Amareke Komo Nar̂mexe Tapi Komo Cipici Komo Yaan̂enho
30
Taa, Sikrake yesamarî yaw tî cetken̂e Tapi komo tmaywen komo yakro rma. 3 kaamo tî cetken̂e ero yaw. Ero yinhîrî takî tî Sikrake n̂een̂atken̂e. Iyarînaw so tko tî mokyatken̂e Amarekita komo. Kanan pono komo waparî me tî mokyatken̂e, suu n̂ixan komo waparî me. Sikrake pona meero tî mokyatken̂e. Yuu yuu ketken̂e tî iitono komo wece. Yîmînthîrî komo tî nakn̂iyatken̂e ahnoro.
2 Ewto pono komo tî nahsîyatken̂e wooxam komo ahnoro mak. Rikomo komo marha tî nahsîyatken̂e, poritomo komo marha tî. Waihkano tî cirihra ro mak xatken̂e. Aano makî tî n̂iir̂atken̂e.
3 Taa, ewtotho pona tmokuche tak Tapi komo tîmînthîrî komo tî n̂een̂atken̂e cecahso. Cipici komo yenîhra ro makî tî xatken̂e okwe, tumumuru komo marha tî, cemsîrî komo marha tî. Waapa narîtho me tî xatken̂e ahnoro okwe.
4 Ero ke nîwracetken̂e takî tî Tapi komo. Cerewre ro makî tî nîwracetken̂e cekar̂katîkaxi ro. Tîwratarî komo yarohra takî tî xatken̂e kar̂pera cexirî ke so okwe.
5 Tapi pici komo marha tî naar̂atken̂e asakno roro rma. Ainoan, Xisirew pono, Abikaw marha, Nabaw pen cinho, Kahmeru pono pen cinho. Ero wa tî naar̂atken̂e waapa.
6 Ero yimaw takî tî n̂eserepokekn̂e xa takî tî Tapi tmaywen komo mtapotarî yentarî ke. Tapi kr̂a na twaihkapore nai toh ke, kacho tî n̂encekn̂e. Tahwokatîkaxi ro makî tî xatken̂e ahnoro kîrkomo tumumuthîrî komo pînîn yaw, cemsîthîrî komo pînîn yaw marha. Tapi reha tî n̂etahworekn̂e hara Kporin komo pona mak, ponaro cehtopo pona mak ha.
7 Ero yinhîrî takî tî Abiata ya tî kekn̂e Tapi. Kaan yaka cewomsom mîk, Aimereke pen mumutho ha. Eepoci ka eeko ohyaka, kekn̂e tî yîwya. Ero ke tî n̂ekyakn̂e Abiata.
8 Ero ke on wara tî kekn̂e Tapi Kporin komo ya, Ai apa, ahce wa wai awya, Amarekita komo wenatîkaxi kîwce? Ero wa owcetaw ween̂a ha na? kekn̂e tî. On wara tî Kaan kekn̂e yîwya, Nhnk, etoko rma. N̂examro meen̂asî rma. Ahyawnonhîrî komo marha mahsîtîkexe hara, kekn̂e tî. Ero wa tî kekn̂e Kaan Tapi ya.
9-10 Ero ke cetken̂e takî tî. Tapi cekn̂e tmaywen komo yakro, 600 komo yakro. Besorî Yewku kwaka tî ka cetken̂e. Iito takî tî n̂etînomyatken̂e anarî komo 200 ha. N̂ekar̂ketken̂e xa thakwa tî aporî watorî yarohra okwe. Tapi reha tî cekn̂e rma en̂exa waapanhîrî komo yeposo. 400 yakro rma tî cetken̂e.
11-12 Ero yinhîrî Exipsiu takî tî n̂een̂atken̂e Tapi maywen komo. Ero ke Tapi yaka tî naar̂atken̂e. Noro tî wokpetken̂e tuuna ke, nînahmetken̂e marha. Piiku yeperîrî tî nîmyatken̂e yîwya yuturpamnoxapu, uupa yeperîrî marha tî yuturpamnoxapu. Ero takî ti nahyakn̂e kar̂pe n̂he tak cehtome. Osorwaw ro enmaxapu tî mîk xakn̂e eseresmara ro mak, tuuna yerîhra marha tî. Osorwaw ro tî kokmamyakn̂e marha ero wara rma. Ero ke kar̂pera thakwa tî xakn̂e okwe.
13 Ero yinhîrî on wara tî kekn̂e Tapi yîwya, Onok yanton amoro? Ahtononhîrî amoro? kekn̂e tî yîwya. On wara tî noro n̂eyukyakn̂e, Exipsiu ow, Amarekita yanton ha. Oyantoman̂enho onomye okwe. Osorwaw tak tan kenmapu onomtoponho yîwya. Kamotoi thakwa, ero ke onomye okwe.
14 Keretita raconho komo waparî me amna toye suu n̂ixan pen kom ha. Xuta yepamtho pen komo marha amna nar̂mai Karebe pen komo, suu n̂ixan kom ha. Sikrake pono marha amna nakn̂iyakn̂e mîîmo pen, kekn̂e tî.
15 Ai ha, kekn̂e takî tî Tapi yîwya. Taa, ow na maar̂a n̂examro yaka, waapanhîrî komo yaka? kekn̂e tî. On wara tî n̂eyukyakn̂e, On wara mak wîîkes awya, yaaro ka amtapotacoko owaikara awehtopo komo poko, omîhra awehtopo komo poko marha oyosomînho ya. Ero poko men amtapotacoko yaaro xa Kaan n̂entarî me xa. Ero yinhîrî tak kaar̂axe so yîhyaka so, kekn̂e tî.
16 Ero ke Tapi komo takî tî naar̂akn̂e, waapanhîrî komo yaka. Cetakpaxi so n̂he tî xatken̂e n̂examro miya xiya wara. N̂eseresmetken̂e, wooku tî n̂eer̂atken̂e. Nahwowatken̂e xa tî mer̂pono pîn yekrî ke Piristew komo yemyawnonho, Xuta yepamtho komo yemyawnonho marha.
17 Ero yimaw takî tî n̂examro yar̂maxi cetken̂e Tapi komo. Sîpî ketaw xa tî yuu yuu ketken̂e wece so. N̂enmayatken̂e rma ar̂mano rirî poko. Kokon̂i cehso ro tî ar̂mano n̂iir̂atken̂e. Emahcira tî xatken̂e. N̂emahciyatken̂e rma re 400 kar̂pamxan komo. Kameru mkaw so tî n̂emahciyatken̂e.
18 Ahnoro tî cemyawnonhîrî komo takî tî nahsîyatken̂e hara Tapi komo, Amarekita komo narîtho. Cipici komo marha tî nahsîyakn̂e Tapi asakno roro rma.
19 Ehcamnopîra ro makî tî xakn̂e ahce na yînarîthîrî komo. Poritomo komo ehcamnopîra, yumumuru komo marha, emsîrî komo marha. Emyawnonhîrî komo marha tî ehcamnopîra ro mak xakn̂e aaxapunhîrî kom ha.
20 Toh komo marha tî nahsîyatken̂e hara paaka komo, oper̂a komo. Noro yipu tî naar̂atken̂e Tapi maywen komo. Poturme tî naar̂atken̂e. Tapi yoku moxam Amarekita komo nahsîtho, ketken̂e tî.
21 N̂etîrametken̂e hara Tapi komo Besorî Yewku kwaka. Iito rma tî xatken̂e ekar̂kaxapunhîrî komo, etînomxapu kom ha. Tapi komo yakro tî esepotpona mokyatken̂e n̂examro. Yîhyaka so tî cekn̂e Tapi, n̂examro takî tî nîmtapotarekn̂e.
22 On wara tko ti ketken̂e kicicitho komo, Amarekita komo narîtho tîmîhra ro mak cexpore nai yîwya so kakro so tohra exirî ke so kica. Cipici komo mak naacowpe, tîmxîkrî komo marha. Ero wa mak naacowpe, ketken̂e tî n̂examro ha.
23 On wara tko tî kekn̂e Tapi, Pîra ro mak oyakno komo. Amemra ro mak cexpore nasî Kporin komo nîmîtho poyero. Noro xa kukurunpetken̂e so. Kwaparî me mohxapunhîrî pen komo nar̂mapoi kîwya so.
24 Onok ma re nai amtapotarî komo ponaro ero wa ketaw awya so ha? Anarî komo n̂etînomce rma kemyawno komo mîtwo. Anarînhîrî komo reha toce ar̂mano riso hara. Ar̂maxapu komo yemyawnonho tko nahsîyaxe etîme re. Ececenarî re xa nahsîcowpe, kekn̂e tî.
25 Ero ke ero wa kacho takî tî Tapi mewrekn̂e Ixaw Yana komo panatanmetopo me. Ero wa kacho ponaro rma naxe oroto. Ero wa naxe.
26 Taa, Sikrake pona tîtoche so Amarekita komo yemyawnonho takî tî narpekn̂e Tapi Xuta yepamtho poritomon komo yaka. Tînîhtînorî komo yaka tî narpekn̂e. On ha awya so tîmsom Kporin komo xatî pînînho pen komo yemyawnonho raconho, kacho tî n̂ekatîmyakn̂e yîwya so.
27-31 On warai pono komo yaka tî narpekn̂e, Betew pono komo yaka, Hamoce pono komo yaka, suu n̂ixan pono komo yaka, Xaci pono komo yaka, Aroe pono komo yaka, Sihmoce pono komo yaka, Estemoa pono komo yaka, Hakaw pono komo yaka, Xeramew yewton pono komo yaka, Kenew yewton pono komo yaka, Ohma pono komo yaka, Korasan pono komo yaka, Ataka pono komo yaka, Ebron pono komo yaka, mîn hak pono komo yaka. Ahna so na Tapi komo cetken̂e roro iitono komo yaka so tî narpekn̂e Amarekita pen komo yemyawnonho raconho. Ero wa tî narpekn̂e Tapi.