Ero yinhîrî on wara tî xakn̂e Erisew, yîhyaka tî mokyakn̂e yînpanatanmekîthîrî pen cinho. On wara tî kekn̂e yîwya, Ai, apa, on wara cma re wîîkes awya, oyin̂o pen meen̂akn̂e. Awanton me xakn̂e noro pen. Kporin komo ponarono xa mîk xakn̂e. On wara tî xakn̂e, cemyaka tî nahsîyakn̂e puranta tîramansom me hara. Waihyakn̂e makî tko okwe. Ero ke tak tî mokya puranta tîmn̂enho omrerî komo yahsîso tantonî ro me. Asakno roro rma tî nahsîya okwe, kekn̂e tî Erisew ya.

2 Ai okwe, kekn̂e tî Erisew. Taa, ahce wa kakronome awya? Ahce tko nai amîn yaw? kekn̂e tî yîwya. Exihra n̂he nas okwe omîn yawno, kekn̂e tî wooxam. Nai cik ha re katî, een yaw, patiri yaw. Ero mak nas okwe omîn yaw, kekn̂e tî.

3 Ero ke on wara tî kekn̂e Erisew yîwya, Etoko tak apoyino komo yaka, ahnoro enko. On wara kasko yîwya so, ahce na yenho mko cma re mîmyasî oyemyaka, yarîhnî mko, kata yîwya so. Asakî mak aponkura men esko, mer̂pora xa aponko.

4 Ero yipu tak arko amîn yaka. Ero yinhîrî tak ametatan ahruko. Amoro mak esko amîn yaw amrerî komo yakro. Ero yimaw tak eenî mko yaka so katî arkacoko patiri yawnonho. Copoyino enîhtocoko anarî yaka arkachome hara. Ahnoro copoyinkacoko, kekn̂e tî Erisew yîwya.

5 Ero ke takî tî cekn̂e hara wooxam. Eenî mko tî n̂ekyatken̂e yîmrerî komo yîhyaka. Ehtîkache metata takî tî nahruyakn̂e. Ero yimaw takî tî katî narkekn̂e eenî mko yaka.

6 Ero yinhîrî takî tî copoyi xakn̂e eenî mko. Ero ke on wara tî kekn̂e wooxam tîmrerî ya, Eeko xa hara een, kekn̂e tî. Exihra tak nasî yeme, kekn̂e tî yîwya. Ero yimaw takî tî nîtîtmamyakn̂e katî, etuhnarera takî tî xakn̂e.

7 Ero yinhîrî takî tî Kaanî yakrono ro yaka takî tî cekn̂e wooxam. Katî yarkacho tî n̂ekatîmyakn̂e yîwya. Ero ke on wara tî kekn̂e yîwya Taa, katî tak tîmta epethîrî pona. Apurantan yahsîche an̂epethîkathîrî tak epemakî. Puranta yakwenho tak nasî anahrî yepetho me hara, amrerî komo nahrî yepetho me marha, kekn̂e tî. Ero wa tî kekn̂e Erisew wooxam ya.

8 Ero yinhîrî takî tî on wara xakn̂e Erisew, Sunem pona tî cekn̂e. Iito tî xakn̂e wooxam tupurantayem. Ero yimaw on wara tî kekn̂e noro Erisew ya, Mîmokyasî cma re amna mîn yaka eseresmaxi, kekn̂e tî. Ero ke tî iina cekn̂e eseresmaxi. Ero yinhîrî emapona roro tî cekn̂e Erisew Sunem pona. Iina tîcetaw roro noro mîn yaka tî n̂eseresmekn̂e. Ero wa tî xakn̂e Erisew.

9 Ero yinhîrî takî tî on wara kekn̂e wooxam ciin̂o ya, On wara ween̂asî, kîhyari roro tmohsom, Kaanî mtapotarî yakrono ro me ween̂asî.

10 Ero ke noro yamtakponî cma re ciir̂asî kîmîn meretkoso. Wahrai cik mak wa ciir̂asî. Ero ciriche ero yaka cirpore nasî kama, karita yapon, aapo marha eremacho, weeyu, ero warai cma re ciir̂asî iina. Ero ke noro mokyataw roro kîhyaka iina n̂etakriya, kekn̂e tî. Ero wa tî kekn̂e wooxam ciin̂o ya.

11 Ero ke takî tî ero wara rma tî n̂iir̂atken̂e. Ero yinhîrî takî tî mokyakn̂e xa hara Erisew n̂examro yaka. Tmokuche tamtakpon yaka takî tî cekn̂e etakriso.

12 Ero yimaw takî tî on wara kekn̂e Erisew tanton ya, Xeasi ya, Aaci an̂ihko tantono, Sunem pono, kekn̂e tî. Ero ke tî mokyakn̂e wooxam Erisew yaka.

13 On wara tî kekn̂e Xeasi ya, On wara kasko yîwya, Kir̂wan̂he amna mîwakresî on ke amna yîwîntopo ke. Ero ke ahce ke tak kwakre ow hara. Anarimaw na kîmtapowa kayaritomo yakro, sowtatu yantoman̂e yakro katî. N̂examro twakrepore nasî, wîîke katî noro yipu ya apoko so? Pîra, kekn̂e tî wooxam. Cerepore rma wasî tan opoyino komo chew rma, kekn̂e tî.

14 Ero yinhîrî on wara tî kekn̂e Xeasi ya hara, Ahce wa xa noro wakre ow? kekn̂e tî. On wara tî kekn̂e Xeasi, On wara ween̂asî, yîmrerî exihra nasî. Iin̂o marha nasî poritomotho me okwe, kekn̂e tî.

15 Taa, noro an̂ihko hara, kekn̂e takî tî Erisew. Ero ke tî wooxam nan̂ikyakn̂e xa hara. Tmokuche metataw tî n̂ecececekn̂e.

16 On wara tî kekn̂e Erisew yîwya, Aaci, anarî cimn̂ipu po amrerî tak mosomcesî, on ponan po ha, kekn̂e tî. Pîra ro makî tko na apa, kekn̂e tî wooxam yîwya. Kaanî yakrono ro rma re amoro. Wara rma oyemîknopîra ro mak esko, kekn̂e tî. Ero wa tî kekn̂e wooxam Erisew ya.

17 Ero yinhîrî takî tî n̂etahsîyakn̂e rma wooxam. N̂ewruyakn̂e marha kîîrî ciki. Erisew mtapotachonho yaw roro rma tî n̂ewruyakn̂e ero yimaw xa.

18 Ero yinhîrî takî tî por̂mamyakn̂e ciki rikomo. Anarî kaamo po tko tî yîîm xakn̂e mararî po tînatîrî yenmekn̂e komo yakro. Ero yimaw tî yîhyaka cekn̂e rikomo.

19 On wara tî kekn̂e tîîm ya, Ohtîpîrî oko, ohtîpîrî oko, kekn̂e. Ero ke on wara tî kekn̂e yîîm tanton ya, Moso arko yîson yaka, kekn̂e tî.

20 Ero ke yîson yaka tî naar̂akn̂e. Noro takî tî nahsîyakn̂e cenaka kamarakataka cehso ro. Ero yimaw takî tî waihyakn̂e rikomo pen okwe.

21 Ero ke okoputhîrî takî tî naar̂akn̂e yîsonînhîrî Kaanî mtapotarî yakrono ro yamtakpon yaka. Noro yîwîntopo pona tî nîrapekn̂e. Ero yinhîrî metata tî nahruyakn̂e. Katpanaka takî tî cekn̂e.

22 Ero yinhîrî on wara tî kekn̂e ciin̂o ya, Ai, kar̂pamxan cma re men̂epesî ohyaka. Buhu marha n̂ekpe. Kaan yakrono ro yaka owto xe wasî yohno. Ero yinhîrî kmokyas hara, kekn̂e tî.

23 On wara tko tî kekn̂e iin̂o, Ahce kacho yîhyaka mîîce oroto? Nuun̂i yepatakacho mera ka nasî, sabatu mera marha ka nasî, kekn̂e tî. On wara makî tî n̂eyukyakn̂e yipici, Kir̂wan̂he rma nasî iina owtotopo, kekn̂e makî tî.

24 Ero yinhîrî buhu mkahsî tî nakriyakn̂e ceremacho. Ero pona takî tî n̂etakriyakn̂e. On wara tî kekn̂e tanton ya, Moso buhu arko esama yaw. Yamoro mak arîhra ro mak esko. Yamoro n̂he arko, wîîkes awya ka xe oyexitaw mak, kekn̂e tî tanton ya.

25 Ero ke tî cekn̂e wooxam Kaanî yakrono ro yaka. Kahmeru Yîpîn po tî xakn̂e. Mooxe rma tî wooxam n̂een̂akn̂e Kaan yakrono ro. Enîche on wara tî kekn̂e Xeasi ya, Mîkro wooxam Sunem pono.

26 Yîhyaka etoko kar̂pe. On wara kasko yîwya, Kir̂wan̂he mai? Kir̂wan̂he nai aan̂o? Kir̂wan̂he nai amrerî ciki, kasko yîwya, kekn̂e tî. Ero ke ero wara rma tî kekn̂e Xeasi yîwya. On wara makî tko tî wooxam n̂eyukyakn̂e, Kir̂wan̂he nas amna, kekn̂e makî tî Xeasi ya.

27 Îh po tî xakn̂e Kaanî yakrono ro. Ero ke tî yîhyaka xa cekn̂e wooxam. Yîhtarî poko tî nahsîyakn̂e. Mokyakn̂e tko tî Xeasî en̂epeso n̂he. On wara tko tî kekn̂e Kaanî yakrono ro, N̂expe. Ahwora ro mak nai ham okwe. Ehtopo tko enpora n̂eexi Kporin komo owya, ekatîmra n̂eexi owya, kekn̂e tî.

28 On wara tî kekn̂e wooxam yîwya, Apa, omrerî xe wasî, wîîkekn̂e ma re awya? Owî cma re emîknopîra masî, wîîkekn̂e makî cma re awya, kekn̂e tî yîwya.

29 Ero yentache on wara tî kekn̂e Erisew Xeasi ya, Aponon amomiko awtotome. On arko oyamoyin. Tooto yakro awesepor̂ataw yîmtapotarera esko. Amtapotaretaw esama yaw tîtosom eikura ro mak esko. On oyamoyin tak cirko rikomo yeepataka pona, kekn̂e tî. Ero wa tî kekn̂e Erisew Xeasi ya.

30 On wara tko tî kekn̂e wooxam, Kporin komo nasî waipînî ro me, kacho wara rma nasî omtapotarî tan, yaaro xa, anomra ro mak men wasî, kekn̂e tî. Ero ke wooxam yakro takî tî cekn̂e Erisew.

31 Yîywapu so tko tî cekn̂e Xeasi. Amoyi tî n̂iir̂akn̂e rikomo yeepataka. Yîmtapotara rma tko tî xakn̂e okwe. Ahce wa na kahra ro mak xakn̂e okwe. Ero ke Erisew yaka tî n̂etîramekn̂e hara Xeasi. Pakahra n̂ex okwe rikomo, kekn̂e tî yîwya.

32 Mîîmo yaka takî tî n̂ewomyakn̂e Erisew. Iito rma tî xakn̂e rikomo twaihso okwe kama po.

33 Ero ke tamtakpon yaka takî tî n̂ewomyakn̂e Erisew. Metata tî nahruyakn̂e. Iito makî tî xakn̂e noro rikomo yokoputho yakro. Kporin komo yakro takî tî nîmtapowakn̂e.

34 Tîmtapotache n̂etîrapekn̂e takî tî Erisew rikomo yokoputho pona xa. Tîmtarî tî n̂iir̂akn̂e rikomo mtarî pona. Cewru tî n̂iir̂akn̂e rikomo yewru pona hara. Tamorî tî n̂iir̂akn̂e rikomo yamorî pona. Rikomo yokoputho pona rma n̂etîrapekn̂e tuupe cewru. Ero yinhîrî ocoro n̂he takî tî n̂ehtîkekn̂e rikomo pun.

35 Ero yinhîrî nîhcekn̂e takî tî Erisew. Mîîmo yaw tî ka n̂etar̂akn̂e, miya, xiya wara. Ero yinhîrî takî tî n̂ewomyakn̂e xa hara amtakpo yaka. N̂etîrapekn̂e xa hara rikomo yokoputho pona. Ero yinhîrî nacinakn̂e takî tî rikomo 7 ro. N̂eewakn̂e takî tî rikomo ero yimaw.

36 Ero ke Xeasi takî tî nan̂ikyakn̂e Erisew, Moso yon an̂ihko, kekn̂e tî. Ero ke tî nan̂ikyakn̂e. On wara tî kekn̂e Erisew yîwya, Moso ha amrerî, anîmko ha, kekn̂e tî.

37 Enîche n̂esewnapekn̂e takî tî yîson Erisew mamaka. Ero yinhîrî nawomyakn̂e hara, tîmrerî takî tî nanîmyakn̂e. Katpanaka takî tî naar̂akn̂e. Ero wa tî xakn̂e wooxam, Sunem pono.

38 Ero yinhîrî takî tî on wara xakn̂e Erisew, Xiwkaw pona tî n̂etîramekn̂e hara. Ero yimaw tuuna tî mokuhra xakn̂e okwe. Ero ke atîhtara tî xakn̂e Ixaw Yana komo natîrî okwe. Iito exitaw Erisew kweronoman̂e npanatanmekrî komo tî xatken̂e yîhyaw ceremaxi. Ero yimaw on wara tî kekn̂e Erisew tanton ya, Ai, tahrem akriko wehto yepona porin ha. Ero yaka tîyoko erewsî, kweronoman̂e npanatamekrî komo nahrî, kekn̂e tî.

39 Ero ke anarî tî cekn̂e woskara pona mîn hak potuso ahce na yeperîrî ha. Iito takî tî yaatî n̂een̂akn̂e urutu warai, ceperkem. Ero ke eperîrî takî tî pohcakn̂e. Tponon makî tî naramekn̂e tînpotuthîrî yaatopo. Ero yaw takî tî naarakn̂e tîyotome tak. Nîknoyakn̂e marha tî tahrem yaka ero yawno cheka rma erewsî cheka. Ahce warai na tan, ketken̂e makî tî iitono komo yîn̂ekîthîrî poko.

40 Ero yinhîrî takî tî n̂etaketken̂e tînahrî komo me. Ahyataw tak yîwya so on wara tî ketken̂e Erisew ya, Ai, apa, Kaan yakrono ro amoro. Kmasmacho ken̂e nas okwe knahrî komo, ketken̂e tî. Ero ke apupra thakwa tî xatken̂e.

41 Ero ke on wara tî kekn̂e Erisew, Puruma ehcoko aposokaxapu, kekn̂e tî. Ekîche yînahrî komo cheka takî tî pahyakn̂e. Ero yinhîrî on wara tî kekn̂e Erisew, Taa, etakacoko xa hara anahrî komo me, kekn̂e. Ero ke nahyatken̂e takî tî. Masmacho ken̂ehra takî tî xakn̂e okre. Ero wa tî xakn̂e.

42 Ero yinhîrî takî tî iina mokyakn̂e Baaw Sarisa pono. Iyuru komo tî nîmyakn̂e Kaan yakrono ro ya. Sepata aixapu tî mîn n̂ekyakn̂e poturme epetaxapu poyino, 20 tî n̂ekyakn̂e aixapu. Sepata yeperîrî marha tî n̂ekyakn̂e akipîn, ero yimaw rma potuxapu. Ero yipu tî n̂ekyakn̂e Erisew yaka. Ero ke on wara tî kekn̂e Erisew yîwya, Taa, kir̂wan̂he nas owya an̂ekîthîrî okre. Moxam yuru me tak etakakî, kekn̂e tî.

43 Okyo, kekn̂e tî noro yanton. Ahce wa thakwa re on wicakno cik wetake 100 kîrkomo nahrî me? kekn̂e tî. On wara tî n̂eyukyakn̂e Erisew, Iyuru komo me rma etakakî. On wara kesî Kporin komo, Ero poi tokuche awya so akwenhîrî rma n̂etîmces amn̂e, kesî, kekn̂e tî Erisew.

44 Ero ke ero rma takî tî n̂etakekn̂e iyuru komo me. Ero poi tî nokyatken̂e. N̂etîmcekn̂e rma tî okyo, akwenhîrî rma xakn̂e. Ero wa tî xakn̂e Kporin komo mtapotachonho yaw roro. Ero wa tî xakn̂e.