Ero yinhîrî takî tî wooxam weronomekn̂e Erisew. Yîmrethîrî n̂enpakekn̂e waixapunhîrî noro rma tî weronomekn̂e. On wara tî kekn̂e yîwya, Ai aaci, on wara wîîkes awya, etocoko tak on poi awekenînhîrî komo poi. Ahnoro etocoko ahyawno komo meero. Ahtono pona ha na etocoko, anarî yana komo cheka mak etocoko. Iito ehcoko pahkî n̂he. Tuuna takî tî ekmexpora nai Kporin komo 7 cimn̂ipu cenatîso ro okwe. Rooma poko tî natu tantono komo okwe amn̂e, kekn̂e tî yîwya.

2 Ero ke takî tî cekn̂e wooxam, Kaanî yakrono ro mtapotachonho yanme rma. Tîhyawno komo marha tî naar̂akn̂e ahnoro. Piristew komo cheka tî n̂esekenmetken̂e 7 cimn̂ipu.

3 7 cimn̂ipu yenatîche takî tî mokyakn̂e hara noro Piristew komo chewnonho. Samaria pona tmokuche kayaritomo yakro tî nîmtapowakn̂e tîmînthîrî yahsîtopo poko hara, tîrowonthîrî yahsîtopo poko marha.

4 Ero yimaw rma tî kayaritomo nîmtapowakn̂e Xeasi yakro, Kaan yakrono ro yantonînho yakro. On wara tî kekn̂e yîwya, Ai, Xeasi, mekatîmyasî cma re owya Erisew yehtoponho ahnoro, cirihnî ciitoponho yîwya, kekn̂e tî yîwya.

5 Ero ke mîn hakî makî tî n̂ekatîmyakn̂e yîwya Erisew yehtoponho. Waixapunhîrî enpakano ritoponho meero tî n̂ekatîmyakn̂e yîwya. Ero wa ekatîmyataw rma tî wooxam mokyakn̂e kayaritomo yaka, yîmrethîrî pen n̂enpakekn̂e Erisew noro rma. Apa, kekn̂e tî wooxam kayaritomo ya, omîntho cma re mîmpesî hara owya, oyekenho ahnoro cma re mîmpes owya, kekn̂e tî. Ero wa ketaw on wara tî kekn̂e Xeasi kayaritomo ya, Apa, Noro rma moso, yîmrethîrî pen n̂enpakekn̂e Erisew noro rma moso, kekn̂e tî yîwya.

6 Ero ke wooxam ya takî tî kekn̂e kayaritomo, Ai, aaci, amrethîrî pen n̂enpakekn̂e ha ma Erisew waihxapunhîrî? kekn̂e tî. Nhnk, noro rma omretho pen n̂enpakekn̂e, kekn̂e tî. Ero ke tmaywen takî tî nantomekn̂e kayaritomo noro yakronomarî poko. On wara tî kekn̂e yîwya, Moso yekenho yîramanpoko hara yîwya, yîmînthîrî meero, emyawnonhîrî meero. Mararînthîrî po natîkwakn̂e naatî iyarînaw, ero yeperîtho yepetho tîmko yîwya puranta, kekn̂e tî yîwya. Ero wa tî kekn̂e kayaritomo wooxam yemyawnonho poko.

7 Ero yinhîrî takî tî Tamasku pona cekn̂e Erisew. Ero yimaw tî namotoyakn̂e Ben-Atace, Siriu komo kayaritomon. Ero ke on wara tî kekn̂e iitono komo yîwya, Ai apa, Kaan yentan̂e ro mokye oona ewto pona, kekn̂e tî yîwya.

8 Ero ke takî tî tmaywen nantomekn̂e kayaritomo, Asaew ha. On wara tî kekn̂e yîwya, Ai, Kaanî yakrono ro mtapotarî entata Kporin komo mtapotarî ha. Yîwya tîmsom arko awcetaw. On wara kasko yîwya, Ai, apa, on wara kesî kayaritomo awya, Kamotoyas okwe. Ahce wa tak wai amn̂e, kir̂wan̂he wai hara? Kwaihya katî eper̂a yanme? kesî kayaritomo, kasko yîwya, kekn̂e tî.

9 Ero ke Erisew yenso takî tî cekn̂e Asaew. Yîwya tîmsom tî naar̂akn̂e. Mer̂pono pînî ro makî tî naar̂akn̂e yîwya tîmsom, kir̂wanî mko. Mîn hakî tî naar̂akn̂e, Tamasku pono komo n̂iritho etpoyino pîn warai. 40 kameru tî nîmkawnomekn̂e ero yipu ke mer̂pora exirî ke. Ero takî tî naar̂akn̂e yîhyaka. Erisew yenîche on wara tî kekn̂e yîwya, Ai, apa, on wara tî nîîke amumuru Ben-Atace, Siriu kayaritomon, Kamotoyas okwe. Ahce wa tak na wai amn̂e, kir̂wan̂he na wai hara amn̂e? nîîke tî awya, kekn̂e tî.

10 On wara tî n̂eyukyakn̂e Erisew, On wara kata yîwya, Kir̂wan̂he tak mas hara, kata yîwya. On wara kacho tko n̂ekatmo hara owya Kporin komo, Waihyasî rma tko noro, kacho n̂ekatmo owya, kekn̂e tî yîwya.

11 Ero wa kache Asaew n̂entîkekn̂e Erisew pahkî ro mak. Ero ke nîhyapamyakn̂e takî tî Asaew pahkî cenîrî ke yîwya. Nîwracekn̂e takî tî Kaanî yakrono ro.

12 Ahce kacho mîwrace okwe apa? kekn̂e tî yîwya. On wara tî kekn̂e Erisew, Ixaw Yana pen komo yemetanmetopo ponaro wasî, awya emetanmetopo kom ha. N̂examro sowtatun mîn makn̂iyasî twacayemî mko. N̂examro poyino pen komo mîwaikesî kacipara imo ke kar̂pamxan pen komo. Yîmxîkîthîrî pen komo mar̂mesî kar̂pe toh pona waihkachome. Wooxam pen komo mîwethîkes oko, tarkem pen komo, kekn̂e tî yîwya.

13 On wara tko tî kekn̂e Asaew yîwya, Ahce wa ow meen̂a hara okwe? Xaparîtho wara katî ow meen̂a? Emetanmekno rin̂e me katî ow meen̂a kopi? kekn̂e tî yîwya. On wara tî kekn̂e Erisew yîwya, On wara nîîka Kporin komo owya, Siriu komo kayaritomon me tak mas amn̂e, nîîka owya, kekn̂e tî yîwya. Ero wa tî kekn̂e Erisew yîwya.

14 Ero yinhîrî takî tî cekn̂e hara Asaew tîkayaritomon yaka. On wara tî kekn̂e kayaritomo yîwya, Ahce wa nîîka Erisew awya? kekn̂e tî. Kir̂wan̂he nas hara amn̂e, kekn̂e owya apoko, kekn̂e tî.

15 Ero yinhîrî enmapuche tak hara takî tî poono nukpekn̂e Asaew tuuna kwaka, yahcono. Ero ke takî tî kayaritomo n̂ewyahruyakn̂e eserenatkachome. Ero yanme rma takî tî waihyakn̂e kayaritomo pen okwe. Yîhretawno me takî tî xakn̂e Asaew kayaritomo me hara. Ero wa tî xakn̂e.

16 Taa, on wara tî xakn̂e Xuta komo kayaritomon hara, Xeosapa tî ka xakn̂e n̂examro kayaritomon me. Ero yinhîrî yumumuthîrî takî tî xakn̂e n̂examro kayaritomon me hara. Xeoraw tî mîk xakn̂e noro yosotî. Ero wa tî kayaritomo me noro n̂iir̂atken̂e 5 cimn̂ipu mak exitaw kayaritomo me Xoraw yehtoponho. Akabe pen mumutho tî mîk xakn̂e Xeoraw, Ixaw Yana komo kayaritomon pen mumutho ha.

17 32 cimn̂ipu tî xakn̂e Xoraw yewrutoponho Xuta komo kayaritomon me ecir̂ataw. 8 cimn̂ipu tî xakn̂e kayaritomo me. Xerusaren tî xakn̂e noro yewton.

18 Ixaw Yana kayaritomon komo wara rma tî xakn̂e noro okwe. Akabe yepamtho komo wara rma tî xakn̂e kica. Ero wa tî xakn̂e Akabe pen yemsîtho exirî ke yipici me okwe. Noro poyero rma kicicme tî xakn̂e noro hara. Kicicme ro makî tî noro xakn̂e Kporin komo ya okwe.

19 Xuta komo tko waihkara rma tî xakn̂e Kporin komo Tapi pen ponaro cexirî ke. Ramha wara wiir̂asî awepamthîrî komo amn̂e kayaritomo me. Eroromero ero wa wiir̂asî, kekn̂e tî Tapi pen ya. Ero ke tî Xuta komo waihkara xakn̂e.

20 On wara tko tî xatken̂e Eton pono komo ero yimaw, Xeoraw yewetîn̂e me ka xatken̂e, nanwekyatken̂e takî tko ewetîn̂e me ehxapunhîrî. Tîkayaritomonî ro komo takî tî n̂iir̂atken̂e cewyaro.

21 Ero ke Xeoraw takî tî cekn̂e Sairi pona. Tîtararan naar̂akn̂e iina ahnoro Eton pono komo waparî me. Eton pono komo tko tî Xeoraw pen wamcetken̂e. Ero ke kosope takî tî Eton pono komo yakro n̂etar̂mekn̂e Xeoraw. Tîtararan yaan̂e komo yakro rma n̂etar̂metken̂e. Kir̂wantaka takî tî n̂epataketken̂e. Wara rma Xeoraw sowtatun komo tî n̂emahciyatken̂e mak okwe. Tîmîn komo yaka makî tî n̂etîrametken̂e hara.

22 Ero ke Xuta komo yewetîn̂e pîn me rma naxe Eton pono komo oroto. Ero yimaw rma Ribna pono komo marha tî n̂etanwekyatken̂e hara. Ero ke Xuta komo yewetîn̂e pîn me marha takî tî xatken̂e n̂examro hara. Ero wa tî xatken̂e.

23 Miya rma nai Xeoraw yehtoponho, ahce wa na ciino ritoponho yîwya. Ahnoro rma tko nai tmewreso karita yaw, Xuta Kayaritomon Komo Yehtoponho, kacho yaw.

24 Ero yinhîrî takî tî tporin pen komo yakro nîwînîkyakn̂e Xeoraw. Tapi pen Yewtontho pona tî okoputhîrî nahruyatken̂e tporin pen komo yokoputho yawxari. Ero yinhîrî takî tî Akasias xakn̂e kayaritomo me tîîm pen retawno me hara. Ero wa tî xakn̂e.

25 Taa, Xuta kayaritomonînho pen mumutho tî mîk xakn̂e Akasias, Xeoraw pen mumutho ha. Ero yimaw 12 cimn̂ipu tî xakn̂e kayaritomo me Xoraw yehtoponho, Ixaw Yana kayaritomon me ehtoponhîrî. Akabe pen mumutho tî mîk xakn̂e Xoraw, Ixaw Yana kayaritomon.

26 22 cimn̂ipu tî xakn̂e Akasias yewrutoponho kayaritomo me ecir̂ataw. Cewn̂e cimn̂ipu makî tî xakn̂e kayaritomo me. Xerusaren tî xakn̂e noro yewton. Ataria tî xakn̂e yîson yosotî, Onhi pen parînho tî mîk xakn̂e Ataria, Ixaw Yana kayaritomon pen parînho ha.

27 Kicicme tî xakn̂e Akasias Kporin komo ya okwe. Akabe pen yepamtho komo wara rma tî xakn̂e kica. Ero wa tî xakn̂e Akabe pen yepamtho komo woxin me cexirî ke.

28 Ero yinhîrî takî tî Xoraw yakro cekn̂e Akasias Asaew waparî me, Siriu komo kayaritomon waparî me. Akabe pen mumutho tî mîk xakn̂e Xoraw noro yakro tî cekn̂e. Hamoce-Xireace pona tî cetken̂e. Etar̂metaw so tak Xoraw pen tî paraxketken̂e Siriu komo cerewre.

29 Ero ke Xisirew pona takî tî cekn̂e hara Xoraw. Namotoyakn̂e tî iito Siriu komo nparaxkatho me cexirî ke. Iito exitaw Akasiasî takî tî mokyakn̂e Xisirew pona Xoraw yenso, tamotosom yenso. Xuta komo kayaritomon tî mîk xakn̂e. Noro yipu tî mîk mokyakn̂e.