Taa, ero yinhîrî pahkî n̂he exiche tak Piristew pen komo tak tî nar̂mekn̂e xa hara Tapi. Tapi yewetîn̂e me takî tî xatken̂e. N̂examro pen yewton xakn̂e ero yimaw, Meceke-Ama mîn xakn̂e ero yosotî. Ero takî tî nahsîyakn̂e Tapi komo cewton komo me.

2 Moabita pen komo marha tî nar̂mekn̂e. Yînahsîthîrî komo takî tî nîrapekn̂e roowo pona. Xapopo ke takî tî n̂examro pen nukuknomekn̂e. Asakî ro so tî xapopo namomhokekn̂e twaihkaxmu komo kuknomachome. Cewn̂e ro so tî namomhokekn̂e waihkan komo kuknomachome hara. Ero wa tî anarî komo waihkekn̂e, Moabita pen komo. Waihkara ehxapu komo takî tî xatken̂e Tapi yepeman̂e me. Puranta tî nîmyatken̂e roro yîwya.

3 Ero yinhîrî Atatese yakro takî tî n̂etar̂mekn̂e hara Tapi, Soba pono komo kayaritomon yakro. Heobe mumuru tî mîk xakn̂e Atatese, Ewpratesî Yepu kwaka tî cekn̂e Atatese tmaywenînhîrî komo yahsîso hara tmaywen me xa hara. Iina cetaw noro pen nar̂mekn̂e Tapi.

4 Noro tararantho tî nahsîyatken̂e Tapi maywen komo 1.000. Tarara yaw tîtosom pen komo marha tî nahsîyatken̂e 7.000. Tîhtarî po tîtosom pen komo marha tî nahsîyatken̂e 20.000. Iyok pen komo tî n̂emetanmekyakn̂e, kawaru pen, tarara yihxikn̂e pen ha. Yîhraknu micin tî nîhkocetken̂e. 100 makî tî nîmcetken̂e yîhraknu micin yîhkoton komo.

5 Ero yimaw rma takî tî Siriu komo cetken̂e Atatese yakronomaxi, Soba pono komo kayaritomon yakronomax ha. Tamasku pono komo mîkyam Siriu komo. Iina toche so n̂examro sowtatun pen tî waihketken̂e Tapi sowtatun komo mer̂pora. 22.000 pen kom ha tî.

6 Ero yinhîrî Ixaw Yana sowtatun komo takî tî nîmînmekn̂e Tapi Siria pona, Tamasku pona xa. Iitono komo yenîrî poko tî sowtatu komo nantomekn̂e. Ero ke Siriu komo takî tî xatken̂e Tapi yepeman̂e me. Emapona roro tî puranta nîmyatken̂e yîwya. Ero wa tî Tapi nakronomekn̂e Kporin komo. Ar̂mano n̂irpekn̂e roro yîwya ahna so na cetaw.

7 On wara tî ka xatken̂e Atatese sowtatun komo, cecen̂an komo tî naar̂atken̂e cemyaw so ooru ciixapu. Ero mko takî tî nahsîyakn̂e Tapi. Xerusaren pona takî tî naar̂akn̂e.

8 Anarî tî xakn̂e Atatese yewtonî mko, Beta, Berotai marha. Iito tî xakn̂e bronse. Ero takî tî naar̂akn̂e Tapi mer̂pora.

9 Ero yimaw takî tî Toi n̂encekn̂e Tapi yekaci, Amace pono komo kayaritomon ha. Atatese sowtatun pen komo tî nar̂mekn̂e Tapi ahnoro, kacho tî n̂encekn̂e.

10 Ero ke tumumuru takî tî n̂en̂epekn̂e Toi Tapi yaka. Xoraw tî mîk xakn̂e yumumuru yosotî. Tawake was apoko okre Atatese pen yar̂marî ke, kaxi tî noro n̂en̂epekn̂e. Atatese pen yakro etar̂maxapunhîrî tî mîk xakn̂e Toi. Taa, Xoraw mokyataw Tapi yaka yîwya tîmsom tî n̂ekyakn̂e. Mîn hak n̂ekyakn̂e prata ciixapu mko, ooru ciixapu mko, bronse ciixapu mko. Ero warai tî n̂ekyakn̂e Tapi ya tîmsom.

11-12 Ero mko tî nîmyakn̂e Tapi Kporin komo ya. Ero wa xa marha tî nîmyakn̂e yîwya mîk hak rowon pono pen komo yemyawnonho tînar̂mathîrî pen komo yemyawnonho ha. Ooru tî mîn nîmyakn̂e yîwya, prata marha. Siriu pen komo yemyawnonho, Moabita pen komo yemyawnonho, Amonita pen komo yemyawnonho, Piristew pen komo yemyawnonho, Amarekita pen komo yemyawnonho. Atatese pen yemyawnonho marha, Heobe pen mumutho yemyawnonho. Soba pono komo kayaritomonînho pen tî mîk xakn̂e Atatese pen. Ero wa tî yîn̂ekîthîrî komo nîmyakn̂e Kporin komo ya, tînar̂mathîrî pen komo yemyawnonho ha.

13 Ero yinhîrî Eton pono pen komo takî tî waihekn̂e hara Tapi Yîmîtî Ken̂arî po woskara po. 18.000 pen tî waihkekn̂e iito Siriu komo. Ero yinhîrî takî tî n̂ekaiwakn̂e Tapi miyan komo n̂entarî me ha.

14 Ero yinhîrî takî tî tîsowtatun komo nîmînmekn̂e Tapi miya so Eton pono komo rowon poko hakî. Ahnoro takî tî xatken̂e Tapi maywen me Eton pono kom ha. Ero wa tî xakn̂e Tapi, ahna so na cetaw noro nakronomekn̂e Kporin komo.

15 Ixaw Yana kayaritomon me tî xakn̂e Tapi ahnorono kayaritomon me ha. Takîhso makî tî tmaywen komo panatanmekyakn̂e, takîhso marha n̂examro n̂en̂ekekn̂e ahce wa na exiche so.

16 Taa, Tapi maywen komo wetahcasî, enîno rin̂e kom ha. Xoabe tî xakn̂e sowtatu komo yantoman̂e me, Seruia mrerî ha. Xeosapa tî xakn̂e kayaritomo komo yehtoponho mewren̂e me. Airuce mumuru tî mîk xakn̂e.

17 Satoke tî xakn̂e Kporin komo yaka cewomsom, Aitube mumuru. Aimereke marha tî xakn̂e Kporin komo yaka cewomsom hara Abiata mumuru. Seraiasî tî xakn̂e kayaritomo karitan mewren̂e me.

18 Benaia tî xakn̂e Keretew komo yantoman̂e me, Peretew komo yantoman̂e me marha. Xeoiata mumuru tî mîk xakn̂e Benaia. Tapi mumuru komo reha tî xatken̂e kayaritomo yakro cesentaxmu komo. Ero wa tî xatken̂e Tapi maywen komo, enîno rin̂e kom ha.