Ero yinhîrî Sipe pono komo takî tî cetken̂e xa hara Xibea pona Sau yaka. On wara tî ketken̂e yîwya, Ai apa, Mînto nasî Tapi Akira Yîpîn po, Xesimonî mkaino po, ketken̂e tî yîwya.

2 Ero ke iina takî tî cekn̂e Sau Sipe comotan pona. 3.000 tî naar̂akn̂e sowtatu komo, Ixaw Yana komo poyinonho. Men̂ekaxapu komo makî tî naar̂akn̂e. Tapi yeposo tî cetken̂e.

3-4 Akira Yîpîn pona rma tî cetarî komo n̂iir̂atken̂e Sau komo Xesimonî mkaino pona. Comota po makî tî xakn̂e Tapi. Iito cexitaw, Sau tak mokye aweposo xa hara kopi, kacho tî n̂encekn̂e. Ero ke erasman̂e komo takî tî n̂en̂epekn̂e Tapi. Yaaro, mokye ham Sau, ketken̂e tî yîwya erasman̂e komo.

5 Ero ke Tapi taki tî cekn̂e Sau yetarî mîtkoso rma. Sau wîntopo tî n̂een̂akn̂e. Abine wîntopo marha tî n̂een̂akn̂e, Nee mumutho wîntopo ha. Sowtatu komo yantoman̂e tî mîk xakn̂e Abine. Eeta rakataw tî xakn̂e Sau tîrapo, sowtatu komo rakataw xa.

6 Ero ke on wara tî kekn̂e Tapi Aimereke ya, etew mîk xakn̂e noro ya. Abinai ya marha tî kekn̂e, Seruia mrerî ya. Xoabe yakno tî mîk xakn̂e Abisai. Onoke xa mokya oyakro Sau yîwîntopo yaka roro? kekn̂e tî. Ow xa kmokyasî, kekn̂e tî Abisai.

7 Ero ke cetken̂e takî tî Tapi, Abisai komo. Kosope tî cetken̂e sowtatu komo cheka. Iito tî xakn̂e Sau tîwînso iyotaw so. Tpasahtoso tî xakne yîrahnu yîhtîpîrî mîtwo. Noro mîtwo tî xakn̂e Abine sowtatu komo yakro. Tîrapo so tî xatken̂e.

8 On wara tî kekn̂e Abisai Tapi ya, Oroto aaxatî pîn nar̂mape ham Kaan awya. Ero ke owî paraxkesî yîrahnu ke rma. Roowo pona roro paraxkesî. Cewn̂e ro mak paraxkesî, asak ro paraxkara wasî, kekn̂e tî.

9 Pîra, kekn̂e tko tî Tapi, waihkara esko. Kporin komo nîhkapetho waihkache kîwya kicicme exihnî me ma re tai Noro ya awya?

10 Kporin komo nasî waipînî ro me yaaro xa, ero wa xa marha nasî omtapotarî yaaro xa, Kporin komo rma noro pen waihkesî. Anarimaw waihtopo me mak tak na nai. Anarimaw na waihya etar̂metaw anarî yana komo yakro, wîîkesî. Yaaro xa ero wa wîîkesî.

11 Twerî men wasî Kporin komo poko. Yînîhkapethîrî waihkara ro mak was kopi. Yîrahnu mak eeko, weer̂an marha, yîhtîpîrî mîtwo nasî ero eeko kîwtotome tak ha, kekn̂e tî.

12 Ero ke Sau rahnu tî naar̂akn̂e Tapi, weer̂an marha yîhtîpîrî mîtwononho. Ero ke cetken̂e tak. Tapi komo yenîhra ro makî tî xatken̂e Sau sowtatun komo. N̂examro wen̂ekarî ro makî tî cetken̂e Tapi komo yîhyaka so. Pakahra ro makî tî xatken̂e. Kporin komo rma tî yuhnari nîwînkrekn̂e.

13 Ero yinhîrî cekn̂e takî tî Tapi miya îh pona hara Sau komo wîntopo yemtacho pona mooxe n̂he mak.

14 Ero yinhîrî sowtatu komo ya takî tî kekn̂e Tapi, Abine ya marha, Nee mumutho ya. Ai, Abine, ow eikura mai ha? kekn̂e tî. Kar̂pe tî kekn̂e. On wara tî kekn̂e Abine, Onok amoro kayaritomo ya kan̂e? kekn̂e tî.

15 On wara tî kekn̂e Tapi, Ai Abine, karitî ma re amoro? Onoke nai awarai Ixaw Yana kom ha? Ahce kacho apapa kurun me exihra meexi, kayaritomo kurun me ha? Oroto iina moko apapa waparî, kayaritomo waparî ha.

16 Kicicme masî kica. Kporin komo nasî waipîn me kacho, wara xa marha nas omtapotarî yaaro xa. On wara wîîkes awya, twaihkaxmu me masî, amaywen komo marha naxe twaihkaxmu me. Ero wa maxe apapa kurun me exihra awexirî ke so. Kporin komo nîhkapetho kurun me exihra mehcow kopi. Enko xe. Ahto nai kayaritomo rahnu, noro weer̂an marha. Yîhtîpîrî mîtwononho, ahto nai awya? kekn̂e tî Tapi.

17 Ero yimaw tak Tapi mtapotarî me tî n̂encekn̂e Sau. Ero ke on wara tî kekn̂e, Ai, okopuci Tapi, amoro xa ma mîmtapowa? kekn̂e tî. Nhnk apa, noro rma ow ha, kekn̂e tî.

18 On wara tî kekn̂e Tapi yîwya, Ahce poyero owaikaxi mîmokya apa? Ahce wa xa wehxe awya? Ahce xa opona miir̂a kicicme oyehtoponho awya?

19 Awanton mak ow ha. Ero ke omtapotarî cma re ka mencesî. Anarimaw Kporin komo rma na oyahsîtopo poko yîhtînon̂e me awira. Ero wara exitaw, takn̂isom tîmî xe tak wasî yîwya kicicme oyehtoponho yahrutopo me. Anarimaw tooto mak na nîmtapowatu kicicme opoko. Ero wa exitaw so Kporin komo nîwîrîmarî me tak exi xe so wasî ero wa kan̂e komo. Oyeken poi oyen̂epetken̂e kica Kporin komo nîmîtho poi ha. Etoko kr̂a ponaro anarî yana komo yehtopo poko ehso, ketken̂e kica owya.

20 Okamxukutho men en̂epera esko roowo pona Kporin komo yeepatai okwe. Ixaw Yana komo kayaritomon xa amoro. Noro yipu rma tko mîmokyasî kupamatho yeposo mak. Ow mepor̂asî turukwarî yepon̂e wara îh pono yepon̂e wara, kekn̂e tî. Ero wa tî kekn̂e Tapi Sau ya.

21 On wara takî tî Sau n̂eyukyakn̂e, Kicicme weexi kica. Amok hara okopuci. Awaika xera tak wasî opînîn yaw awexirî ke oroto. Tohnaw ro mak kmokye ham xiya. Akpin me ro mak wehxe kica, kekn̂e tî.

22 Taa, kekn̂e tî Tapi, on ha arahnu. Kar̂pamxan en̂epeko xiya iika.

23 Kepeman̂e ro mîk Kporin Komo, ahnoro yepeman̂e xa. Kir̂wan̂he kehtoponhîrî n̂epemesî, cewetîn̂e me roro kehtoponhîrî komo marha. Awahsîpo rma cma owya Kporin komo oroto. Awaikara rma tko weexi yînîhkapethîrî me awexirî ke.

24 Apînîn yaw xa weexi oroto. Ero wa xa marha opînîn yaw exi xe wasî Kporin komo. Cesemetanmesom me oyexitaw okurunpen̂e me Noro exi xe wasî, kekn̂e tî Tapi.

25 On wara tî kekn̂e Sau hara, Awakronoma xe wasî okopuci Kporin komo ya. Tooto yeserepokacho rin̂e me tak mas amn̂e. Aaxatî pîn komo yopono me marha masî, kekn̂e tî. Ero wa tî kekn̂e Sau Tapi ya. Ero yinhîrî tak cekn̂e hara tî Tapi. Sau marha tî cekn̂e ceken pona hara. Ero wa tî cetken̂e hara.