Ero yinhîrî takî tî Kporin komo mîn ciitopo takî tî n̂ihciyakn̂e Saromaw Xerusaren pona, Moria Yîpîn pona. Iito rma tî Kporin komo n̂esenpekn̂e Saromaw yîîm pen ya. Iito tî xakn̂e puruma yatho yîpîpîtîkachonho, Ohnan yeken po, Xebusew yeken po. Ero rma tî Tapi pen naiwekn̂e Kporin komo mîn yeken me. Ero ke iina tî Kporin komo mîn n̂iir̂akn̂e, n̂ihciyakn̂e mak ha ka.

2 4-nhîrî cimn̂ipu po n̂ihciyakn̂e. Ero wicakî cimn̂ipu tî xakn̂e kayaritomo me Saromaw yehtoponho. 2-înhîrî nuun̂i po n̂ihciyakn̂e, 2-înhîrî kaamo po. Ero po xa tî n̂ihciyakn̂e.

3 On wicakî tî ka n̂iir̂akn̂e mîîmo yapon, yuhnawno, 27 metru wicakî tî n̂iir̂akn̂e ehyatkawnon. 9 metru wicakî tî n̂iir̂akn̂e akwerî hara. Pahxan pen komo ya yukuknomacho wicakno tî mîn xakn̂e, metru, kacho.

4 Mîîmo potuhremacho marha tî n̂iir̂akn̂e wacamnî. 9 metru wicakî tî xakn̂e ehyatkawnon. Mîîmo yakwerî yecenarî rma tî n̂iir̂akn̂e. 9 metru marha tî ero kawnon n̂iir̂akn̂e hara. Mîîmo ciriche ero wacan nîratawnoncekn̂e ooru ke.

5 On wara tî n̂iir̂akn̂e mîîmo yamtakpon porin, siprexte sahsamaxapu ke tî nîratawnoncekn̂e. Ero ciriche ero rma takî tî nîratawnoncekn̂e xa hara ooru ke hara. Ooru ratari tî kuum yepu warai kuknon mewrekn̂e kanawa mici warai kuknon marha. Ero wara mîîmo wacan mewrekn̂e, wakîkrekn̂e makî.

6 Ooru ratari marha tî toopuci enporixapu mko n̂iir̂akn̂e. Nahsîsîknoyakn̂e cenpore xa ehtome. Pahpain pononho tî mîn xakn̂e ooru.

7 Mîîmo ahnoro tî nîratawnoncekn̂e ooru ke, makwanan, metata yecepu, wacan, metatan, ahnoro tî nîratawnoncekn̂e ooru ke. Kerubin warai tî wakîknoyakn̂e waaca poko porokru me.

8 Ero yinhîrî takî tî Kporin komo yekenî ro n̂iir̂akn̂e hara amtakpo. 9 metru wicakî tî xakn̂e ehyatkawnon, mîîmo yakwerî yecenarî rma. Ero wicakî xa marha tî xakn̂e amtakpo yakwerî hara 9 metru wicakî xa marha. Ero marha tî nîratawnoncekn̂e amtakpo ooru ke, 600 tarentu wicakno ke ha.

9 Ooru marha tî n̂iir̂akn̂e potupoture me. 0,6 kiru wicakî tî n̂iir̂akn̂e potupoture me. Amtakpo wacan perî marha tî nîratawnoncekn̂e ooru ke.

10 Kporin komo yekenî ro yaw tî kerubin warai n̂iir̂akn̂e asakî. Ero warai tî mîn n̂enpor̂akn̂e maria ke. Enporiche ero marha nîmkarinomekn̂e ooru ke.

11 9 metru wicakî tî xakn̂e kerubin yaporî esepotponari yukuknomaxapu. 2,3 metru wicakî ti xakn̂e anarî kawnon. Amtakpo wacan tî napeyakn̂e. Eeconhîrî marha tî xakn̂e 2,3 metru wicakî. Anarî kerubin yaporî tî napeyakn̂e esepotponari.

12 Ero wa xa marha tî xakn̂e anarî yaporî hara, eeco tî xakn̂e 2,3 wicakî ehyatkawnon. Amtakpo wacan tapeso ro tî xakn̂e. 2,3 wicakî marha tî xakn̂e eeconhîrî hara. Anarînhîrî yaporî tî esepotpona xa marha xakn̂e.

13 9 metru wicakî tî xakn̂e kerubin yaporî esepotponari yukuknomacho. Piiri tî xakn̂e kerubin Kaan yamatan wece cewru.

14 Ero yinhîrî poono kahyakn̂e Kaan yekenî ro yahrurî me. Riin̂u tî kahyakn̂e ero me, kir̂wan̂he ekposîxapu riin̂u. Ceske tî kahyakn̂e camnarexapu ke, yîswarexapu ke, yucurexapu ke marha, ero wara tî iitono yahruru kahyakn̂e. Kerubin kuknon marha tî kahyakn̂e yîratari.

15 Mapata imo marha tî n̂iir̂akn̂e asakî Kporin komo mîn potawno. 16 metru tî n̂iir̂akn̂e kawnon. Mapata meretîrî marha tî n̂iir̂akn̂e asakî. 2,3 metru wicakî so kawnon tî n̂iir̂akn̂e.

16 Kanawa mici warai ke marha tî mapata imo meretîrî porokucekn̂e. Kaan mîn yaw n̂iir̂akn̂e ero yipu xa marha n̂iir̂akn̂e hara. Orosî warai marha tî n̂iir̂akn̂e kanawa mici poko cimiso, 100 tî n̂iir̂akn̂e.

17 Ero yinhîrî mapata imo nanîmyakn̂e piiri asakno roro rma. Kaan mîn potaka rma n̂iir̂akn̂e, poowa n̂ixa anarî, kaari n̂ixa anarî hara. Ero mko marha nosohcekn̂e Saromaw. Kaari n̂ixan tî nosohcekn̂e Xakin me. Poowa n̂ixanî reha tî nosohcekn̂e Boas me. Ero wa tî mapata imo nosohcekn̂e.