Taa, ero yinhîrî Samuew pen taki tî waihyakn̂e okwe. Noro waipuche Ixaw Yana komo tî n̂esenmekyatken̂e ahnoro noro pînîn yaw yîwrataxi. Noro pen yokoputho tî nahruyatken̂e Hama po yîmînthîrî mîtwo rma.

2 Ero yinhîrî Tapi komo takî tî cetken̂e Paran Comotan pona. Ero yimaw iito tî xakn̂e cemyawnoyem xa. Maon pono mîk xakn̂e. Woskara yosom marha tî mîk xakn̂e Kahmeru woskaran yosom ha. Cemyawnoyem xa tî mîk xakn̂e. 1.000 yakenon tî xakn̂e iyoku kabra, 3.000 tî xakn̂e iyoku opera. Ero yimaw iito tî xakn̂e noro Kahmeru po tok poci yawotorî poko.

3 Nabaw tî mîk xakn̂e noro yosotî. Abikaw tî xakn̂e yipici yosot hara. Cenporem tî mîk xakn̂e yipici, takîhsom marha tî. Anarme tko tî xakn̂e iin̂o. Apehceme cetîrwonmesom me tî xakn̂e kica, kicicitho me ro mak. Karebe pen yepamtho tî mîk xakn̂e.

4 Taa, axawa po exitaw Tapi Nabaw yekaci tî n̂encekn̂e. Mînto nai Nabaw tok poci yawotorî poko, kacho tî n̂encekn̂e.

5 Ero ke kar̂pamxan komo tî n̂en̂epekn̂e yîhyaka 10. On wara tî kekn̂e yîwya so, Kahmeru pona etocoko Nabaw yaka. Tapi tî nai aponaro, kacoko yîwya.

6 On wara marha kacoko yîwya, cemyawnoyem ya, Ai Nabaw, on wara tî nîîke awakno Tapi, pahkî awexi xe wasî waipîra. Amotopîra marha awexi xe wasî, ahyawno komo marha. Waipîra so exi xe wasî awoh komo. Ero wa awexi xe wasî, nîîke tî Tapi awya.

7 On wara marha kesî noro awya, On wara wencesî awekaci, oper̂a poci yawototopo me tak nasî, kacho wencesî. On wara wîîkes awya, Awoku yenîn̂e komo xatken̂e kokon̂oro amna mîtwo. N̂examro yemetanmekîra ro mak amna n̂ehxe. N̂examro yemyawno yehcamnopîra ro mak xakn̂e Kahmeru po exitaw so.

8 Kasko xe ka amaywen komo ya. Nhnk, ero wara rma xatken̂e Tapi komo amna poko, kexe ha. Ero ke on wara cma re wîîkes awya, on yimaw tak nasî kahwotacho me, keseresmatopo me okre. Ero ke tawake cma re masî omaywen komo poko. Amna nahrî cma re mîmyasî yîwya so ahce ha na, ahyaw cehsom mak. Awanton mak ow Tapi ha, kes awya, kacoko yîwya, kekn̂e tî Tapi. Ero wa tî kekn̂e yîwya so en̂epetaw.

9 Ero ke Nabaw yaka tî cetken̂e. Ero wara rma tî ketken̂e yîwya. Ero wa cma re kesî awakno Tapi awya, ketken̂e tî yîwya. Ero wa kache iito rma tî ka xatken̂e yîmtapotarî yentachome.

10 On wara tko tî Tapi maywen komo n̂eyukyakn̂e Nabaw, Onok mîkro hara Tapi? Onok warai mîkro hara Xese mumuru? Yaake mexe naxe oroto antonanonho etowxapu kom ha.

11 Nai rma re oyuru, otunarî marha, oyotî marha. Oyok penî rma waihkai oyoku poci yawoton̂e komo yotî me mak. Ahce kacho anarî komo ya wîmya hara? Ahn̂i xan ha na mîkyam? Yîhtînopîra ro mak wasî, kekn̂e tî yîwya so. Ero wa tî kekn̂e kica Nabaw Tapi maywen komo ya.

12 Ero ke yaw xa marha tî cetken̂e hara Tapi maywen komo. Nabaw mtapotarî takî tî n̂ekatîmtîketken̂e Tapi ya.

13 Ero yentache on wara takî tî kekn̂e Tapi tmaywen komo ya, Amohcoko. Akaciparan komo ciicoko awan̂apotun komo yaka, kekn̂e tî. Ero ke tîkaciparan komo ero wa n̂iir̂atken̂e, taan̂apotun komo yaka so n̂imiyatken̂e. Tapi marha tî ero wa n̂iir̂akn̂e tîkaciparan hara. Eroyinhîrî takî tî cetken̂e, 400 tî cetken̂e Tapi yakro. 200 tî n̂etînomyatken̂e hara cemyawno komo mîtwo. Ero wa tî xatken̂e.

14 Ero yimaw rma tko tî cekn̂e kar̂pamxan, Nabaw yanton, noro pici yaka, Abikaw yaka. On wara tî kekn̂e yîwya, Ai yeme, comota chew cexitaw Tapi tmaywen komo n̂en̂epekn̂e apapa yaka, amna yantoman̂e yaka. Kir̂wan̂he apapa nîmtapotaretken̂e n̂examro. Kicicitho me ro makî tko tî n̂examro n̂eyukyakn̂e apapa kica.

15 Amna yakronoman̂enho komo tko mîkyam xatken̂e. Amna yemetanmekîra ro mak xatken̂e. Amna yemayawno yehcamnopîra ro mak xakn̂e n̂examro yakro amna exitaw.

16 Amna wacan wara rma xatken̂e kosope, katpanaw marha. Ero wa xatken̂e amna poko n̂examro yakro amna exitaw oper̂a yenîrî poko.

17 Ero ke ahce wa na mai amoro? Tîhtînopore men nasî. Apapa waparî me men wa mokyaxe Tapi komo, iyanan komo waparî me marha okwe. Kicicitho mak mîk apapa kica, kir̂wan̂he esentarî yarohra ro mak nasî noro yakro, kekn̂e tî. Ero wa tî kekn̂e Abikaw ya.

18 Ero yinhîrî yohno ro makî tî puruma n̂enkayakn̂e Abikaw awci yaka. 200 tî n̂enkayakn̂e. Buhu mkahsî tî nakriyakn̂e. Uupa yukun marha tî nakriyakn̂e asakî yen. 5 oper̂a pun nakriyakn̂e, cewararîno komo rma. Nasînasî marha nakriyakn̂e yupuxapu, 5 saku wicakî. Uupa yeperîrî marha nahsîyakn̂e yuturpamnoxapu, 100 pîmîrî wicak ha. Piiku yeperîrî yuturpamnoxapu marha nahsîyakn̂e amnonoxapu, 200 wicak ha. Ero yipu tî nakriyakn̂e buhu mkahsî yakeno mkahsî.

19 Ero yinhîrî on wara tî kekn̂e tanton komo ya, Kaikatko. Awenari so kmokyasi, kekn̂e tî. Ciin̂o ya tko tî esekatîmra xakn̂e Nabaw ya ha.

20 Buhu mkaw tî cekn̂e Abikaw esama yaw. Îîpî tî n̂enîhcekn̂e tarenakem yaka. Ero yimaw rma tî îîpî n̂enîhcetken̂e Tapi komo mehxa emtaka hara. Noro wece rma tî nîhcetken̂e. Ero ke n̂esepor̂atken̂e takî tî.

21 Pahxa n̂he tî on wara kekn̂e Tapi Abikaw mokuhnaw ha ka, Tohnaw ro mak noro yoku ween̂e, emyawno marha. Ero wa ween̂e woskara po exitaw. Waipîra so xakn̂e iyoku, emyawno komo marha ehcamnopîra xakn̂e. Kicicme ro makî tko nas opoko norotho kica owya takronomachonhîrî yepetho me hara.

22 Owaika xe wasî Kporin komo ya noro pen waihkara oyexitaw enmapîra rma exitaw, yîhyawno pen komo ahnoro waihkara oyexitaw kîrkomo, kekn̂e tî Tapi.

23 Ero yinhîrî takî tî Tapi n̂een̂akn̂e Abikaw. Noro yenîche yohno tî nîhcekn̂e Abikaw buhu mkai. Tapi yamrinaka takî tî n̂esewnapekn̂e.

24 On wara tî kekn̂e Abikaw yîwya, Apa, on wara wîîkes awya, opona xa matko cirko kicicme Nabaw yehtoponho. Awanton mak ow ha. Omtapotarî cma re ka mencesî.

25 Kicicitho mîk Nabaw. Ero ke noro ponarora cma re masî. Tosotî wara rma nasî. Ero pîntho ponarono, kacho mîn, Nabaw, kacho. Yaaro, ero pîntho ponarono mak mîk kica. Owî reha tko enîhra wehxe kar̂pamxan komo an̂en̂epethîrî komo.

26 Oroto Kporin komo cma aporoka waihkano cirihra tak awehtome, awanme ro mak esepanso tohra awehtome ha. Ero ke yaaro tan wîîkesî, yaaro Kporin komo nasî waipînî ro me, amoro marha masî waipîra, kacho wara rma nas omtapotarî yaaro xa, Nabaw wara rma n̂ehcowpe aaxatî pîn komo, awîrîma xatî komo ha. Nabaw wara rma n̂ehcowpe noro yipu komo.

27 On ha apa, onîmrî awya, awanton nîmrî ha. Onî cma re nahsîyaxe kar̂pamxan komo, amaywen kom ha.

28 Kicicme oyehtoponho cma re mîhcamnoyasî. On wara wîhtînoyasî yaaro xa, kayaritomo me awir̂asî Kporin komo amn̂e. Ero wa xa marha awepamthîri komo n̂iir̂asî miya roro ehcamnopîn me ro mak. Ero wa awir̂asî Noro yanme mak ar̂mano cirirî ke awya. Kicicme awexi xera ro mak wasî miya roro awaitopo pona roro.

29 Nasî rma kica awenatîkan̂e, awaika xat okwe. Kporin komo rma tko nasî awawrutamin̂e wara waipîn komo yakro. Ero wa awir̂asî Kaan, ponaro awehtopo ha. Aaxatî pîn komo reha nar̂mesî kr̂a toopu yar̂macho yaino wara rma.

30 Taa, amn̂e awakronomesî Kporin komo ahnoro tîmtapotachonhîrî yaw roro rma, Ixaw Yana komo kayaritomon me awir̂asî.

31 Ero wara awiriche ahwora exihra tak masî tohnaw waihkano rin̂enho me awehtoponhîrî yanme. Awanme ro mak awesepanîyataw mahwokesî men okwe tohnaw awesepanîrî ke. Taa, kayaritomo me awiriche tak Kporin komo ya ero yimaw cma re oponaro masî awanton ponaro, kekn̂e tî. Ero wa tî kekn̂e Abikaw Tapi ya.

32 Ero yentache on wara takî tî kekn̂e Tapi Abikaw ya, Kir̂wan̂he xa nai ham Kporin komo, ponaro Ixaw Yana komo yehtopo. Noro rma awen̂epew ham oroto esepotpona oyakro.

33 Noro rma awepema xe wasî oyakîretoponho yepetho me ha. Amoro xa ow mîwahkoto waihkano cirihra tak oyehtome, oyanme ro mak esepanpîra oyehtome ha.

34 Yohno mokuhra awexitaw ketaw ha re twaihso tak n̂exirî ha re Nabaw pen, yîhyawno komo marha ahnoro kîrkom ha. Ero wa n̂ehcerî ha re enmapîra rma ka exitaw pahxaxa. Yaaro xa ero wa wîîkesî. Kporin komo nasî waipînî ro me, ponaro Ixaw Yana komo yehtopo ha, awaikara so orin̂enho ha. Noro nasî waipîn me ro mak, kacho wara rma nasî omtapotarî yaaro xa, kekn̂e tî. Ero wa tî kekn̂e Tapi Abikaw ya.

35 Ero ke Abikaw nîmîtho takî tî nahsîyakn̂e Tapi. Taa, cerepore tak etok hara, kekn̂e tî yîwya. Amtapotarî wenta. Ero yaw roro rma tak was ha, kekn̂e tî. Ero wa tî kekn̂e Tapi.

36 Ero yinhîrî takî tî Nabaw yaka cekn̂e hara Abikaw. Tîmîn yaw tî xakn̂e Nabaw. Wokpano tî n̂iir̂akn̂e. Kayaritomo wara ro makî tî wokpano n̂iir̂akn̂e. Tahwore ro makî tî xakn̂e twenîmso ro mak cexirî ke. Ero ke Tapi yakro tîmtapotachonhîrî yekatîmra ro makî ka xakn̂e Abikaw yîwya.

37 Emapuche tak wenîmra takî tî xakn̂e Nabaw. Ero yimaw takî tî Tapi yakro tîmtapotachonhîrî n̂ekatîmyakn̂e yipici yîwya. Ero wa kacho yentache waixapu wara takî tî xakn̂e Nabaw coro. Toopu wara marha tî xakn̂e yupun ceipu xa.

38 10 kaamo exiche tak Nabaw pen tî nokohrekn̂e Kporin komo. Ero yanme takî tî waihyakn̂e. Ero wa tî xakn̂e noro pen.

39 Nabaw pen waihtoponho yentache on wara takî tî kekn̂e Tapi, Kir̂wan̂he nai ham Kporin komo. Noro rma tak oyepanpo. Ero wa n̂epema owîrîyakachonho yîwya. Kicicme oyexi xe oyexitaw owahkotoi. Nabaw marha tak n̂epema kicicme ehtoponhîrî yepetho me, kekn̂e tî. Ero yinhîrî takî tî tmaywen komo tî n̂en̂epekn̂e Tapi Abikaw yaka cipici me ekaiman̂e komo.

40 Ero ke cetken̂e tak tî ekaiman̂e komo Kahmeru pona Abikaw yaka. On wara tî ketken̂e yîwya, Ai aaci, ahyaka amna n̂en̂epei Tapi. Cipici me tî awahsî xe nai, ketken̂e tî yîwya.

41 Ero yentache Abikaw takî tî n̂esewnapekn̂e roowo pona. On wara tî kekn̂e yîwya so, Awanton komo mak ow ha. Ow mak antomacoko yiixe awehtopo komo poko. Amaywen komo tarî meero korokesî, kekn̂e tî.

42 Ero yinhîrî buhu mkahsî takî tî n̂etakriyakn̂e Abikaw. Tapi maywen komo wenari tî cekn̂e. Tmaywen komo yakro rma tî cekn̂e Tapi yaka, wooxam komo yakro, 5 ha kî. Noro pici me takî tî xakn̂e.

43 Anarî marha tî nahsîyakn̂e Tapi cipici me. Ainowaw tî mîk nahsîyakn̂e Xisirew pono ha. Asakno roro rma tî xatken̂e yipici me.

44 Cemsîrî tko tî nîmyakn̂e Sau anarî ya hara Mikaw ha. Tapi cinho mîk nîmyakn̂e. Pawci ya tî nîmyakn̂e Raisi mumuru ya. Karim pono mîk xakn̂e Pawci. Ero wa tî xakn̂e Tapi cinho.