Ero yinhîrî takî tî Kporin komo mîn ciitopo nîhtînoyakn̂e Saromaw, Noro yosotî yeken me ciisom. Kayaritomo mîn ciitopo marha tî nîhtînoyakn̂e tîmînî rma. Ero yipu ciri xe tî xakn̂e.

2 Ero ke kîrkomo takî tî n̂antomekn̂e Saromaw ahce na yenmetopo poko. 70,000 tî nantomekn̂e ero poko. Anarî komo tî nantomekn̂e toopu towrî poko hara, îh pono towrî poko. 80.000 tî nantomekn̂e ero poko. Anarî komo tî nantomekn̂e ero pokono komo yantomacho poko hara. 3.600 tî nantomekn̂e ero poko.

3 Ero yinhîrî takî tî tkaritan narpekn̂e Saromaw Iraw yakan. Ciru kayaritomon tî mîk xakn̂e Iraw. On wara kacho tî mîn mewrekn̂e Saromaw, Oyakno, on okaritan an̂enîrî. On wara cma re wîîkes awya, pahxa apapa pen mîwakrekn̂e. Setru yepu mekpekn̂e yîhyaka yîmîn me ciisom. Ero ke noro pen wara xa marha cma re ow mîwakres hara.

4 Oroto Kporin komo mîn ciri xe wasî, ponaro oyehtopo mîn. Ciriche owya wîmyasî yîwya yîmînî ro me. Kotoporem yakn̂itopo me tak nasî. Cuure warai mîn me marha nasî, Kaan mîn yaw roro cenposom ha. Oper̂a xîkîtho yakn̂itopo me marha nasî pahxaxaro tîmsom yakn̂itopo me, kokon̂i tîmsom yakn̂itopo me marha. Kepokaretopo po tîmsom yakn̂itopo me marha, nuun̂i yepatakacho po tîmsom yakn̂itopo me marha, Kporin komo Kaan poko amna yahwotacho yimaw tîmsom yakn̂itopo me marha. Ero warai yakn̂itopo poko Ixaw Yana komo nantomekn̂e Kporin komo. Ero ke ero yipu me cehsom wiir̂asî Noro mîn ha.

5 Porin wiir̂asî mîîmo, porin me exirî ke Kaan. Ponaro anarî komo yehtopo yopono ro mak Mîk Kaan, ponaro amna yehtopo.

6 On wara tko wîhtînoyasî Noro poko, onoke thakwa re yîmîn n̂iir̂a. Kaapu yopono ro mak Mîkî, kaapu yepoyino yopono meero Mîk ha, kaapu mko mkaino yopono marha. Ero ke ahce kacho owîtho ciki yîmîn ciri xe wai? wîîkesî. Wara rma yîwya tîmsom yakn̂itopo me mak yîmîn wiir̂asî.

7 Ero ke ahce na poko yaana komo cma re men̂epesî ohyaka tamocamkîno pîn. Yohno cma re noro yipu men̂epesî. Ahce na komo ciin̂e xe wasî takîhso ciin̂e xa, ooru ciin̂e, prata ciin̂e, bronse ciin̂e, pehu ciin̂e, poono ciin̂e, camnarexapu, yucurexapu, yîswarexapu, ero yipu ciin̂e ro xe wasî, poono ciin̂e. Takîhsom moku xe wasî poroku yenporitopo poko. Noro yipu cma re men̂epesî ohyaka. Naxe rma re tan Xuta komo chew, Xerusaren pono komo takîhsom kom ha ahce na ciitopo poko. Apapa pen nmen̂ekatho mîkyam. N̂examro yakro n̂etapicke an̂en̂epethîrî amn̂e.

8 Setru yepu marha cma re mekpesî ohyaka, siprexte yepu, santaru yepu, ero warai komo cma re mekpesî ohyaka Ribanu pononho. Takîhso xa awanton komo yehtopo wencesî sahsamacho poko. Oyanton komo marha wen̂epesî iina awanton komo yakro etapickachome so.

9 Mer̂pora ro mak tîsahsamapore nasî weewe. Porin wiir̂asî mîîmo. Kir̂wanî ro marha mîn wiir̂asî keserepokacho xa.

10 Awanton komo nahrî warpesî iina sahsaman̂e komo nahrî. Puruma warpesî akihxapu, 4.400 kiroritru wicakî. Sepata marha warpesî akihxapu ero wicakî xa marha. Wooku marha warpesî 440 kiroritru wicakî, katî marha warpes ero wicakî xa marha. Ero wa so yînahrî komo warpes iina, kacho tî mewrekn̂e Saromaw. Ero wara kacho tî mewrekn̂e Iraw yakan karita.

11 On wara takî tî n̂eyukyakn̂e Iraw, tkaritan takî tî mewrekn̂e noro hara Ciru pono komo kayaritomon. Saromaw yakan tî mewrekn̂e. On wara kacho tî mewrekn̂e, On okaritan ahyakan oyakno. On wara wîîkes awya, tîyanan komo xe xa nai ham Kporin komo. Ero ke awire n̂examro kayaritomon me, kacho tî mewrekn̂e.

12 On wara kacho marha tî mewrekn̂e Iraw, On wara wîîkesî Kporin komo poko, ponaro Ixaw Yana komo yehtopo poko, Kir̂wan̂he xa nai ham okre Noro. Kaapu yakîhton̂enho Mîk, roowo yakîhton̂enho marha, wîîkesî. Tapi pen ya nîmye ham takîhsom yumumuru ha. Tweeno me cehsom nîmye, yuhnari yîhtînon̂e me cehsom marha. Ero ke Kporin komo mîn miir̂a ham, kayaritomo mîn marha miir̂a amînî rma.

13 Ero ke tamocamkîno pîn tak wen̂epesî ahyaka, Iraw Abi osotî. Ahce na ciin̂e ro mîk takîhso ciin̂e.

14 Taan tribun wosîn mîk yîson xakn̂e. Ciru pononho mîk xakn̂e yîîmînhîrî pen ha. Ahce na mko ciin̂e mîkî, takîhso ciin̂e. Ooru ciin̂e, prata, bronse, pehu, toopu, weewe komo. Poono kahn̂e marha mîk, riinu kahn̂e marha, camnarexapu, yucurexapu, yîswarexapu, ero warai poono kahn̂e mîk ha. Ahce na porokru ciin̂e marha mîkî. Ahce wa na kache yîwya, On wara men cirko, kache, ero wara rma ciin̂e mîkî. Ahce na ciin̂e komo marha na natu ahyaw takîhso ciin̂e komo, aamonhîrî pen nmen̂ekatho kom ha. N̂examro n̂etapicket ham Iraw Abi yakro.

15 Ero ke oyanton komo nahrî mekpe ham, puruma, sepata, katî, wooku, metahce, ero yipu komo mekpe ham amna yaka.

16 Ero ke tak amna namesî weewe Ribanu pono yiixe awehtopo wicakî. Amache amna narpesî ahyaka tuuna imo kwaw. Etpoko amna n̂imiyasî. Ero yipu tak amna narpesî iina Xope nakwataka. En̂exa tak amoro marpes hara Xerusaren pona tak. Ero wa amna n̂iir̂asî, kacho tî mewrekn̂e Iraw Saromaw yakan.

17 Ero yinhîrî takî tî anarî yana komo nukuknomekn̂e Saromaw ahnoro, Ixaw Yana komo chewno komo. Pahxa n̂he tî yukuknomano n̂iir̂akn̂e Tapi pen, Saromaw yîîm pen. Ero wara xa marha takî tî yukuknomano n̂iir̂akn̂e Saromaw hara. 153.600 tî mîkyam xatken̂e Ixaw Yana komo chewno.

18 Noro yipu komo tî nantomekn̂e ahce na yenmekrî poko, 70.000 ha. Anarî komo tî nantomekn̂e toopu yenporirî poko hara, îh pono yenporiri poko ha. 80.000 tî nantomekn̂e ero yipu poko. 3.600 tî n̂iir̂akn̂e ero yipu pokono komo yantoman̂e me. Ero wa tî antomano n̂iir̂akn̂e Saromaw.