Taa, on wara tî xakn̂e Xoraw hara, Ixaw Yana komo kayaritomon me tî n̂ecir̂akn̂e. Samaria tî xakn̂e noro yewton. 18 cimn̂ipu tî xakn̂e Xosapa yehtoponho Xuta yepamtho komo kayaritomon me ehtoponhîrî, ero yimaw tî Xoraw takî tî xakn̂e Ixaw Yana komo kayaritomon me hara. 12 cimn̂ipu tî xakn̂e kayaritomo me.

2 Kicicme tko tî noro n̂een̂akn̂e Kporin komo. Tîîm pen warahra tî xakn̂e, tînocwan warahra marha tî xakn̂e. Wara n̂he tî re xakn̂e. Pahxa tî yîîm pen n̂iir̂akn̂e toopu, piirino, Baaw yakro tîmtapotacho me okwe. Eronhîrî takî tî narmekn̂e kr̂a Xoraw.

3 Xeroboaw N̂ebace pen yehtoponho yaw roro rma tko tî xakn̂e kica. Ixaw Yana komo panatanmekn̂enho pen mîk xakn̂e Xeroboaw, kicicitho poko panatanmekn̂enho ha. Noro pen yehtoponho yaw roro rma tî xakn̂e Xoraw kica, ahsîpînkara rma tî xakn̂e. Ero wa tî xakn̂e noro.

4 Taa, on wara tî xakn̂e Mesa, Moabita komo kayaritomon, opera yosom xa tî mîk xakn̂e. Noro tî nîmyakn̂e roro Ixaw Yana komo kayaritomon ya oper̂a mer̂pono pîn. 100,000 tî nîmyakn̂e yîwya yicimn̂ipuntaxera. Kahn̂eru picitho marha nîmyakn̂e yîwya 100,000 pocitho. Ero warai ke tî Ixaw Yana komo kayaritomo n̂epemakn̂e yicimn̂ipuntaxera.

5 Ero yinhîrî Akabe pen waipuche takî tî Ixaw Yana komo kayaritomon nanwekyakn̂e Moabita kayaritomon. Tîmîhra takî tî xakn̂e oper̂a xîkrî yîwya, kahn̂eru pocitho marha tî tîmîhra xakn̂e.

6 Ero ke Samaria poi takî tî cekn̂e Xoraw Ixaw Yana kayaritomon. Ixaw Yana komo tî nan̂ikyakn̂e sowtatu me totohme so. Ahnoro tî nan̂ikyakn̂e kîrkomo.

7 Ero yinhîrî takî tî Xeosapa ya tîmtapotarî n̂entamexpekn̂e hara, Xuta yepamtho komo kayaritomon ya ha. On wara tî kekn̂e yîwya, Oyakno, oyanwekyasî tak okwe Moabita kayaritomon. Ero ke mokuhra mai amoro amna yakro etar̂maxi noro yakro? kacho tî n̂entamexpekn̂e yîwya. On wara tî Xeosapa n̂eyukyakn̂e, Kmokyasî rma awakro so. Noro re thakwa kîwyam, noro re marha mîkyam kmaywen komo, noro re marha koh komo kawaru, kekn̂e tî yîwya.

8 Ahto xa tîhcetu? kekn̂e marha tî Xeosapa. Eton Yaxawan pore kaikatko, kekn̂e tî Xoraw.

9 Ero ke takî tî cetken̂e. Ixaw Yana komo kayaritomon, Xuta komo kayaritomon, Eton pono komo kayaritomon, ero wa tî cetken̂e Moabe komo waparî me. Wow me tî cetken̂e Moabe rowonî mkai. Mooxe tî cetken̂e 7 kaamo okwe. Ero yimaw n̂examro wokru exihra takî tî xakn̂e okwe tuuna, iyoh komo wokru exihra marha tî xakn̂e okwe.

10 Ero ke on wara tî kekn̂e Ixaw Yana komo kayaritomon, Okwe, okwe, Xiya kehcow so Kporin komo Moabita komo nar̂marî me mak ham okwe. Osorwaw taxe kîwyam kayaritomo re yîn̂ekîthîrî komo. Kwaihkapotome so mak yîwya so kekyatken̂e so ham okwe, kekn̂e tî.

11 On wara tko tî kekn̂e Xeosapa, Kporin komo poko kweronoman̂e exihra nai tan? Exitaw Kporin komo mtapotarî cma re ka cencexe yîn̂ekatîmrî, kekn̂e tî. On wara tî n̂eyukyakn̂e iitono Xoraw maywen, Tan nasî Erisew, Sapace mumuru. Erias yesemokacho yekn̂enho tî mîk xakn̂e noro, kekn̂e tî.

12 Ai ha, kekn̂e tî Xeosapa, Kporin komo mtaporî yentan̂e ro mîk okre, kekn̂e tî. Ero ke cetken̂e takî tî yîhyaka kayaritomo komo. Ixaw Yana kayaritomon, Xeosapa, Eton pono komo kayaritomon, ero wa tî cetken̂e Erisew yaka.

13 On wara tko tî kekn̂e Erisew Ixaw Yana kayaritomon ya, Ahce wa awexirî ke amtapotarî weyukya? Aamo pen weronoman̂e komo yaka xa matko etoko, anocwan weronoman̂e komo yaka ha, kekn̂e tî yîwya. Pîra, kekn̂e tî Ixaw Yana kayaritomon, Kporin komo xa amna n̂eekî xiya osorwaw kayaritomo re. Moabita kayaritomon nwaihkarî me mak amna n̂eekî okwe, kekn̂e tî.

14 On wara tî kekn̂e Erisew, Kporin komo nasî waipînî ro me, yaaro, kacho wara rma nasî omtapotarî yaaro xa, Xeosapa ponaro cma wasî Xuta komo kayaritomon ponaro. Noro exihra exitaw ketaw ha re awenîra ro mak wasî, awece cewru exihra marha wasî.

15 Wara rma raatî yorkan̂e eeko waano yentachome owya, kekn̂e tî Erisew. Ero ke raatî yorkan̂e tî n̂ekyatken̂e yîhyaka. Raatî iyorketaw tak yîwya Erisew takî tî karihcekn̂e Kporin komo.

16 Ero ke on wara tî kekn̂e yîwya so, On wara kesî Kporin komo, Roowo ahtopocoko ehyatkaw so xa. Arenarî me so ahtopocoko. Mer̂pora ahtopocoko on woskara tawronohkatîkaxi ro.

17 On wara kesî Kporin komo, ocowomra ro mak nasî tan. Tuuna marha mokuhra nasî. Wara rma nukmesî tak amn̂e on woskara pono tarenakem. Tuuna ke nukmesî awokru komo me, awoh komo wokru me marha paaka wokru me, ahnoro awoh komo wokru me, kes awya so Kporin komo.

18 Apehceme rma tuuna n̂esekpesî Kporin komo ya. Ero wa xa marha Moabita komo nar̂mapesî awya so.

19 Waihkache so awya so Moabita komo yewton tak akn̂icoko amn̂e twacayem komo ahnoro, kir̂wan komo ahnoro. Weewe marha amacoko ahnoro cepetaxmu komo. Tuuna pîtho mko marha ahrucoko. Naatî yewtîtho mko yîwîrîmacoko toh ke mer̂pono pîn ke, kesî Kporin komo awya so, kekn̂e tî Erisew.

20 Taa, amn̂e enmapuche takî tî Kaan ya tîmsom nakn̂iyatken̂e akn̂itopo ro yimaw. Ero yimaw tuuna takî tî nukmekn̂e ahtoxapu yaw. Eton poi tî nîhcekn̂e. Ero wa tî xakn̂e.

21 Taa, pahxa n̂he tî ka on wara tî xatken̂e Moabita komo, Awaparî me men mokyaxe kayaritomo komo kopi, kacho tî n̂encetken̂e. Ero ke kîrkomo ahnoro tî nan̂ikyatken̂e. Karitî komo re tî nan̂ikyatken̂e ahnoro tukurun yaan̂e me cehsom. Poritomo komo meero tî nan̂ikyatken̂e. Tmokuche so tîrowon komo wokpan porero tî n̂ecececetken̂e.

22 Taa, enmapuche takî tî pahxaxaro rma paketken̂e Moabita komo. Kaamo tî ewkaranpeno n̂iir̂akn̂e oko tuuna ratari. Ero ke cucure xa tî n̂esenpekn̂e tuuna yîwya so. Kamxuku wara tî n̂een̂atken̂e cucure xa oco.

23 Ero ke on wara tî ketken̂e, Kamxuku mîn mer̂pono pînî ro mak okyo. N̂examro re rma n̂etar̂macow ham kayaritomo komo kwaparî me mohxapunhîrî, n̂etwaikacow ham n̂examro rma. Ero ke kaikatko kîwyam Moabita komo n̂examro pen yemyawnonho yahsîso okre, ketken̂e tî.

24 Ero ke Ixaw Yana komo yetarî yaka takî tî cetken̂e Moabita komo. Ero ke n̂examro yakro takî tî Ixaw Yana komo n̂etar̂metken̂e. Ero ke takî tî n̂emahciyatken̂e hara Moabita komo. Wenari so tî cetken̂e Ixaw Yana komo. Yîrowon komo pona roro tî cetken̂e. Moabita pen komo takî tî waihketken̂e.

25 Moabe rowon pona tîtoche so takî tî ewtonthîrî komo nakn̂iyatken̂e. Toopu tî nar̂metken̂e Ixaw Yana komo ahnoro yînatîrî komo yewtîtho tahruso ro. Tuuna pîtho mko marha tî nahruyatken̂e. Weewe marha tî nametken̂e cepetaxmu komo ahnoro. Kiri-Aresece pono makî tî yixkara xatken̂e mîîmo mko. Ero rma tko tî mamcetken̂e toopu yar̂man̂e komo. Iitono pen komo tî n̂etapetken̂e.

26 Ero yinhîrî on wara tî xakn̂e Moabita komo kayaritomon, tîyopono me so takî tî n̂een̂akn̂e twaparî komo. Ero ke kîrkomo nan̂ikyakn̂e 700, kacipara imo ke cemyarkem komo. N̂examro takî tî naar̂akn̂e Eton pono komo kayaritomon wece cma ha re. Porohyatken̂e tko tî okwe yîhyaka roro tohra rma. N̂ehn̂etken̂e thakwa mak okwe.

27 Ero ke tumumuru takî tî nahsîyakn̂e kayaritomo poturme ewruxapu. Noro tak nasî kayaritomo me amn̂e tîîm pen waipuche, kachonho mîk nahsîyakn̂e. Noro pen takî tî waihkekn̂e. Yupunthîrî tî nakn̂iyakn̂e ewto wacan kanahtaw. Ero wa tî xakn̂e Moabe kayaritomon okwe. Ero yimaw takî tî Ixaw Yana komo poko nîrwonatken̂e xa Moabita komo. Ero yinhîrî cetken̂e hara Ixaw Yana komo ceken komo pona hara. Ero wa tî cetken̂e.