Taa, ero yimaw tî meye xakn̂e Siria pono, Naaman tî osotî. Siriu komo kayaritomon maywen tî mîk xakn̂e, sowtatu yantoman̂e ro. Takîhso tî sowtatu komo naar̂akn̂e noro cetar̂maxmu me. Kporin komo rma tî ar̂mapono n̂iir̂akn̂e yîwya. Ero ke yaana me tî noro n̂een̂akn̂e kayaritomo sowtatu yaatopo poko. Kîk, kan̂e pîn marha tî mîk xakn̂e. Repra ken̂e tko tî xakn̂e okwe.

2 Ero yimaw on wara tî xatken̂e Siriu sowtatun komo, Ixaw Yana komo waparî me tî cetken̂e. Ixaw Yana pen komo tî nahsîyatken̂e. Emasî cik meero tî nahsîyatken̂e. Noro tî n̂ekyatken̂e Siriu komo cheka. Naaman pici yanton me takî tî xakn̂e.

3 Ero yinhîrî on wara tî kekn̂e emasî tantoman̂e ya, Ai yeme, Apapa yeper̂an yetow xe was okwe. Ero ke on wara wîhtînoyasî, kweronoman̂e komo nai meye, Samaria po. Yîhyaka cetaw, nakir̂wamesî tak noro repra ken̂ehra tak ehtome, kekn̂e tî yîwya.

4 Ero ke kayaritomo yaka takî tî cekn̂e Naaman. Emasî mtapotarî tî n̂ekatîmyakn̂e yîwya. On wara kekn̂e emasî, Ixaw Yana wosîn, kekn̂e tî.

5 Ero ke on wara tî kekn̂e kayaritomo yîwya. Taa, etoko tak iina. Okaritan warpesî awya Ixaw yana kayaritomon yakan, kekn̂e tî yîwya. Ero ke cekn̂e takî tî Naaman. Puranta tî naar̂akn̂e prata, 10 tarentu wicakî. Ooru marha tî naar̂akn̂e hara 70 kiru wicakî. Poono marha tî naar̂akn̂e 10 namruru yecenarî. Ero wa tî naar̂akn̂e.

6 Ixaw Yana kayaritomon yaka tî cekn̂e. Siriu komo kayaritomon karitan tî nîmyakn̂e yîwya. On wara kacho tî mîn xakn̂e karita, Ixaw Yana kayaritomon amoro, on wara wîîkes awya, yarî men omaywen wen̂epesî ahyaka akir̂wamachome awya, repra yawhra ehtome tak ha, kacho tî mîn xakn̂e karita.

7 Ero wa kacho yenîche Ixaw Yana kayaritomon ya, tponon takî tî nahxaikekn̂e ceserepokarî ke. On wara tî kekn̂e, Ahce wa noro nîîke hara kopi owya? Kaan ma ow yîwya kopi? Waihkano riche owya waihxa pen yenpakan̂e me ma re wai? Ahce kacho tmaywen n̂en̂epe ohyaka noro yakir̂wamachome owya repra ken̂arî kopi? Oyakno komo, yîmtapotarî ponaro men ehcoko. Cetar̂ma xe mak nai ham oyakro okwe, kekn̂e tî tmaywen komo ya.

8 Ero yinhîrî takî tî Ixaw Yana kayaritomon yeserepokacho tî n̂encekn̂e Erisew, Kaan yakrono ro. N̂eserepoke ro makî tî Ixaw Yana kayaritomon, tpononthîrî meero tî nahxaika, kacho tî n̂encekn̂e. Ero ke tîmtapotarî yekatîmn̂e tî n̂en̂epekn̂e kayaritomo yaka, On wara tî nîîke Erisew, kekn̂e tî, Ai apa, ahce kacho apononthîrî mahxaika? Ohyaka xa matko Naaman en̂epeko on wara kachome tak yîwya, kweronoman̂e komo xa nai ham Ixaw Yana komo chew, kachome, kekn̂e tî.

9 Ero ke cekn̂e takî tî Naaman Erisew yaka. Tîtararan yaw rma tî cekn̂e, kawaru narîrî yaw. Erisew mîn potaw makî tî n̂ecececekn̂e.

10 Tanton makî tî n̂en̂epekn̂e Erisew noro yenso. On wara tî kekn̂e yîwya, Etoko tî Xotaw yepu kwaka. Ero kwaw tî eyehko, 7 ro emicko yukwaka. Ero yinhîrî apun takî tî n̂etakir̂wame, kir̂wan̂he takî tî mai hara repra ken̂ehra ro mak, kekn̂e tî yîwya.

11 Ero wa kacho yentache tko tî nîrwonakn̂e Naaman, nîrwonakn̂e ro makî tî. Ero ke cekn̂e hara. On wara tî kekn̂e, On wara cma re wîîka, Oyenso na mokya. Omîtwo cexitaw Kporin komo tak na n̂etahca, ponaro cehtopo ha. Ero wa etahcataw pokupoku nîîke na opun wece, repra ken̂arî wece. Ero wa na oyakir̂wame, wîîka cma re.

12 Tamasku po xa nasî kirwan tuuna yepu. Abana yepu nasî iito kir̂wan tuuna, Parparu yepu marha. Ero warai kir̂wan exihra ro mak nasî tan Ixaw Yana komo rowon po. Ahce kacho Tamasku pono kwaka xa eyepîra wai oyetakir̂wamachome? kekn̂e tî. Ero wa tî kekn̂e Naaman. Ero wa kache n̂etaknamekn̂e mak tak tîtotome hara. Tîrwon̂e xa tî cekn̂e.

13 Ero yinhîrî yîhyaka tî mokyatken̂e maywen komo. On wara tî ketken̂e yîwya, Ai, apa, ahce wa meexirî ha re anarî me ketaw kweronoman̂e awya? Sowtatu komo arko meyeno komo waparî me, ketaw awya yîmtapotarî yewetîra meexirî ha re awya? Mewetîrî rma. Soroso xa cewetpore nai, Eyehta kir̂wan̂he tak awehtome, kacho ha, ketken̂e tî yîwya.

14 Ero ke cekn̂e takî tî Naaman Xotaw kwaka rma. Ero kwaka tî n̂emihcakn̂e 7 ro Kaanî yakrono ro mtapotachonho yaw roro. Ero wa emiciche kir̂wan̂he takî tî xakn̂e yupun rikomo pun wara rma hara okre. Repra ken̂ehra ro mak takî tî xakn̂e okre.

15 Ero ke takî tî Erisew yaka n̂etîramekn̂e hara. Tmaywen komo yakro rma tî cetken̂e. On wara tî kekn̂e yîwya, Ai apa, on wara tak wîîkesî yaaro xa, Kaan xa Mîk Ixaw Yana komo chewno. Roowo poko hakî exihra ro mak nas anarî. Ixaw Yana komo chewno mak nasî ponaro kehtopo ro xa, wîîkesî yaaro. Ero ke on ha awya tîmsom. Onîmrî cma re mahsîyasî, kekn̂e tî yîwya.

16 Pîra, ahsîra wasî, kekn̂e tî Erisew yîwya. Kporin komo nasî waipîn me, kacho wara rma nasî omtapotarî yaaro xa. Ahce na yahsîra ro mak wasî, kekn̂e tî Erisew. Ketîkekn̂e rma Naaman tînîmrî yahsîtopo poko. Ahsîra ro makî tko tî xakn̂e Erisew.

17 Ero ke on wara takî tî kekn̂e hara Naaman yîwya, Taa, ahsîra awexitaw on wara cma re wîîkes awya, roowo cma re mîmyas owya onarîrî. Asakî buhu narîrî wicakî yiixe wasî. Anarî ya tîmsom akn̂ipîra ro mak tak wasî. Kporin komo ya tîmsom mak tak wîmyasî. Yîwya tîmsom me mak wakn̂iyasî oyok pun.

18 On wara tko exi xe wasî Kporin komo opoko, kicicme nasî noro ka xera cma re wasî on wara oyehtopo yanme. Himon mîn yaka nîîce okayaritomon, Oporin amoro, kaxi. Iina tîcetaw oyaporî poko n̂ecececesî. Ero ke kutupenwasî thakwa Himon mamaka. Ero wara otupenwataw, Kicicme nasî noro okwe, ka xera wasî Kporin komo opoko, kekn̂e tî yîwya.

19 Taa, eserepokara rma esko ero poko, etoko mak ha, kekn̂e makî tî Erisew yîwya. Ero ke yîhyai takî tî cekn̂e.

20 Meyehra n̂he makî ka exitaw, kicicme xakn̂e Xeasi, Erisew yanton. On wara tî kekn̂e noro tîropotaw, Okyo, moso Siriu nîmrî yahsîra ro mak n̂eexi oyantoman̂e, Naaman nîmrî okyo. Kporin komo nasî waipînî ro me, yaaro, ero wa xa marha tan yaaro xa wîîkesî on wara. Ow xa noro yaka kîwcesî yînîmrî yahsîso, kekn̂e tî.

21 Ero ke Naaman yaka tî cekn̂e Xeasi. Mooxe rma tî n̂een̂akn̂e Naaman. Ero ke tarara yai tî nîhcekn̂e yîmtapotarî yentaxi. On wara tî kekn̂e yîwya, Kir̂wan̂he matu? kekn̂e tî.

22 Kir̂wan̂he amna nasî, kekn̂e tî Erisew yanton. Oyantoman̂e oyen̂epew ahyaka. On wara tî nîîke awya, Oroto xa mohcow weronomano rin̂e npanatanmekrî, asakî, kar̂pamxan komo. Mehxa mohcow îîpî chewnonho, Eprain yepamtho komo chewnonho ha. N̂examro pononî cma re mîmyas asakî, cewn̂e marha cma re mîmyasî prata 34 kiru wicakno ha, nîîke awya, kekn̂e tî yîwya.

23 Taa, kekn̂e tî Naaman yîwya. Asakî xa matko arko yîhyaka prata, 2 tarentu wicakno mko re. Ero ke 2 tarentu tî n̂enkayakn̂e prata kumixi yaka, asak hakno yaka. Poono marha tî nîmyakn̂e asakî. On aacoko moso yakro, kekn̂e tî tanton komo ya asak hakno ya rma. Ero ke yînmîthîrî tî naar̂atken̂e Xeasi ywapu.

24 Îh pona titoche so takî tî yînarîrî komo nahsîyakn̂e Xeasi yîhyai so. Taa, ero wa ham, etocoko hara, kekn̂e tî yîwya so. Ero ke cetken̂e hara. Naaman nîmîtho tko tî nakriyakn̂e tîmîn yaka. Ero wa tî xakn̂e Xeasi okwe.

25 Ero yinhîrî takî tî Erisew yaka cekn̂e hara. On wara tko tî kekn̂e Erisew yîwya, Ahna mîîtomo Xeasi? kekn̂e tî. Pîra, tohra ro mak weexi, kekn̂e tî.

26 On wara tî n̂eyukyakn̂e Erisew, Tohra ma re n̂eexi oyekatî awakro tarara yai tmokyataw Naaman amtapotarî yentachome? Kemyawno yahsîtopo me ma re nai awya oroto, poono, knatîrî marha oripera, uupa yatî marha, kooku marha oper̂a, paaka, kanton komo marha kîrkomo, wooxam komo, noro yipu yahsîtopo me ma re nai awya oroto?

27 Ero wa awexirî ke repra ken̂e tak masî amoro hara Naaman pokononho rma. Awepamrî komo marha naxe ero ken̂e miya roro etowîn me ro mak, kekn̂e tî. Ero yinhîrî Erisew yai takî tî cekn̂e Xeasi tumutwe ro mak tak yukwarî wara, repra ken̂e xa. Ero wa tî xakn̂e noro pen okwe.