Ero yinhîrî on wara takî tî kekn̂e Erisew, Ai oyakno komo, Kporin komo mtapotarî entacoko. On wara kesî Noro kîwya so, Pahxaxa tak on wara exitaw kaamo 7 ritru puruma aposokaxapu naponukyaxe tantono komo 1 sikru pona so. Sepata marha naponukyaxe 14 ritru so 1 sikru pona so marha. Samaria wacan potaw rma ero wicakî epethîrî pona nahsîyaxe, kesî, kekn̂e tî. Ero wa tî kekn̂e Erisew.

2 Ero yimaw iito tî xakn̂e kapitaw, kayaritomo yaporî yecehton̂e. On wara tî kekn̂e noro Kaan yakrono ro ya, Okyo, kaapu yewkanapanî mko yahrunketaw rma Kporin komo ya ero wicakî so tahsîya ma re knahrî komo awya? kekn̂e tî. On wara tî Erisew n̂eyukyakn̂e, Ero wa anarî komo ya ahsîrî meen̂asî rma re. Ero yapupra ro makî tko mas amoro okwe, kekn̂e tî yîwya. Ero wa tî kekn̂e yîwya.

3 Taa, ero yimaw iito rma tî xatken̂e kîrkomo 4 mak ewto po. Ceremaxi tî xatken̂e ewto metatan mîtwo. Repra ken̂arî re tî mîkyam xatken̂e okwe. On wara tî ketken̂e n̂examro, Ahce kacho wa tan tatu ceremaxi kwaihtopo komo pona roro okwe?

4 Kaikatko ewto pona, ketaw kîwya so rooma poko mak naxe iitono komo. Tîtwaiyaxe thakwa mak iito okwe. Tanî rma keremetaw so hara tîtwaiyaxe marha. Ero ke Siriu sowtatun komo yaka kaikatko. Kwaihkara exitaw so n̂examro waipîra rma taxe okre. Kwaihketaw so reha tîtwaiyaxe thakwa makî, ketken̂e tî.

5 Ero ke awarpanwataw xa takî tî cetken̂e n̂examro Siriu komo yetarî yaka. Etarî komo panaka tîtoche so exihra ro makî tî xatken̂e Siriu komo iito.

6 On wara tko tî n̂iir̂akn̂e Kporin komo, Siriu sowtatun komo ya tî n̂entamexpekn̂e tarara pen mokrî wara, kawaru pen mokrî wara marha tî n̂entamexpekn̂e yîwya so, sowtatu pen mokrî wara marha, mer̂pono pîn mokrî wara n̂encetken̂e kopi. Ero ke on wara tî ketken̂e n̂examro, Entakî xe, Etew kayaritomon komo nan̂ikpoi ham kopi Ixaw Yana kayaritomon, Exipsiu kayaritomon komo marha nan̂ikpoi ham kopi. Kwaparî komo me men mokyaxe kopi, ketken̂e tî.

7 Ero ke awarpanwataw rma tî n̂emahciyatken̂e Siriu sowtatun komo ahnoro. Cemyawno komo yarîhra ro makî tî xatken̂e. Tîmînthîrî komo tî amomira ro makî tî cetken̂e, roona mko, iito marha tî nînomyatken̂e tookuthîrî komo kawaru komo, buhu komo ahnoro ro makî tî. Twaparî komo yeen̂atawno wara tî n̂emahciyatken̂e. Ero wa tî n̂emahciyatken̂e okyo.

8 Taa, n̂examro yemahciche takî tî repra ken̂arî komo tî cetken̂e Siriu komo yetatho yaka, potaka mak ha ka. Sowtatu mîntho yaka tî n̂ewomyatken̂e. Iito tî n̂eseresmetken̂e, wooku marha tî n̂eer̂atken̂e. Iitono marha tî naar̂atken̂e puranta, prata ciixapu, ooru ciixapu marha. Poono marha tî naar̂atken̂e. Ero mko yeyamso takî tî cetken̂e. Ero yinhîrî takî tî anarî yaka n̂ewomyatken̂e hara sowtatu mîntho yaka. Iitononhîrî yemyawnonho marha tî naar̂atken̂e eyamso xa hara.

9 Ero yinhîrî on wara tî ketken̂e, Kir̂wan̂he exihra taxe okwe. Kahwotacho komo me xa nasî oroto okre. Tîtken̂e mak taxe kica kpoyino komo ya ekatîmra ro mak okwe. Tîtken̂e rma kexitaw so cenmaxi ro kîwîrîmacho komo men kepor̂axe so okwe. Kaikatko ekatîmso kayaritomo yawno komo ya, ketken̂e tî.

10 Ero ke cetken̂e ewto metatan yenîn̂e komo yaka. On wara tî ketken̂e yîwya so, Ai, amna tomo Siriu komo yetarî yaka oroto. Exihra ro makî tko n̂ehcow iito kopi. Yîmtapotarî komo meero esentara n̂eexi kopi. Iyokuthîrî komo mak n̂ehcow iito cimiso so, kawaru, buhu kom ha. Iito marha n̂eexi yîmînthîrî komo roonatho, ciiso so rma, ketken̂e tî.

11 Ero wa kacho yentache tak, Ei, kekn̂e ewto metatan yenîn̂e komo yîmtapotarî komo yentachome kayaritomo mîn yawno komo ya.

12 Ero yipu yentache takî tî kayaritomo ya, nawomyakn̂e tak. On wara tî kekn̂e tmaywen komo ya, Ai, oyakno komo, on wara natu Siriu komo owya, kemîknopu xe so mak wa natu kica kromanîmrî ke so. Ero ke cetarî komo yai tocow moro na mak eseyamso woskara pona. On wara na ketu, Ixaw Yana komo yepatakache ewto poi tahsîyaxe kr̂a kar̂pe rma. Ewtonthîrî komo pona tak tîhcexe, ket ha na kica. Ero wa tko na ketu owya, kekn̂e ti kayaritomo.

13 On wara tko tî kekn̂e anarî, kayaritomo maywen hara, Apa, sowtatu komo cma re men̂epesî asakî mak. Kawaru marha cma re marpesî yîwya so 5 mak. Nai rma ciki re kookuthîrî poyinonho tan ewto po. Noro yipu komo ya cma re marpesî. N̂etwaikapetu rma na. Waihyatu mak na Ixaw Yana pen komo wara xa marha, etîmtoxaputho ciki wara rma natu. Ero ke men̂epesî cma re, kekn̂e tî. Ero wa tî ketken̂e kayaritomo maywen komo yîwya.

14 Ero ke tarara takî tî n̂een̂atken̂e asakî. Kawaru marha tî n̂een̂atken̂e ero yaan̂e. Tarara yaw so takî tî sowtatu komo n̂en̂epekn̂e kayaritomo Siriu komo yesamatho yaw. Siriu komo entatko, kekn̂e tî yîwya so.

15 Ero ke Siriu komo wenatho yaw tî cetken̂e Xotaw yepu kwaka roro. Esama porero tî n̂een̂atken̂e pononthîrî komo ar̂maxapu, yukurunthîrî komo marha okyo. Mer̂pora ro mak xakn̂e, tahruso tî xakn̂e esama ar̂maxapu ke. Kar̂pe xa tîtorî ke so tî ero yipu nar̂metken̂e Siriu komo. Ero ke tî n̂etîrametken̂e hara enîn̂enhîrî komo tîn̂enîthîrî komo yekatîmso kayaritomo ya.

16 Ero yinhîrî takî tî Ixaw Yana komo cetken̂e Siriu komo yemyawnonho wece. Ero yinhîrî 7 ritru so takî tî puruma aposokaxapu naponukyatken̂e 1 sikru pona rma. Sepata marha tî naponukyatken̂e 14 ritru 1 sikru pona xa marha. Ero wicakî epethîrî pona nahsîyatken̂e Kporin komo mtapotachonho yaw roro rma.

17 Ero yimaw takî tî tmaywen nantomekn̂e kayaritomo ewto metatawno komo yenîrî poko. Pahxa n̂he tî noro yaporî poko n̂etahsîyakn̂e kayaritomo, noro rma tî nantomekn̂e ero poko. Noro penî tko tî napikyatken̂e Ixaw Yana komo ewto wacan potaw rma okwe. Ero yanme tî noro pen waihyakn̂e okwe. Kaan yakrono ro kekn̂e kayaritomo ya tîhyaka mokuche, ero wa kachonho yaw roro rma tî xakn̂e noro pen okwe.

18 On wara tî kekn̂e Kaanî mtapotarî yekatîmn̂e ro ero yimaw kayaritomo ya, Pahxaxa on wara exitaw kaamo 7 ritru so tak puruma aposokaxapu nahsîyaxe tantono komo 1 sikru pona so. Sepata marha nahsiyaxe 14 ritru so 1 sikru pona xa marha. Ero wa nahsiyaxe amn̂e Samaria wacan metataw rma, kekn̂e tî.

19 On wara tko tî Kaanî mtapotarî yentan̂e ro mtapotarî n̂eyukyakn̂e kayaritomo maywen, Okyo, kaapu yewkanapanî mko yahrunketaw rma na Kporin komo ya ero wicakî so tahsiya ha ma re knahrî komo awya? kekn̂e tî. On wara tî n̂eyukyakn̂e Erisew, Ero wa tantono komo ya ahsîrî rma wa meen̂as amn̂e. Ero poi tko apupra ro mak mas amoro okwe, kekn̂e tî.

20 Ero wa kachonho yaw roro rma thakwa tî xakn̂e noro pen okwe. Noro pen tî napikyatken̂e Ixaw Yana komo mer̂pono pîn ewto wacan potaw. Ero ke waihyakn̂e thakwa tî okwe. Ero wa tî xakn̂e okwe.