Ero yinhîrî takî tî Piristew komo n̂esenmekyatken̂e Ixaw Yana komo waparî me tîtotome so xa hara. Ero ke on wara takî tî kekn̂e Akisi Tapi ya, Ai, oyakno, on wara wîîkes awya, amoku xe men was oyakro waapa me amna cetaw. Amaywen komo yakro rma amoku xe so wasî, kekn̂e tî.

2 Taa, kekn̂e tî Tapi, amna mokyasî. Iito tak meen̂asî sowtatu me oyehtopo, kekn̂e tî. Taa, kekn̂e tî Akisi. Okurunu ro komo yakrono me tak kiir̂asî eroromero, kekn̂e tî. Ero wa tî kekn̂e Akisi Tapi ya.

3 Taa, pahxa rma tî waihyakn̂e Samuew pen. Ero yimaw noro pen pînîn yaw tî nîwracetken̂e Ixaw Yana komo ahnoro. Noro pen yokoputho tî nahruyatken̂e ewtonthîrî pona rma, Hama pona. Taa, on wara tî xakn̂e Sau pahxa n̂he, yaskomo komo tî waihkekn̂e, worokyam yakro tîmtapotaxmu pen komo ahnoro. Kanan po exi xera ro makî tî xakn̂e. Ero wa tî xakn̂e Sau.

4 Ero yinhîrî takî tî tak n̂esenmekyatken̂e Piristew komo. Ixaw Yana komo cheka tî mokyatken̂e. Sunem pona tî cetarî komo n̂iir̂atken̂e. Ero ke Ixaw Yana komo marha tî n̂enmekyakn̂e Sau hara. Xiwboa pona tî cetarî komo n̂iir̂atken̂e n̂examro hara.

5 Iito cexitaw so tak Piristew sowtatun komo tî n̂een̂akn̂e Sau. N̂examro pona tî n̂eraswakn̂e. Cerahtîke tî tatanakn̂e ro mak. Ahce wa tatu kopi? kekn̂e tî.

6 Ero ke Kporin komo yakro cma tî re nîmtapowakn̂e noro ahce wa na cetakîretopo poko. Yîmtapotarî tko tî eikura xakn̂e Kporin komo okwe wosoto enxapu ke, Urin ke marha, weronomano rin̂e komo ke marha eikura ro makî ti xakn̂e.

7 Ero ke on wara takî tî kekn̂e Sau tmaywen komo ya, Ahto nai wooxam, yaskomo me cehsom? Noro yipu ka epotatko. Noro yipu yaka owto xe wasî yîmtapotarî yentachome tak oyetakîretopo poko, kekn̂e tî. Mînto tî nai noro yipu Entoro po, ketken̂e maywen komo yîwya.

8 Ero ke anarî men takî tî namruyakn̂e Sau tponon. Ero warai tî namruyakn̂e anarî kuknon yaw tîtotome. Ero yinhîrî takî tî kosope cekn̂e wooxam yaka yaskomo me cehsom yaka. Asakî tî naar̂akn̂e tmaywen komo. On wara tî kekn̂e yîwya, Ai aaci, worokyam ya cma re mekatîmyasî omtapotarî. Tooto penî cma re menpakesî, wetahcasî noro ha, kekn̂e tî Sau.

9 On wara tko tî kekn̂e wooxam yîwya, Mentai ha na yaskomo komo pen waihkachonho Sau ya. Ahnoro tî waihkekn̂e Kanan pononho pen komo, ahnoro worokyam yentan̂e pen komo, kacho na mentai. Owaikapo xe mak na mai. Ero ke owya mîîkesî, Waixa pen enpakakî on̂enîrî, mîîkesî, kekn̂e tî.

10 Pîra ro mak, kekn̂e tî Sau, awaikara ro mak nasî kayaritomo waixa pen yenpakarî ke. Yaaro xa wîîkesî. Waipîn me nasî Kporin komo yaaro, kacho wara rma nas omtapotarî yaaro xa, waipîra ro mak masî, kekn̂e tî.

11 Taa, onoke xa wanîmexpe an̂enîrî, kekn̂e tî wooxam. Samuew pen anîmexpoko, kekn̂e tî.

12 Ero yinhîrî takî tî Samuew takî tî n̂een̂akn̂e wooxam. Ero ke n̂emtarakekn̂e. On wara takî tî kekn̂e Sau ya, Ahce kacho mîcemaronta awosotî poko kica? Sau rma amoro kopi, kekn̂e tî.

13 Erasîra ro mak esko, kekn̂e tî Sau yîwya. Ahce meen̂a? kekn̂e tî. Tooto yekatînho ween̂asî kopi. Roowo chewnonho nawomyasî, kekn̂e tî wooxam.

14 Ahce wa nai yupun? kekn̂e tî Sau. Poritomotho mîk. Ahnorono yaw nasî. Noro yipu nawomyasî, kekn̂e tî. Ero yinhîrî Samuew me takî tî awomxapu nîhtînoyakn̂e Sau. Ero ke nutupenwakn̂e takî tî. N̂etîrapekn̂e xa takî tî tuupe cewru.

15 On wara tî kekn̂e Samuew Sau ya, Ahce kacho ow mewrucpew oyanîmexpotopo ke ha? kekn̂e tî. On wara tî kekn̂e Sau yîwya, Keserepokesî ro mak okwe. Oyakro etar̂maxi mohce Piristew komo. Oyahsîpînkekn̂e tak Kaan okwe. Omtapotarî yeikura ro mak tak nas okwe. Owosoto oyeikura nasî, weronomano rin̂e ke marha oyeikura nas okwe. Ero ke kanîmexpo amtapotarî yentachome owya. On wara esko, kacho yenta xe wasî amtapotarî, kekn̂e tî.

16 On wara tî Samuew n̂eyukyakn̂e, Ahce kacho omtapotarî yenta xe mai? Kporin komo tak awahsîpînkai ham. Aaxatî pîn me tak nai ham.

17 Tîmtapotachonhîrî yaw roro rma wa awire ham Kporin komo, Noro n̂ekatîmyakn̂e awya ooke ero yaw roro rma awire ham. Kayaritomo me awehtoponhîrî tak nowye ham. Awekenînhîrî na apoyino rma n̂iire hara kayaritomo me. Tapi mîk ero wa n̂iire.

18 Kporin komo mtapotachonho yewetîra mîxakn̂e Amarekita komo waihkacho poko. N̂examro poko nîrwonakn̂e xa. Waihkatîkara mîxakn̂e kica. Ero ke tak awemetanmekyasî Kporin komo oroto.

19 Pahxaxa tak awar̂mapesî Piristew komo ya. Ixaw Yana sowtatun komo marha nar̂mapesî yîwya so. Pahxaxa oyakro tak masî, amumuru komo marha naxe oyakro. Ixaw Yana sowtatun pen komo marha nar̂mapesî Piristew komo ya, kekn̂e tî. Ero wa tî kekn̂e Samuew Sau ya.

20 Ero wa entache tîhra rma takî tî n̂etîrapekn̂e Sau pen roowo pona. N̂eraswakn̂e xa takî ti Samuew mtapotarî yentache. Kar̂pera tî xakn̂e okwe. Eseresmara ro makî ehxapu tî mîk xakn̂e kokmamso ro. Kosope marha tî eseresmara xakn̂e. Ero ke kar̂pera xakn̂e.

21 Wooxam mokuche Sau yaka eserepokatîkaxapu me xa tî n̂een̂akn̂e. Ero ke on wara tî kekn̂e yîwya, Apa, on wara wîîkes awya, amtapotarî wewetî. Twaihkaxmu me oyexirî yaro weexi awewetîrî ke. Wara rma amtapotarî yaw roro rma anîmexpono wiirî.

22 Ero ke omtapotarî marha tak entakî amoro hara. Knahmesî takî cma re aweseremachome. Ero wa aweseresmache kar̂pe tak masî awtotome hara, kekn̂e tî.

23 Pîra, eseremara wasî, kekn̂e tî. Ero yinhîrî takî tî Sau maywen komo meero takî tî ketken̂e yîwya wooxam wara xa marha. Eseresmak ha apa, ketken̂e tî yîwya. Ero ke yîmtapotarî komo takî tî n̂ewehcakn̂e. Roowo po makî tî ka n̂eremekn̂e, ero ke takî tî nawomyakn̂e etîrapotopo komo pona ceremachome hara.

24 Wooxam yoku tî xakn̂e paaka xîkrî yupurukrexapu. Yîmîn yaw rma tî xakn̂e. Noro takî tî paraxkekn̂e, nakpocakn̂e marha, kanpor̂akn̂e marha tî. Puruma marha tî nayakn̂e wahrutupamnotopo ken̂ehra makî. Ero wa tî erewsî n̂iir̂akn̂e.

25 Ero tak n̂etakekn̂e Sau komo nahrî me. Ero ke tî n̂eseresmetken̂e. Ceseresmache so cetken̂e hara n̂examro kosope rma. Ero wa tî cetken̂e.