Taa, Naioce poi takî tî cekn̂e Tapi, n̂emahciyakn̂e tî. Xonatas yaka tî cekn̂e. On wara tî kekn̂e yîwya, Ai oyakno, ahce wa xa wai aamo ya? Ahce wa oyexirî ke akpîn me oyen̂a? Ahce wa oyexirî ke kicicme oyen̂a? Owaika xe mak nas okwe, kekn̂e tî yîwya.

2 Pîra ro mak, kekn̂e tko tî Xonatas. Waipîra wa mas ha. On wara nasî apapa, ahce wa na ciino ciri xe cexitaw n̂ekatîmyas owya. Ero wa nasî ero pîntho poko, keserepokacho poko marha. Ahce kacho ekatîmra nai owya apoko tîrwonîmtopo? Pîra ro mak nai owya, kekn̂e tî.

3 Pîra ha men, kekn̂e tko tî Tapi. Yaaro men tan wîîkes awya, Yaaro Kporin komo nasî waipînî ro me, yaaro mas amoro hara waipîn me. Ero wa xa marha yaaro tan wîîkesî, cemaro pîn me. Pahnoke ro mak nasî owaitopo okwe. On wara nas aamo, ooxe awehtopo n̂een̂asî. Ero ke on wara na nîîke, Xonatas ya ekatîmra wasî Tapi waihkacho ahwokara ehtome, nîîke xa ha na, kekn̂e tî.

4 Ai ha, kekn̂e tî Xonatas. Taa, ahce wa tak kakronome? Awanme mak oyexi xe wasî. Ero ke kasko owya, kekn̂e tî.

5 Ero ke on wara tî kekn̂e Tapi, On wara wîîkesî, pahxaxa keseresmacho me tak nai nuun̂i yepatakacho yimawno. Kayaritomo yakro ceseresmaxmu me roro cma re wasî. Owto xe tko wasî eseyamso woskara pona. Iito cma re oyexi xe wasî osorwaw kaamo. Kokon̂i cehso ro iito oyexi xe wasî.

6 Ahto nai Tapi? ketaw aamo ya on wara kasko yîwya, On wara kai Tapi owya, Owto xe wasî Beren pona apapa yewton pona. Iina mokyaxe amna yanan komo ahnoro Kporin komo ya tîmsom yakn̂itome. Yicimn̂ipuntaxera ero wa naxe. Ero wa xa marha naxe pahxaxa, kai owya. Cerewre kai, mîîkesî cma re yîwya.

7 Taa, ero wa ham, ketaw mak noro awya, waikacho ponarora nai ham, mîîkesî. Yîrwonataw xa tko, Tapi waihka xe men nai ham okwe, kasko tak.

8 Amoro reha cma re ow makronomesî. Mîmtapowakn̂e ketkurunpetopo poko. Kporin komo n̂entarî me rma mîmtapowakn̂e. Ero ke cma re ow makronomesî. Kicicme oyexitaw tko amoro rma ow waihkakî. Ahce kacho ow mîwaikape aamo ya? kekn̂e tî Tapi.

9 Pîra ro mak, kekn̂e tî Xonatas. Awaika xe apapa yehtopo yencetaw owya wekatîmyasî ro mak awya, kekn̂e tî.

10 Taa, tîrwon̂e aweyukyataw aamo opoko onoke xa owya n̂ekatîmya? kekn̂e tî Tapi.

11 On wara tî Xonatasî n̂eyukyakn̂e, Amok ha. Woskara pona kaika, kekn̂e tî. Ero ke iina tî cetken̂e.

12 Iito takî tî on wara kekn̂e Xonatas Tapi ya, Yaaro tan wîîkes awya, Kaan n̂entarî me rma tan wîîkesî, Ixaw Yana komo Porin n̂entarî me ha. Mîk ha mehxan po tak apapa mtapotarî wencesî apoko. Tawake exitaw apoko wekatîmyas awya.

13 Awaika xe exitaw reha ero marha wekatîmyas awya. Waipîra awehtome ken̂epesî. Yaaro tan wîîkes awya, owaika xe wasî Kporin komo ya ekatîmra oyexitaw awya. Awakronoma xe was amn̂e Kporin komo ya apapa nakronomesî ero wa xa marha.

14 Ero ke on wara cma re masî opoko miya roro owaitopo pona roro, opînîn yaw cma re masî, Kporin komo nasî kîpînîn yaw so, ero wa xa marha masî. Ero wa masî opoko waipîra oyehtome.

15 Oyepamtho komo cma re makronomesî miya roro. Pahxaro aaxatî pîn komo waihyaxe roowo po exihra ro mak tak cehso ro ero yimaw meero cma re oyepamtho komo yîpînînkara ro mak masî, kekn̂e tî. Ero wa tî kekn̂e Xonatas Tapi ya.

16 Ero yinhîrî on wara tî kamexpekn̂e Xonatas Tapi ya, Awaikara ro mak wasî, awepamthîrî komo marha waihkara was amn̂e, mîîkesî cma re owya, kekkn̂e tî. Ero ke ero wara rma tî kekn̂e Tapi. Yaaro xa tan wîîkesî, kekn̂e. Owaikan̂e komo yekî xe wasî Kporin komo ya ero wa kacho yaw roro exihra oyexitaw, kekn̂e tî.

17 Ero yinhîrî ero wa xa hara tî kamexpekn̂e Xonatas Tapi ya yiixe ro mak cexirî ke. Ero wa kasko xa hara, kekn̂e tî yîwya. Tapi xatî xa mîk xakn̂e Xonatas. Tîîxe rma xakn̂e ero wa xa marha tî Tapi xe xakn̂e. Ero wa tî xakn̂e.

18 Ero yinhîrî takî tî on wara kekn̂e Xonatas Tapi ya, Pahxaxa nasî keseremacho komo nuun̂i yepatakacho yimawno. Aponaro men nas apapa awaponî ro po exihra awexirî ke.

19 Mîk ha mehxan po tak kokon̂i etoko xa hara aweseyamtoponhîrî na, kokon̂oro meseyamye iina xa hara. Iito tak esko Esew Topun yexenaw.

20 Ero yawxari war̂mesî waiwî osorwaw. Ahce na wo xatî wara mak war̂mesî.

21 Ero yinhîrî rikomo wen̂epesî waiwî wece. On wara na wîîke yîwya, Enko, xehxa nasî waiwî meyehra n̂he. Epota, wîîke ha na yîwya. Ero wa ketaw owya amok ha. Awaika xera nai apapa, kacho rma ero wa kacho. Yaaro xa waipînî ro me nasî Kporin komo ero wa xa marha yaaro nasî omtapotarî cemaro pîn me ro mak.

22 Anarimaw on wara na wîîke rikomo ya, Miya enko, mehxa nasî waiwî, wîîke na. Ero wa ketaw owya awtotopo thakwa tak yîhtînoko, Kporin komo rma oyen̂epe ham, kasko.

23 Taa, etpînîn yaw kehtopo komo poko tîmtapota ero ponaro men esko miya roro yîhcamnopîra ro mak. Kporin komo xa nasî kenîn̂e me ero wa kacho yaw roro kehtome miya roro yîtîhkan me ro mak, kekn̂e. Ero wa tî kekn̂e Xonatas Tapi ya.

24 Ero ke woskara pona takî tî n̂eseyamyakn̂e Tapi. Enmapuche takî tî eseresmacho komo tî xakn̂e, nuun̂i yepatakacho yimawno. Ero ke tî kayaritomo mokyakn̂e, n̂eremekn̂e ceseresmachome.

25 Taponî ro pona tî n̂eremekn̂e mîîmo wacan mîtwono pona. Emtacho pona tî n̂eremekn̂e Xonatas. Sau yawxaka tî n̂eremekn̂e Abine hara. Pohra tko tî xakn̂e Tapi yapon.

26 Ero po tko tî ahce wa na kahra ka xakn̂e Sau Tapi poko. On wara makî tî kekn̂e tîhnaw, Ahce wa ehxapu me na nai noro? Kicicme ehxapu me tko na nai. Ero poyero mokuhra nai. Kicicme ehxapu me xa nai ham, kekn̂e tî.

27 Enmapuche tak pohra xa hara tî xakn̂e Tapi yapon. 2-înhîrî tak mîn xakn̂e kaamo nuun̂i yepatakaxan pono. Ero ke on wara takî tî kekn̂e Sau tumumuru ya, Xonatas ya, Ahce poyero mokuhra nai Xese mumuru eseresmaxi? Kokon̂oro mokuhra xakn̂e. Oroto marha mokuhra nasî, kekn̂e tî yîwya.

28-29 On wara tî Xonatasî n̂eyukyakn̂e, On wara kai owya Apa, Owto xe ro mak wasî Beren pona. Ero ke iina cma re ow men̂epesî, kekn̂e. Iito tî Kporin komo ya tîmsom nakn̂iyatu oyanan komo oyewton po. Amok ha men, kekn̂e oyakno owya. Ero ke tawake awexitaw opoko owî cma re men̂epesî oyakno komo yenso owtotome, kekn̂e owya. Ero ke oona mokuhra nasî awakro eseresmaxi, kekn̂e tî Xonatas.

30 Ero wa kacho yentache nîrwonakn̂e xa takî tî Sau Xonatas poko. On wara tî kekn̂e yîwya, Kicicitho xîkrî mak amoro ham kica wooxamtho xîkrî. Kanwekn̂e xîkrî xa amoro ham kica. Owen̂ekarî ma re mai Xese mumuru xatî me xa? Noro xe masî kica kayaritomo me tak ehtome noro, noro pîntho me mak awehtome hara amoro, noro pîntho me anocwan yehtome marha. Yîropotai mewruyakn̂e noro ciri xe masî noro pîntho me ro mak kica.

31 Roowo po rma ka exitaw ro Xese mumuru waipîra, kayaritomo me exihra ro mak men mas amoro okwe. Mîwaiyasî mak men okwe. Ero ke an̂ikpoko ka noro xiya ohyaka. Waihkesî kr̂a tak men noro, kekn̂e tî.

32 On wara tko tî kekn̂e Xonatasî tîîm ya, Ahce wa exirî poyero mîwaike? Ahce wa n̂ehxe awya twaihkaxmu me cehtome? kekn̂e tî tîîm ya.

33 Ero yinhîrî takî tî tîrahnu nar̂mekn̂e Sau tumumuru wece rma. Waihka xe tî xakn̂e okwe. Ero ke Tapi waihka xe nai ham okwe apapa, kekn̂e takî tî Xonotas.

34 Ero ke nawomyakn̂e takî tî Xonatas. Nîrwonakn̂e ro makî tî. Eseresmara ro makî tî xakn̂e ero kaamo po 2-înhîrî po. Tapi pînîn yaw ro makî tî xakn̂e. Ahwora ro makî tî xakn̂e tîîmî mtapotarî poko kicicme ro mak yîmtapotarî ke Tapi poko.

35 Enmapuche tak mararî pona takî tî cekn̂e Xonatas Tapi yenso. Mînto kaamo xa kmokyasî, kachonho yaw roro rma tî cekn̂e. Kîîrî mren tî naar̂akn̂e.

36 On wara tî kekn̂e rikomo ya, Waiwî war̂mesî miya. Ero wece etoko amoro kar̂pe. Ero ke rikomo cetaw waiwî nar̂mekn̂e epore mooxe.

37 Rikomo toche tak waiwî nîhcekn̂e. Iina toche rikomo on wara tî kekn̂e Xonatas yîwya. Meye rma nai waiwî amkai, kekn̂e tî yîwya.

38 On wara marha tî kekn̂e Xonatas yîwya, Ehta yohno. Yîtîtmamra ro mak esko, kekn̂e tî. Kar̂pe tî kekn̂e. Ero ke waiwî namekyakn̂e rikomo. Tantoman̂e yaka tî mokyakn̂e hara.

39 Twen̂ekarî rma tî xakn̂e rikomo Tapi yeseyamtopo poko. Xonatas makî tî nîhtînoyakn̂e Tapi yakro tîmtapotachonhîrî.

40 Ero yinhîrî takî tî tuwuhre nîmyakn̂e Xonatas rikomo ya. On arko hara ewto pona hara, kekn̂e tî yîwya.

41 Rikomo toche Tapi takî tî nawomyakn̂e toopu yexenaw eseyamxapunhîrî. Suu n̂ixa tî xakn̂e ceseyamso. En̂exa takî tî mokyakn̂e Xonatas yaka. Noro yamrinaw tî n̂esewnapekn̂e osorwaw ro. Ero yinhîrî tî n̂esewcoketken̂e. Nîwracetken̂e marha tî, Tapi xa tî nîwracekn̂e Xonatas yopo.

42 On wara tî kekn̂e Xonatas Tapi ya, Erasîra etok ha. Ketakronomacho komo poko tîmtapotai yaaro xa. Kporin komo yanme tan wîîkesî, tîtkekn̂e. Ero ke Kporin komo nasî awepamthîrî komo yehtopo yenîn̂e me, oyepamtho komo yehtopo yenîn̂e me marha. Ero wa n̂examro n̂een̂asî miya roro yîtîhkan me ro mak. Kîmtapotachonhîrî towîhra ro mak ehtome so n̂een̂asî, kekn̂e tî. Ero wa tî kekn̂e Xonatas Tapi ya. Ero yinhîrî takî tî anana cekn̂e Tapi. Xonatas tî cekn̂e ewto pona hara. Ero wa tî cetken̂e.