Ero yinhîrî takî tî Sau mokyakn̂e xa hara Piristew komo yakro etarmaxapunhîrî. Mokuche so on wara tî ketken̂e iitono komo yîwya, Meye men nasî Tapi, En Xeci Comotan po, ketken̂e tî yîwya.

2 Ero ke tmaywen komo takî tî men̂ekekn̂e Sau, sowtatu komo. 3.000 tî men̂ekekn̂e Ixaw Yana komo poyino, miyan komo poyino rma. N̂examro tak naar̂akn̂e Tapi komo yeposo Îîpî yawxari tî n̂epor̂akn̂e Kabra Yîpîn yawxari.

3 Tîcetaw so tak oper̂a wacan porero tî cetken̂e Sau komo. Iito tî xakn̂e ewtarî îîpî yexenaw. Ero yaka tî n̂ewomyakn̂e Sau wekaxi. Ero yaw rma tko tî xatken̂e Tapi komo kopi ewtarî mapitaw rma.

4 Sau yenîche takî tî on wara ketken̂e Tapi maywen komo yîwya, Pahxa Kporin komo kekn̂e awya on wara, Aaxatî pîn tak wahsîpesî awya amn̂e awamn̂e ro ciitome, kekn̂e awya. Noro yahsîtopo me tak nai ham oroto, enko xe, ketken̂e tî yîwya. Ero ke ehtura takî tî cekn̂e Tapi Sau yaka. Noro ponon takî tî nawocekn̂e perî mak.

5 Ero yinhîrî tko ahwora tî xakn̂e Tapi Sau ponon yawotorî ke tîwya.

6 On wara tî kekn̂e, Pîra ro mak okwe. Kporin komo yewetîn̂e mera ro mak tak wasî okwe okayaritomon yetapetaw owya. Kporin komo nîhkapetho mîk ha kayaritomo me, kekn̂e tî.

7 Ero wa kacho ke tmaywen komo nîtwermekn̂e Tapi. Sau waihkapora ro makî tî xakn̂e yîwya so. Ero yinhîrî ewtarî yai takî tî n̂epatakekn̂e Sau. Esama yaw tî cekn̂e xa hara.

8 Ero yinhîrî tak Tapi marha tî n̂epatakekn̂e ewtarî yai. Sau ya takî tî kekn̂e kar̂pe, Ai apa, Okayaritomon amoro, kekn̂e tî. Ero yentache n̂etaknamekn̂e Sau. Ero yimaw takî tî n̂esewnapekn̂e Tapi roowo pona.

9 On wara tî kekn̂e Sau ya, Apa, ahce kacho rîîwo ponaro mai okwe, Awaika xe men nai Tapi, kacho ponaro ha?

10 Oroto Kporin komo awaikaporî ha re owya. Waihkakî men, kacow anarî komo owya. Pîra ro mak, wîîka. Etamoyankara ro mak wasî okayaritomon yemetanmetome. Kporin komo nîhkapetho mîkro kopi, wîîka yîwya so.

11 Enko xe apa, aponon perî kotonho tan oyemyaw. Onawototho rma tan aponon perî. Awaikara rma tko wex ha. Ero ke kicicitho pîn me tak ow yîhtînoko. Awanwekn̂e pînî rma ow. Kicicme exihra ro mak was awece. Wara rma ow pen mepor̂asî owaikachome okwe.

12 Kporin komo pona xa ween̂asî ken̂ekacho. Noro xa oyepanîyasî oyemetanmekrî ke awya. Owî reha awemetanmekîra ro mak was ha.

13 Poritomo penî mtapotarî yaw roro rma wa wasî, Kicicitho komo mak naxe kemetanmekn̂e me, kacho yaw roro ha. Wara rma awemetanmekîra ro mak was owî reha.

14 Ixaw Yana komo kayaritomon xa amoro. Onoke warai yahsîso wa mîmoko? Xapari yokoputho yahsîso na mîmoko, kupama yahsîso cik xa ha na?

15 Kporin komo xa tko ken̂ekan̂e me exi xe wasi, oyen̂ekan̂e me, awen̂ekan̂e me marha. Kir̂wanhe oyehtopo apoko enî xe wasî yîwya. Awya owaikapora ro mak exi xe wasî Noro, kekn̂e tî. Ero wa tî kekn̂e Tapi Sau ya.

16 Ero wa nîmtapowakn̂e Tapi Sau yakro. Yîtîhkache takî tî on wara kekn̂e Sau yîwya, Amoro xa ma amoro mîmtapowa okopuci Tapi? kekn̂e tî Sau. Ero wa kache nîwracekn̂e mak takî tî.

17 On wara marha tî kekn̂e Tapi ya, Kir̂wan̂he mas amoro oyopo. Kir̂wan̂he meexi opoko. Kicicme ro mak wasî owî reha apoko kica awepethîrî me.

18 Oroto rma menpo opînîn yaw awehtopo. Anahsîrî me rma oriu ham Kporin komo. Owaikara rma tko meexi.

19 Ahce wa katî tai, kwaparî me mohxapu yenîche kîwya cen̂epe ha ma re waihkara? Ow men̂epew amoro reha. Ero ke awakronoma xe wasî Kporin komo ya oroto owaikara awehtopo yepetho me.

20 Ero ke tak on wara wîîkes awya, kayaritomo me tak mai ham amn̂e. Yaaro xa wîhtînoyasî ero wa awehtopo. Amoro xa mas amn̂e Ixaw Yana komo kayaritomonî ro me.

21 Ero ke on wara cma re mîîkesî oroto on̂entarî me, Sau yepamtho komo waihkara ro mak was amn̂e. Sau kr̂a etacira ro mak tak ehcoko, kahra marha wasî iyanan komo ya amn̂e, mîîkesî marha cma re. Yaaro xa ero wa kasko Kporin komo n̂entarî me rma, kekn̂e tî. Ero wa tî kekn̂e Sau Tapi ya.

22 Ero ke ero wara rma tî kekn̂e Tapi Sau ya. Yaaro xa wîîkesî Kporin komo n̂entarî me rma, kekn̂e tî. Ero yinhîrî takî tî tîmîn yaka cekn̂e hara Sau. Tapi komo reha tî cetken̂e îîpî cheka xa hara. Ero wa tî cetken̂e.