1-2 Taa, on wara takî tî xakn̂e Tapi, tîmînî ro yaw takî tî xakn̂e. Yiixatî pîn komo mokuhra tî xatken̂e ero yimaw Ixaw Yana komo waparî me. Kporin komo yanme mokuhra xatken̂e. Ero yimaw on wara takî tî kekn̂e Tapi tweronoman̂e ya, Natan tî xakn̂e noro yosotî. Tan was ow omîn yaw setru ciixapu yaw. Roonatho yaw makî reha nai okwe Kaan yamatanî, kekn̂e tî.

3 Ai ha, kekn̂e tî Natan yîwya, Taa, awakronoman̂e me nai ham Kporin komo, ero ke ahce wa na yîmîn ciri xe awexitaw ero wara rma cirko, kekn̂e tî.

4-5 Ero po rma tko tî Kporin komo mokyakn̂e Natan yaka kosope. On wara tî kekn̂e yîwya, Ai Natan, omtapotarî ekatîmta oyanton ya, Tapi ya, On wara kasko yîwya, Ai apa, on wara tî nîîke Kporin komo awya, kasko yîwya, Amoro xa ma omîn miir̂a ha?

6 Mîîmo yawno me exihnî me ro makî ka wîxakn̂e mehxa ro rma. Exitu poi Ixaw Yana komo yekyataw owya omîn exihra xakn̂e. Exihra rma nas oroto. Anana so mak kîwcesî, roona yaw mak ha.

7 Ahce wa wîxakn̂e Ixaw Yana komo yakro owcetaw ahna so na? Ahce kacho omîn cirihra mak mat okwe setru sahsamaxapu? wîîkekn̂e ma re yîwya so tribu yenîn̂e komo ya? Ero wa kahra ro mak wîxakn̂e yîwya so, kasko yîwya.

8 On wara marha kasko yîwya, oyanton Tapi ya, On wara xa kesî Kporin komo awya, Kantoman̂e ro, Woskara pononho amoro oper̂a yenîn̂enho. En̂exa kekyakn̂e oyanan komo yenîn̂e me awehtome hara, Ixaw Yana komo yenîn̂e me ha.

9 Kakronomekn̂e roro ahna so na awtoche. Aaxatî pîn komo war̂mapekn̂e roro awya. Oroto tak cekaiporesom me xa tak kiir̂asî. Cekaiporesom komo naxe ha re roowo po, n̂examro wara rma tak kiir̂asî.

10 Ixaw Yana komo tak wekenmesî amn̂e ekenî ro komo pona. Oona xa n̂examro wiir̂asî naatî wara. Ero ke cekenke xa tak naxe anana esekenmanî ro me. Kicicitho komo n̂emetanmekrî me exihra tak naxe. Pahxa mokyatken̂e kicicitho komo n̂examro yemetanmeso ero wara mokuhra tak n̂axe amn̂e.

11 Miya roro Ixaw Yana komo n̂emetanmekyatken̂e okwe. Town̂e komo tko wiir̂akn̂e yiixatî pîn komo yar̂man̂e me. Ero warahra tak kiir̂axe so amn̂e, tîtken̂e tak maxe amyamro. Mokuhra tak naxe aaxatî pîn komo. On wara tko wîîkes awya hara, Aporin komo ow ha. Amîn xa matko wiir̂as amn̂e ow hara, wîîkes awya.

12 Roowo po awehtoponhîrî yenatîche tak mîwînîkyasî aporin pen komo yakro. Ero yimaw tak amumuru wiir̂as hara kayaritomo me awekenhîrî yaka. Apunthîrî rma mîk ero wa wiir̂asî. Noro yecehton̂e me wasî, kayaritomo me exitaw.

13 Noro xa omîn n̂iir̂asî oyosotî yeken me. Noro tak wiir̂asî kayaritomo me xa.

14 Noro yîîm me was Ow, omumuru me nasî noro hara. Kicicme exitaw Owî rma panaresî tooto yamoyin ke. Amoi ke n̂etapexe oko panaretome. Ero wa panarexe.

15 Noro yîpînînkara ro makî tko wasî. Sau penî reha wîpînînkekn̂e. Kayaritomo mera tak wiir̂akn̂e noro yekenho yaka tak awitome hara. Ero warahra tak was amn̂e amumuru poko.

16 Awepamthîrî komo wiir̂asî kayaritomo me eroromero. Miya roro nasî awepamthîrî kayaritomo me, kasko Tapi ya, kekn̂e tî Kporin komo Natan ya.

17 Ero ke Kporin komo mtapotachonho takî tî n̂ekatîmtîkekn̂e Natan Tapi ya. Tîn̂enîthîrî marha tî n̂ekatîmyakn̂e yîwya.

18 Ero wa kacho yentache tak Kporin komo mîn yaka takî tî cekn̂e Tapi. Iina tî n̂eremekn̂e Kporin komo yakro tîmtapotachome. On wara tî kekn̂e yîwya, Onoke warai me ow meen̂a apa? Onok warai me xa oyanan komo meen̂a? Noro yipu rma tko ow makronomai ham mehxaro rma.

19 Wahra mak kakronomai, mîîkai ha re ero poko. Miya roro oyakronomatopo poko tak mîmtapowas hara. Ero warahra akronomano n̂iir̂atu tooto komo reha. Ero ke Kporin komo Kaan xa ham amoro, wîîkes awya apa.

20 Ahce wa wîîke awya apa? Tapi mak ow, awanton ha. Oyehtopo rma wa meen̂asî. Kporin komo Kaan xa Amoro.

21 Amna yeserepokacho me xa mîmtapowasî. Awanme ro mak ero warai mekatîmyas owya, awanton ya, ero yaw roro rma amna ciitopo ponaro oyehtome.

22 Amna yopono ro xa Amoro Apa. Amoro mak Kaan ha. Anarî exihra ro mak nasî. Ero wa awehtopo rma amna n̂entai tpanarî ke rma.

23 Ahtono pono komo xa ma re natu Ixaw Yana komo warai me hara, ayanan komo warai me ha? Amna porin pen komo yahsîso mîîcekn̂e, ayanan me ahsîso. N̂examro mowyakn̂e Exipsiu komo yanton mera tak ehtome so, mîk hak rowon pono komo yanton mera marha. Ponaro n̂examro yehtopotho ponarora ehtome so marha mowyakn̂e. Awyanî ro me ehtome so tak mowyakn̂e. Karitî me mesenpekn̂e, miyan komo yeserepokacho me xa. Ero wa awehtopo menpekn̂e cekaiporesom me xa tak awehtome.

24 Ayanan me amna mahsîyakn̂e eroromero. Ero wa amna mahsîyakn̂e Ixaw Yana kom ha. Ero ke ponaro xa amna yehtopo me tak mas Amoro hara. Ero wa mas Apa amna ya.

25-26 Ero ke on wara mak wîîkes awya Apa, Kaan Amoro. Opoko mîmtapowasî, oyepamrî poko marha. On wara kiir̂axe so amn̂e, mîîkesî, ero ke ero wa rma amna cirko amtapotachonhîrî yaw roro rma. Eroromero ero wa amna cirko. Ero wa amna cirko cewetîsom me xa tak awehtopo ponaro ehtome so miyan komo rma. Ero wa amna ciriche on wara tak kexe miyan komo rma, Ponaro Ixaw Yana komo yehtopo me nai ham Kporin komo, Kantoman̂e ro ha, kexe. Ero ke oyepamtho tak n̂expe kayaritomo me miya roro towîhnî me ro mak. Awanme rma ero wa n̂expe.

27 Oporin xa Amoro apa, Kantoman̂e ro ha. Ponaro Ixaw Yana komo yehtopo marha Amoro. Awanton makî reha ow. Kepamnoyasî amn̂e, mîîka owya. Ero ke mak awakro omtapota xe weexi amna yakronomacho poko.

28 On wara marha wîîkes awya Apa, Kaan xa Amoro. Yaaro tîmtapotaxmu mak Amoro. Oyakronomacho poko mîmtapota oyakro, awanton yakro ha.

29 Ero ke ero wara rma oyepamrî komo cma re makronomesî eroromerono me xa tak ehtome so amîtwo. Ero wa mîîka apa. Ero ke anakronomarî me xa tak n̂ehcowpe eroromero. Ero wa n̂ehcowpe oyepamrî komo amn̂e, kekn̂e tî. Ero wa tî kekn̂e Tapi Kporin komo ya.