Ero yinhîrî on wara takî tî kekn̂e Tapi tîropotaw, Owaikesî rma men Sau okwe ahcemaw ha na. On wara tko cexpore nasî, cemahcipore mak nasî. Piristew komo cheka kîwce ham etahsîpora oyehtome yîwya. Iito oyexitaw oyeporîra tak nai. Ahsîra thakwa wai ham, nîîke tak Sau. Ixaw Yana chew oyeporîra tak nasî. Ero ke ero wa xa kîwcesî, kekn̂e tî.

2 Ero ke cekn̂e takî tî Tapi tmaywen komo yakro 600 yakro. Akisi yaka tî cekn̂e, Kace pono komo kayaritomon yaka. Maoke mumuru tî mîk xakn̂e Akisi.

3 Iina takî tî n̂esekenmetken̂e Tapi komo ahnoro. Cihye so tî xatken̂e maywen komo tîmxîkye so marha. Tapi pici komo marha tî xatken̂e yîhyaw asakno roro rma. Ainoan, Xeserew pononho ha, Abikaw marha Kahmeru pononho, Nabaw pen cinho mîk xakn̂e noro. Ero wa tî xatken̂e.

4 Ero yinhîrî Kace pona Tapi totoponho takî tî n̂encekn̂e Sau. Ero ke eposo tohra takî tî xakn̂e.

5 Ero yinhîrî on wara takî tî kekn̂e Tapi Akisi ya. On wara cma re wîîkes awya apa, tawake awexitaw opoko oyekenî ro cma re menpes owya. Anarî ro cma re menpes owya oyewton, ewtoci mak. Iina tak kesekenmesî. Ahce kacho tanî ro wai awakro kayaritomo yewton po? kekn̂e tî Tapi yîwya.

6 Ero ke Sikrake takî tî nîmyakn̂e Akisi yîwya. Ero ke ero takî tî nahsîyakn̂e Tapi cewton me. Ero ke Xuta yepamtho kayaritomon komo yewton me tak xakn̂e ero yimawnonho rma.

7 Pahkî n̂he tî xakn̂e Tapi Piristew komo chew 16 nuun̂i ha tî.

8 Ero yinhîrî takî tî Tapi komo cetken̂e Xesurita komo waparî me, Xihsita komo waparî me marha, Amarekita komo waparî me marha. Iitono ro komo mîkyam pahxanî rma. Suu n̂ixa xakn̂e n̂examro yeken, Exitu pona roro rma. Noro yipu komo waparî me tî cetken̂e.

9 Onoke waparî me tîtoche so na Tapi komo, iitono komo waihketîketken̂e. Yîmtora ro makî tî xatken̂e waipîn komo, kîrkomo pen tî yîmtora, wooxam pen komo marha. Ahnoro tî waihketken̂e. Iyokuthîrî komo tko tî naar̂atken̂e tok me so. Oper̂a komo, paaka komo, buhu komo, kameru komo, noro yipu komo naar̂atken̂e tok me. Pononthîrî komo marha naar̂atken̂e. Cewton komo pona ekîche tak Akisi yaka takî tî cekn̂e Tapi.

10 On wara tî kekn̂e roro Akisi Tapi ya, Ahtono komo waparî me mîîtocow oroto? kekn̂e tî. On wara tî Tapi n̂eyukyakn̂e, Xuta mapitawno komo waparî me amna tomo oroto, suu n̂ixan waparî me. Anarimaw, Xeramerita mapitawno komo waparî me amna tomo oroto, kekn̂e. Ken̂ew mapitawno komo waparî me amna cekn̂e, kekn̂e anarimaw hara. Ero warai komo waparî me amna tomo oroto, kekn̂e roro.

11 Iitono pen komo waihketîkekn̂e Tapi yîmton me ro mak. Kîrkomo pen waihkekn̂e, wooxam pen komo marha. Waipîn komo yarî xera tî xakn̂e Kace pona. On wara kekn̂e, Iitononhîrî komo men kekatîmyaxe so Kace pono komo ya. Ero wa xatken̂e Tapi komo okwe, kexe yîwya so, kekn̂e Tapi. Ero ke n̂examro pen waihketîkekn̂e. Ero wa tî xakn̂e roro Piristew komo chew cexitaw.

12 Ero ke Tapi pona tî n̂een̂akn̂e Akisi. On wara tî kekn̂e tîhnaw, Tapi xera ro mak tak nai ham iyanan komo, Ixaw yana komo waihkarî ke yîwya. Ero ke omaywen me tak nai eroromero, kekn̂e tî. Ero wa tî kekn̂e Akisi.