Taa, on wara tî xatken̂e Piristew sowtatun komo, Apeke pona tî n̂esenmekyatken̂e. Xisirew po reha tî xatken̂e Ixaw Yana komo yetarî hara. Tuuna pîtho mîtwo tî xatken̂e iito.

2 Piristew komo tî mokyatken̂e tantoman̂e komo wenari. Anarî komo tî xatken̂e 100 komo yantoman̂e me. Anarî komo tî xatken̂e 1.000 komo yantoman̂e me hara. Akisi tî mokyakn̂e mapitaw so. Noro yakro tî mokyakn̂e Tapi tmaywen komo yakro.

3 Ero wa mokyataw so on wara takî tî ketken̂e Piristew komo yantoman̂e, Ahce kacho Ebrew komo mokyat hara? ketken̂e tî. On wara tî Akisi n̂eyukyakn̂e, Tapi mîkro Sau maywenînho, Ixaw Yana komo kayaritomon maywenînho. Pahkî nasî ohyaw yaake kaamo, yaake cimn̂ipu nasî. Kicicime ehtopo yenîhra ro mak wasî Sau yai etowtoponhîrî n̂ixa ro rma, kekn̂e tî.

4 Nîrwonatken̂e rma tî Piristew yantoman̂e komo Akisi poko. On wara tî ketken̂e yîwya, Noro men en̂epeko hara ewton pona, anmîthîrî pona. Waapa me kîwcetaw so tohra ro mak men n̂expe kakro so. Ixaw Yana komo yakro ketar̂metaw so kîwyam tpoyino komo tak na nakronometu kwaihkacho komo poko okwe. Piristew komo pîtho yarî xe na nai tkayaritomon yaka tawake tak ehtome tpoko.

5 Noro mîk Tapi ha, Noro poko waano naar̂atken̂e Ixaw Yana wosîn komo pahxa. Noro rma mîk kopi. On wara kacho tî naar̂atken̂e waano, Emapona roro 1.000 komo waihkekn̂e Sau. Emapona roro marha 10.000 komo waihkekn̂e Tapi hara, ketken̂e. Ero wa kacho tî naar̂atken̂e waano noro poko rma kopi, ketken̂e tî. Ero wa tî ketken̂e Piristew yantoman̂e komo Akisi ya.

6 Ero ke takî tî Tapi nan̂ikyakn̂e Akisi. On wara tî kekn̂e yîwya, Yaaro xa Kporin Komo nasî waipînî ro me, kacho wara rma nas omtapotarî, yaaro xa marha oyewetîn̂e me roro mîxakn̂e mehxa ro rma. Kir̂wan̂he ween̂asî waapa me awtorî oyakro, amokrî hara oyakro. Mehxa ro ohyaka amohtoponhîrî n̂ixa ro rma kicicme awehtopo yenîhra ro mak wasî. Wara rma tan awexi xera tî natu Piristew yantoman̂e komo takro so okwe.

7 Ero ke etok hara cerepore rma, Noro Tapi kica, kahra tak ehtome so Piristew yantoman̂e komo apoko, kekn̂e tî Akisi Tapi ya.

8 Ai ha okwe, kekn̂e tî Tapi. Ahce wa wehxe kicicme yîwya so? Ahce wa oyehtopo meen̂e amoro mehxa ro ahyaka omohtoponho n̂ixa ro? Kicicme oyehtopo katî meen̂a? Ahce poyero tohra wai etar̂maxi aaxatî pîn komo yakro apa? kekn̂e tî yîwya.

9 On wara tko tî Akisi n̂eyukyakn̂e, Kir̂wan̂he ro mak keen̂asî. Kaan yancun wara rma keen̂asî. On wara tko kacow Piristew yantoman̂e komo, Tohra ro mak men n̂expe Tapi kakro so etar̂maxi, kacow thakwa owya.

10 Ero ke pahxaxa ro rma apakakî. Saa ketaw tak etocoko akayaritomon komo maywenînho komo yakro, awakro so mohxapu komo yakro ha, kekn̂e tî. Ero wa tî kekn̂e Akisi Tapi ya.

11 Ero ke saa ketaw takî tî Tapi komo paketken̂e. Piristew komo rowon pona tî cetken̂e hara. Piristew komo reha tî cetken̂e Xisirew pona. Ero wa tî cetken̂e.