. Esama yaw tîcetaw rma tî n̂ekatîmyakn̂e. Miya roro tî n̂ekatîmyakn̂e, Naioce pona roro tîcetaw rma.

24 Tponon takî tî mohkekn̂e. N̂etîrapekn̂e takî tî ponomra ro mak. Samuew yeepatai rma tî n̂ekatîmyakn̂e Kaanî mtapotarî. Ero wa tî xakn̂e kokmamso ro, cenmakaxi ro marha. Ero wa tî xakn̂e Sau. Ero wa exirî ke on wara kexe Ixaw Yana komo, Sau ma nai ke weronomano rin̂e me kopi, kexe. Ero wa kexe. Ero wa tî xakn̂e Sau iito Naioce po, Hama pono po.