Taa, ero yinhîrî on wara takî tî xakn̂e Isbosece Sau pen mumutho, Abine pen waihtoponho takî tî n̂encekn̂e. Ero ke nahwokekn̂e ro mak takî tî okwe. Ixaw Yana komo marha tî n̂eserepoketken̂e ahnoro.

2 Taa, Isbosece maywen tî xatken̂e asakî kîrkomo, sowtatu yaan̂e komo. Baana, Hekabe, ero wa tî xakn̂e osotî komo. Himon mumuru komo tî mîkyam xatken̂e, Beeroce pono mumuru kom ha. Benxamin yepamtho tî mîkyam xatken̂e. Benxamin yepamtho komo yewtonî rma mîn Beeroce.

3 Pahxa tî n̂emahciyatken̂e Beeroce pononho komo Xitain pona anarî ro komo cheka. Iito rma naxe oroto yîchew so.

4 Taa, Xonatasî pen mumutho tî xakn̂e ero yimaw. Yîhrepun tî mîk xakn̂e ececoka rma okwe. 5 cimn̂ipu makî tî xakn̂e noro yewrutoponho ciki Sau pen waihtoponho yesencetaw, Xonatasî pen komo waihtoponho yesencetaw ha. Xisirew po tî waihcow okwe, kacho tî n̂encetken̂e. Waihtoponhîrî komo yentache rikomo takî tî nanîmyakn̂e wooxam rikomo yenîn̂e ro. N̂emahciyakn̂e takî tî. Kar̂pe cetaw tko n̂epîrkekn̂e rikomo pen. Ero yanme tî n̂ehrekekn̂e okwe. Noro pen yosotî ciki xakn̂e Mepibosece.

5 Taa, Abine pen waipuche tak Isbosece yaka tî cetken̂e Hekabe komo, Baana yakro, Himon mumuru kom ha. Isbosece yewton pona tî n̂epataketken̂e ocoro xa exitaw kaamo. Ero yimaw tî n̂etakriyakn̂e Isbosece kamarakataw.

6 Yîmîn yaka tî n̂ewomyatken̂e Hekabe komo atumnaka xa. Puruma wecan wara tî cetken̂e iina. Iito cexitaw so Isbosece pen tî paraxketken̂e okwe wethîrî poko. Paraxkache n̂emahciyatken̂e takî tî.

7 Tîwîntopo ro yaw tî xakn̂e Isbosece ero yimaw kuywa po tî xakn̂e. Ero wa exitaw yîmîn yaka tî n̂ewomyatken̂e Hekabe komo. Noro pen paraxkache takî tî nîpîmkocetken̂e. Yîhtîpîthîrî tî naar̂atken̂e. Cetken̂e takî tî esama yaw, woskara pore. Kokmamyatken̂e esama yaw rma, n̂enmayatken̂e marha tî.

8 Ebron pona tî cetken̂e Tapi yaka, kayaritomo yaka. Yîhyaka tî naar̂atken̂e Isbosece pen pîtho Ebron pona. On wara tî ketken̂e yîwya, Ehe, on ha Isbosece pen pîtho, Sau pen mumutho pîtho. Aaxatî pîn pen mumutho pîtho on, awaika xatî pen mumutho pîtho ha. Oroto tak awepanpo Kporin komo Sau pen poko, epamthîrî poko marha, ketken̂e tî.

9 On wara tko tî Tapi n̂eyukyakn̂e yîmtaka so, Yaaro xa tan wîîkesî awya so, Kporin komo nasî waipîn me, oyakronomekn̂e oyesemetanmekyataw noro nasî waipîn me, kacho wara rma nasî omtapotarî yaaro xa,

10 pahxa Sau pen yehtoponho yekatîmn̂e mokyakn̂e ohyaka, Waihye kr̂a tak ha Sau pen, kekn̂e owya. Tawake tak na nai Tapi ero yipu yencetaw, kekn̂e cma tî re tîropotaw. Noro pen tko wahsîye, waihkai tak Sikrake po. Ero wa noro pen wiire, Sau pen waihkachonho yekatîmn̂enho pen.

11 Soroso xa twaihkaxmu me maxe amyamro hara, kicicitho komo. Kicicitho pîn mîwaikace okwe yîmîn yaw rma, yîwîntopo po rma. Ero ke noro pen tak nasî cepanpore hara. Twaihkapore maxe roowo po exihnî ro me kra, kekn̂e tî.

12 Ero wa kache tmaywen komo ya takî tî n̂examro pen waihkapekn̂e. Okoputhîrî tî namohkocetken̂e, nîhrokocetken̂e marha tî. Yupunthîrî komo takî tî namhosocetken̂e tuuna yecihtaw, Ebron pono yecihtaw. Isbosece pîtho tko tî nahruyatken̂e Abine pen yahrutoponho yaka rma, Ebron pono yaka rma. Ero wa tî nahruyatken̂e.