Ero yinhîrî takî tî on wara xakn̂e kaapu kayaritomo me exitaw rma Tapi, tuuna tî mokuhra xakn̂e 3 cimn̂ipu okwe. Ero ke Kporin komo yakro takî tî nîmtapowakn̂e Tapi ero poko. On wara tî Kporin komo n̂eyukyakn̂e, Tuuna yekmexpora wasî Sau pen poyero, noro yanan komo yanme marha, waihkano ciri xatî komo mîkyam xatken̂e. Xibeonita pen komo waihkekn̂e Sau pen okwe, kekn̂e tî.

2 Ero ke Xibeonita komo tî nan̂ikpekn̂e kayaritomo. Ixaw Yana pîn mîkyam xatken̂e Xibeonita komo. Amohew komo yepamtho reha mîkyam xatken̂e, etîmtoxapu kom ha. Awaikara so nas amna, ketken̂e tî pahxa Ixaw Yana komo yîwya so. Yaaro xa tan amna kesî Kporin komo n̂entarî me, ketken̂e. Wara rma n̂examro pen tî waihkekn̂e Sau pen. Waihkatîka xe tî xakn̂e okwe. Ixaw Yana komo rowon mak tan ha, kekn̂e tî noro pen. Xuta yepamtho komo rowon marha tan. Anarî komo rowon pînî ro mak, kekn̂e tî. Ero wa tî kekn̂e Sau pen.

3 Ero ke on wara tî kekn̂e Tapi Xibeonita komo ya, Cetwîrîmaxi nas okwe amna rowon, Kporin komo nîmîtho. Ahce wîmya awya so? Ahce wa xa kiir̂atu so akirwaman̂e me tak awehtome so? kekn̂e tî yîwya so.

4 On wara tî ketken̂e Xibeonita komo, Sau pen purantantho yahsî xera ro mak nas amna, prata, ooru, ero warai yahsî xera ro mak nas amna. Noro pen yananînho purantantho marha ahsî xera nas amna. Ixaw Yana komo waihkapo xera marha nas amna awya, ketken̂e tî. Taa, ahce xe xa mat ha ke, ahce wîmya awya so ha? kekn̂e tî Tapi yîwya so.

5 On wara tî ketken̂e kayaritomo ya, Amna waihkan̂enho poko mak xa cesepan xe nas amna. Amna waihkacho poko n̂esencekn̂e tmaywen komo yakro. Ixaw Yana komo chew amna yexi xera ro mak xakn̂e noro.

6 Noro pen yepamtho cma re mîmyas amna ya amna nwaikarî. Kîrkomo re tîmko amna ya, 7 mak ha. N̂examro waihkache okoputhîrî komo amna namhosocesî kir̂wantaw Kporin komo ya enpon̂e wara. Ximea po amna n̂exewnukyasî Sau pen yekenho po, kayaritomo me Kporin komo n̂iritho yekenho po, ketken̂e tî. Taa, wîmyas awya so ha, kekn̂e takî tî Tapi.

7 Mepibosece tko tî nîmcekn̂e, Xibeonita komo ya tîmîhra xakn̂e. Xonatasî pen mumutho mîk nîmcekn̂e, Sau pen parînho. Cetwakrecho komo poko tî nîmtapowatken̂e Tapi komo, Xonatasî yakro. Yaaro xa wîîkesî Kporin komo n̂entarî me, ketken̂e tî ero yimaw. Ero ke tî noro pen mumutho nîmcekn̂e.

8 Hispa mrerî komo xa nahsîyakn̂e asakno roro rma. Ahmonn̂i, Mepibosece, ero wa tî nahsîyakn̂e. Aia yemsîrî tî mîk xakn̂e Hispa Sau pen cinho ha. 5 marha tî nahsîyakn̂e Merabe mrerî komo, Sau pen yemsîtho mrerî kom ha. Atîriew pici tî mîk xakn̂e Merabe. Bahsirai mumuru tî mîk xakn̂e Atîriew, Meoracita ha.

9 N̂examro pen tî nîmyakn̂e Tapi Xibeonita komo ya. N̂examro pen takî tî waihketken̂e, okoputhîrî komo takî tî namhosocetken̂e îîpî meretkoso. Kporin komo ya enpon̂e wara tî namhosocetken̂e. 7 rma tî waihketken̂e. Yihcirî me sepata yeperîrî yîhkototopo me exitaw waihketken̂e okwe.

10 Ero yinhîrî on wara tî xakn̂e Hispa, Aia yemsîrî, kumixitho tî namomhokekn̂e cetîrapotopo me. Ero wa tî n̂iir̂akn̂e toh po okoputhîrî mîtwo rma okwe. Pahkî tî xakn̂e iito, sepata yeperîrî kototoponho n̂ixa ro cimn̂ipu mohtopo pona roro, okoputhîrî matanîn̂e mohtopo pona roro. Kwacinama komo tî n̂en̂epekn̂e katpanaw so. Kamara warai komo marha tî n̂en̂epekn̂e kosope hara okoputhîrî korîn yahn̂e komo.

11-12 Ero yinhîrî Tapi Hispa yehtopo tak tî n̂encekn̂e Tapi. Iito makî tî n̂enmaya Hispa Sau pen pici wara cehsomînhîrî. Kokmamya marha tî iito, kacho tî n̂encekn̂e. Ero yinhîrî takî tî Sau pen yocho yehso cekn̂e Tapi. Xabes Xireace pono komo yawnonho tî n̂ekyakn̂e. Xonatas pen yocho marha tî n̂ekyakn̂e en̂exa. On wara tî xatken̂e Xabes Xireace pono komo pahxa, n̂examro pen yokoputho tî naar̂atken̂e Piristew komo nwaikatho Xiwboa Yîpîn po. Waihkache okoputhîrî tî naar̂atken̂e Piristew komo Bece San pona. Iina takî tî namhosocetken̂e tîhroron komo po. En̂exa tî okoputhîrî naar̂atken̂e Xabes Xireace pono komo en̂epa me.

13 N̂examro yawnonho takî tî Tapi n̂ekyakn̂e Sau pen yocho, Xonatas pen yocho marha. Amhosotoxapunhîrî komo yocho marha tî n̂enmekyakn̂e.

14 Sau pen yocho, Xonatas pen yocho, n̂examro pen yocho takî tî nahruyatken̂e Kisi pen yocho yawxari, Sau pen yîmînho yawxari. Sera po tî xakn̂e Kisi yocho Benxamin komo chewno po. Ero wa tî iyochothîrî komo n̂iir̂atken̂e kayaritomo mtapotachonho yaw roro rma. Ero yinhîrî takî tî, yîrowon komo takî tî nakirwamekn̂e Kporin komo, takro yîmtapotacho komo yanme tak ha.

15 Taa, tooto imo pen komo waihkachonho wekatîmyasî, Tapi maywen komo ya waihkachonho ha. Pahxa Piristew komo takî tî n̂etar̂metken̂e xa hara Ixaw Yana komo yakro. Sowtatu komo tî naar̂akn̂e Tapi Piristew komo yakro etar̂machome. Etar̂metaw so tko tî n̂ekar̂kekn̂e Tapi.

16 Ero wa exitaw Isbi Benobe takî tî mokyakn̂e, Piristew yepamtho. Tooto imo pen yepamtho tî mîk xakn̂e. Noro rahnu poturu tî xakn̂e porinî ro mak. 3,5 kiru wicakî tî xakn̂e awsîn okyo. Kacipara imo marha tî xakn̂e noro yemyaw yaxan ha. On wara tî kekn̂e noro ero yimaw, Taa, Tapi penî kr̂a waihkesî oroto, kekn̂e tî.

17 Ero yimaw rma tko tî mokyakn̂e Abisai, Seruia mrerî. Tapi tî nukurunpekn̂e. Piristew pen tî namekn̂e kacipara imo ke. Ero wa tî waihkekn̂e. Ero yinhîrî on wara takî tî ketken̂e Tapi maywen komo yîwya, Yaaro xa tan amna kesî Kporin komo n̂entarî me, amokyataw ar̂mano riso mîwaiyasî tak men okwe. Awaipuche Ixaw Yana komo tak naxe weyumnî wara okwe. Ero ke amna yakro mokuhra ro mak men esko amoro ar̂mano riso, ketken̂e tî.

18 Ero yinhîrî pahkî n̂he exiche n̂etar̂metken̂e xa hara tî Piristew komo Ixaw Yana komo yakro. Kobe po tî n̂etar̂metken̂e. Ero yimaw Sibekai takî tî Saap pen waihkekn̂e, tooto imo yepamtho pen xa marha. Usatita tî mîk xakn̂e Sibekai.

19 Ero yinhîrî n̂etar̂metken̂e xa hara tî Piristew komo Ixaw Yana komo yakro. Kobe po xa hara tî n̂etar̂metken̂e. Ero yimaw Ewanan tî tooto imo pen waihkekn̂e xa hara. Korias pen yaknonho tî mîk waihkekn̂e, Kace pononho pen yaknonho. Porin me tî xakn̂e noro pen rahnu yecepu, kuywa kahtopo wicakno okyo. Beren pono tî mîk xakn̂e Ewanan, Xaare-Orexin mumuru tî.

20 Anarimaw xa hara tî n̂etar̂metken̂e Kace po tak. Iito marha tî xakn̂e tooto imo anarî hara. Kawno tî mîk xakn̂e. 6 me so marha tî xakn̂e noro yamoyaran ececoka. 6 me so marha tî xakn̂e yîhtayaran hara ececoka. 24 tî xakn̂e ahnoro yîhtayaran, amoyaran meero. Tooto imo pen yepamtho marha tî mîk xakn̂e noro.

21 Ixaw Yana komo tî nîwîrîyakekn̂e. Ero ke Xonatas takî tî waihkekn̂e. Simea mumuru tî mîk xakn̂e Xonatas, Tapi yakno mumuru ha.

22 4 tî xatken̂e Tapi maywen komo nwaikatho komo, tooto imo pen yepamtho pen komo, Kace pononho kom ha. Ero wa tî waihketken̂e.