Ero yinhîrî takî tî Kporin komo ya tîmsom yakn̂itopo nakîhcekn̂e hara Saromaw. Bronse ciixapu tî mîn xakn̂e. 9 metru wicakî tî xakn̂e ehyatkawnon. 9 metru wicakî xa marha tî xakn̂e akwerî hara. 4,5 metru kawnonke tî xakn̂e. Ero wa tî nakîhcekn̂e.

2 Ero yinhîrî takî tî tuuna yen nakîhcekn̂e hara porin. Tamnon̂e tî xakn̂e. 4,5 metru tî xakn̂e potarî yakwerî. 2,3 metru kawnonke tî xakn̂e. Porin me tî xakn̂e awrutarî kuknomacho 13,5 metru wicak ha.

3 Paaka kuknon takî tî mewrekn̂e tuuna yen poko porokru me. Petaporokutotopo tî mîn xakn̂e. 10 tî n̂iir̂akn̂e paaka warai meia metru wicakî so. Miya rma tî n̂iir̂akn̂e ero yipu mko tuuna yen tmamritîkaxi ro. Asakî yatî tî n̂iir̂akn̂e paaka warai, ekanataw re.

4 Paaka marha tî n̂iir̂akn̂e tuuna yen yapon me, 12 hara. 3 paaka warai tî n̂iir̂akn̂e nohce yaw roro cewru, 3 marha tî n̂iir̂akn̂e oesce yaw roro cewru, 3 marha tî n̂iir̂akn̂e suu yaw roro cewru, 3 marha tî n̂iir̂akn̂e resce yaw roro cewru. Ero wa so tî n̂iir̂akn̂e paaka warai. Ero yipu maxkokoro tî tuuna yen nakriyakn̂e. Paaka warai matkîrî tî xakn̂e tuuna yen yapomyaw. Yîhtîpîrî komo tî xakn̂e tuuna yen yai cewru.

5 Yahcome tî xakn̂e tuuna yen, 5 kamoyaran wicakî tî xakn̂e yahconon. Tahrem wara tî xakn̂e potarî, epemrutun wara. Mer̂pono pîn tuuna yen me tî xakn̂e, 66 kiroritru wicakno yen me ha.

6 Basia komo marha tî n̂iir̂akn̂e 10. Porin tuuna yen mîtkoso tî n̂iir̂akn̂e 5 kaari n̂ixa. Ero mîtkoso xa marha tî n̂iir̂akn̂e 5 xa marha poowa n̂ixa hara. Okno pun tî koroketken̂e ero yaka, takn̂isom ha. Porin tuuna yen tî xakn̂e Kporin komo ya tîmsom pokono komo yekorokacho me reha. Ero wa tî xakn̂e.

7 Ramha yecepu marha tî n̂iir̂akn̂e, 10. Ooru ciixapu tî mîn xakn̂e. On wara ciicoko, kacho yaw roro rma tî n̂iir̂akn̂e. Ero yinhîrî takî tî Kporin komo mîn yaka naar̂akn̂e. 5 tî n̂iir̂akn̂e kaari n̂ixan me, 5 marha tî n̂iir̂akn̂e poowa n̂ixan me hara. Ero wa tî ramha yecepu n̂iir̂akn̂e.

8 Aapo mko marha tî nakîhcekn̂e tîhrekem, 10. Ero yipu mko marha tî n̂iir̂akn̂e Kporin komo mîn yaka. 5 tî n̂iir̂akn̂e kaari n̂ixan me, 5 xa marha tî n̂iir̂akn̂e poowa n̂ixan me hara. Tutumu mko marha n̂iir̂akn̂e, ooru hara. 100 tî n̂iir̂akn̂e.

9 Kporin komo mîn roron marha tî wacancekn̂e asakî. Anarî tî wacancekn̂e Kporin komo ya tîmsom pokono komo wacan me. Anarî tî xakn̂e porin me n̂he. Yîhroron potarî yahruru marha tî nakîhcekn̂e metata mko, bronse ke yîmkarenomaxapu.

10 Tuuna yen takî tî n̂iir̂akn̂e hara porin. Kporin komo mîn mîtkoso tî n̂iir̂akn̂e resce n̂ixa, suu yaw roro n̂he ha tko. Iina tî n̂iir̂akn̂e.

11 Tahrem marha tî n̂iir̂akn̂e Iraw, caarapa komo, tutum komo. Ero warai komo tî n̂iir̂akn̂e. Ahnoro takî tî n̂iitîkekn̂e Kporin komo mîn yawno komo, Saromaw n̂enpekn̂e yukuknon yîwya ero wa xa tî n̂iir̂akn̂e.

12 On wara tî xakn̂e noro n̂iritho, wetahcasî ka, mapata imo asakî, ero meretîrî tutum warai. Meretîrî porokru kanawa mici warai. Ero warai ke tî mapata imo meretîrî porokucekn̂e.

13 Kanawa mici porokru marha tî n̂iir̂akn̂e kahri warai. Yaake tî n̂iir̂akn̂e, 400. Asakî yatî tî n̂iir̂akn̂e kahri warai. Ero warai ke tî mapata imo kanahtawno porokucekn̂e.

14 Tarara warai cik marha tî n̂iir̂akn̂e yaake. Ahce na mko korokacho marha n̂iir̂akn̂e yaake. Ero mko tak n̂iir̂akn̂e tarara warai pona.

15 Tuuna yen tî n̂iir̂akn̂e porin, cewn̂e mak. Paaka warai marha tî n̂iir̂akn̂e 12 yakenon. Tuuna yen yapon me tî n̂iir̂akn̂e paaka warai.

16 Tahrem marha tî n̂iir̂akn̂e, caarapa komo, parata warai komo, ahnoro ero yipu komo tî n̂iir̂akn̂e Iraw Abi, bronse ciixapu. Kir̂wan xa mîn xakn̂e bronse tpepeyurem okre. Saromaw yanme tî ero yipu n̂iir̂akn̂e Kporin komo mîn yawno mko, yîmîtwono mko marha.

17 Xotaw woskaran po tî ero yipu mko n̂iir̂akn̂e. Bronse tî nukuyakn̂e ewtarî yaka yukmamtome ciisom kuknon yaka. Ewto yotaw tî n̂iir̂akn̂e. Mehxa tî xakn̂e Sukoci, xehxa reha tî xakn̂e Sereta. Iito tî n̂iir̂akn̂e.

18 Mer̂pono pînî ro mak ero yipu n̂irpekn̂e Saromaw Iraw ya. Bronse yawsîn tî xakn̂e mer̂pora ro mak, yukuknomarî yopo ro mak.

19 Ero warai mko tî n̂irpekn̂e Saromaw Kporin komo mîn yawno mko. Kotoporem yakn̂itopo marha tî nakîhtopekn̂e ooru rma. Cuure warai yapon marha tî nakîhtopekn̂e Kaan mîn yaw cenposom yapon ha.

20 Ramha yecepu marha tî n̂irpekn̂e, ramha mko marha. Ecepu pona ciisom mîn xakn̂e ramha mko ha. Ooru ciixapu rma tî mînî xakn̂e. Kaan Karitan yaw roro rma takî tî Kporin komo weyuru n̂iir̂akn̂e Kaan yekenî ro mîtkoso. Mehxa tî xakn̂e Kporin komo mînî ro, xehxa tak xakn̂e ramha yecepu. En̂exa takî tî Kaan mîn yawno mko weipekn̂e.

21 Epemrutun warai ken̂e tî ramha yecepu n̂irpekn̂e, ramha marha tî n̂irpekn̂e, ramha potuhkototopo komo marha. Ooru ciixapu makî tî mîn xakn̂e, esmanî ro ooru ha.

22 Ero wa tî n̂irpekn̂e ramha potuhkototopo komo, tutum komo, wooku yanîmtopo komo, kotoporem yakn̂itopo komo. Ooru ciixapu makî tî mîn xakn̂e, esmanî ro ooru ha. Kporin komo mîn metatan marha tî n̂irpekn̂e, Kaan yekenî ro metatan marha, porin amtakpo metatan marha, ero yipu mko tî n̂irpekn̂e. Ooru ciixapu re tî mînî mko xakn̂e. Ero warai tî n̂irpekn̂e Saromaw.