Taa, ero yinhîrî takî tî on wara ketken̂e iitono komo Tapi ya, Piristew komo mohce Keira pona. N̂etar̂mexe iitono komo yakro okwe. Yînatîrî komo yeperîrî naar̂axe okwe puruma yîpîpîtîkacho pononho rma.

2 Ero ke Kporin komo yakro tî nîmtapowakn̂e Tapi. On wara tî kekn̂e yîwya, Ahce wa wai Apa, kîwce Piristew komo yakro etar̂maxi? kekn̂e tî. Nhnk, etoko rma Piristew komo yakro etar̂maxi. Keira pono komo yukurunpeta, kekn̂e tî Kporin komo yîwya.

3 On wara tko tî ketken̂e Tapi maywen komo, Tanî rma ceraswaxe Xuta komo chew rma. Soroso xa tak ceraswaxe Keira pona kîwtoche so hara Piristew komo yakro etar̂max ha, ketken̂e tî.

4 Ero ke Kporin komo yakro tî nîmtapowakn̂e xa hara Tapi. N̂eyukyakn̂e xa hara tî Kporin komo, Etoko rma Keira pona. Piristew komo war̂mapes awya so, kekn̂e tî yîwya.

5 Ero ke cekn̂e takî tî Tapi tmaywen komo yakro Keira pona. Piristew komo yakro tî n̂etar̂metken̂e. Mer̂pono pîn waihketken̂e Piristew pen komo. Iyokuthîrî komo marha tî naar̂atken̂e. Ero wa tî Keira pono komo nukurunpetken̂e.

6 Iito rma exitaw Tapi Keira po exitaw tî mokyakn̂e Abiata yîhyaka, Aimereke pen mumutho. Tponon tî n̂ekyakn̂e cemyaw eepoce.

7 Ero yimaw tko tî Sau n̂encekn̂e Tapi totoponho Keira pona. Ero ke on wara tî kekn̂e Sau. Taa, Tapi tak nar̂mape Kaan ham owya. Noro rma n̂etahrupoi tanme ro rma. Ewto pona tak toye metata ken̂arî pona xa, metata yecetî ken̂arî pona ha, kekn̂e tî Sau.

8 Ero ke tmaywen komo takî tî nan̂ikpekn̂e Sau sowtatu komo ahnoro. Amohcoko waapa me kîwtotome so Keira pona Tapi wamtoso kr̂a, noro maywen komo wamtoso marha, kekn̂e tî yîwya so.

9 Sau komo mohtopo tko tî n̂encekn̂e Tapi. Awar̂maxi tmohtopo komo poko tî n̂esence Sau, kacho tî n̂encekn̂e. Ero ke Abiata ya takî tî kekn̂e hara, Eepoci eeko xiya, kekn̂e tî.

10 Ekîche on wara tî kekn̂e Tapi Kporin komo ya, Apa, ponaro Ixaw Yana komo yehtopo xa Amoro, on wara wîîkes awya, on wara kacho wenta, tmoku xe tî nai Sau oona Keira pona. Tantono komo waihka xe tî nai yîchew so oyexirî ke mak okwe.

11 Ahce wa oriyatu Keira pono komo, Sau ya katî oyenpetu? Mokyasî Sau xiya, kacho wencesî. Yaaro ma ketu ero wa kan̂e komo? Apa kah yawno, ponaro Ixaw Yana komo yehtopo xa Amoro, Sau yehtopo cma re mekatîmyas owya. Awanton mak ow ha, kekn̂e tî Tapi Kaan ya. Mokyasî rma wa ha, kekn̂e tî Kporin komo yîwya.

12 Nîmtapowakn̂e xa hara tî Tapi. On wara takî tî kekn̂e, Amna na n̂enpetu Keira pono komo Sau ya, omaywen komo marha na n̂enpetu yîwya? kekn̂e tî. Awenpexe so rma wa okwe, kekn̂e tî Kporin komo.

13 Ero ke cekn̂e takî tî Tapi Keira poi, tmaywen komo yakro tî cetken̂e. 600 takî tî xatken̂e noro maywen komo. En̂exa tîtoche so ekemra makî tî xatken̂e. Tanhamya mak cetken̂e. Ero yinhîrî n̂encekn̂e takî tî Sau Tapi yemahcitoponho Keira poi. Ero ke tî iina tohra rma xakn̂e.

14 Ero yinhîrî takî tî Tapi xakn̂e axawa imo po toopu komo chew. Sipe Yaxawan po xa tî xakn̂e îîpî chew. Enmar̂atîxera tî Tapi n̂epor̂akn̂e Sau. Ahsîpora tko tî xakn̂e Kaan yîwya.

15 Sipe po tî xakn̂e Tapi ero yimaw, comota po. Iito cexitaw Sau mohtopo tî n̂encekn̂e, twaihkaxi mohtopo ha tî.

16 Iito comota chew Tapi yexitaw Xonatas tî cekn̂e yîhyaka ahworeso Kaan poko.

17 On wara tî kekn̂e yîwya, Erasîra ro mak esko. Awahsîra ro mak wa nas apapa. Ixaw Yana komo kayaritomon me tak mas amn̂e. Ow tak wasî axawyakan me kayaritomo me rma ha re. Ero wa kehtopo ponaro rma wa nai apapa, kekn̂e tî Xonatas yîwya.

18 Ero yinhîrî takî tî nîmtapowatken̂e xa hara n̂examro cetakronomacho komo poko. Yaaro xa tî ketken̂e Kporin komo n̂entarî me xa. Ero wa tîmtapotache so tak Xonatas takî tî cekn̂e tîmîn yaka hara. Comota chew rma tî xakn̂e Tapi.

19 Ero yinhîrî Sau yaka takî tî cetken̂e Sipe pono komo. Xibea pona tî cetken̂e Tapi yehtopo yekatîmso Sau ya. On wara tî ketken̂e yîwya, Apa, mînto nasî Tapi amna chew. Comota chew mak nasî Akira Yîpîn po. Xesimon mkaino mîn îîpî, mehxa nasî suu n̂ixa. N̂eseyamyasî mak iina comota chew.

20 Ero ke amok ha apa yiixe awexitaw amna yaka. Amna tak Tapi nahsîyasî awya tîmtome tak, ketken̂e tî yîwya.

21 On wara tî Sau n̂eyukyakn̂e, Awakrepo xe so wasî Kporin komo ya opînîn yaw awexirî ke so okre, kekn̂e tî.

22 Ero ke etocoko hara ka Tapi yeseyamtopo ro yenso. Onoke xa iina totopo n̂een̂a? Ero wa ehtopo yenso ka etocoko. Cemahcisom ro makî tko mîk Tapi.

23 Eseyamtopo entatko miyan komo rma. Entîkache awya so amohcoko hara ekatîmso owya. Iina so xa n̂eseyamyasî, kacoko tak owya. Ero yinhîrî kmokyasî awakro so. Iito exitaw wenatîkesî. Merpora ro mak naxe Xuta yepamtho komo. Wara rma eken komo wentîkesî mer̂pono pîn komo rma. Tapi censo ro xa wentîkesî, kekn̂e tî. Ero wa tî kekn̂e Sau Sipe pono komo ya.

24 Ero ke cetken̂e hara Sipe pono komo ceken komo pona hara Sau ywapu. Ero yimaw Maon Yaxawan po takî tî xakn̂e Tapi. Woskara po tî xakn̂e Xesimon mîtwo tî xakn̂e, mehxa suu n̂ixa.

25 Ero yinhîrî takî tî Tapi yeposo cekn̂e Sau tîsowtatun komo yakro. Noro mohtopo yentache takî tî Tapi ya, cekn̂e takî tî toopu imo yaka. Iito takî tî xakn̂e Maon Yaxawan po. Tapi yekaci rma tî n̂encekn̂e Sau. Ero ke Maon Yaxawan pona xa marha tî cekn̂e Sau hara Tapi yahsîso.

26 Îîpî yawxari tî mokyatken̂e Sau komo. Ero yawxari xa marha tî cetken̂e Tapi kom hara eeco yawxari marha kopi. Kar̂pe tî cekn̂e Tapi Sau ya etahsîpora cehtome. Tapi komo mamriso xa takî tî mohtîketken̂e Sau komo meyehra ahsîtome tak ha.

27 Ero yimaw tko tî mokyakn̂e Piristew komo yekaiporen̂e kom hara. On wara tî ketken̂e Sau ya, Amok ha apa yohno. Kpoyino komo yar̂maxi mohce okwe Piristew komo, ketken̂e tî yîwya.

28 Ero ke porohyakn̂e takî tî Sau Tapi yepon̂enho. Piristew komo yakro etar̂maxi tî cekn̂e hara. Ero ke iitono tak n̂etahcaxe toopu Emahcino Ritoponho, kacho me. Ero wara rma n̂etahcaxe oroto.

29 Ero yinhîrî en̂exa takî tî cekn̂e Tapi En-Xeci pona hara. Iito takî tî xakn̂e îîpî chew. Ero wa tî xakn̂e.