Taa, on wara tî xakn̂e Erisew, kweronoman̂e komo npanatanmekrî takî tî nan̂ikyakn̂e cewn̂e mak. On wara tî kekn̂e yîwya, Ai okopuci, aponon amomiko kar̂pe awtotome. On arko katî, patiri yawno. Hamoce-Xireace pona arko.

2 Iito awexitaw tak Xeu eporko Xeosapa mumuru, Ninisi parî ha. Enîche tak yîhyaka ewomko. Noro tak arko akrono komo yai amtakpo yaka mîîmo yatumnawno yaka.

3 Iito takî on katî ke yîhkapeko, xoo kasko yîhtîpîrî pore. On wara kasko yîwya, On wara kesî Kporin komo awya, Ixaw Yana komo kayaritomon me kîhkapes oroto, kasko yîwya. Ero wa kache, metata tak ahrunkakî, emahciko tak kar̂pe. Ecmamra ro mak men esko, kekn̂e tî yîwya.

4 Ero ke cekn̂e takî tî kar̂pamxan, kweronoman̂e komo npanatanmekrî ha. Hamoce-Xireace pona tî cekn̂e.

5 Iina epataketaw iito xatken̂e sowtatu yantoman̂e komo ceremaxi. On wara tî kekn̂e noro Erisew nantomatho, Ai antomano rin̂e, nai tî on̂entamexporî awya, kekn̂e tî. Ai ha, kekn̂e tî Xeu, onoke ya xa mîîke, kekn̂e tî. Awya xa wîîkesî, antomano rin̂e ya ha, kekn̂e tî.

6 Ero ke tî nawomyakn̂e Xeu, mîîmo maxixinaka tî cekn̂e mohxapu yakro. Iito takî tî Xeu nîhkapekn̂e Erisew nantomatho, xoo, kekn̂e tî. On wara tî kekn̂e Xeu ya, On wara kesî Kporin komo awya, ponaro Ixaw Yana komo yehtopo, Kporin komo yanan komo kayaritomon me tak kîhkapesî oroto, Ixaw Yana komo kayaritomon me ha, kes awya.

7 Ero ke on wara men esko, kesî. Akabe pen yepamtho waihkakî, akayaritomonînhîrî pen yepamtho. Ero wa oyanton pen komo wepanîyasî aweronoman̂e pen kom ha. Ahnoro oyanton pen komo wepanîyasî Xesabew nwaihkapotho pen kom ha.

8 Waihyaxe ahnoro Akabe pen yepamtho kîîrî pen komo. Waihkatîkano wiir̂asî anto me cehsom pen komo, tanme ro cetapickaxmu pen komo marha.

9 Xeroboaw N̂ebace pen yepamtho komo waihketîkekn̂e. Baasa pen yepamtho komo marha waihketîkekn̂e, Aias mumutho pen yepamtho kom ha. Ero wa xa marha waihketîkes Akabe pen yepamtho kom hara.

10 Xesabew yokoputho tak non̂esî xapari Xisirew panaw rma. Noro pen yokoputho yahrun̂e exihra ro mak nas amn̂e, kesî. Ero wa kesî Kporin komo awya, kekn̂e tî yîwya Xeu ya. Ero wa kache metata tî nahrunkekn̂e, n̂emahciyakn̂e takî tî.

11 Ero yinhîrî takî tî Xeu cekn̂e tîkayaritomon maywen komo yaka hara. On wara tî kekn̂e anarî yîwya, Kir̂wan̂he mai? Ahce wa kaxi noro moko ahyaka tîmtawaimamsom kopi? kekn̂e tî. On wara tî n̂eyukyakn̂e Xeu, Noro rma wa meen̂axe, yîmtapotarî yentan̂e wara rma maxe hara, kekn̂e tî.

12 Cemaro, camkî rma nas amna, Ahce wa kyam na nîîka awya, ketken̂e tî yîwya. Yîmtapotachonhîrî ekatîmko ka amna ya, ketken̂e tî. Ero ke n̂ekatîmyakn̂e takî tî Xeu yîwya so, On wara nîîka owya, On wara kesî Kporin komo awya, Kîhkapew tak Ixaw Yana kayaritomon me, kes awya, nîîka owya, kekn̂e tî.

13 Ero wa kacho yentache tponon komo takî tî mohketken̂e Xeu yakrono komo. Ero ke rma tî noro yapon namuhcetken̂e awomtopo kanahtawno. Raatî takî tî n̂eceyatken̂e yaake. On wara tî ketken̂e, Kayaritomo me tak nasî Xeu, ketken̂e tî. Ero wa tî ketken̂e.

14 Ero yinhîrî takî tî on wara xakn̂e Xeu, Xeosapa mumuru, Ninisi parî ha, Xoraw waihkacho poko tî n̂esencekn̂e takrono komo yakro. On wara tî xakn̂e Xoraw, Hamoce-Xireace po tî ka xakn̂e. Ixaw Yana sowtatun komo ahnoro tî xatken̂e iito noro yakro. Asaew yakro tî n̂etar̂metken̂e Siriu komo kayaritomon yakro.

15 Iito cexitaw tko Xoraw pen tî paraxketken̂e oko siriu komo. Ero ke Xisirew pona tî cekn̂e Xoraw esehcemaposo. Ero yimaw on wara tî kekn̂e Xeu takrono komo ya, Owara rma yîhtînoyataw awya so tantono komo porohkacoko ekatîmso tohra ro mak ehtome so Xisirew pono komo yaka, kekn̂e tî. Ero wa tî kekn̂e Xeu takrono komo ya.

16 Ero yinhîrî takî tî tarara yaw cekn̂e Xeu Xisirew pona. Iito tî namotoyakn̂e Xoraw. Iito marha tî xakn̂e Akasias, Xuta yepamtho kayaritomon, Xoraw yenso mohxapu.

17 Ero yimaw kawno xakn̂e mîîmo iito Xisirew po. Ero yaw tî xakn̂e waapa yekaiporen̂e. Noro takî tî Xeu komo mokrî n̂een̂akn̂e. Ero ke on wara tî kekn̂e Xoraw ya, Apa, sowtatu komo ween̂asî xiya tmohsom komo. On wara tî kekn̂e Xoraw tmaywen komo ya, Kawaru mkawno en̂epeko yîhyaka so. On wara men kape yîwya so, Tawake mîmokyat ha? kape tmohsom komo ya, kekn̂e tî.

18 Ero ke takî tî kayaritomo maywen cekn̂e kawaru mkaw. On wara tî kekn̂e Xeu ya, On wara kesî kayaritomo awya, Tawake mîmokyatu? kesî, kekn̂e tî. On wara tko tî n̂eyukyakn̂e Xeu yîmtaka, Tawake kehtopo pokono ma re amoro. Omkai mak men amok ha, kekn̂e tî yîwya. Ero yinhîrî on wara tî kekn̂e waapa yekaiporen̂e Xoraw ya, Ai apa, tomo cma re amaywen yîhyaka so. Mokuhra tko nas hara okwe, kekn̂e tî.

19 Ero ke anarî takî tî n̂en̂epekn̂e hara Xoraw Xeu yaka. Yîhyaka tîtoche ero wa xa marha tî kekn̂e Xeu ya, On wara kesî kayaritomo awya, Tawake mîmokyat ha? kesî, kekn̂e tî. Ero wa xa marha tko tî n̂eyukyakn̂e Xeu yîmtaka, Tawake kehtopo pokono ma re amoro? Omkai mak men amok ha, kekn̂e tî yîwya.

20 Ero yinhîrî kekn̂e xa hara tî waapa yekaiporen̂e, Ai, apa, noro marha tomo yîhyaka so, mokuhra marha nas okwe. Poturme tmohsom ween̂asî Xeu wara, Ninisi parînho wara. Noro wara xa kawaru naar̂asî kar̂pe ro mak, kekn̂e tî.

21 Ero ke on wara tî kekn̂e Xoraw, Tarara poko kawaru yimiko owtotome tak yîhyaka ow hara, kekn̂e tî. Ero ke tarara yaw takî tî cekn̂e Xoraw rma, Ixaw Yana kayaritomon. Akasias marha tî cekn̂e noro yakro anarî yaw. Xeu yentaxi tî cetken̂e. Naboce pen mararîntho po tî n̂esepor̂atken̂e noro yakro, Xisirew pono pen mararîntho po.

22 Xeu yenîche tak Xoraw ya on wara tî kekn̂e yîwya, Tawake mîmokyatu Xeu? kekn̂e tî. On wara tko tî n̂eyukyakn̂e yîmtaka, Ahce wa ma re tawake tatu mer̂pora ro mak exitaw enporixaputho ponaro anocwan yehtopo, Xesabew yehtopo ha? Erem marha nasî yîhyaw mer̂pora ro mak. Ero ke ahce wa ma re tatu tawake? kekn̂e tî.

23 Ero ke tîtararan takî tî naknamekn̂e Xoraw cemahcitome. On wara tî kekn̂e Akasias ya, Waapa oyakno. Emahciko, kekn̂e tî yîwya.

24 Ero yimaw takî tî tîkrapan n̂ehsakn̂e Xeu. Miya xe xa tî n̂ehsakn̂e, n̂ekaricetîkekn̂e ro makî tî. Xoraw pen tî wekn̂e yîmkarakatakaw oko. N̂epatakekn̂e ro makî tî waiwî coro to xa. Ero ke n̂epîrkekn̂e thakwa tî Xoraw pen tarara yaka rma.

25 Ero ke on wara tî kekn̂e Xeu Bicka ya, tmaywen komo yantoman̂e ya, Noro yokoputho anîmko. Naboce pen mararîntho pona tak ar̂makî, Xisirew pononho pen mararîntho pona ha. Mencekn̂e rma, pahxa Akabe pen yakro kîwcetaw noro yîîm pen yakro Kporin komo mtapotarî cencetken̂e noro pokono.

26 On wara kekn̂e Kporin komo yîwya, Kokon̂oro Naboce pen kamxukutho ween̂e, yumumuthîrî pen komo kamxukutho marha. Ero ke noro pen kamxukutho poyero tak men kesepanîyasî apoko so tanî rma noro pen mararîntho po rma, kekn̂e Kporin komo yîwya, kekn̂e Xeu. Ero ke iina noro yokoputho ar̂makî Kporin komo mtapotachonho yaw roro rma, kekn̂e tî. Ero wa tî kekn̂e Xeu tmaywen komo yantoman̂e ya.

27 Taa, Xoraw pen worî yenîche tak Akasias ya, Xuta komo kayaritomon ya, noro marha tî n̂emahciyakn̂e. Naatî mîn yesamarî yaw tî cekn̂e. Wenari tko tî cekn̂e Xeu. On wara tî kekn̂e tmaywen komo ya, Noro marha kr̂a twocoko tarara yaka rma, kekn̂e tî. Ero ke noro pen marha tî wetken̂e Kuru yesamarî yawnukyataw ro, Ibreaw pahnoke. En̂exa rma tî woxapu cekn̂e rma Mexito pona. Iina takî tî waihyakn̂e.

28 Ero ke noro pen yokoputho takî tî naar̂atken̂e maywenînhîrî komo. Tarara yaw rma tî naar̂atken̂e Xerusaren pona. Iina takî tî okoputhîrî nahruyatken̂e tporin pen komo yawxari, Tapi pen Yewtontho pona. Iina tî nahruyatken̂e.

29 On wara tî xakn̂e Akasias pen, 11 cimn̂ipu exitaw Xoraw pen yehtoponho, Ixaw Yana kayaritomon me ehtoponhîrî, ero yimaw tî Akasias tak xakn̂e Xuta yepamtho komo kayaritomon me hara. Ero wa tî xakn̂e Akasias pen.

30 Ero yinhîrî Xisirew pona takî tî cekn̂e Xeu. Iito tî xakn̂e Xesabew. Xeu mohtopo tî n̂encekn̂e. Ero ke tî n̂ecpomekn̂e, tîhtîpîrî marha porokucekn̂e. Ero yinhîrî mîîmo yewkanapan yaro tak n̂een̂akn̂e.

31 Ero yinhîrî waaca yaka ewomyataw Xeu on wara tî kekn̂e Xesabew yîwya, Tawake mîmoko? Siniritho mak amoro ham akayaritomonînhîrî pen waihkan̂enho, kekn̂e tî yîwya.

32 Ero ke kahsî tî n̂een̂akn̂e Xeu ewkanapa wece. On wara tî kekn̂e iitono komo ya, Onoke nai iito oyewetîn̂e komo, onoke xa ha? kekn̂e tî. Ero yinhîrî 2 takî tî n̂een̂atken̂e ewnuku komo ewkanapa yaro, 3 ha na. Xeu wece tî n̂een̂atken̂e.

33 On wara tî kekn̂e yîwya so, Noro kr̂a ar̂macoko roowo pona, kekn̂e tî. Ero ke Xesabew pen takî tî nar̂metken̂e kai ro. Epîrketaw kamxukuthîrî tî n̂ecaramekn̂e mîîmo wacan pore, kawaru pore marha. Ero yinhîrî noro yokoputho petpore tî tarara naar̂akn̂e Xeu apihtome kr̂a kawaru ya.

34 Ero yinhîrî takî tî mîîmo yaka n̂ewomyakn̂e Xeu. Iito tî n̂eseresmekn̂e, wooku marha tî n̂eer̂akn̂e. Ero yinhîrî on wara tî kekn̂e tmaywen komo ya, Etoko noro pen yokoputho yenso. Kporin komo nîwîrîmatho mîk noro pen okwe. Okoputhîrî tko ahrucoko kayaritomo yemsîtho me exirî ke, kekn̂e tî.

35 Ero ke ahruso tî cetken̂e. Wahra makî tko tî yupunthîrî n̂een̂atken̂e. Yîhtîpîrî yocho tî n̂een̂atken̂e, yîhtathîrî, amoyeretarî, ero wa makî tî yupunthîrî n̂een̂atken̂e.

36 Ero ke mokyatken̂e hara Xeu ya ekatîmso. Ero wa ehtopo yentache on wara tî kekn̂e Xeu, Kporin komo mtapotarî yaw roro rma noro pen n̂ex ham. Ero wara rma tî kekn̂e Eriasî mtari, Cisbi pono mtari. On wara tî kekn̂e, Xisirew po rma tî Xesabew pen puntho non̂esî xapari.

37 Weeto wara ro mak nasî noro pen yokoputho mararî po Xisirew pono po, Naboce pen mararîntho po rma. Ahrura ro mak naxe okoputhîrî, Tanî nasî Xesabew yocho, kahra ro mak ehtome so taixa tîtosom komo amn̂e, kekn̂e yîmtari. Ero ke ero wara rma nai ham ahrura, kekn̂e tî. Ero wa tî kekn̂e Xeu.