Taa, ero yinhîrî Ixaw Yana komo takî tî mokyatken̂e Tapi yaka Ebron pona. Tribu komo tî mokyatken̂e ahnoro rma. On wara tî ketken̂e yîwya, ayocho me rma nas amna yocho. Apun me marha nas amna pun.

2 Pahxa, Sau pen ka exitaw kîkayaritomon me amoro xa Ixaw Yana sowtatun komo maar̂akn̂e waapa me. On wara marha tî kekn̂e Kporin komo awya, Amoro xa mas amn̂e oyanan komo yenîn̂e me. Ixaw Yana komo yenîn̂e me masî oper̂a yenîn̂e wara. N̂examro kayaritomon me tak masî, kekn̂e tî awya, ketken̂e tî. Ero wa tî ketken̂e Ixaw Yana komo Tapi ya.

3 Ero yinhîrî takî tî Ixaw Yana poritomon komo mokyatken̂e Tapi yaka ahnoro. Ebron pona tî mokyatken̂e. Ero ke n̂examro yakro tî nîmtapowakn̂e Tapi cetkurunpetopo komo poko. Yaaro xa tan wîîkesî, on wara was amn̂e apoko so, kekn̂e tî yîwya so. Ero yinhîrî Tapi takî tî nîhkapetken̂e Ixaw Yana komo kayaritomon me hara.

4 30 cimn̂ipu tî xakn̂e Tapi yewrutoponho kayaritomo me ecir̂ataw. Ero yinhîrî takî tî 40 cimn̂ipu pahkînon xakn̂e kayaritomo me.

5 Ebron po tî ka xakn̂e Xuta yepamtho komo kayaritomon me 7 cimn̂ipu, 6 nuun̂i xa hara. Ero yinhîrî Xerusaren po takî tî xakn̂e hara Ixaw Yana komo kayaritomon me, Xuta yepamtho komo kayaritomon me meero. 33 cimn̂ipu tî xakn̂e iito ahnorono komo kayaritomon me. Ero wa tî xakn̂e.

6 Taa, on wara takî tî xakn̂e Tapi, Xerusaren pona tî cekn̂e tîsowtatun komo yakro Xebusew komo waparî me. Iitono ro mîkyam xatken̂e Xebusew komo Xerusaren pono ro. Ewto panaka Tapi komo mokuche on wara tî ketken̂e Xebusew komo yîwya so, Oona ewto pona xa amokutorî ro komo. Ewuhnîtho komo rma aporoketu so, yîhrepuntho komo marha, ketken̂e tî. Tîhyaka so mokuhnî me ro makî tî Tapi komo nîhtînoyatken̂e. Ero wa tî nîhtînoyatken̂e Xebusew komo.

7 Siaw rma tko tî nahsîyakn̂e Tapi. Tapi Yewton, kacho rma mîn Siaw, sowtatu wacan ha.

8 On wara tî kekn̂e Tapi ero kaamo po, Xebusew komo yar̂maxi kîwcetaw so tuuna totopo yaro mak tîtopore nasî. Ero yaro kîwcetaw so Tapi xatî pîn komo tak tar̂mexe yîhrepun komo, ewuhnî kom ha. Ero yinhîrî rma tak on wara ketu iitono komo anarimaw so, On mîîmo yaka ewomra ro mak maxe okwe. Ewuhnî komo rma aporohkexe so, yîhrepun komo marha. Mîîmo yaka mokuhra ro mak maxe, ketu.

9 Ero yinhîrî iina takî tî n̂esekenmekn̂e Tapi sowtatu wacantho yaka. Tapi Yewton, kacho me takî tî n̂osohcekn̂e ero. Mîîmo mko takî tî n̂irpekn̂e iina. Yihcirî me ka n̂irpekn̂e Miro pona. Ero yinhîrî miya so takî tî mîîmo mko n̂irpekn̂e hara ewto rakataka cehso ro.

10 Ero yinhîrî yukurumîkno me takî tî n̂ehtîkekn̂e Tapi kayaritomo me xa tak. Kporin komo Kaan xakn̂e akronoman̂e me, kantoman̂e ro ha. Ero wa takî tî n̂ehtîkekn̂e Tapi.

11 Ero yimaw Ciru pono komo kayaritomon tî xakn̂e, Iraw tî mîk xakn̂e noro yosotî. Noro takî tî tîmtapotarî yekatîmn̂e komo n̂en̂epekn̂e Tapi yaka. Setru yepu marha tî narpekn̂e yîhyaka, mîîmo ciin̂e ro komo marha tî n̂en̂epekn̂e, toopu yenporin̂e ro komo marha. N̂examro takî tî Tapi mîn n̂iir̂atken̂e.

12 Ero yimaw on wara takî tî kekn̂e Tapi tîropotaw, Ixaw Yana komo kayaritomon me oriye ham Kporin komo. Omaywen komo tak n̂iir̂a anarî ro komo yopono me. Ero wa kiir̂atu so tîyanan me xa exirî ke Ixaw Yana komo, kekn̂e tî. Ero wa tî kekn̂e Tapi tîropotaw.

13 Taa, on wara tî xakn̂e Tapi Ebron poi tmokuche Xerusaren pona, cipici komo takî tî nahsîyakn̂e xa hara. Anarî komo marha tî nahsîyakn̂e cipici wara cehsom me rma. Ero ke noro mumuru komo xa hara tî n̂ewruyatken̂e iito, noro yemsîrî komo marha.

14-16 On wara nasî yumumuru komo yosotî Xerusaren po ewruxapu komo, Samua, Sobabe, Natan, Saromaw, Iba, Erisua, N̂epeke, Xapia, Erisama, Eriata, Eriperece. Ero wa tî xakn̂e Tapi mumuru komo yosotî, Xerusaren po ewruxapu komo yosot ha.

17 Taa, Piristew komo takî tî n̂encetken̂e Tapi yîhkapetoponho. Ahnoro Ixaw Yana komo me tak nasî Tapi, kacho tî n̂encetken̂e. Ero ke etar̂maxi takî tî cetken̂e Tapi yakro. Ahnoro n̂examro sowtatun komo tî cetken̂e. Ero ke sowtatu wacan yaka takî tî n̂ewomyakn̂e Tapi.

18 Hepain Woskaran pona tî cetken̂e Piristew komo. Iina takî tî n̂epanacetken̂e miya so woskara pore.

19 Ero yinhîrî Kporin komo mtapotarî tî ka n̂encekn̂e Tapi. Ai Apa, kekn̂e tî, Piristew komo yar̂maxi kîwce? Iina owtoche n̂examro mar̂mape owya? kekn̂e tî. Etoko rma, kekn̂e tî Kporin komo, yaaro tan wîîkes awya, Piristew komo war̂mapes awya, kekn̂e tî.

20 Ero ke cekn̂e takî tî Tapi Baaw Perasin pona. Iito takî tî Piristew komo pen nar̂mekn̂e. Ar̂mache on wara takî tî Tapi kekn̂e, Tuuna wahkotoxapunhîrî wara oriw ham Kporin komo, twahkototoponhîrî macakan̂e wara. Ero wara Piristew komo yopono me oriw, kekn̂e tî. Ero ke Baaw Perasin me takî tî n̂esosocekn̂e iitono woskara.

21 Iito tak mîk hak warai me ciixaputho mko mîn nînomyatken̂e Piristew komo. Ero ke ero mko takî tî miya kr̂a naar̂atken̂e Tapi sowtatun komo.

22 Ero yinhîrî takî tî mokyatken̂e xa hara Piristew komo Ixaw Yana komo waparî me xa hara okwe. Hepain Woskaran pona xa hara tî mokyatken̂e.

23 Ero ke Kporin komo mtapotarî takî tî n̂encekn̂e xa hara Tapi. On wara tî kekn̂e Kporin komo yîwya, Piristew komo wece tohra ka ehcoko. Mamrikno xa matko ciicoko. Yîmkai so mak etocoko. En̂exa tak yuu yuu kacoko wece so amoreira yecen̂e awexitaw so.

24 Iito makî ka ehcoko. Ero yinhîrî sowtatu komo torî wa mencesî, weewe yarihtari torî wara. Ero yipu yentache awya so yuu yuu kacoko tak yohno. Tomo tak ham Kporin komo kpoturme so Piristew komo yar̂maxi, kacoko tak, kekn̂e tî.

25 Ero ke ero wa tî xakn̂e Tapi, Kporin komo mtapotarî yaw roro rma. Ero ke Piristew komo nar̂metken̂e xa hara. Xibea po ar̂mano n̂ihciyatken̂e. En̂exa ar̂mano n̂iir̂atken̂e miya roro Xese pona roro. Ero wa tî Piristew pen komo nar̂metken̂e.