Ero yinhîrî on wara tî ketken̂e kweronoman̂e npanatanmekrî komo Erisew ya, Ai, apa, tan amna nasî amîn yaw. Wahra tko nas amîn okwe. Yaake taxe mîîmo yopo.

2 Ero ke tîhcexe cma re Xotaw yecihtaka. Iito tak weewe amna namesî, amna naar̂asî marha cewn̂e so kîmîn komo ciitome hara, ketken̂e tî. Taa, etocoko, kekn̂e tî Erisew yîwya so.

3 Amoro cma re mîmokyasî amna yakro, ketken̂e tî yîwya. Taa, kmokya ham awakro so, kekn̂e tî yîwya so.

4 Ero ke cekn̂e takî tî Erisew n̂examro yakro. Xotaw yecihtaw exitaw so tî weewe nametken̂e.

5 On wara tî xakn̂e anarî, weewe yametaw, iyawakan tî n̂emoskekn̂e okwe. Yukwaka tî n̂epîrkekn̂e okwe, tokokmow. Ero ke on wara tî kekn̂e noro Erisew ya, Okwe apa, yukwaka n̂epîrka okwe oyawakantho. Owyanî ro pîn mîn n̂eexi okwe, oyemyaka tîmxapu mak mîn n̂eexi, kekn̂e tî.

6 On wara tî kekn̂e Kaan yakrono ro, Ahna xa n̂epîrka? kekn̂e tî. Ero ke epîrkachonhîrî tî n̂ekanîyakn̂e. Ero ke weewe tî nîhkocekn̂e Erisew kawno pîn. Ero rma takî tî nar̂mekn̂e iina epîrkachonhîrî na. Ero yar̂marî ke tî yawakatho nupurupurmamye, potow. Purupurpe takî tî xakn̂e okyo kuripara rma.

7 On wara tî kekn̂e Erisew yawakatho yar̂man̂enho ya, Ahsîko tak ha kekn̂e tî. Ero ke n̂etapoyankekn̂e ahsîtome takî. Ero wa tî xakn̂e.

8 Ero yinhîrî takî tî on wara xakn̂e Siriu komo kayaritomon, Ixaw Yana komo waparî me tîto xe tî xakn̂e okwe. Ero ke tmaywen komo yakro tî n̂esencekn̂e. On wara tî kekn̂e, Iina men oyetarî wirpesî waapa me kîwtoche so, kekn̂e tî.

9 Ero yimaw rma tî tîmtapotarî yekatîmn̂e n̂en̂epekn̂e Kaan yakrono ro Ixaw Yana kayaritomon yaka, On wara tî kekn̂e, Iina mokyaxe Siriu komo ewto pona awaparî komo me. Ero ke iituxari tohra men ehcoko, kekn̂e tî.

10 Ero ke takî tî iina tmaywen n̂en̂epekn̂e Ixaw Yana kayaritomon. Iina men mokyaxe Siriu komo awaparî komo me, kacho yentarî ke tî n̂en̂epekn̂e iitono komo yerasmachome. Ero yinhîrî, tmokuche so hara on wara tî ketken̂e toxapunhîrî komo, Yaaro, iito men naxe, ketken̂e tî. Ero ke twerî takî tî xakn̂e Ixaw Yana kayaritomon. Siriu komo mamrikyakn̂e mehxa mooxe. Yaake ro tî mamrikyakn̂e.

11 Ero wa tmamrikrî ke n̂eserepokekn̂e takî tî Siriu komo kayaritomon. Ero ke takî tî tmaywen komo nan̂ikyakn̂e. On wara tî kekn̂e yîwya so, Onoke xa Ixaw Yana kayaritomon ya n̂ekatîmya kica? Ahce kacho ekatîmra mat owya? Ixaw Yana komo yakronoman̂e me nasî noro, kahra mat owya ahce kacho? kekn̂e tî.

12 On wara tko tî kekn̂e anarî n̂examro poyino rma, Pîra apa, amna pîn noro weronomesî. Mînto xa nai Erisew, Ixaw Yana komo chew, weronomano rin̂e mîk Noro n̂ekatîmyasî tîkayaritomon ya amtapotachonhîrî rma. Awîntopo yaw amtapowataw ero meero n̂ekatîmyasî yîwya, kekn̂e tî.

13 Ero ke on wara tî kekn̂e Siriu komo kayaritomon, Ai ha. Taa, noro yerasmaxi etocoko iito nai ham, kachome tak owya. Ero wa ekatîmcoko noro yahsîn̂e komo yen̂epetome tak owya, kekn̂e tî. Ero yinhîrî on wara tî ketken̂e yîwya, Totan po tî nai, ketken̂e.

14 Ero ke sowtatu komo takî tî n̂en̂epekn̂e Siriu komo kayaritomon iina Erisew yahsîn̂e komo. Tarara yaw so tî n̂en̂epekn̂e, kawaru mkaw so marha tî. Mer̂pono pînî ro makî tî n̂en̂epekn̂e. Kosope tî mokyatken̂e Totan panaka. Ero yimaw tî ewto wamcetîketken̂e okwe. Ero wa tî xatken̂e Erisew yahsîso toxapu komo.

15 Enmapuche hara pahxaxa ro rma Kaanî yakrono ro yanton takî tî pakekn̂e. Mîîmo yai cepatakache waapa komo takî tî n̂een̂akn̂e mer̂pono pînî ro mak kopi. Ewto tî xakn̂e twamtotîkaxi ro. Tarara yaw so tî xatken̂e anarî komo, kawaru mkaw so tî xatken̂e anarî kom hara. Ero ke on wara tî kekn̂e anton Erisew ya, Apa, Ahce wa tatu kopi? kekn̂e tî yîwya.

16 Erasîra esko, kekn̂e tko tî Erisew yîwya. Mer̂pora ro mak nasî kukurunpen̂e komo tan n̂examro kurunpen̂e komo yopo ro mak, kekn̂e tî.

17 Ero wa kache Kporin komo yakro takî tî nîmtapowakn̂e hara Erisew. On wara tî kekn̂e yîwya, Apa kah yawno, Moso cma re mewtanîresî kir̂wan̂he entome tak, kekn̂e tî yîwya. Ero ke anton takî tî n̂ewtanîrekn̂e Kporin komo kir̂wan̂he entome tak yîwya. Tawronohkatîkaxi takî tî îîpî mko n̂een̂akn̂e tarara ke, kawaru ke marha. Wehto me cehsom tî mîk xakn̂e kawaru, tarara marha. Miya ro makî tî xatken̂e noro yipu komo Erisew twamtotîkaxi ro mak. Ero yipu tî n̂een̂akn̂e Erisew yanton.

18 Ero yinhîrî takî tî Erisew yahsîso mokyatken̂e sowtatu komo, Siriu komo. Ero yimaw takî tî Kporin komo yakro takî tî nîmtapowakn̂e xa hara Erisew. On wara tî kekn̂e yîwya, Apa, moxamu cma re mewkanoyasî enîhra tak ehtome so, kekn̂e tî yîwya. Ero ke ewkanono tî n̂iir̂akn̂e Kporin komo Erisew mtapotachonho yaw roro.

19 Ero yinhîrî takî tî on wara kekn̂e Erisew yîwya so, sowtatu komo ya, Awesamarî komo pîn on, anarî yaw ro mak mîmohcow. Noro yewton pîn marha on, Anarî pona mak mîmohcow okwe. Owenari xa amohcoko. Yîhyaka tak kaar̂axe so, an̂eporîrî komo yaka, kekn̂e tî. Ero yinhîrî takî tî Samaria pona naar̂akn̂e.

20 Taa, Samaria pona arîche Kporin komo yakro tî nîmtapowakn̂e xa hara Erisew. On wara tî kekn̂e, Apa, moxam takî cma re mewtanîres hara entome tak yîwya so, kekn̂e tî. Ero ke tî ewtanîreno n̂iir̂akn̂e hara Kporin komo kir̂wan̂he entome tak yîwya so. Samaria po tî xatken̂e okyo.

21 Sowtatu komo yenîche Ixaw Yana kayaritomon ya on wara tî kekn̂e Erisew ya, Ai apa, moxamu kr̂a waihke? Moxamu kr̂a waihke ha? kekn̂e tî.

22 Pîra, waihkara esko, kekn̂e tî Erisew yîwya, Anarimaw awaparî me mohxapu komo yakro awetar̂metaw so kacipara imo ke, waiwî ke anarî komo na mahsîyatu. Ero wa ahsîxapu komo mîwaike ma re awya? Pîra ro mak. Ero ke moxam tak yînahmakî, wokpakî marha tuuna ke. N̂eseresmacowpe rma kîhyaw so, wooku marha n̂eecowpe tîtotome so tak hara tîkayaritomon yaka hara, kekn̂e tî Erisew. Ero wa tî kekn̂e kayaritomo ya.

23 Ero ke erewsî tî n̂iir̂akn̂e kayaritomo Siriu sowtatun komo yerewusmacho. Mer̂pora ro makî tî n̂iir̂akn̂e. Ero ke eseresmache so takî tî n̂en̂epekn̂e hara kayaritomon komo yaka totohme so. Ero yinhîrî takî tî mokuhra xatken̂e Siriu sowtatun komo, tanmero so tmohsom komo. Ixaw Yana komo waparî me tak mokuhra. Ero wa tî xatken̂e.

24 Ero yinhîrî on wara tî xakn̂e Ben Atace, Siriu komo kayaritomon, tîsowtatun komo tî nan̂ikyakn̂e xa hara. Esenmekîche so Samaria pono komo waparî me takî tî cetken̂e xa hara okwe. Ewto tî wamcetken̂e ahnoro ro mak. Epatakara thakwa tî xatken̂e okwe ewto pono komo.

25 Pahkî ro makî tî ewto wamcetken̂e rooma poko ehtîkachome so tak iitono komo. Ero ke rooma poko xa thakwa tî xatken̂e iito. Ero ke buhu pen pîtho takî tî nahsîyatken̂e ero pono komo 80 sikru pona prata pona. Potkuku wetî marha tî nahsîyatken̂e cepethîke hara. 5 sikru tî xakn̂e ero yepetho, 0,3 ritru yepetho ha. Ero wa tî xatken̂e okwe.

26 Ero yimaw takî tî Ixaw Yana kayaritomon n̂etar̂akn̂e ewto wacan kanahtari. Ero wa etar̂ataw wooxam takî tî kekn̂e yîwya, Ai apa, kayaritomo amoro, ow akronomakî, kekn̂e tî. Kar̂pe tî kekn̂e yîwya.

27 On wara tî kayaritomo n̂eyukyakn̂e, Awakronomara exitaw Kporin komo ahce wa thakwa re kakronome ow hara? Anahrî ma re wîmya naatî yatho yîpîpîtîkacho pononho ha? Awokru ma re wîmya awya ewkukacho yawnonho ha? kekn̂e tî.

28 On wara tî kekn̂e hara kayaritomo wooxam ya, Ahce wa meexi? kekn̂e tî. On wara tî kekn̂e wooxam, On wara kai moso owya opoyino wooxam, Amrethîrî pen puntho tîyocerî oroto kotî komo me. Pahxaxa tak omretho puntho wîîyes hara kotî komo me, kekn̂e owya.

29 Ero ke omretho puntho amna nîîyoi totî me. Enmapuche tak wîîkai yîwya, Eeko tak amrethîrî hara kot kom hara, wîîkai. Tîmrerî mak tak n̂eyamye ohyai okwe, kekn̂e tî.

30 Ero wa kacho yentache kayaritomo ya tpononthîrî takî tî nahxaikekn̂e, xahrarara. Ero yinhîrî n̂etar̂akn̂e xa hara waaca kanahtari. Iitoxari tîtosom komo takî tî n̂een̂atken̂e kayaritomo ponon. Ahxaikaxapu yaw tî n̂een̂atken̂e kumixitho hara noro ponon me hara, amtarino me.

31 Ero yinhîrî on wara tî kekn̂e hara kayaritomo, Erisew penî kr̂a wîpîmkocesî oroto Sapace mumutho ha. Yîpîmkotora oyexitaw ow penî rma opîmkotope hara Kaan, miya xe ro mak owîrîmape, kekn̂e tî.

32 Tîmîn yaw rma tko tî xakn̂e Erisew ceremaxi. Ixaw Yana poritomon komo marha tî xatken̂e yîhyaw ceremaxi so. Ero yimaw takî tî tîmtapotarî yekatîmn̂e n̂en̂epekn̂e kayaritomo Erisew yaka. Esama yaw rma ka exitaw tko ekatîmn̂e on wara tî kekn̂e Erisew poritomo komo ya, Ai oyakno komo, tooto waihkan̂enho mumutho mîk kayaritomo. Oroto sowtatu komo n̂en̂epew noro opîmkoton̂e ha tî re. Encoko xe amn̂e. Noro mokyataw men metata ahrucoko ewomra ehtome. Noro wenatho yaw rma tak mokyasî antoman̂e hara. Mokrî rma wa wencesî, kekn̂e tî.

33 Ero wa ketaw rma kayaritomo n̂en̂epetho takî tî mokyakn̂e Erisew yaka. Ero yinhîrî tak kayaritomo marha mokyakn̂e. Tmokuche on wara tî kekn̂e kayaritomo, On wara kîwîrîmacho nasî Kporin komo yanme. Ahce kacho Noro ya kakronomacho ponaro rma wai ha ke? kekn̂e tî. Ero wa tî kekn̂e kayaritomo.