Ero yinhîrî takî tî pahnoke xakn̂e Erias yaatopo kah yaka. Kah yaka arî xe tî xakn̂e Kporin komo. Ocowo ke arî xe tî xakn̂e cetapomrisom ke. Aatopo me exporo exitaw Xiwkaw poi takî tî cekn̂e Erias esama yaw. Erisew yakro tî cetken̂e.

2 On wara tko tî kekn̂e Erias Erisew ya, Ai okopuci, tanî cma re masî. Betew pona tak oyen̂epesî Kporin komo, kekn̂e tî. On wara tko tî n̂eyukyakn̂e Erisew, Kporin komo nasî waipînî ro me, yaaro. Amoro marha masî waipîra, yaaro. Ero wa xa marha yaaro xa wîîkesî, anomra ro mak wasî, kekn̂e tî.

3 Ero ke Betew pona takî tî cetken̂e. Iina epatakache so Erisew yaka takî tî mokyatken̂e kweronoman̂e npanatanmekrî komo. On wara tî ketken̂e yîwya, Ai, apa, apanatanmekn̂enhîrî pen takî tî naar̂a Kporin komo oroto ahyai. Ero wa kacho na mentai? ketken̂e tî yîwya. Nhnk, wentai rma. Tîtken̂e mak ehcoko, kekn̂e tî Erisew yîwya so.

4 Ero yinhîrî on wara tî kekn̂e hara Erias Erisew ya, Ai, okopuci, tanî cma re mas amoro Betew po. Xer̂ko pona takî tî oyen̂epe hara Kporin komo, kekn̂e tî. On wara tko tî n̂eyukyakn̂e Erisew, Kporin komo nasî waipînî ro me, yaaro. Amoro xa marha masî waipîra, yaaro. Ero wa xa marha yaaro xa wîîkes awya, anomra ro mak wa wasî, kekn̂e xa hara tî.

5 Ero ke Xer̂ko pona takî tî cetken̂e hara. Iina epatakache so Erisew yaka tî mokyatken̂e iitono kom hara, kweronman̂e npanatanmekrî komo. On wara tî ketken̂e yîwya, Ai, apa, apanatanmekn̂enhîrî pen takî tî naar̂a Kporin komo ahyai oroto. Ero wa kacho na mentai? ketken̂e tî yîwya. Nhnk, wentai rma. Tîtken̂e mak ehcoko, kekn̂e Erisew yîwya so.

6 Ero yinhîrî on wara tî kekn̂e xa hara Erias Erisew ya, Ai, okopuci, tanî cma re mas amoro Xer̂ko po. Xotaw kwaka takî tî oyen̂epe hara Kporin komo. On wara tko tî n̂eyukyakn̂e Erisew, Kporin komo nasî waipînî ro me, yaaro. Amoro marha masî waipîra. Ero wa xa marha yaaro xa tan wîîkesî, anomra ro mak wa wasî, kekn̂e xa hara tî. Ero ke cetken̂e xa hara asakno roro rma.

7 Xotaw yecihtaka tî cetken̂e. Wenathîrî komo yaw tî mokyatken̂e kweronoman̂e npanatanmekrî komo, 50. Mooxe makî tko tî n̂ecececetken̂e Erias komo wece cewru. Erias komo makî tî xatken̂e cececetoso Xotaw yecihtaw Erisew yakro.

8 Ero yinhîrî takî tî tponon mohkekn̂e Erias tîmkarino. Mohkache Namomiyakn̂e ha ka. Ero ke takî tî tuuna n̂etapekn̂e, cmow, kekn̂e. Etapache rma n̂etîraconkekn̂e takî tî tuuna. Tîhkotoso takî tî xakn̂e mehxa xehxa wara. Ero ke yarinho yaw takî tî wacetken̂e asakno roro rma eeco pona.

9 Ero yinhîrî takî tî on wara kekn̂e Erias Erisew ya, Ai, okopuci, yiixe awehtopo etacko. Ahce ke kwakre ahyai oyarîra ka exitaw Kporin komo? kekn̂e tî. On wara tî kekn̂e Erisew, Kaan Yekatî ken̂e xa nasî awekatî. Ero wa xa marha opokono me exi xe wasî awehtoponhîrî hara, ayopo xa matko, asakrono wicak hara, kekn̂e tî yîwya.

10 Ai ha, kekn̂e tî Erias. Kehn̂anmecho ha re mîn metaci ero. Wara rma ahyai oyatopo yeen̂ataw awya ero wicakî rma nasî awakro amn̂e. Oyatopo yenîhra tko awexitaw ero wicakî exihra rma nasî Noro awakro okwe, kekn̂e tî.

11 Ero yinhîrî tî cetken̂e rma ka Erias komo esama yaw. Nîmtapowatken̂e tî tîcetaw so. Ero yimaw takî tî ponan̂e rma n̂esenpekn̂e tarara wehto me cehsom. Kawaru komo marha tî n̂esenpekn̂e ero yaan̂e komo. Wehto me cehsom marha tî mîk xakn̂e kawaru hara. Tarara takî tî mokyakn̂e yîhyaka so Erias komo yakpacho. Ero yinhîrî kah yaka takî tî cekn̂e Erias ero yaw. Ocowo chew rma tî cekn̂e, cetapomrisom chew.

12 Torî tî n̂een̂akn̂e Erisew. On wara tî kekn̂e Erias ya cetaw, Apatho okwe, apatho okwe. Ixaw Yana komo yukurunpen̂e amoro okwe, mer̂pono pîn tararan komo warai. Mer̂pono pîn tarara yaan̂e komo warai marha amoro okwe, kekn̂e tî. Ero wa tî kekn̂e Erisew Erias pen cetaw. Ero yinhîrî Erias pen yenîhra takî tî xakn̂e. Ero yinhîrî tpononthîrî takî tî mohkekn̂e, nahxaikekn̂e marha tî. Asakî takî tî xakn̂e pononthîrî raconho.

13 Erias pen ponontho marha tî namekyakn̂e Erisew mkai epîrkaxapunhîrî. Xotaw yecihtaka takî tî cekn̂e hara.

14 Ero yinhîrî Erias pen ponontho ke takî tî tuuna n̂etapekn̂e noro hara. On wara tî kekn̂e etapetaw, Ahto tak nai Kporin komo, ponaro Erias pen yehtopo? kekn̂e tî. Tuuna yetapache n̂ehkocekn̂e xa hara mehxa xehxa wara. Ero ke yarinho yaw tî wacekn̂e xa hara Erisew. Ero wa tî xakn̂e Erisew.

15 Iito rma tî xatken̂e kweronoman̂e npanatanmekrî komo, Xer̂ko pono kom ha. Erisew tî n̂een̂atken̂e mokyataw hara. Ero ke on wara tî ketken̂e, Nnn, Kaan Yekatî ken̂e xa xakn̂e Erias pen, Noro Yekatî ken̂e xa marha nai ham Erisew hara, ketken̂e tî. Ero yinhîrî yîhyaka takî tî cetken̂e. Noro mamaka tî n̂esewnapetken̂e.

16 On wara tî ketken̂e yîwya, Apa, 50 naxe kîrkomo amna yaw karitî komo. N̂examro cma re men̂epesî apanatanmekn̂enhîrî yeposo. Ahce wa na noro pen n̂iir̂î Kaan Yekatî. Nar̂ma hara na îh pona, anarimaw woskara pona ha na, ketken̂e tî yîwya. Pîra, kekn̂e tî Erisew yîwya so, noro yepon̂e komo en̂epera ro mak ehcoko, kekn̂e tî.

17 Ero poko rma tko tî Erisew panapicketîketken̂e yîtîtmamra. Ero ke nîhyapamyakn̂e takî tî Erisew. Ero ke, Taa, epon̂e komo en̂epecoko rma, kekn̂e mak takî tî. Ero ke 50 kîrkomo tî n̂en̂epetken̂e. 3 kaamo tî n̂epor̂atken̂e. Erias pen yenîhra ro makî tî xatken̂e. Ero wa tî xatken̂e.

18 Iito rma tî ka xakn̂e Erisew Xer̂ko po. Ero ke yîhyaka takî tî n̂etîrametken̂e hara epon̂enhîrî komo. Ero ke on wara tî kekn̂e Erisew yîwya so, En̂epeno cirihra ehcoko, wîîkai re wa awya so, kekn̂e tî. Ero wa tî kekn̂e.

19 Ero yinhîrî takî tî on wara ketken̂e iitono komo, Xer̂ko pono komo Erisew ya, Apa, on wara cma re kes amna awya, Kir̂wan̂he rma re nas on amna yewton. Ero wara rma na meen̂a. Kicicme tko nas amna tunarî. Naatî yewtî mera marha nasî on roowo. Atîhtara nas amna mararîn okwe, ketken̂e tî yîwya.

20 Ero ke on wara tî kekn̂e Erisew yîwya so. Tutum ka ehcoko ohyaka yaxan. Ekîche arîhtocoko yîmîtî ke, kekn̂e tî yîwya so. Ero ke tî n̂ekyatken̂e yîhyaka.

21 Ero yinhîrî takî tî tuuna pîtho kwaka cekn̂e Erisew. Ero kwaka tî nar̂mekn̂e yîmîtî. On wara takî tî kekn̂e yîwya so, On wara kesî Kporin komo awya so, On tak wakir̂wama atunarî komo. Waipîra tak naxe on yeen̂e komo. Natîkwasî marha tak amararîn komo, kesî Kporin komo awya so, kekn̂e tî.

22 Ero ke ero wara takî tî xakn̂e, kir̂wan̂he takî tî xakn̂e tuuna. Kir̂wan̂he rma nas oroto. Ero wa nasî Erisew mtapotachonho yaw roro rma.

23 Ero yinhîrî Xer̂ko poi takî tî n̂etîramekn̂e Erisew Betew pona hara. Esama yaw cetaw kar̂pamxan komo takî tî mokyatken̂e yîhyaka ewto pono komo. Erisew poko tî n̂etaporetken̂e kica. On wara tî ketken̂e yîwya, Etoko n̂he pesma, etoko n̂he pesma, ketken̂e tî yîwya kica.

24 Ero ke takî tî n̂etaknamekn̂e Erisew. N̂examro pen takî tî n̂emetanmekpekn̂e Kporin komo ya. Ero yimaw rma takî tî uhsu komo n̂epatakekn̂e comota chewno komo asakî, woosî re. Kar̂pamxan pen komo tî kararaketken̂e oko. Yaake tî kararaketken̂e karpamxan pen komo, 42 ha tî. Ero wa tî kararaketken̂e oko.

25 Ero yinhîrî takî tî en̂exa cekn̂e Erisew. Kahmeru Yîpîn pona tî cekn̂e. En̂exa takî tî n̂etîramekn̂e hara Samaria pona hara. Ero wa tî xakn̂e Erisew.