Ero yinhîrî Nobe pona takî tî cekn̂e Tapi. Aimereke yaka tî cekn̂e Kporin komo yaka cewomsom yaka ha. N̂eraswakn̂e tko tî Aimereke Tapi yenîche. Ahce kacho cewn̂e mîmoko? Ahce kacho anarî komo mokuhra n̂ehcow awakro, kekn̂e tî yîwya.

2 On wara tî kekn̂e Tapi Aimereke ya, Cemyawno poko oyantoma kayaritomo. On wara nîîka owya, Awantomacho ekatîmra ro mak men esko. Ero wa men cirko, nîîka kayaritomo owya, kahra esko, nîîka thakwa owya. On wara wîîka oyakrono komo ya, Mîîna xa etocoko amn̂e oyakro eseposo, wîîka.

3 Ero ke on wara mak wîîkes awya erewsî exihra nai ahyaw? 5 cma re mîmyas owya amna yuru. Exihra exitaw, ahce na mak tîmko owya exitaw mak, kekn̂e tî Tapi.

4 On wara tî n̂eyukyakn̂e Kporin komo yaka cewomsom, Kuuru ro exihra ro mak nas okwe ohyaw. Kporin komo ya tîmxapunhîrî makî tko nasî puruma. Ero rma na mokyatu wooxam pokohra exitaw so mak awakrono komo kar̂pamxan komo, kekn̂e tî.

5 On wara tî kekn̂e Tapi, Yaaro wîîkesî, wooxam pokohra n̂ehce 3 kaamo oyakrono komo. Ero wara roro wîtwermes oyakrono komo ahna so na owcetaw. Ero ke kir̂wan̂he roro naxe oyakrono komo. Soroso xa on wece amna torî ke wooxam pokohra n̂ehce, kekn̂e tî.

6 Ero ke puruma takî tî nîmyakn̂e yîwya Kporin komo ya tîmxapunhîrî ha. Ero mak tî xakn̂e puruma iito, Tanî nasî Kaan, kacho. Kaan mîn yawnonho nowyakn̂e Aimereke ero po rma takî tî ekenhîrî na rma ciitome ocorono hara. Towxapunhîrî tî nîmyakn̂e Tapi ya. Ero wa tî xakn̂e Aimereke, Kporin komo yaka cewomsom.

7 Ero yimaw tko tî iito xakn̂e Sau maywen Toeke, Eton pono. Sau yok yenîn̂e komo yantoman̂e tî mîk xakn̂e, oper̂a yenîn̂e komo yantoman̂e ha. Kporin komo mîn mîtwo tî xakn̂e pahkî n̂he ahce na poko.

8 On wara marha tî kekn̂e Tapi Aimereke ya, Raapu exihra nai tan ahyaw, kacipara imo anarimaw? Okaciparan yekîhra weexi kica. Ahce na mko okurun yekîhra ro mak weexi cerekan̂e oyen̂eperî ke kayaritomo ya, kekn̂e tî yîwya.

9 On wara tî n̂eyukyakn̂e Kporin komo yaka cewomsom, Korias pen kaciparantho mak nasî tan, Piristew pen kaciparantho. Era woskaran po anwaikathîrî mîk noro kaciparantho mak nasî tan. Twomtoso nasî mînto eepoci mkai. Ero xe awexitaw arko. Ero mak nasî tan, kekn̂e tî. Taa, ero rma ek ha. Anarî exihra ro mak nasî kir̂wan ero warai ha, kekn̂e tî yîwya.

10 Ero yinhîrî ero po rma takî tî n̂emahciyakn̂e Tapi Sau yai mooxe. Akisi yaka tî cekn̂e Kace pono komo kayaritomon yaka.

11 On wara tko tî ketken̂e Akisi maywen komo yîwya, Tapi pîn katî mîkro Ixaw Yana komo kayaritomon ha? Noro poko tko na n̂ewanometken̂e Ixaw Yana wosîn komo tmanataw so. On wara tî ketken̂e, Emapona roro 1.000 pen komo waihkai Sau, emapona roro 10.000 pen komo waihkai Tapi hara, ketken̂e tî waano ke, ketken̂e tî kayaritomo ya.

12 Yîmtapotarî komo tko tî n̂encekn̂e Tapi. Ero ke n̂eraswakn̂e xa takî tî Akisi pona, Kace pono komo kayaritomon pona.

13 Ero ke wara mak tîmtapotaxmu wara takî tî n̂esenpekn̂e Piristew komo wero ro kopi. Camkîno wara ro makî tî n̂esenpekn̂e. Metata poko tî seesee kekn̂e mak. Nîmtawakronwakn̂e marha, etpoci pona tî cekn̂e etakru kica.

14 Ero ke on wara takî tî kekn̂e Akisi tmaywen komo ya, Noro enko kica, wara mak tîmtapotaxmu ro mak mîkro ham kica. Ahce kacho noro yipu mehce ke ohyaka kica?

15 Wara mak cehsom xe ma re wai awya so? Ero ke moso mehce ohyaka ero wara ehtome owero ro? Omîn yaka wermonoya ma re noro yipu? kekn̂e tî. Ero wa tî kekn̂e Akisi Tapi poko.