Taa, ero yinhîrî tak Ixaw Yana komo yakro takî tî n̂etar̂metken̂e Piristew komo. N̂emahciyatken̂e takî tî okwe Ixaw Yana pen komo n̂examro yai. Mer̂pono pîn tî waihyatken̂e Ixaw Yana pen komo paraxkaxapu me. Xiwboa Yîpîn po tî waihyatken̂e.

2 Kar̂pe xa tî cetken̂e Piristew komo Sau wenari, yumumuru komo wenari marha. Yumumuru pen komo takî tî waihyatken̂e, Xonatas pen, Abinatabe pen, Mawkisua pen.

3 Sau kurunu ro komo yakro takî tî n̂etar̂metken̂e kar̂pe xa tak. Tuwuhrekem komo tî mokyatken̂e meyehra. En̂exa takî tî Sau pen wetken̂e cerewre ro mak oko.

4 Ero ke on wara takî tî kekn̂e Sau cecen̂an yaan̂e ya, Akaciparan ka mohkakî oparaxkachome. Owaikara awexitaw moxam men mokyaxe etanpikantho komo oparaxkaxi. Oyerepexe ro mak oko, kekn̂e tî. N̂eraswakn̂e tko tî Sau yecen̂an yaan̂e. Sau paraxka xera tî xakn̂e. Ero ke tîkaciparanî rma tî mohkekn̂e Sau. Ero poturu pona takî tî n̂epîrkekn̂e oko cetwaikachome rma tak okwe.

5 Ero yinhîrî twaihso takî tî Sau n̂een̂akn̂e ecen̂an yaan̂e. Ero ke noro xa marha tî n̂epîrkekn̂e tîkaciparan poturu pona hara oko. Ero wa tî waihyakn̂e noro hara Sau yakro ro rma.

6 Ero wa waihyakn̂e Sau pen okwe, yumumuthîrî pen komo osorwaw rma, ecen̂an yaan̂enho pen, yukurunthîrî ro pen komo. Ero kaamo po rma tî waihyatken̂e okwe.

7 Taa, on wara takî tî xatken̂e Ixaw Yana komo, aporî yeco pono kom hara, Xotaw yeco pono komo meero, Ixaw Yana sowtatun komo yemahcitopo tî n̂encetken̂e, Sau pen waipo okwe, yumumuthîrî pen komo marha, kacho tî n̂encetken̂e. Ero ke cewtonthîrî komo takî tî nahsîpînketken̂e. Miya so takî tî n̂emahciyatken̂e. Ero yinhîrî Piristew komo takî tî n̂esekenmetken̂e ewtonthîrî komo pona. Iitono ro me tî iina cetken̂e.

8 Enmapuche tak waixa pen komo yemyawnonho yahsîso takî tî cetken̂e Piristew komo. Ero wa ahsîyataw Sau pen yokoputho takî tî n̂een̂atken̂e, yumumuthîrî pen komo yokoputho marha tî n̂een̂atken̂e osorwaw rma. Twaihso tî xatken̂e Xiwboa yîpîn po.

9 Ero ke Sau pen yokoputho takî tî nîpîmkocetken̂e. Noro ponontho marha tî mohketken̂e kuripara ciixapu. Ekahton̂e komo tî n̂en̂epetken̂e miya so Piristew komo chere ro. Sau pen tak waihye okre, ketken̂e. Ponaro cehtopo komo mîn yaw so tî ero wa ketken̂e. Tpoyino komo ya marha tî ketken̂e.

10 On wara tî Sau pen ponontho n̂iir̂atken̂e kuripara, nakriyatken̂e Astaroce komo mîn yaka. Yupunthîrî tî namposocetken̂e ewto wacan pona, Bece San wacan pona.

11-12 Ero yinhîrî takî tî Sau pen yokoputho yekaci n̂encetken̂e Xabes Xireace pono komo. Ero wa tî noro pen yokoputho n̂iice kica Piristew komo, kacho tî n̂encetken̂e. Ero ke iitono komo takî tî cetken̂e Bece San pona kîrkomo, karitî kom ha. Kosope tî cetken̂e. Sau yokoputho tî n̂enîhcetken̂e Bece San wacan pononho. Yumumuthîrî pen komo yokoputho marha tî n̂enîhcetken̂e. Xabes pona tî naar̂atken̂e. Iito takî tî nakn̂iyatken̂e.

13 Iyochîrî komo takî tî nahruyatken̂e roowo cheka Xabes po. Ahporetu yepu yapomyaw tî nahruyatken̂e. Ero yinhîrî tî ceseresmacho komo tî wacetken̂e 7 kaamo. Ero wa tî xatken̂e.