Ero ke ciitîkaxî takî tî xakn̂e Saromaw n̂irpotho ahnoro, Kporin komo mîn, ero yawno komo marha. Kaan mîn yaka takî tî n̂ekpekn̂e Saromaw tîîm pen nîmîtho ahnoro, Kaan ya yînmîthîrî ha. Prata ciixapu mko, ooru ciixapu mko, ahce na ciixapu ahnoro tî n̂ekpekn̂e Kaan mîn yaka. Cepethîkem yamtakpon yaka tî n̂ekpekn̂e. Ero wa tî n̂ekpekn̂e.

2-3 Ero yinhîrî takî tî Ixaw Yana poritomon komo nan̂ikpekn̂e Saromaw, tribu yantoman̂e komo, tîyanan yenîn̂e ro komo, noro yipu komo tî nan̂ikpekn̂e Xerusaren pona. Kporin komo yamatan yekî xe tî xakn̂e Tapi pen Yewtontho pononho, Siaw pononho ha. Kaan mîn yaka tî ekî xe xakn̂e. Kporin komo mtapotachonho yen mîn xakn̂e Kporin komo yamatan. An̂ihxapu komo wero ro ekî xe tî xakn̂e. Ero ke mokyatken̂e Ixaw Yana komo, kîrkomo ahnoro. Kayaritomo yaka tî n̂esenmekyatken̂e tahwotacho yimaw, 7-nhîrî nuun̂i pono yimaw ha.

4 Ero ke mokyatken̂e Ixaw Yana poritomon komo ahnoro. Kporin komo yamatan takî tî nanîmyatken̂e Repita komo.

5 Kporin komo mîn yaka takî tî n̂ekyatken̂e. Kaan yakro cesentachonhîrî komo marha tî n̂ekyatken̂e roona warai. Ero yawnonho mko marha n̂ekyatken̂e ahnoro. Ero yipu mko tî n̂ekyatken̂e Kporin komo mîn yaka. Ero yipu tî n̂ekyatken̂e tîmsom pokono komo, Repita komo marha.

6 Ero yimaw Kaan yamatan mîtwo tî xakn̂e Saromaw, Ixaw Yana komo ahnoro tî xatken̂e noro yakro. Oper̂a pun tî nakn̂iyatken̂e, paaka pun marha. Mer̂pora ro makî tî tokuthîrî komo pen waihketken̂e takn̂isom me, yukuknomarî yopo ro mak.

7 Ero yinhîrî takî tî Kaan yamatan naar̂atken̂e tîmsom pokono komo. Mîîmo yatumnaka tî naar̂atken̂e, Kporin komo yekenî ro yaka. Kerubin warai yaporî makataka tî n̂iir̂atken̂e.

8 Kaan yamatan yeken yahrun̂e me tî xakn̂e kerubin yaporî. Yamata tî nahruyakn̂e, weewe marha nahruyakn̂e, yamata yaatopo. Ahnoro nahruyakn̂e Kaan yekenî ro yawno.

9 Aatopo mapirî rma tko mehxa n̂esenpekn̂e kotoporem yakn̂itopo yamtakpon yawno komo ya. Mîîmo mkaino komo ya tî esenpora xakn̂e. Iito rma nasî weewe yamata poko rma oroto, aatoponhîrî ha.

10 Yarîhra tî xakn̂e ha re Kaan yamatan. Toopu makî tî xakn̂e ero yaw, mewrexapu asakî. Moises n̂enkatho tî mîn xakn̂e, Orebe po exitaw so tî n̂enkayakn̂e. Ixaw Yana komo mokyataw Exitu poi ero yimaw tî nîmtapowakn̂e Kporin komo n̂examro yakro, Kakronomexe so oyewehcataw awya so, kacho poko. Ero yimaw enkaxapu tî mîn xakn̂e.

11 Ero yinhîrî Kaan mîn yai takî tî mokyatken̂e hara tîmsom pokono komo. Ahnoro rma tî xatken̂e cetakir̂wamaxi so ero yimaw anarmerpan pokono me ciixapu komo rma.

12 Ero yinhîrî takî tî Kaan ya tîmsom yakn̂itopo mîtwo tî n̂ecececetken̂e Repita komo, cewanomaxmu komo mak. Asape yepamtho tî mîkyam xatken̂e, Eman, Xetutun, n̂examro mumuru komo marha tî xatken̂e iito, akno komo marha, ero warai komo tî xatken̂e iito. Tîmsom yakn̂itopo mîtwo n̂ecececetken̂e resce n̂ixa. Riin̂u ke tponoi so tî xatken̂e, tumutwem ke ha. Car̂ar̂a kan̂e komo ke cemyarke tî xatken̂e anarî komo. Anarî komo tî pioraw warai nîyorketken̂e, ahpa komo marha tî. Iito marha tî xatken̂e tîmsom pokono komo 120. Tuu kacho tî n̂eceyatken̂e n̂examro hara.

13 Ero yimaw cewn̂an wara rma tî waano naar̂atken̂e raatî yecen̂e komo, cewanomaxmu komo marha. Kir̂wan̂he xa mai ham okre Apa, kacho tî naar̂atken̂e waano. Ero wa tî nahwowatken̂e Kporin komo poko. Raatî tî n̂eceyatken̂e kar̂pe, cerekcerek kan̂e marha tî nîyorketken̂e, pioraw warai marha tî. Kporin komo poko tî nahwowatken̂e. On wara tî ketken̂e, Kir̂wan̂he xa nai ham Kporin komo. Kîpînîn yaw so nasî miya roro kîpînînkan̂e pîn me ro mak, ketken̂e tî. Iito re tî n̂ewanometken̂e. Ero wara ketaw kaweresî ken̂e xa takî tî xakn̂e Kporin komo mîn.

14 Ero ke takî tî Kaan mîn yaw ececetora thakwa xatken̂e tîmsom pokono komo kaweresî ken̂e xa exirî ke. Kaan weyuru ken̂e marha tî xakn̂e Kaan mîn ahnoro. Ero wa tî xakn̂e.