Ero yimaw waano takî tî naar̂akn̂e Tapi Kporin komo n̂entarî me tukurunperî ke Noro ya. Ahnoro yiixatî pîn komo takî tî nar̂mekn̂e noro waparî me mohxapunhîrî, Sau pen marha tî exihra tak xakn̂e noro wapatho hara. Ero ke takî tî on waano naar̂akn̂e.

2 Toopu warai Mîk Kporin komo iipo oyececetotopo warai. Owacan warai marha Mîk ha sowtatu wacan warai. Okurunpen̂e ro Mîk ha, kekn̂e tî Tapi waano me.

3 Ponaro oyehtopo Mîk ha. Noro pona ween̂asî okaritotopo. Oyecen̂an warai marha Mîk ha. Paaka meretîrî warai marha Mîkî okurunu ro me. Owacan warai marha Mîk sowtatu wacan warai. Ow mukurunpesî, cewapatosom komo mîwahkocesî owaikara ehtome so.

4 Kir̂wan Mîk ham okre, kacho mexan xa Mîkî Kporin komo. Noro yakro kîmtapowasî okurunpetopo poko owaparî komo mokyataw. Ero ke okurunpesî Noro okre.

5 Omamton̂e ro mak ween̂akn̂e owaitopo okwe. Kahxi chewno wara ro mak wîxakn̂e, Kaan ponarono pîn komo chew. Cenorisom wara wîxakn̂e okwe owaitopo kwakan wara.

6 Kîkaramiyasî ruupu warai oyesemetanmetopo. Ohxikn̂e wara xakn̂e oyahrutopo yaka. Mîîye wara xa ween̂akn̂e owaitopo oyemcinon̂e wara.

7 Kesemetanmekyakn̂e ro mak okwe. Ero wa oyexitaw Kporin komo yakro kîmtapowakn̂e. Apa, ow yukurunpeko, wîîkekn̂e yîwya. Kaan ya wîîkekn̂e ponaro oyehtopo ya. Tîmîn yaw rma oyencekn̂e. Miya ro mak cekn̂e ham omtapotarî yîn̂entarî me xa.

8 Ero yinhîrî tak roowo nîrîrînakn̂e, n̂esewsîyakn̂e marha. Kaapu mapatan marha n̂esewsîyakn̂e. Ero wara xakn̂e Kporin komo yîrwonîmrî ke kopi.

9 Wehto yîsîn n̂epatakekn̂e Noro yewnarî yaro. Wehto n̂epatakekn̂e yîmtarî yaro akn̂ino ritopo oco. Nîroronwakn̂e tak yînakn̂iputhîrî.

10 Ero yimaw tak kaapu wananîyakn̂e roowo pona tîhtotome tak. Awarpan tî xakn̂e Noro tarî yapon me.

11 Kerubin mkahsî tak n̂etakriyakn̂e kaikokoro tmohtome. Tapokem wara xakn̂e ocowo. Ero pono wara rma mokyakn̂e kaikokoro. Ero wara mokyakn̂e Kporin komo.

12 Awarpanî rma n̂iir̂akn̂e tîmîn me. Tuuna yewru rma xakn̂e yîmîn me cicipiyem xa.

13 Weeyu chew xa xakn̂e Noro. Weeyu yai n̂epatakekn̂e pepe kan̂e oco.

14 Kporin komo nîmtapowakn̂e kah yaw kar̂pe ro mak. Tarai wara ro mak kekn̂e kopi. Kyopono ro xa Mîk nîmtapowakn̂e.

15 Waiwî nar̂mekn̂e ooxatî pîn komo wece. N̂examro pen nakpayakn̂e ro mak. Pepe kan̂e marha nar̂mekn̂e pona so. Ero ke tak ar̂mano n̂iir̂akn̂e.

16 Ero yimaw tak tuuna imo napaiyakn̂e yarinho me cehso ro. Roowo mapatan warai mko marha n̂esenpekn̂e. Tuuna yein̂e wara xakn̂e Kporin komo. Puu kekn̂e mak cewnarî yaro tuuna imo yapainokachome.

17 Kah yawno Mîk Kporin komo. En̂exa rma tko n̂etapoyankekn̂e oyanîmtome. Weyunthîrî kwawnonho oyanîmyakn̂e.

18 Kar̂pe ro mak xatken̂e ooxatî pîn komo oyopo ro mak. Ooxera ro mak xatken̂e okwe. Noro yipu komo ya rma tko owaikapora xakn̂e okre.

19 Oyesemetanmetîketaw xa mokyatken̂e ooxatî pîn komo. Kporin komo tko oyececekn̂e rma okre.

20 Kir̂wantaka tak oyar̂akn̂e tamtakem pona. Tîn̂enîrî me oyen̂akn̂e ham. Ero ke okurunpekn̂e.

21 Ero wa okurunpekn̂e Kporin komo kir̂wan me oyexirî ke, kicicme oyehtoponho exihtorî ke marha.

22 Kporin komo yehtopo yaw roro mak wîxakn̂e. Kicicme exihra wîxakn̂e, Kporin komo poko rma wîxakn̂e etowra ro mak.

23 Yîmtapotarî ponaro wîxakn̂e opanatanmetopo ponaro. Ero wa men ehcoko, kacho yai etaknamara ro mak wasî.

24 Kicicme mîxakn̂e kica, kacho mera ro mak wîxakn̂e yîwya. Akpîn me exihra ro mak wîxakn̂e.

25 Kir̂wan me oyen̂akn̂e Kporin komo. Ero ke oyepemekn̂e, oyakronomekn̂e kicicme exihnî me oyenîrî ke.

26 On wara mas Apa, etpînîn yawno komo ya mesenpesî yîpînîn yawno me xa marha. Kicicme exihnî mîkro, kacho komo ya mesenpesî kicicme exihnî me hara.

27 Kicicitho yakro esmaxapu exihra ro mak nasî anarî komo ropotarî. Noro yipu komo ya mesenpesî kicicitho yakro esman me xa marha. Kemîknon̂e komo ya tko mesenpesî iyopo so yîhtînon̂e me hara.

28 On wara masî anarî komo xawyakan me cesehtînosom komo ya, kicicitho ya ahsîpora masî. Ero warahra masî, cehcoyoponkaxmu kan̂e komo poko reha. Noro yipu komo ponaro masî cehn̂axmu me tak enpotome so.

29 Oweyuru me mas Apa. Awarpanaw oyexitaw ow mîweipesî kir̂wan̂he okre.

30 Kar̂pe wasî oyakronomarî ke awya. Ero ke sowtatu yarmaxi kîwcesî kar̂pe. Ponaro oyehtopo ya okaritorî ke waaca yepore tahron̂em wara wasî.

31 Kir̂wan̂he ro mak nasî ahce wa na kiitopo komo Kaan ya. Kir̂wan̂he xa nai ham yîmtapotarî, wîîkesî yukukman̂enhîrî kaxi. Noro pona een̂ataw kîwya so kecen̂an komo me nas okre.

32 Noro mak Mîkî Kaan. Onoke ma re nai anarî hara? Kporin komo mak nasî ero warai me. Onoke ma re nai anarî toopu warai? Pîra, ponaro kehtopo komo mak nasî ero warai me.

33 Kaan xa nasî okariton̂e me. Noro marha oyesamarî nakir̂wamesî.

34 Ohtarî marha karihcesî Noro kooso wara xa owtotome kar̂pe. Îîpî meretwono me oriyasî.

35 Waapa yakro oyetar̂macho poko oyamorî nîhcamhokesî. Oyaporî karihcesî marha krapa yesîtome tak owya. Cewaxkem tak wehsasî bronse ciixapu rma.

36 On wara mas Apa opoko, oyecen̂anî rma mîmyas owya. Oyakronomacho rma mîn oyecen̂an. Yamoro ow menporitîkesî. Ero wa oritopo yanme rma cewetîsom me tak ow miir̂asî.

37 Tamtake tak maiwesî oyesamarî owcetaw rma. Ero ke ehrokara wehxe.

38 Ooxatî pîn komo poko ro mak kîwcekn̂e. Waihkekn̂e ro mak. Poropîra ka wîxakn̂e. Waihtîkache so mak tak kporohye.

39 N̂examro pen wapikmekn̂e ro mak. Wetapekn̂e ro mak awomrî komo yarohra thakwa. Onapikrî me n̂epîrketken̂e.

40 Ow mîkaricekn̂e waihkano ritohme tak owya. Oyar̂ma xatî komo miir̂akn̂e tuupe cewru omamakan me.

41 Ooxatî pîn komo mîwaikapekn̂e owya onapikrî me ehtome tak yîpîmîrî komo. Owaparî me tmohsom pen komo tak ow waihkekn̂e.

42 N̂esewyar̂atken̂e rma re n̂examro tukurunpen̂e komo yenî xe. Exihra ro makî tko xakn̂e. Kporin komo yakro marha re nîmtapowatken̂e. Yîmtapotarî komo yewetîra ro mak xakn̂e.

43 N̂examro pen yaposokan̂e wara wîxakn̂e. Wakuhr̂apekn̂e ro mak pin̂ipici me cehso ro roowo pupuntho wara ro mak. Wapikyakn̂e apacakrî wara esama yawno wara. N̂examro pen wakpayakn̂e ro mak.

44 Omaywen komo meero oyanwekyatken̂e okwe. Wara rma ow mukurunpekn̂e. Waipîra ow miir̂akn̂e mîk hak rowon pono komo kayaritomon me tak oyehtome. On̂enîtho pîn komo tak naxe amn̂e omaywen me.

45 Anarî yana komo tak naxe omaywen me. Omtapotarî yentache rma oyewecaxe.

46 Nahwokexe ro mak anarî yana komo. Tatan̂e mak mokyaxe ceseyamtoponhîrî komo yai.

47 Waipîn me nas okre Kporin komo. Kir̂wan̂he nai ham okre Noro toopu warai, oyapon warai. Kayaritomo xa Mîk ham okre, kapore nasî Kaan ya, toopu me cehsom warai ya. Okurun me nasî Noro.

48 Kaan xa oyepanîyasî. Mîk hak rowon pono komo n̂iir̂asî omaywen me.

49 Ooxatî pîn komo ya oyar̂mapora nasî. Ow manîmyasî oyar̂ma xatî komo yopono me oyehtome. Cewapatosom komo ya owaikapora masî.

50 Ero ke mîk hak rowon pono komo n̂entarî me kîmtapowas apoko apa. Kir̂wan̂he awehtopo poko kîmtapowasî. Kir̂wan̂he xa nai Kporin kom ham okre, wîîkesî waano me.

51 Waapa komo yopono me xa oriyasî. Kayaritomo me yîn̂irithîrî ow. Opînîn yaw xa nasî tînîhkapethîrî me oyexirî ke. Tapi ow ha, yînakronomarî xa. Oyepamtho marha nakronomesî miya roro yîtîhkan me ro mak. Ero wa nasî Kporin komo, kekn̂e tî. Ero wa tî kekn̂e Tapi waano me.