Taa, ero yinhîrî takî tî Kace poi n̂emahciyakn̂e Tapi. Ewtarî yaka tî cekn̂e Aturaw pono yaka. Ero yimaw takî tî Tapi yekaci n̂encetken̂e akno komo, yîîm yawno komo ahnoro tî n̂encetken̂e. Aturaw pono yaw tî nai Tapi ewtarî yaw, îîpî yexenawno yaw, kacho tî n̂encetken̂e. Ero ke iina takî tî cetken̂e yîhyaka.

2 Anarî komo marha tî cetken̂e yîhyaka. Cesemetanmesom komo, tpoyino yepethîkan̂e komo, ahwokaxapu komo, ero warai komo tî cetken̂e yîhyaka ahnoro. Tapi takî tî xakn̂e n̂examro yantoman̂e me. Yaake takî tî xatken̂e kîrkomo, 400 ha.

3 Ero yinhîrî takî tî Mispa pona takî tî cekn̂e Tapi, Moabita komo yewton pona. Iito tî xakn̂e Moabita komo kayaritomon. Noro yakro tî nîmtapowakn̂e. On wara tî kekn̂e yîwya, Ai apa, Apapa cma re wekyasî ahyaka, yememe komo. Awewton po cma re ka n̂examro enmapu xe wasî. Ahce wa tak na oriya Kaan, kachome owya ahyaw ka n̂ehcowpe, kekn̂e tî.

4 Ero ke tîîm komo tî naar̂akn̂e Moabita komo kayaritomon yewton pona. Iito rma tî xatken̂e pahkî n̂he ha re ceseyamso exitaw ro Tapi.

5 Ero yinhîrî takî tî on wara kekn̂e weronomano rin̂e, Kace tî osotî. Tapi ya tî kekn̂e, Ewtarî yaw exihra tak men esko. Xuta komo rowon pona xa etok ha, kekn̂e tî yîwya. Ero ke ewtarî yai takî tî cekn̂e Tapi. Comota cheka tî cekn̂e Erece pona.

6 Ero yinhîrî on wara kacho tî n̂encekn̂e Sau, Mînto tî nai Tapi tmaywen komo yakro. Iitono komo tî n̂een̂atken̂e, kacho tî n̂encekn̂e. Ero yimaw Sau tî xakn̂e Xibea po. Ceremaxe tî xakn̂e ahporetu yepu yapomyaw. Rah ke cemyarke tî xakn̂e. Noro maywen komo tî xatken̂e iito yîmîtwo cececetoso.

7 On wara takî tî kekn̂e Sau tmaywen komo ya, Ai, Benxamin yepamtho komo amyamro. On wara wîîkes awya so, Ahce wa meen̂atu Xese mumuru? Awakren̂e me na nai noro? Amararîn komo na nîmya, anatîrî komo marha na uupa yatî? Sowtatu komo yantoman̂e me marha na awîratu so 1.000 komo yantoman̂e me, 100 komo yantoman̂e me marha na. Ero wa awakren̂e me na nai awya so?

8 Oyar̂macho poko xa mesencet ham ke. Omumuru yehtoponho yekatîmra marha maxe owya. Xese mumuru yakro nîmtapowakn̂e amumuru cetkurunpetopo komo poko, kahra maxe owya okwe. Opînîn yawra ro mak matu ke. On wara kahra maxe owya, Amaywen panatanmekyasî amumuru rma awaikacho poko, Ero ke n̂eseyamyasî awaikachome okwe, kahra marha maxe ke owya. Ero wa omumuru yehtopo yekatîmra ro mak maxe opînîn yawra awexirî ke so ham okwe, kekn̂e tî. Ero wa tî kekn̂e Sau tmaywen komo ya.

9 Ero yimaw iito tî xakn̂e Toeke, Eton pononho. Iitono komo yakro tî xakn̂e, Sau maywen komo yakro. On wara tî kekn̂e noro, Apa, Xese mumuru ween̂e kokon̂oro mak. Nobe pona tî mokyakn̂e iito oyexitaw. Aimereke yaka cekn̂e Aitube mumuru yaka.

10 Kporin komo mtapotarî n̂encekn̂e Aimereke Tapi pokono. Iyuru komo marha nîmyakn̂e, Korias pen kaciparantho marha, Piristew pen kaciparantho ha, kekn̂e tî Toeke.

11 Ero ke takî tî kayaritomo nan̂ikpekn̂e Kporin komo yaka cewomsom, Aimereke ha. Aitube mumuru tî mîk xakn̂e Aimereke. Aitube yanan komo ahnoro tî nan̂ikpekn̂e. Yaake xatken̂e tîmsom pokono komo Nobe po, n̂examro tî nan̂ikpekn̂e ahnoro. Ero ke mokyatken̂e kayaritomo yaka.

12 On wara tî kekn̂e Sau yîwya so, Ai Aitube mumuru amoro, on wara wîîkes awya, kekn̂e tî. Taa, kasko apa, kekn̂e tî Aimereke.

13 On wara tî kekn̂e Sau, Ahce kacho Xese mumuru yakro mesentace oyar̂macho poko? Iyuru komo marha tî mîmyakn̂e yîwya, kacipara imo marha tî. Kaanî mtapotarî marha tî mencekn̂e noro pokono kica. Ero ke n̂eseyamyasî tak noro owaikachome amn̂e, kekn̂e tî.

14 On wara tko tî n̂eyukyakn̂e Aimereke, Yaake naxe amaywen komo. Onoke xa nai awewetîn̂e ro me hara Tapi wara? Awoxin marha mîk, akurunpen̂e ro komo yantoman̂e hara. Kir̂wan mîkro, kacho xa mîk ahnoro ahyawno komo ya.

15 Kaanî mtapotarî ma re wencekn̂e noro pokono awya? Pîra ro mak. Kicicitho mîkro, kahra ro mak esko opoko. Apapa yanan komo poko kahra marha esko. Ero wa mehxe, mîîkes owya. Pîra ro makî, oroto mak wencesî ero yipu, kekn̂e tî yîwya.

16 On wara tko tî kekn̂e kayaritomo, Mîwayasî tak men Aimereke. Aamo yanan komo ahnoro waihyaxe, kekn̂e tî Sau yîwya okwe.

17 Ero yinhîrî on wara takî tî kekn̂e Sau tukurunpen̂e ro komo ya tpanawno komo ya, Tîmsom pokono ro komo waihkacoko. Tapi yakronoman̂e me nat ham kica. Noro yemahciyataw n̂een̂atken̂e, owya tko ekatîmra xatken̂e kica, kekn̂e tî Sau okwe. Kporin komo mîn yenîn̂e komo paraxka xera tko tî xatken̂e kayaritomo kurunpen̂e ro komo .

18 Ero ke Toeke ya takî tî kekn̂e hara Sau, Amoro xa tîmsom pokono ro komo waihkakî, kekn̂e tî. Ero ke noro takî tî paraxkekn̂e. Yaake tî waihkekn̂e eepoci yawno komo, 85 ha tî okwe.

19 Ero yinhîrî Nobe pona takî tî cekn̂e hara Toeke tîmsom pokono pen komo yewton pona. Iitono komo takî tî waihkekn̂e hara kacipara imo ke. Kîrkomo pen, wooxam pen komo, yîmxîkîthîrî pen komo, moomo yeen̂enho pen komo meero okwe. Iyokuthîrî komo marha tî waihkekn̂e buhu pen komo, kahn̂eru pen komo. Ero wa tî waihkano n̂iir̂akn̂e okwe Toeke, Eton pono.

20 Abiata tko tî n̂emahciyakn̂e. Aimereke pen mumutho tî mîk xakn̂e Abiata, Aitube parî ha. Tapi yaka tî n̂emahciyakn̂e. Yîhyaw takî tî xakn̂e.

21 Noro takî tî Tapi ya n̂ekatîmyakn̂e tîmsom pokononho pen komo waihkachonho Sau yanme.

22 On wara tî kekn̂e Tapi Abiata ya, Apapa yaw oyexitaw iito ween̂akn̂e Toeke, Eton pono. Noro men n̂ekatîmyasî Sau ya okwe owakretoponho yîwya, wîîkekn̂e rma ero yimaw. Oyanme xa waihce aamonhîrî yananînho pen komo ahnoro okwe.

23 Ohyaw rma tko esko amoro. Owaika xe marha nasî awaika xatî okwe. Ohyaw awexitaw waipîra masî, kekn̂e tî. Ero wa tî kekn̂e Tapi Abiata ya.