Taa, ero yinhîrî kîrkomo takî tî nan̂ikyakn̂e Tapi, Ixaw Yana komo, karitî komo mak. Mer̂pora tî nan̂ikyakn̂e, 30.000.

2 Mokuche so takî tî Tapi yakro cetken̂e Baarin Xuta pona. Kaan yamatan yehso tî cetken̂e. Kporin komo yamatanî ro mîn xakn̂e. Ero wa n̂esosocekn̂e, Noro yosohcaro rma. Kantoman̂e ro Mîkî Kaan, kerubin yotawno ro, Noro yamatan wece tî cetken̂e.

3-4 Ero takî tî n̂enkayatken̂e tarara yaka yaxan yaka. Ero wa tî naar̂atken̂e. Abinatabe mîn yai tî naar̂atken̂e îh pono yai. Abinatabe mumuru komo tî naar̂atken̂e tarara. Usa, Aio ero wa tî xakn̂e n̂examro yosotî. Ero wa tî tarara naar̂atken̂e Kporin komo yamatan yeen. Aio tî cekn̂e tarara poturme.

5 Ero wa aar̂ataw Tapi tî n̂ahwowakn̂e xa Ero wa xa marha tî n̂ahwowatken̂e ahnoro Ixaw Yana komo. Kporin komo poko rma tî n̂ahwowatken̂e. Waano tî naar̂atken̂e, raatî marha tî nîyorketken̂e. Maraka marha tî nîyorketken̂e, cahcacahca kan̂e marha.

6 Ero yinhîrî Nakon mararîn panari tî cetken̂e. Iito tî xakn̂e noro natîrî yeperîrî yîpîpîtîkacho. Iito exitaw paaka tî n̂ehrokekn̂e. Ero ke Kporin komo yamatan takî tî nahsîyakn̂e Usa ecehtotome.

7 Ero yanme takî tî nîrwonakn̂e Kporin komo Usa poko tîyamatan yahsîrî ke. Ahsîra ro mak cexpore tî xakn̂e okwe. Ero ke Usa pen tî waihkekn̂e. Iito rma tî waihkekn̂e tîyamatan mîtwo rma.

8 Ero ke nîrwonakn̂e takî tî Tapi Usa waihkarî ke Kporin komo ya. Ero ke iitono roowo tak Perese Usa me n̂esosocekn̂e. Ero wara rma n̂esetacasî oroto rma.

9 Kporin komo pona takî tî n̂eraswakn̂e Tapi. On wara tî kekn̂e, Ahce wa thakwa re Kporin komo yamatan ohyaka wekya? kekn̂e tî.

10 Ero ke Kporin komo yamatan yekî xera takî tî xakn̂e tîhyaka Tapi Yewton, kacho pona. Obece Eton mîn yaka makî tî naar̂akn̂e iitono yaka rma. Kace pononho mîk xakn̂e Obece Eton.

11 Noro mîn yaw rma ka n̂enmayakn̂e Kporin komo yamatan 3 nuun̂i. Iito exitaw Obece Eton tî nakronomekn̂e xa Kporin komo, yîhyawno komo ahnoro tî nakronomekn̂e okre.

12 Ero yinhîrî noro yehtopo takî tî n̂encekn̂e Tapi, Obece Eton tî nakronome xa okre Kporin komo tîyamatan exirî ke yîhyaw. Yîhyawno komo marha tî nakronome, emyawno komo tî n̂epamnoya, iyoku marha n̂epamnoya. Ero wa tî Obece Eton nakronome Kporin komo, kacho tî n̂encekn̂e. Ero ke Obece Eton mîn yaka takî tî cekn̂e xa hara Tapi. En̂exa tî tîhyaka n̂ekyakn̂e Kaan yamatan, Tapi Yewton, kacho pona. Nahwowakn̂e ekyataw.

13 Morona nhe mak ka toche Kporin komo yamatan yaan̂e komo, Ahri kapu, kekn̂e tî Tapi. 6-îro makî tî ka tapi tapi ketken̂e. Iito takî tî bui pun nakn̂iyakn̂e Tapi, oper̂a xîkrî pun marha tî, yupurukrexapu pun. Kaan ya tîmsom me tî nakn̂iyakn̂e.

14 Ero yinhîrî takî tî Tapi manakn̂e. Kar̂pe ro makî tî manakn̂e. Kporin komo poko nahwowakn̂e. Eepoci yaw tî manakn̂e, riin̂u kahxapu yaw.

15 Ero wa tî n̂ahwowakn̂e Kporin komo yamatan yekyataw. Ixaw Yana komo marha tî mokyatken̂e Tapi yakro. Cemtarakaro tî mokyatken̂e, tuu kaxi marha tî. Ero wa tî n̂ekyatken̂e Kporin komo yamatan.

16 Taa, Tapi Yewton pona xa ekyataw so iito tî xakn̂e Mikaw, Sau pen yemsîtho. Mîîmo yewkanapan yaro tî n̂een̂akn̂e ekrî komo. Tapi manîmrî tî n̂een̂akn̂e, kayaritomo manîmrî ha. Manataw tî nahronakn̂e Tapi, ero yipu yenîrî ke tî noro nîwîrîyakekn̂e tîropotaw.

17 Taa, Kporin komo yamatan yekîche ewto pona mîîmo yaka takî tî naar̂atken̂e roona yaka, Tapi n̂ir̂potho yaka. Iina takî tî n̂iir̂atken̂e Kaan yamatan ekenî ro yaka. Ero yimaw marha takî tî tokuthîrî pun nîmyakn̂e xa hara Tapi Kporin komo ya. Takn̂itîkaxmu tî nîmyakn̂e, Aaxe xa wasî, kacho marha tî. Kaan yeepatai rma nîmyakn̂e.

18 Aknirî yîtîhkache tak on wara takî tî kekn̂e Tapi Ixaw Yana komo ya, Kporin komo awakronomacowpe, Kantoman̂e ro ha, kekn̂e tî.

19 Ero wa kache takî tî Ixaw Yana komo n̂erewusmekn̂e Tapi ahnoro. Puruma n̂ekamyakn̂e yîwya so yupuxapu cewn̂e so. Iyotî komo marha tî n̂ekamyakn̂e. Uupa yeperîrî marha tî nîmyakn̂e yîwya so yuturpamnoxapu. Kîrkomo komo tî n̂erewusmekn̂e ahnoro, wooxam komo marha. Ero yinhîrî tîmîn komo yaka takî tî cetken̂e hara Ixaw Yana komo. Ero wa tî cetken̂e.

20 Ero yinhîrî tîmîn yaka takî tî cekn̂e hara Tapi tîhyawno komo yakronomaposo hara Kporin komo ya. Iina cetaw rma Mikaw takî tî mokyakn̂e mîîmo yai Tapi yakro esepotpona. On wara tî kekn̂e Tapi ya, Cenporera ro mak mesenpo oroto kica Ixaw Yana komo kayaritomon warahra ro mak. Amaywen komo yanton n̂enîrî me rma mepononka kica wooxam komo n̂enîrî me. Ero wara n̂epononketu kicicitho komo kica kîrkomo, kekn̂e tî yîwya.

21 On wara tko tî kekn̂e Tapi yîwya, Kporin komo poko mak kmanmo. Noro rma oriye tîyanan komo kayaritomon me aamonhîrî pen yekenho na. Noro yanan komo rma cirihra xakn̂e yîhretawno me. Ero ke kahwowasî rma Kporin komo poko.

22 Kayaritomo pîntho me xa tak kesenpetîkesî amn̂e. Anarî komo xawyakan me marha kesehtînoyasî amn̂e owî rma. Oyanton komo poko mîmtapota wooxam komo poko, n̂examro reha oyen̂axe takîhsom me, kekn̂e tî. Ero wa tî kekn̂e Tapi Mikaw ya.

23 Ero wa tî xakn̂e Mikaw, Tapi tî nîwîrîyakekn̂e. Ero ke on wara tî xakn̂e noro, Sau pen yemsîtho, yîmxîtan me ro makî tî xakn̂e okwe twaihtopo pona roro. Ero wa tî xakn̂e.